Popera ga Yudíugü ga yaxõgüxü̃ca̱x ümatüxü̃ 13:10 - Tupanaarü Ore

¹⁰ Rü yixema nax yaxõgüxü̃ tüxü̃́ nangẽxma ya Cristu ga tórü pecaduca̱x yucü. Natürü yema chacherdótegü i Tupanapatawa puracüexü̃ rü tama nüxna naxǘ nax nanayauxgüãxü̃ i ngẽma ngü̃xẽxẽ i Cristu tüxna ãxü̃.

Popera ga Yudíugü ga yaxõgüxü̃ca̱x ümatüxü̃ 13:10 Referans Kwoze

1 Corintios 10:20

Natürü pemaxã nüxü̃ chixu rü ngẽxguma ngẽma duü̃xü̃gü i tama Tupanaxü̃ cua̱xgüxü̃, norü tupananetachicüna̱xãgüca̱x nadaiãgu i ta̱xacürü naxü̃na, rü tama Tupanaca̱x nixĩ i nadaiaxü̃, natürü ngo̱xogüca̱x nixĩ i nadaiaxü̃. Rü tama chanaxwa̱xe i ngo̱xogütanüxü̃xü̃ pegü pixĩgüxẽxẽ.

1 Corintios 9:13

Pema nüxü̃ pecua̱x rü guxü̃ma i duü̃xü̃gü i Tupanapata ya taxü̃newa puracüexü̃, rü ngẽma õna ya yimá Tupanapata ya taxü̃newa ngẽxmaxü̃tama nangõ̱xgü. Rü ngẽma duü̃xü̃gü i Tupanapata ya taxü̃negu Tupanaca̱x naxü̃nagü daixü̃, rü nanade i ñuxre i ngẽma namachi norü ngõ̱xruxü̃.

Iraétanüxü̃arü muxchiga 7:5

—¡Rü nade ya yima carugü rü ngẽma wocagü rü Lebítanüxü̃na nana nax namaxã naxügüã̱xü̃ca̱x i ngẽma chopataarü puracü i wüxichigü üxü̃! —ñanagürü.

Popera ga Yudíugü ga yaxõgüxü̃ca̱x ümatüxü̃ 8:5

Natürü ngẽma ñoma i naanewa naxügüxü̃ i ngẽma chacherdótegü, rü naxca̱x nadauxü̃taegümare i ngẽma daxũguxü̃ i naanewa ngẽxmaxü̃. Rü meama nüxü̃ tacua̱x i ngẽma, yerü yexguma Moiché naxüxchaü̃gu ga Tupanapata, rü Tupana rü ñanagürü nüxü̃: “¡Dücax, mea nangugü i ngẽma cua̱xruxü̃ ga cuxü̃ chawéxü̃ ga ma̱xpǘne ga Chinaíwa! Rü chanaxwa̱xe i ngẽmaãcü cunaxüxü̃ ya yima chopata”, ñanagürü.