Gálatas 4:8 - Tupanaarü Ore

⁸ Rü ü̃pa ga yexguma taxũta Tupanaxü̃ pecua̱xgu, rü perü tupananetagütüü̃wa peyexmagü rü nüxü̃ picua̱xüü̃gü ga yema tama aixcüma Tupana ixĩgüxü̃.

Gálatas 4:8 Referans Kwoze

1 Corintios 8:4

Rü ngẽma nax nangṍxü̃ i ngẽma namachi i tupananetachicüna̱xãgüca̱x daixü̃, rü meama nüxü̃ tacua̱x nax taxuwama namexü̃ i ngẽma tupananetachicüna̱xãgü, erü tama aixcüma Tupanaxü̃chi nixĩgü. Erü wüxixicatama nixĩ ya Tupana ixĩcü, rü nataxuma i to.

2 Tesalonicenses 1:8

Rü núma tá naxũ i nüma ya tórü Cori ya Ngechuchu nax napoxcueãxü̃ca̱x i ngẽma duü̃xü̃gü i tama Tupanaxü̃ cua̱xgüchaü̃xü̃ rü tama naga ĩnüexü̃ i ngẽma ore i mexü̃ i tórü Cori ya Ngechuchu ya Cristuchiga.

1 Tesalonicenses 4:5

Rü tama name i nagu pemaexü̃ i ngẽma naxü̃nearü ngúchaü̃gü i nagu namaxẽxü̃ i ngẽma duü̃xü̃gü i tama Tupanaxü̃ cua̱xgüxü̃.

1 Tesalonicenses 1:9

Yerü nümagütama ga yema duü̃xü̃gü rü marü nüxü̃ nixugügü nax mea toxü̃ peyauxgüxü̃ ga yexguma petanüwa taxĩxgu. Rü nüxü̃ nixugügü nax nüxü̃ perüxoexü̃ ga perü tupananetachicüna̱xãgü nax Tupanaxü̃chi ya maxü̃cü rü ixaixcümacüwe perüxĩxü̃ca̱x nax nüxü̃́ pepuracüexü̃ca̱x.

Nüxíraxü̃xü̃ ga popera ga Pedru ümatüxü̃ 4:3

Ü̃pa ga pemax, rü mucüma ga taunecü nagu pemaxẽ i ngẽma chixexü̃ i ñu̱xma ngẽma duü̃xü̃gü i tama Tupanaxü̃ cua̱xgüxü̃ nagu maxẽxü̃. Rü yexguma ga pema rü pecadugu pemaxẽ, rü penaxü ga pexenearü ngúchaü̃, rü õnagü ga taxü̃ pexügü, rü petagü ga nawa pexãũgatanüxü̃ pexügü, rü pengãxẽ, rü tupananetachicüna̱xãgüxü̃ picua̱xüü̃gü.

1 Corintios 1:21

Natürü nüma ya Tupana ya guxü̃xü̃ma cuácü, rü tama nanaxwa̱xe nax ñoma i naanecüã̱x i duü̃xü̃güarü cua̱xgagu nax yixĩxü̃ i naxü̃tawa nangugüxü̃ i nümagü. Natürü nanaxwa̱xe nax ngẽma norü ore i mexü̃gagu nax yixĩxü̃ inamaxẽxẽẽãxü̃ i ngẽma duü̃xü̃gü i yaxõgüxü̃ woo ngẽma togü i duü̃xü̃güca̱x rü natüca̱xmamare yixĩxgu i ngẽma ore.

Norü taxre ga to ga popera ga ãẽ̱xgacügüchiga ümatüxü̃ 13:9

¿Rü tama ẽ̱xna aixcüma yixĩxü̃ nax pema rü ípenawoxü̃xü̃ ga yema Cori ya Tupanaarü chacherdótegü ga Aróü̃taagü, rü yema Lebítanüxü̃ nax pema rü penamucuxü̃ca̱x ga perütama chacherdótegü ngẽma togü ga nachixü̃anegü i tama Tupanaxü̃ cuáxü̃ naxügüxü̃rüxü̃? Rü ngẽmaca̱x i ñu̱xma i pema rü chacherdóteca̱x tüxü̃ pexuneta ya ngexerüxüxemare ya duü̃xẽ ya nua nagaxe i wüxi i wocaxacü rü 7 i carnérugü nax ãmare naxca̱x tiguxü̃ca̱x i ngẽma tupananetagü i tama aixcüma Tupana ixĩgüxü̃.

Efesios 4:18

Erü Chataná rü nanatoãẽgü i ngẽma duü̃xü̃gü nax chixexü̃gu naxĩnüexü̃ca̱x. Rü ngẽmaca̱x nüxü̃́ nataxuma i maxü̃ i taguma gúxü̃ i Tupanawa ne ũxü̃, erü tama nüxü̃ nacua̱xgüchaü̃.

1 Corintios 12:2

Rü pema meama nüxü̃ pecua̱x ga yexguma tauta Cristuaxü̃́ peyaxõgügu, rü pegü nüxna pexãgü ga tupananetachicüna̱xãgü ga tama idexaxü̃.

Yeremía 10:25

¡Ẽcü curü numaxã napoxcue i ngẽma duü̃xü̃gü i tama cuxü̃ cua̱xgüchaü̃xü̃ rü tama cuxü̃́ yaxõgüxü̃! Erü ngẽmagü nixĩ i Acóbutanüxü̃xü̃ daixü̃ rü noxtacüma iyanaxoxẽẽgüaxü̃. Rü ngẽmagü nixĩ i nachitaxü̃xica ngéma yaxǘgüxü̃ i ngẽma nachixü̃ane —ñanagürü.

