Popera ga Yudíugü ga yaxõgüxü̃ca̱x ümatüxü̃ 13:9 - Tupanaarü Ore

⁹ Rü tama name i peyaxõgü i ngẽma ngu̱xẽẽtaegü i tama toma pexü̃ namaxã tangúexẽẽxü̃ i tama Tupanaarü ixĩgüxü̃. Rü nũxcüma nagu taxĩ ga yema mugü ga Moiché ümatüxü̃ ga tüxna nachu̱xuxü̃ nax ta̱xacü ixüxü̃ rü ta̱xacü ingṍxü̃. Natürü narümemae nixĩ nax Tupanaarü ngechaü̃maxã napaxü̃ i tórü maxü̃ nax tórü õwa iporaexü̃ca̱x

Popera ga Yudíugü ga yaxõgüxü̃ca̱x ümatüxü̃ 13:9 Referans Kwoze

Efesios 4:14

Rü taũtáma ñoma buxü̃gürüxü̃ tixĩgü i tórü õwa. Rü ngẽxguma ta̱xacürü to i ngu̱xẽẽtaexü̃ ixĩnüegu rü taxũtáma naga taxĩnüe nax tama ñoma buanecü ngextámare cuecürüxü̃ tüxü̃ yaxĩgüxẽẽxü̃ca̱x. Rü taxũtáma nawe tarüxĩ i ngẽma duü̃xü̃gü i norü doramaxã tüxü̃ womüxẽẽgüxü̃ rü norü ngu̱xẽẽtaemaxã tüxü̃ ítüexẽẽchaü̃xü̃.

Efesios 5:6

¡Rü ngẽxguma texé ta̱xacürü ngu̱xẽẽtae i taxuwama mexü̃maxã pexü̃ womüxẽxẽchaü̃gu rü taxṹ i naga pexĩnüexü̃! Erü ngẽma ngu̱xẽẽtae i taxuwama mexü̃gagu tá nixĩ ya Tupana poraãcü napoxcuexü̃ i ngẽma duü̃xü̃gü i tama naga ĩnüexü̃.

Romanos 14:6

Rü yíxema duü̃xẽ ya ta̱xacürü ngunexü̃ Tupanaca̱x íxüxüchixe, rü ngẽmaãcü tanaxü nax ngẽma ngunexü̃gu tórü Corixü̃ ticua̱xüü̃xü̃ca̱x. Rü yíxema guxü̃ i õna ngṍxe, rü ngẽmaãcü tanangõ̱x nax tórü Corixü̃ ticua̱xüü̃xü̃ca̱x, rü Tupanana moxẽ taxã naxca̱x i ngẽma tangṍxü̃. Rü yíxema tama guxü̃ i õna ngṍxe, rü ngẽmaãcü tanaxü nax tórü Corixü̃ ticua̱xüü̃xü̃ca̱x, rü tüma rü ta Tupanana moxẽ taxã naxca̱x i ngẽma tangṍxü̃.

Nüxíraxü̃xü̃ ga popera ga Cuáü̃ ümatüxü̃ 4:1

Pa Chauenexẽgü ya Pexü̃ Changechaü̃güxe, ¡Taxṹ i nüxü̃́ peyaxõgüxü̃ i guxü̃ma i ngẽma nügü ixugügüxü̃ nax Tupanaarü orearü uruü̃gü yixĩgüxü̃! Rü name nixĩ i penangugü i norü ore nax nüxü̃ pecuáxü̃ca̱x rü aixcüma Tupanaãxẽ yixĩxü̃ i nawa idexaxü̃, rüe̱xna tama. Erü guxü̃wama i ñoma i naanewa rü nangẽxma i muxü̃ma idorata̱a̱xgüxü̃ i nügü ixugüxü̃ nax Tupanaarü orearü uruü̃gü yixĩgüxü̃.

Ngechuchuarü ngúexü̃gü ga yamugüxü̃arü puracüchiga 20:30

Rü woo petanüwa tátama nangẽxmagü i nümaxü̃ i tá doramaremaxã nangúexẽẽxü̃ i ngẽma yaxõgüxü̃ nax nügüwe naxĩxẽẽãxü̃ca̱x.

