Popera ga Yudíugü ga yaxõgüxü̃ca̱x ümatüxü̃ 10:23 - Tupanaarü Ore

²³ Rü ñu̱xma nax ínangu̱xẽẽxü̃ i ngẽma maxü̃ i taguma gúxü̃ ya Tupana tamaxã ixunetaxü̃ rü tanaxwa̱xe i aixcüma Cristuaxü̃́ yaxõgüechaxü̃ rü taguma nüxü̃ rüxoexü̃. Yerü Tupana ga tamaxã ixunetacü nax tüxü̃ nangü̃xẽẽxü̃, rü aixcümaxü̃chi tá nayanguxẽxẽ ga yema tamaxã nüxü̃ yaxuxü̃.

Popera ga Yudíugü ga yaxõgüxü̃ca̱x ümatüxü̃ 10:23 Referans Kwoze

1 Tesalonicenses 5:24

Rü nüma ya Tupana ya pexü̃ decü rü tá nayanguxẽxẽ i guxü̃ma i ngẽma pemaxã nüxü̃ yaxuxü̃.

1 Corintios 1:9

Rü Tupana rü guxü̃guma nayanguxẽxẽ i norü uneta. Rü nüma nixĩ ga pexü̃ nadexü̃ nax wüxigu Nane ya tórü Cori ya Ngechuchu ya Cristumaxã pexãmücügüxü̃ca̱x.

2 Tesalonicenses 3:3

Rü nüma ya tórü Cori ya Ngechuchu rü aixcüma nayanguxẽxẽ i ngẽma tamaxã inaxunetaxü̃. Rü nüma tá pexü̃ naporaexẽxẽ rü pexna nadau nax tama chixexü̃gu peyixü̃ca̱x.

Popera ga Yudíugü ga yaxõgüxü̃ca̱x ümatüxü̃ 6:18

Rü nüxü̃ tacua̱x rü ngẽxguma ta̱xacüca̱x nügüégagu inaxunetagu ya Tupana, rü taxucürüwama tüxü̃ nawomüxẽxẽ rü nanaxüchicüü i ngẽma. Rü ñu̱xma i guxãma i yixema nax Tupanaarü ngü̃xẽẽca̱x idauxü̃ nax tüxü̃ ínapoxü̃xü̃ca̱x, rü tüxü̃́ nangẽxma i taxü̃ i taãxẽ, erü nüxü̃ tacua̱x rü aixcüma tá tanayaxu i ngẽma maxü̃ i taguma gúxü̃ i tamaxã inaxunetaxü̃.

Popera ga Yudíugü ga yaxõgüxü̃ca̱x ümatüxü̃ 3:6

Natürü nüma ya Ngechuchu rü Moichéarü yexera nixĩ erü Tupana Nanexü̃chi nixĩ. Rü nüma nixĩ i nüxna nadauxü̃ i guxü̃ma i ngẽma Tupanaarü duü̃xü̃gü ixĩgüxü̃. Rü yixema rü ta rü Tupanaarü duü̃xü̃gü tixĩgü ega aixcüma Ngechuchuaxü̃́ yaxõgügu rü taguma nüxü̃ rüxoegu. Rü Tupana nanaxwa̱xe nax guxü̃guma Ngechuchumaxã itaãẽgüxü̃ erü nüxü̃ tacua̱x nax wüxi i ngunexü̃ rü tá taxca̱x nataeguxü̃ nax wüxiwa namaxã ingexmagüxü̃ca̱x.

1 Corintios 10:13

Rü taguma pexca̱x ínangu i ta̱xacürü ngúchaü̃ i chixexü̃ i taxucürüwama duü̃xü̃ yáxna namaxã ĩnüxü̃. Rü name nixĩ i Tupanaaxü̃́ peyaxõ erü nüma rü taxũtáma nawa pexü̃ nawogü i ngúchaü̃gü i taxucürüwama yáxna namaxã pexĩnüexü̃. Natürü ngẽxguma tá ngúchaü̃gü i chixexü̃ pexca̱x ínguxgu, rü nüma rü tá pexü̃ ínapoxü̃ nax tama nagu peyixü̃ca̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 3:11

Rü paxa tá chataegu. Rü chanaxwa̱xe i ñu̱xma mea cumaxü̃xü̃rüxü̃ mea cumaxecha nax taxúema cuxna nanapuxü̃ca̱x i ngẽma curü ãmare.