Yochué 24:15

Natürü ngẽxguma tama Cori ya Tupanawe perüxĩxchaü̃gu ¡rü ñu̱xmatama nüxü̃ pixu i ta̱xacürü tupanawe tá perüxĩxü̃, rüe̱xna ngẽma tupananetagü ga nũxcüma ga perü o̱xigü nüxü̃ icua̱xüü̃güxü̃ ga taxtü ga Eufrátecutüwa, rüe̱xna ngẽma norü tupananetagü i Amoréutanüxü̃ i ñaa naanegu ãchiü̃güxü̃! Natürü i chomax rü chauxacügü rü Cori ya Tupanawe tá nixĩ i tarüxĩxü̃ —ñanagürü ga Yochué.

Ínachoxü̃xü̃chiga 5:2

Natürü ga nüma ga Faraóü̃ rü nanangãxü̃, rü ñanagürü: —¿Texé tixĩ ya yíxema “Cori”, ixĩxẽ, rü ta̱xacüca̱x tá naga chaxĩnü rü chayange̱xgü i ngẽma Iraétanüxü̃ i duü̃xü̃gü? Choma rü tama nüxü̃ chacua̱x i ngẽma Tupana i nachiga pidexagüxü̃ rü taxũtáma chayange̱xgü i ngẽma Iraétanüxü̃ —ñanagürü.

Nüxíraxü̃xü̃ ga popera ga Cuáü̃ ümatüxü̃ 3:1

¡Dücax, Pa Chauenexẽgüx, ñuxãcü poraãcü tüxü̃ nangechaü̃ ya Tanatü ya Tupana! Rü ngẽmaca̱x nixĩ i naxacügümaxã tüxü̃ naxuxü̃ i nümax. Rü aixcüma naxacügü tixĩgü. Rü ngẽmaca̱x ñoma i naanecüã̱x i duü̃xü̃gü rü tama tüxü̃ nacua̱xgüchaü̃ erü Tupanaxü̃ rü ta tama nacua̱xgüchaü̃.

Romanos 1:28

Rü yema nax tama Tupanaxü̃ nacua̱xgüchaü̃xü̃, rü yemaca̱x ga nüma ga Tupana rü düxwa nanayexrü ga yema duü̃xü̃gü nax norü chixexü̃gu naxĩnüexü̃ca̱x rü naxügüã̱xü̃ca̱x ga yema chixexü̃.

Ngechuchuarü ngúexü̃gü ga yamugüxü̃arü puracüchiga 17:23

Erü ngẽxguma perü ngutaque̱xechicagüwa chixüpetüchigügu, rü nüxü̃ chadau i naxchicüna̱xãgü i nüxü̃ picua̱xüü̃güxü̃. Rü wüxi i nachicawa namaxã chayarüxũ i wüxi i Tupanaarü ãmarearü guruxü̃ i nagu ümatüxü̃ i naéga i ñaxü̃: “Tupana ya tama nüxü̃ icuácü”, ñaxü̃. Rü yimá Tupana ya tama nüxü̃ pecuáãcüma nüxü̃ picua̱xüü̃gücü nixĩ ya choma pemaxã nüxü̃ chixuchigacü.

Ngechuchuarü ngúexü̃gü ga yamugüxü̃arü puracüchiga 14:12

Rü Bernabé rü tupana ga Chéumaxã nanaxüégagü. Rü Pauru rü tupana ga Érmexmaxã nanaxüégagü yerü nüma nixĩ ga yadexaxü̃.

Ore i mexü̃ ga Cuáü̃ ümatüxü̃ 1:10

Rü nüma ga gumá Nane ga Tupanaarü Oregu ãégacü rü ñoma ga naanewa nayexma. Rü woo Nanatü ya Tupana rü namaxã nanaxü ga ñoma ga naane, natürü ñoma ga naanecüã̱x ga duü̃xü̃gü rü tama nüxü̃ nacua̱xgü nax texé yixĩxü̃.

Yeremía 5:7

Rü nüma ya Cori ya Tupana rü ñanagürü: —¿Ñuxãcü tá pexü̃́ nüxü̃ charüngümaxü̃ i guxü̃ma i ngẽma chixexü̃ i pexüxü̃, Pa Yerucharéü̃cüã̱xgüx? Rü pexacügü rü marü choxna nixĩgachitanü, rü ngẽma tupananetachicüna̱xãgü i tama aixcüma Tupana ixĩgüxü̃maxã inaxunetagü. Rü choma rü taxü̃ ga õna nüxna chaxã, natürü nümagü rü tama chauga naxĩnüechaü̃. Rü guxü̃ma wüxigu tupananetagüwe narüxĩ ñoma yatügü i ngexü̃gü i ngĩxü̃nemaxã taxexü̃we rüxĩxü̃rüxü̃.

Yeremía 16:20

“¿Rü namexü̃ ya yatü nax nümatama naxüaxü̃ i norü tupanagü? ¡Rü ngẽma tupananetachicüna̱xãgü rü tama aixcüma Tupana nixĩgü!” —ñanagürü ga Yeremía.

Gálatas 4:3

Rü yexgumarüxü̃ ta nixĩ ga tamaxã nangupetüxü̃ ga noxrix. Yerü yexguma tauta Cristuxü̃ icua̱xgu, rü natüü̃wa tayexmagü ga yema mugü i ñoma i naanemaxã icua̱xgüxü̃.