Popera ga Yudíugü ga yaxõgüxü̃ca̱x ümatüxü̃ 13:18 - Tupanaarü Ore

¹⁸ Rü tanaxwa̱xe i toxca̱x peyumüxẽgü. Erü toõxẽwa nüxü̃ tacua̱x nax aixcüma mea tayanguxẽẽxü̃ i ngẽma puracü ya Tupana toxna ãxü̃ rü tanaxwa̱xe nax guxü̃guma ngẽmaãcü mea tanaxüxü̃.

Popera ga Yudíugü ga yaxõgüxü̃ca̱x ümatüxü̃ 13:18 Referans Kwoze

1 Tesalonicenses 5:25

Pa Chauenexẽgüx, ¡Toxca̱x peyumüxẽgü!

2 Tesalonicenses 3:1

Rü ñu̱xma Pa Chauenexẽgüx, rü chanaxwa̱xe nax toxca̱x peyumüxẽgüxü̃ nax paxa guxü̃wama nanguxü̃ca̱x i tórü Cori ya Ngechuchuarü ore, rü duü̃xü̃gü norü ngúchaü̃maxã nax nayauxgüxü̃ca̱x yema pema nax penayauxgüxü̃rüxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 1:5

Rü ngẽma ucu̱xẽ i cumaxã nüxü̃ chixuxü̃ rü nachiga nixĩ i ngẽma ngechaü̃ i wüxi ya maxü̃ne ya ngearü chixexü̃ã́xü̃wa ne ũxü̃, rü wüxi i ĩnü i mexü̃wa ne ũxü̃, rü wüxi i õ i aixcüma ixĩxü̃wa ne ũxü̃. Rü name nax ngẽma ngechaü̃maxã yigü ingechaxü̃güxü̃.

Colosenses 4:3

¡Rü toxca̱x rü ta peyumüxẽgü nax Tupana toxü̃́ natauxchaxẽxẽxü̃ca̱x nax nüxü̃ tixuxü̃ca̱x i norü ore, rü meama duü̃xü̃güca̱x tanango̱xẽxẽxü̃ca̱x i ngẽma ore ga noxri ẽxü̃guxü̃ i Cristuchiga! Rü ngẽma oreca̱x nixĩ i ñu̱xma ichapoxcuxü̃.

Romanos 15:30

Pa Chauenexẽgüx, tórü Cori ya Ngechuchu ya Cristuégagu, rü ngẽma ngechaü̃ i Tupanaãxẽ ya Üünecü tüxna ãxü̃égagu pexü̃ chaca̱a̱xü̃ nax Tupanana cha̱u̱xca̱x pecaxü̃ i perü yumüxẽwa. Rü ngẽmaãcü tá choxü̃ perüngü̃xẽxẽ nawa i ñaa puracü ya Tupana choxna ãxü̃.

Nüxíraxü̃xü̃ ga popera ga Pedru ümatüxü̃ 3:21

Rü ngẽma dexá rü wüxi i cua̱xruxü̃ nixĩ. Erü ngẽxguma ngẽma dexáwa íibaiegu, rü duü̃xü̃güxü̃ nüxü̃ tacua̱xẽxẽ nax Tupanaga taxĩnüexü̃ nax tüxü̃́ nangẽxmaxü̃ i maxü̃ i taguma gúxü̃. Rü tama taxü̃nearü düxétüwa nax imexü̃ca̱x nixĩ i íibaiexü̃, natürü ítabaie erü marü Tupanana naxca̱x taca nax tüxü̃́ iyanaxoxẽẽãxü̃ca̱x i tórü pecadugü rü Ngechuchu ya Cristu wena maxü̃xü̃gagu nape̱xewa imexü̃ca̱x rü mexü̃gu rüxĩnüexü̃ca̱x.

Nüxíraxü̃xü̃ ga popera ga Pedru ümatüxü̃ 3:16

Natürü name nixĩ i tama pegü picua̱xüü̃güãcüma penangãxü̃ rü tama pegügu perüxĩnüeãcüma nax ngẽma duü̃xü̃güarü yexera pixĩgüxü̃. Rü name nixĩ i mea pemaxẽ nax taxuca̱xma pexoegaãẽgüxü̃ca̱x. Rü ngẽxguma ngẽmaãcü pemaxẽgu rü tá naxãnẽxẽ i ngẽma duü̃xü̃gü i chixri pechiga idexagüxü̃ naxca̱x nax Cristuca̱x pemaxẽxü̃.

