Gálatas 5:24 - Tupanaarü Ore

²⁴ Rü ngẽma aixcüma Ngechuchu ya Cristuarü duü̃xü̃gü ixĩgüxü̃, rü marü nüxü̃ narüxoe ga naxü̃nearü ngúchaü̃gü, rü guxü̃ma ga yema ngúchaü̃gü ga tama mexü̃.

Gálatas 5:24 Referans Kwoze

Romanos 6:6

Rü nüxü̃ tacua̱x rü yema tórü maxü̃ ga nũxcümaü̃xü̃ rü Cristumaxã wüxigu curuchagu nayu nax yexma yanaxoxü̃ca̱x ga yema tacüma ga chixexü̃. Rü ñu̱xma rü tama pecadutüü̃wa tangexmagü, rü ngẽmaca̱x marü tama naga taxĩnüe.

Romanos 13:14

Rü name i nacüma pexĩ i tórü Cori ya Ngechuchu ya Cristu. Rü tama name i naxca̱x pedau nax pexenearü ngúchaü̃gu pexĩxü̃.

Romanos 8:13

Erü ngẽxguma chi pexenearü ngúchaü̃ pexü̱xgu rü tá ipeyarütauxe. Natürü ngẽxguma Tupanaãxẽ ya Üünecüarü ngü̃xẽẽmaxã ipeyanaxoxẽẽgu i ngẽma pexenearü ngúchaü̃, rü aixcüma tá pexü̃́ nangẽxma i maxü̃ i taguma gúxü̃.

Romanos 8:9

Natürü i pemax, rü tama pexenearü ngúchaü̃gu pemaxẽ, erü Naãxẽ ya Üünecüarü ngúchaü̃gu nixĩ i pemaxẽxü̃ erü pewa namaxü̃ i Tupanaãxẽ ya Üünecü. Rü yíxema tama tüxü̃́ nangẽxmaxe i Cristuãxẽ rü tama Cristuarü duü̃xü̃ tixĩ.

Gálatas 6:14

Natürü i choma rü chaugü chicua̱xüxü̃ erü nüxü̃́ chayaxõ ya tórü Cori ya Ngechuchu ya Cristu ga curuchagu yucü. Rü ngẽmaca̱xicatama nixĩ i chaugü chicua̱xüüxü̃. Rü ñu̱xma nax Cristu ga curuchagu yucüaxü̃́ chayaxõxü̃, rü marü tama nagu charüxĩnü i ñoma i naane rü norü ngẽmaxü̃gü. Rü ngẽxgumarüxü̃ ta i ñoma i naane rü marü tama choxü̃ nacuáxchaü̃.

Nüxíraxü̃xü̃ ga popera ga Pedru ümatüxü̃ 2:11

Pa Chauenexẽgü ya Pexü̃ Changechaü̃güxe, ñu̱xma nax paxaãchimare ñoma i naanewa pengẽxmagüxü̃, rü ngẽmaca̱x pexü̃ chaca̱xaxü̃ nax nüxü̃ perüxoexü̃ca̱x i guxü̃ma i ngẽma ngúchaü̃gü i chixexü̃ i ñoma i naanecüã̱x nagu ĩxü̃. Erü ngẽma ngúchaü̃gü rü chixexü̃gu nanagu̱xẽẽchaü̃ i peãxẽ.

1 Corintios 3:23

Rü pema rü Cristuarü pixĩgü, rü Cristu rü Tupanaarü nixĩ.

2 Corintios 10:7

¡Mea penangugü i ngẽma nüxü̃ pedauxü̃! Rü ngẽxguma texé tügü cua̱xgu nax Cristuarü duü̃xü̃ tixĩxü̃, rü name nixĩ i nüxü̃ tacua̱x nax toma rü ta Cristuarü duü̃xü̃gü tixĩgüxü̃.

Gálatas 3:29

Rü ñu̱xma nax Cristuarü pixĩgüxü̃, rü ngẽmaca̱x nixĩ i aixcüma Abraáü̃taagü pixĩgü. Rü ngẽmaca̱x i pema rü tá ta penayaxu i guxü̃ma ga yema Abraáü̃maxã inaxunetaxü̃ ga Tupana.

1 Corintios 15:23

Natürü wüxichigü rü tá tümawa nangu nax wena tamaxü̃xü̃. Rü Cristu nixĩ ga nüxíra maxü̃cü. Rü ngẽxguma wena núma naxũxgu i nümax, rü ngẽxguma tá nixĩ i wena namaxẽxü̃ i norü duü̃xü̃gü.

