Gálatas 2:16 - Tupanaarü Ore

¹⁶ Rü nüxü̃ tacua̱xgü rü yema mugü ga Moiché ümatüxü̃ rü tama aixcüma tüxü̃ nimexẽxẽ i Tupanape̱xewa, yerü taxúema aixcüma naga taxĩnüe ga yema mugü. Natürü i ñu̱xma rü Tupana tüxü̃ nadau nax imexü̃ erü Ngechuchu ya Cristuaxü̃́ tayaxõgü. Rü yemaca̱x i yixema rü Ngechuchu ya Cristuaxü̃́ tayaxõgü nax ngẽmagagu Tupana tüxü̃ nadauxü̃ nax imexü̃. Rü ngẽmawa nüxü̃ tacua̱xgü rü tama ngẽma mugügagu nixĩ nax Tupanape̱xewa imexü̃, erü taxúema aixcüma naga taxĩnü i ngẽma mugü nax ngẽmaãcü Tupanape̱xewa imexü̃ca̱x.

Gálatas 2:16 Referans Kwoze

Filipenses 3:9

Rü yema nax Cristuarü duü̃xü̃ chixĩxü̃ca̱x nixĩ i nüxü̃ charüxoxü̃ ga yema Yudíugücümagü ga noxri nagu chixũxü̃. Rü tama ngẽma nax chamecümaxü̃ca̱x rü ẽ̱xna mugü chaxaurexü̃ca̱x nixĩ nax chamexü̃ i nape̱xewa. Rü ñu̱xma rü Tupanape̱xewa chame erü Cristuaxü̃́ chayaxõ. Rü ngẽma nax Cristuaxü̃́ chayaxõxü̃ca̱x nixĩ i nügüca̱x choxü̃ namexẽẽxü̃ ya Tupana.

Wiyaegü 143:2

¡Rü taxṹ i choxna naxca̱x cucaxü̃ i chorü chixexü̃gü nax poxcu chomaxã cuxueguxü̃ca̱x! Erü cupe̱xewa rü tataxuma ya texé ya tama nüxü̃ cuáxe nax chixexü̃ taxüxü̃.

Romanos 9:30

¿Rü ñuxũ ñagüxü̃ i ñu̱xmax? Rü pemaxã nüxü̃ chixu rü ngẽma duü̃xü̃gü i tama Yudíugü ixĩgüxü̃ ga tama Tupanaca̱x daugüxü̃ ga noxrix, rü ngẽmatama duü̃xü̃gü nixĩ i ñu̱xma Tupanape̱xewa imexü̃ yerü nayaxõgü.

Nüxíraxü̃xü̃ ga popera ga Pedru ümatüxü̃ 3:18

Yerü nümatama ga Cristu rü ngúxü̃ ninge, rü wüxicanatama guxãarü pecaduca̱x nayu. Rü nüma rü taxuxü̃ma ga chixexü̃ naxü, natürü chixexü̃ ga duü̃xü̃güca̱x ngúxü̃ ningẽ nax Tupanaxü̃tawa pexü̃ nagagüxü̃ca̱x. Rü woo nayu ga naxü̃ne, natürü ga naãxẽ rü namaxü̃.

Romanos 4:2

Rü dücax, yexguma chi ta̱xacürü mexü̃ nax naxüxü̃ca̱x Tupanape̱xewa namexgu ga Abraáü̃ rü chi yemaca̱x nügü nicua̱xüxü̃, natürü tama yemaca̱x Tupanape̱xewa name. Erü Tupanaarü ore i ümatüxü̃wa rü ñanagürü: “Abraáü̃ rü Tupanaaxü̃́ nayaxõ, rü yemaca̱x Tupana nüxü̃ nixu nax namexü̃”, ñanagürü i ngẽma ore.

Nüxíraxü̃xü̃ ga popera ga Pedru ümatüxü̃ 2:24

Rü nümatama ga Cristu rü nügüxü̃negu nayange ga tórü pecadugü ga yexguma curuchagu nayu̱xgu. Rü yemaacü nanaxü nax nüxü̃ rüxoexü̃ca̱x i tórü chixexü̃ rü naxca̱xicatama imaxẽxü̃ca̱x. Nüma rü pexca̱x nanapi̱x nax yemaacü pexü̃ nameexẽẽxü̃ca̱x.

Romanos 8:3

Rü yemaacü Tupana nanaxü ga yema taxucürüwa naxüxü̃ ga yema mugü ga Moiché ümatüxü̃. Erü taxúema namaxã tapora i tümaarü ngúchaü̃ nax chixexü̃ taxüxü̃. Rü yemaca̱x ga Tupana rü ñoma ga naanewa nanamu ga Nane, rü duü̃xü̃ i pecaduã́xü̃rüxü̃ nixĩ ga naxü̃ne nax yemaacü pecadugagu nayuxü̃ca̱x nax tama tamaxã naporaxü̃ca̱x i ngẽma pecadu.

Romanos 3:30

Nüxü̃ tacua̱x nax wüxitama yixĩxü̃ ya Tupana. Rü nüma nixĩ i nügüpe̱xewa yamexẽẽgüãxü̃ i guxü̃ma i duü̃xü̃gü i Cristuaxü̃́ yaxõgüxü̃ woo Yudíugü rü woo i tama Yudíugü ixĩgüxü̃.

