Gálatas 2:19 - Tupanaarü Ore

¹⁹ Yerü yexguma yema mugüwa changu̱xgu, rü düxwa nüxü̃ chicua̱xãchi nax tama yanguxü̃ ga yema mugü nax choxü̃ namexẽẽxü̃ Tupanape̱xewa. Rü ngẽmaca̱x i ñu̱xma rü Cristuaxü̃́ chayaxõ nax Tupanape̱xewa chamexü̃ca̱x rü naxca̱xicatama chamaxü̃xü̃ca̱x. Rü Cristu rü curuchagu nayu nax iyanaxoxü̃ca̱x ga nũxcümaü̃xü̃ ga chorü maxü̃ ga choxü̃́ yexmaxü̃ ga yexguma yema mugügu chixũxgu.

Gálatas 2:19 Referans Kwoze

Romanos 7:4

Rü ngẽxgumarüxü̃ ta i pemax, Pa Chauenexẽgüx, rü ngẽxguma Cristuaxü̃́ peyaxõgügü̃ rü Cristu nayuxü̃rüxü̃ na̱xcha̱xwa peyue i ngẽma mugü. Rü ngẽmaca̱x i ñu̱xma rü marü tama ngẽma mugütüü̃wa pengẽxmagü erü Cristu ga yuwa írüdacüme̱xẽwa tangexmagü. Rü ngẽmaãcü Tupana tüxü̃ narüngü̃xẽxẽ nax naxca̱x imaxẽxü̃ca̱x, rü norü ngúchaü̃ ixügüxü̃ca̱x.

Romanos 6:2

Rü dücax, tama ngẽmaãcü nixĩ. Erü ñu̱xma pecaducha̱xwa rü ñoma iyuexü̃rüxü̃ tixĩgü, erü marü tama naga taxĩnüe. Rü ngẽmaca̱x tama name i yeü̃cürü pecadu taxügüecha.

1 Tesalonicenses 5:10

Rü Ngechuchu ya Cristu rü taxca̱x nayu nax wüxigu namaxã imaxẽxü̃ca̱x i daxũguxü̃ i naanewa. Rü woo marü iyueyane ínanguxgu rüẽ̱xna imaxẽyane ínanguxgu, rü wüxiwa tá namaxã tamaxẽ.

2 Corintios 5:15

Rü yemaacü guxü̃ma ga duü̃xü̃güca̱x nayu ga Cristu, nax ngẽma duü̃xü̃gü i maxẽxü̃, rü tama nümatama nagu naxĩnüexü̃gu namaxẽxü̃ca̱x, natürü naxca̱x nax namaxẽxü̃ca̱x ya Cristu ya naxca̱x yucü rü wena írüdacü.

Romanos 6:11

Rü ngẽxgumarüxü̃ ta i pema rü name nixĩ i pegügu perüxĩnüe nax marü pecaducha̱xwa peyuexü̃ rü Tupanaca̱x pemaxẽxü̃, erü Ngechuchu ya Cristuarü duü̃xü̃gü pixĩgü.

Romanos 8:2

Erü Tupanaãxẽ ya Üünecü ya Ngechuchu ya Cristugagu tüxü̃ maxẽxẽẽxü̃, rü nüxna tüxü̃ ínanguxü̃xẽxẽ i pecadu nax tama yuwa tüxü̃ nagagüxü̃ca̱x.

Nüxíraxü̃xü̃ ga popera ga Pedru ümatüxü̃ 2:24

Rü nümatama ga Cristu rü nügüxü̃negu nayange ga tórü pecadugü ga yexguma curuchagu nayu̱xgu. Rü yemaacü nanaxü nax nüxü̃ rüxoexü̃ca̱x i tórü chixexü̃ rü naxca̱xicatama imaxẽxü̃ca̱x. Nüma rü pexca̱x nanapi̱x nax yemaacü pexü̃ nameexẽẽxü̃ca̱x.

Romanos 6:14

Rü ñu̱xma rü marü tama pecadutüü̃wa pengẽxmagü nax pemaxã inacuáxü̃ca̱x. Rü yexguma yema mugü ga Moiché ümatüxü̃we perüxĩxgu, rü pemaxã inacua̱x ga pecadu. Natürü i ñu̱xma rü Tupana pemaxã namecüma, rü nüma nixĩ i pemaxã inacuáxü̃ i ñu̱xmax.

Nüxíraxü̃xü̃ ga popera ga Pedru ümatüxü̃ 4:6

Rü yexguma ñoma ga naanewa namaxẽgu ga yema duü̃xü̃gü ga marü yuexü̃, rü Tupanaarü orearü uruü̃gü namaxã nüxü̃ nixu ga Tupanaarü ore nax namaxẽxü̃ca̱x i naãxẽgü. Rü yema nixĩ i nanaxwa̱xe ya Tupana woo ñoma ga naanewa rü ãẽ̱xgacügü rü ngúxü̃ nüxü̃ ningexẽẽgü ga yema duü̃xü̃gü.

Popera ga Yudíugü ga yaxõgüxü̃ca̱x ümatüxü̃ 9:14

Natürü nagü ya Cristu rü naporaxüchi norü yexera ya yimá nagü i ngẽma naxü̃nagü. Rü nüma ya Cristu rü Tupanaãxẽarü poramaxã nügü inaxã rü nayu nax ãmare i ngẽarü chixexü̃ã́xü̃ yixĩxü̃ca̱x nax yemaacü yanaxoxẽẽãxü̃ca̱x i tórü chixexü̃ i tórü ĩnüwa ngẽxmagüxü̃ nax ngẽmaãcü Tupana ya Maxü̃cüca̱x imaxẽxü̃ca̱x.