Popera ga Yúda ümatüxü̃ 1:12

Rü ngẽxguma pema i yaxõgüxü̃ õnaca̱x pengutaque̱xegügu, rü ngẽma duü̃xü̃gü rü wüxi i ãnexüchi nixĩgü. Erü nataãẽgü, rü poraãcü nachibüe rü naxaxegü. Rü nügüguxicatama narüxĩnüe. Rü ngẽma duü̃xü̃gü rü taxuwama nime, rü ñoma caixanexü̃ i ngearü pucüã́xü̃ i buanecü ingexü̃rüxü̃ nixĩgü. Rü ñoma nanetügü i tama ixoxü̃ i ngẽxguma norü owa nanguxgurüxü̃ nixĩgü. Rü ñoma naigü i guxü̃ma i naxchúma̱xãmaxã nabe̱xgüxü̃ rü yuexüchixü̃rüxü̃ nixĩgü i ngẽma duü̃xü̃gü.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:20

Pa Timutéux, ¡mea naga naxĩnü i ngẽma ore i cumaxã nüxü̃ chixuxü̃! Rü tama name nax icurüxĩnüxü̃ i ñoma i naanecüã̱xarü dexagümare i taxuwama mexü̃. Rü tama name nax icurüxĩnüxü̃ i ngẽma ore i doramare ixĩxü̃ i duü̃xü̃gü nüxü̃ ixugügünetaxü̃ nax ore i nawa nüxü̃ icuáxü̃ yixĩxü̃.

Popera ga Yúda ümatüxü̃ 1:3

Pa Chauenexẽgü ya Pexü̃ Changechaü̃güxex, noxri rü poraãcü choxü̃́ nangúchaü̃ nax pexca̱x chanaxümatüxü̃ nachiga i ngẽma maxü̃ i taguma gúxü̃ i pema rü choma tüxü̃́ ngẽxmaxü̃. Natürü ñu̱xma rü chauãẽwa ínangu nax namexü̃ nax pexca̱x chanaxümatüxü̃ nax pexü̃ chaxucu̱xẽxü̃ca̱x rü ípenapoxü̃xü̃ca̱x i ngẽma ore i aixcüma ixĩxü̃ ga nũxcüma wüxicanatama Tupana norü duü̃xü̃güna ãxü̃.

2 Tesalonicenses 2:17

Rü ngẽmaca̱x tanaxwa̱xe nax nüma pexü̃ nangü̃xẽẽxü̃ nax guxü̃guma petaãẽgüxü̃ca̱x rü mexü̃ i oremaxã pidexagüxü̃ca̱x rü mexü̃ pexügüxü̃ca̱x.

Ore i mexü̃ ga Matéu ümatüxü̃ 24:24

Erü Cristunetagü rü Tupanaarü orearü uruü̃netagü tá ínangugü. Rü tá nanaxügü i muxü̃ma i cua̱xruü̃gü i taxü̃gü. Rü ngẽxguma nüxü̃́ natauxchagu, rü ngẽmamaxã tá tüxü̃ nawomüxẽẽgü rü woo ya yíxema duü̃xẽgü ya Tupana tüxü̃ dexe.

Ore i mexü̃ ga Matéu ümatüxü̃ 24:4

Rü yexguma ga Ngechuchu rü ñanagürü nüxü̃: —¡Pexũãẽgü nax taxúema pexü̃ womüxẽẽxü̃ca̱x!

Colosenses 2:4

Rü pemaxã nüxü̃ chixu i ngẽma, erü tama chanaxwa̱xe nax texé pexü̃ womüxẽẽgüxü̃ namaxã i ta̱xacürü ore i chixexü̃wa pexü̃ gagüxü̃.

2 Corintios 1:21

Rü Tupana nixĩ ya toxü̃ poraexẽẽcü rü pexü̃ poraexẽẽcü nax tama Cristuna ixĩgachixü̃ca̱x. Rü nümatama nixĩ ga nügüxü̃́ tüxü̃ nadexü̃ nax noxrü ixĩgüxü̃ca̱x.