Popera ga Chantiágu ümatüxü̃ 1:6

Natürü ngẽxguma naxca̱x ítacaxgu rü tanaxwa̱xe nax aixcüma tayaxõõcüma naxca̱x ítaca̱xaxü̃. Rü tama name i nagu tarüxĩnüxü̃ nax taxũtáma tanayaxuxü̃. Erü yíxema tama mea yaxṍxe, rü ñoma már arü yuape i buanecü guxü̃wama cuexü̃rüxü̃ tixĩ.

Popera ga Yudíugü ga yaxõgüxü̃ca̱x ümatüxü̃ 11:11

Rü nüma ga Abráü̃ rü woo marü nax nayaxü̃ rü naxma̱x ga Chára rü ta nax nayaxü̃ rü taguma naxãxacüxü̃, natürü ngĩxü̃́ nayexma ga wüxi ga nane, yerü nüma ga Abráü̃ rü nayaxõ nax Tupana tá aixcüma yanguxẽẽxü̃ ga yema norü uneta.

Popera ga Yudíugü ga yaxõgüxü̃ca̱x ümatüxü̃ 4:14

Ngechuchu ya Tupana Nane nixĩ i chacherdótegüarü ãẽ̱xgacü i daxũguxü̃ i naanewa ngucü nax ngéma Nanatüpe̱xewa tüxü̃ ínapoxü̃xü̃ca̱x. Rü ngẽmaca̱x tanaxwa̱xe i guxü̃guma nüxü̃́ tayaxõgü rü taguma nüxü̃ tarüxoe.

Popera ga Yudíugü ga yaxõgüxü̃ca̱x ümatüxü̃ 3:14

Rü ñu̱xma rü Cristumaxã tüxü̃́ nangẽxma i maxü̃ i taguma gúxü̃ ega yaxõgüechagu rü noxrirüü̃tama naga ixĩnüegu ñu̱xmatata nawa nangu nax nataeguxü̃ i nüma.

Wiyaegü 26:1

Pa Cori Pa Tupanax ¡choxü̃ nadau nax taxuxü̃ma i pecadu chaxüxü̃! Rü chorü maxü̃wa rü nataxuma i chixexü̃. Rü aixcüma cuxü̃́ chayaxõ, Pa Cori Pa Tupanax.

Auxexü̃chiga 3:23

Rü wüxichigü i ngunexü̃gu rü choxna nüxü̃ nacua̱xãchixẽxẽ nax aixcüma yangu̱xẽẽãxü̃ i ngẽma nüxü̃ yaxuxü̃.

2 Corintios 9:13

Rü nümagü i ngẽma taenexẽgü i Yudéaanewa ngẽxmagüxü̃ rü tá Tupanaxü̃ nicua̱xüü̃gü, erü ngẽma perü ãmaremaxã tá nüxü̃ penawe̱x nax aixcüma naga pexĩnüexü̃ i Cristuarü ore i mexü̃. Rü nümagü rü tá Tupanana moxẽ naxãgü naxca̱x i ngẽma perü ãmare i perü ngúchaü̃maxã nüxna pexãgüxü̃ rü guxü̃ma i ngẽma togü i yaxõgüxü̃na pexãgüxü̃.

Popera ga Yudíugü ga yaxõgüxü̃ca̱x ümatüxü̃ 3:1

Rü ñu̱xma Pa Chauenexẽgü ya Tupanape̱xewa Üünegüxe, rü pexü̃ nixĩ ya Tupana i nadexü̃ nax norü duü̃xü̃gü pixĩgüxü̃ca̱x. Rü ngẽmaca̱x name nixĩ i mea nagu perüxĩnüe ya Ngechuchu ya Cristu ya Tupana núma namucü. Rü nüma ya Ngechuchu nixĩ i tórü chogüruxü̃ i Tupanape̱xewa tüxü̃ ixüünexẽẽcü. Rü yimáaxü̃́ nixĩ i yaxõgüxü̃.