Popera ga Títoca̱x naxümatüxü̃ ga Pauru 2:14

Rü nüma ga Ngechuchu rü taxca̱x nayu nax tüxü̃ ínanguxü̃xẽẽxü̃ca̱x nawa i guxü̃ma i chixexü̃, rü mea tüxü̃ yamexẽẽgüxü̃ca̱x nax norü duü̃xü̃gü ixĩgüxü̃ca̱x rü guxü̃guma mexü̃ ixügüxü̃ca̱x.

Colosenses 2:20

Rü pema rü ñu̱xma nax Cristuaxü̃́ peyaxõgüxü̃ rü marü tama name nax naga pexĩnüexü̃ i ngẽma Yudíugüarü mugü. ¿Rü tü̱xcüü̃ nixĩ i ñoma i naanecüã̱xrüxü̃ nagu pemaxẽxü̃ i ngẽma Yudíugücümagü?

Gálatas 3:24

Rü yemaacü ga yema mugü rü tamaxã inacua̱x ñu̱xmata ínangu ga Cristu nax nüxü̃́ yaxõgüxü̃ca̱x rü ngẽmaãcü Tupanape̱xewa imexü̃ca̱x.

Gálatas 2:20

Rü choma rü wüxigu Cristumaxã curuchawa chipota. Rü ñu̱xma rü marü tama chaugümaxãtama ichacua̱x, natürü Cristu nixĩ ya chomaxã icuácü erü chowa namaxü̃. Rü ñu̱xma rü Tupana Nane ya Cristuaxü̃́ chayaxõõcüma nixĩ i chamaxü̃xü̃. Rü nüma nixĩ ga choxü̃ nangechaü̃xü̃, rü nügü inaxãxü̃ nax cha̱u̱xca̱x nayuxü̃ca̱x.

Colosenses 3:3

Yerü yema nũxcümaü̃xü̃ ga perü maxü̃ rü marü nayu. Rü ñu̱xma rü Cristugagu Tupana pexna nanaxã i maxü̃ i ngexwaca̱xü̃xü̃.

Gálatas 3:10

Natürü chixexü̃wa nangẽxmagü i guxü̃ma i ngẽma nagu rüxĩnüexü̃ nax mugü yanguxẽẽgüxü̃gagu Tupanape̱xewa yamexü̃. Erü Tupanaarü ore i ümatüxü̃wa rü ñanagürü: “Rü guxü̃ma i duü̃xü̃gü i tama aixcüma yanguxẽẽgüxü̃ i guxü̃ma i ngẽma mugü i ümatüxü̃, rü chixexü̃wa nangẽxmagü”, ñanagürü.

1 Corintios 10:31

Dücax, pemaxã nüxü̃ chixu rü name nixĩ i guxü̃ma i ngẽma pexüxü̃maxã Tupanaxü̃ picua̱xüü̃gü. Rü ngẽxguma ta̱xacü pengõ̱xgügu, rüe̱xna ta̱xacü pixaxgügu rüe̱xna ta̱xacü i to pexügügu, rü name nixĩ i ngẽmamaxã Tupanaxü̃ picua̱xüü̃gü.

Romanos 7:14

Nüxü̃ tacua̱x i ngẽma mugü rü Tupanaãxẽ i Üünexü̃wa ne naxũ. Natürü choma rü duü̃xü̃mare chixĩ, rü ngẽmaca̱x nixĩ i chomaxã inacuáxü̃ i ngẽma pecadu.

Romanos 5:20

Rü Tupana rü Moichéna nanaxã ga norü mugü nax duü̃xü̃güxü̃ nüxü̃ nacua̱xẽẽxü̃ca̱x nax poraãcü yapecaduã́xü̃. Natürü yexguma yexeraãcü pecadu naxügügu ga duü̃xü̃gü, rü yexeraãcü Tupanaaxü̃́ nangechaü̃tümüü̃gü.

Romanos 4:15

Nüxü̃ tacua̱x rü ngẽma mugü ga Moiché ümatüxü̃ rü poxcuwa tüxü̃ naga erü taxúema aixcüma mea tayanguxẽxẽ. Natürü yexguma chi nataxuxguma ga yema mugü rü tataxuchima nax texé chixri yanguxẽẽxü̃.

1 Corintios 9:20

Rü yexguma chautanüxü̃ ga Yudíugütanüwa chayexmagu, rü namaxã chaugü chawüxiguxẽxẽ nax yemaacü nüxü̃ charüngü̃xẽẽxü̃ca̱x nax Cristuaxü̃́ yaxõgüãxü̃ca̱x. Rü woo tama yema Moiché ümatüxü̃ ga mugütüü̃wa changexmagu, natürü chayanguxẽẽãma i ngẽma mugü nax ngẽmaãcü Cristuxü̃tawa chanagagüxü̃ i ngẽma duü̃xü̃gü i ñu̱xma rü ta nagu ĩxü̃ i ngẽma mugü ga Moiché ümatüxü̃.

Gálatas 6:14

Natürü i choma rü chaugü chicua̱xüxü̃ erü nüxü̃́ chayaxõ ya tórü Cori ya Ngechuchu ya Cristu ga curuchagu yucü. Rü ngẽmaca̱xicatama nixĩ i chaugü chicua̱xüüxü̃. Rü ñu̱xma nax Cristu ga curuchagu yucüaxü̃́ chayaxõxü̃, rü marü tama nagu charüxĩnü i ñoma i naane rü norü ngẽmaxü̃gü. Rü ngẽxgumarüxü̃ ta i ñoma i naane rü marü tama choxü̃ nacuáxchaü̃.