1 Corintios 8:8

Rü yixema nüxü̃ tacua̱x nax tama ta̱xacürü namachi nax ingṍxü̃gagu yixĩxü̃ nax Tupanape̱xewa imexü̃ rüe̱xna ichixexü̃.

Romanos 14:17

Rü ngẽma Tupanape̱xewa nax imexü̃ca̱x rü tama ta̱xacürü õna nax ingṍxü̃ rüe̱xna ta̱xacürü axexü̃ nax ixaxüxü̃gagu nixĩ. Natürü Tupanape̱xewa nax imexü̃ca̱x rü tanaxwa̱xe i Naãxẽ ya Üünexü̃arü ngü̃xẽẽmaxã tayanguxẽxẽ i ngẽma Tupana naxwa̱xexü̃, rü yigü tangechaü̃gü, rü aixcüma tataãẽgü nape̱xewa ya Tupana.

Romanos 14:2

Rü nangẽxma i ñuxre i taenexẽgü i nagu rüxĩnüexü̃ nax namexü̃ nax guxü̃raü̃xü̃ i õna nangõ̱xgüxü̃. Natürü nangẽxma i togü i taenexẽgü i turaexü̃ i norü õwa i berdúragüxicatama nangõ̱xgüxü̃.

Ngechuchuarü ngúexü̃gü ga yamugüxü̃arü puracüchiga 20:32

Rü ñu̱xmax, Pa Chauenexẽgüx, rü Tupanana pexü̃ chamugü. Rü chanaxwa̱xe i naga pexĩnüe i norü ore i tüxü̃ nüxü̃ cua̱xẽẽxü̃ nax aixcüma poraãcü tüxü̃ nangechaü̃xü̃. Erü ngẽma norü ore tá pexü̃ naporaexẽxẽ nax tórü Corica̱x pemaxẽxü̃ca̱x rü pexü̃́ nangẽxmaxü̃ca̱x i pechica namaxã i guxü̃ma i duü̃xü̃gü ya Tupana dexü̃.

1 Corintios 6:13

Rü ngẽxgumarüxü̃ ta rü ñuxre i duü̃xü̃gü rü ñanagürügü: “Õna rü taxü̃neca̱x nixĩ, rü taxü̃ne rü õnaca̱x nixĩ”, ñanagürügü. Rü aixcüma ngẽmaãcü nixĩ, natürü ya Tupana rü tá inayanaxoxẽxẽ i guxü̃ma i ngẽma. Rü taxü̃ne rü tama nai i ngexü̃maxã namaxã nax ingẽãẽmarexü̃ca̱x nixĩ. Erü taxü̃nemaxã nixĩ i inaxüxü̃ i tórü Coriarü ngúchaü̃. Rü tórü Cori nixĩ ya taxü̃nearü yora.

Gálatas 6:1

Pa Chauenexẽgüx, ngẽxguma chi texéxü̃ peda̱u̱xgu nax ta̱xacürü chixexü̃gu tanguxü̃, rü pema nax Tupanaãxẽ ya Üünecü pewa ngẽxmaxü̃, rü name nixĩ i tüxü̃ pengechaü̃ãcüma tüxü̃ perüngü̃xẽxẽ nax itayarüwe̱xãchixü̃ca̱x. ¡Natürü pexuãẽgü i wüxichigü, nax pema rü ta tama ngẽma chixexü̃gu peyixü̃ca̱x!

Wiyaegü 112:8

Rü nüma ya yimá yatü rü taxuca̱xma norü uanügüxü̃ namuü̃. Rü nüxü̃ nacugüama erü Tupanagu nayaxõ.

Ore i mexü̃ ga Luca ümatüxü̃ 5:38

Rü ngẽmaca̱x tanaxwa̱xe nax yimá ngexwacaxü̃cü ya bínu rü ngexwaca̱xü̃xü̃ i naxchixü̃ i naxcha̱xmünaxca̱xgu yabacuchixü̃. Rü ngẽmaãcü rü taxuxü̃táma inayarütaxu.