Nüxíraxü̃xü̃ ga popera ga Pedru ümatüxü̃ 2:12

Rü name nixĩ i mea pemaxẽ nape̱xewa i ngẽma duü̃xü̃gü i tama Tupanaxü̃ cua̱xgüxü̃. Rü woo ñu̱xma chixri pechiga yadexagügu, natürü tá nüxü̃ nadaugü i ngẽma mexü̃ i pexügüxü̃, rü tá Tupanaxü̃ nicua̱xüü̃gü i ngẽma ngunexü̃ i nagu Tupana guxãxü̃ma icagüxü̃gu.

1 Tesalonicenses 4:12

Rü ngẽxguma ngẽmaãcü pepuracüegu, rü ngẽma duü̃xü̃gü i tama yaxõgüxü̃ rü tá pexü̃ nangechaü̃gü, rü taxúeme̱xẽwa tá pengẽxmagü.

Ngechuchuarü ngúexü̃gü ga yamugüxü̃arü puracüchiga 24:16

Rü ngẽmaca̱x nixĩ i guxü̃guma mea chaugüna chadauxü̃ nax chauãẽwa mexü̃gu charüxĩnüxü̃ i Tupanape̱xewa rü duü̃xü̃güpe̱xewa.

Ngechuchuarü ngúexü̃gü ga yamugüxü̃arü puracüchiga 23:1

Rü Pauru meama nüxü̃ nadawenü ga yema Yudíugüarü ãẽ̱xgacügütücumü, rü ñanagürü nüxü̃: —Pa Chautanüxü̃x, chomatama nüxü̃ chacua̱x nax guxü̃guma mea chamaxü̃ ga Tupanape̱xewa ñu̱xmata ñoma i ngunexü̃wa nangu —ñanagürü.

Filipenses 4:8

Rü ñu̱xma Pa Chauenexẽgüx, rü name nixĩ i nagu perüxĩnüe i guxü̃ma i ngẽma ore i aixcüma ixĩxü̃, rü guxü̃ma i ngẽma nacüma i taxucürüwama texé chixri nachiga idexaxü̃. Rü name nixĩ i nagu perüxĩnüe i guxü̃ma i ngẽma ore i aixcüma mea iwéxü̃, rü guxü̃ma i ngẽma Tupanape̱xewa mexü̃, rü guxü̃ma i nacümagü i duü̃xü̃gü namaxã taãẽxü̃, rü guxü̃ma i ngẽma nacümagü i duü̃xü̃gü mea nachiga idexagüxü̃. Rü ngẽmaãcü name nixĩ i nagu perüxĩnüe i guxü̃ma i ngẽma nacümagü i mexü̃ nax nüxü̃ icua̱xüü̃güxü̃.

2 Corintios 1:12

Rü ngẽma toxü̃ taãẽxẽẽxü̃ nixĩ nax toõxẽwa nüxü̃ tacuáxü̃ nax ñoma i naanewa rü aixcüma Tupana naxwa̱xexü̃ãcüma mea tamaxẽxü̃. Rü pepe̱xewa nixĩ ga guxü̃arü yexera yemaacü mea tamaxẽxü̃. Natürü tocüma rü tama ñoma i naanecüã̱xarü cua̱xwa ne naxũ, erü Tupana ya toxü̃ ngechaü̃cü nixĩ ya nüxü̃́ tayaxõcü.

Romanos 13:13

Rü ngĩxã mexü̃ taxügü rü Tupana naxwa̱xexü̃ãcüma tamaxẽ. Rü tama namaxã taxãmücü i ngẽma duü̃xü̃gü i naxügüxü̃ i taxü̃ i petagü i nawa naxãũgatanüxü̃ rü nangãxexü̃. Rü tama taxünearü ngúchaü̃we tarüxĩ, rü tama to i chixexü̃ taxügü, rü bai nax yigü ichoxü̃gagüxü̃, rü bai i ixauxãchiwa̱xexü̃.

Romanos 12:17

Rü ngẽxguma texé chixexü̃ pexca̱x ínguxẽẽgu, ¡rü taxṹ i chixexü̃maxã pexütanüxü̃! Natürü name nixĩ i pegü peporaexẽxẽ nax mexü̃ pexügüxü̃ca̱x nape̱xewa i guxü̃ma i duü̃xü̃gü.