Gálatas 5:20

Rü tupananetachicüna̱xãgüxü̃ nicua̱xüü̃gü, rü yuüca̱x nangúe, rü aigu narüxĩnüe, rü nachoxü̃gawa̱xegü, rü ta̱xacü ninuxü̃wa̱xegü, rü nanuxwa̱xegü, rü duü̃xü̃güxü̃ naxucu̱xẽgü nax tama wüxigu naxĩnüexü̃ca̱x. Rü nayatoye i duü̃xü̃gü, rü nügü nixüxchimüü̃gü.

1 Corintios 6:13

Rü ngẽxgumarüxü̃ ta rü ñuxre i duü̃xü̃gü rü ñanagürügü: “Õna rü taxü̃neca̱x nixĩ, rü taxü̃ne rü õnaca̱x nixĩ”, ñanagürügü. Rü aixcüma ngẽmaãcü nixĩ, natürü ya Tupana rü tá inayanaxoxẽxẽ i guxü̃ma i ngẽma. Rü taxü̃ne rü tama nai i ngexü̃maxã namaxã nax ingẽãẽmarexü̃ca̱x nixĩ. Erü taxü̃nemaxã nixĩ i inaxüxü̃ i tórü Coriarü ngúchaü̃. Rü tórü Cori nixĩ ya taxü̃nearü yora.

Gálatas 2:20

Rü choma rü wüxigu Cristumaxã curuchawa chipota. Rü ñu̱xma rü marü tama chaugümaxãtama ichacua̱x, natürü Cristu nixĩ ya chomaxã icuácü erü chowa namaxü̃. Rü ñu̱xma rü Tupana Nane ya Cristuaxü̃́ chayaxõõcüma nixĩ i chamaxü̃xü̃. Rü nüma nixĩ ga choxü̃ nangechaü̃xü̃, rü nügü inaxãxü̃ nax cha̱u̱xca̱x nayuxü̃ca̱x.

Gálatas 3:26

Rü ñu̱xma nax Ngechuchu ya Cristuaxü̃́ peyaxõgüxü̃, rü Tupanaxacügü pixĩgü i guxãma i pemax.

Gálatas 3:28

Rü ñu̱xma rü Tupanape̱xewa rü nüetama nixĩ ega woo Yudíugü pixĩgügu rü ẽ̱xna tama. Rü nüetama ega woo wüxi i coriarü duü̃xü̃gü pixĩgügu rü ẽ̱xna taxúearü duü̃xü̃gü pixĩgügu. Rü nüetama ega woo piyatügu rü ẽ̱xna pingexgu. Erü ñu̱xma nax Ngechuchu ya Cristuarü duü̃xü̃gü nax pixĩgüxü̃, rü wüxitama i duü̃xü̃ pixĩgü i guxãma i pemax.

Efesios 3:1

Rü ñu̱xma i choma i Pauru rü chapoxcu erü Ngechuchu ya Cristuarü puracü chaxü nax pexü̃ charüngü̃xẽẽxü̃ca̱x i pemax i tama Yudíugü nax pixĩgüxü̃.

Efesios 3:6

Rü ngẽma ĩnü ga noxri Tupanaxicatama nüxü̃ cuáxü̃ nixĩ nax ngẽma ore i mexü̃maxã Tupana nüxna uxü̃ i guxü̃ma i duü̃xü̃gü i tama Yudíugü ixĩgüxü̃ nax Ngechuchu ya Cristuaxü̃́ yaxõgüãxü̃ca̱x rü nayauxgüãxü̃ca̱x i maxü̃ i taguma gúxü̃. Rü ñu̱xma rü Cristugagu ngẽma duü̃xü̃gü i tama Yudíugü ixĩgüxü̃ rü Yudíugümaxã wüxitama i duü̃xü̃gü nixĩgü. Rü ngẽma tama Yudíugü ixĩgüxü̃ca̱x nixĩ i ngẽma Tupanaarü unetagü ga noxri Iraétanüxü̃maxã nüxü̃ yaxuxü̃.

Efesios 3:11

Rü Tupana rü yemaacü nanaxü, yerü woetama nũxcüma nagu narüxĩnü nax tórü Cori ya Ngechuchu ya Cristuwa tá yangu̱xẽẽãxü̃ ga yema norü ĩnü.

Colosenses 2:11

Rü ngẽma Yudíugü rü nügü ínawiecha̱xmüü̃pe̱xechiraü̃gu nax Tupanape̱xewa yamexü̃ca̱x. Natürü ñu̱xma nax Cristuaxü̃́ peyaxõgüxü̃ rü tama ngẽma wiecha̱xmüü̃pe̱xechiraü̃gagu nixĩ nax Tupanape̱xewa pimexü̃. Rü ñu̱xma rü nape̱xewa pime erü Cristu pexü̃ ínanguxü̃xẽxẽ nawa i pexenearü ngúchaü̃gü i chixexü̃.