Romanos 1:17

Rü ngẽma norü orewa nixĩ ya Tupana tamaxã nüxü̃ yaxuxü̃ nax tórü õgaguxicatama yixĩxü̃ nax nape̱xewa imexü̃. Erü norü ore i ümatüxü̃wa rü ñanagürü: “Yíxema tümaarü õgagu Tupanape̱xewa mexẽ, rü tüxü̃́ nangẽxma i maxü̃ i taguma gúxü̃”, ñanagürü.

Nüxíraxü̃xü̃ ga popera ga Cuáü̃ ümatüxü̃ 1:7

Natürü ngẽxguma chi Tupanarüxü̃ ngóonexü̃wa imaxẽgu, rü yigütanüxü̃ tixĩgü, rü Tupana Nane ya Ngechuchu rü nagümaxã tüxü̃́ inayanaxoxẽxẽ i guxü̃ma i pecadugü.

Norü taxre ga popera ga Pedru ümatüxü̃ 1:1

Pa Chauenexẽgüx, choma i Chimóü̃ i Pedru ya Ngechuchu ya Cristuarü puracütanüxü̃ chixĩ, rü nüma nixĩ ga choxü̃ namuxü̃ nax nüxü̃ chixuxü̃ca̱x i norü ore. Rü ñu̱xma i choma rü pexü̃ charümoxẽ i pema i toxrüxü̃ mea yaxõgüxe erü tórü Tupana ya Ngechuchu ya Cristu ya tórü Maxẽxẽẽruxü̃ rü pemaxã namecümaxüchi.

Yema Cuáü̃ nüxü̃ dauxü̃ i yixcüra tá ngupetüxü̃chiga 7:9

Rü yemawena ichadawenü, rü nüxü̃ chadau ga muxũchixü̃ma ga naguxü̃raü̃xü̃ ga nachixü̃anecüã̱x, rü naguxü̃raü̃xü̃ ga duü̃xü̃gütücumü, rü naguxü̃raü̃xü̃ ga ĩanegücüã̱x, rü naguxü̃raü̃xü̃ ga duü̃xü̃gü ga to ga nagawa idexagüxü̃. Rü yema tochicaxü̃pe̱xegu rü gumá Carneruxacüpe̱xegu nachigü. Rü yema nax namuxũchixü̃ rü taxucürüwa texé tayaxugü nax ñuxre yixĩxü̃. Rü naxchiru ga icómüxü̃ rü imáxü̃maxã nixãxchiru. Rü naxme̱xwa nanangegü ga wairaatügü.

Gálatas 5:4

Rü pema i nagu rüxĩnüexe nax Tupanape̱xewa pimexü̃ ega nagu pexĩxgu i ngẽma mugü, rü pemaxã nüxü̃ chixu rü marü Cristuna pixĩgachi. Rü ngẽxgumarüxü̃ ta nüxü̃ pexoe i ngẽma ngechaü̃ ga Tupana namaxã pexü̃ ngechaü̃xü̃.

1 Corintios 6:11

Rü yexgumarüü̃tama pixĩgü ga ñuxre ga pema ga ü̃pax. Natürü i ñu̱xma ya Tupana rü marü pexü̃́ ínanapi i perü chixexü̃ nax noxrüxicatama pixĩgüxü̃ca̱x. Rü ñu̱xma rü nape̱xewa pime yerü Naãxẽ ya Üünexü̃ rü tórü Cori ya Ngechuchu ya Cristuégagu marü perü pecaduna pexü̃ ínanguxü̃xẽxẽ.

Ore i mexü̃ ga Cuáü̃ ümatüxü̃ 20:31

Natürü guxü̃ma ga yema Ngechuchu üxü̃ rü ñaa poperagu naxümatü nax peyaxõgüxü̃ca̱x nax Ngechuchu rü Tupana Nane ya Cristu nax yixĩxü̃ rü ngẽxguma nüxü̃́ peyaxõgügu pexü̃́ nangẽxmaxü̃ca̱x i maxü̃ i taguma gúxü̃.

Yox 25:4

¿Rü wüxi i duü̃xü̃ rü ñuxãcü tá Tupanape̱xewa nügü nixu nax nangearü pecaduã́xü̃? ¿Rü wüxi i duü̃xü̃ i wüxi ya ngexewa buxü̃ rü ñuxãcü tá nügü nixu nax nataxuxũma i norü chixexü̃?

Gálatas 4:5

Rü núma nangu ga Tupana Nane nax tüxü̃ ínanguxü̃xẽẽxü̃ca̱x i guxãma i yixema ga noxri mugütüü̃wa nax iyexmagüxü̃. Rü yemaacü tüxü̃ narüngü̃xẽxẽ ga nüma ga Tupana Nane nax Nanatü ya Tupanamaxã tüxü̃ yaxuxü̃ca̱x nax aixcüma naxacügüxüchi ixĩgüxü̃.

Yox 9:29

Rü ñu̱xma nax nagu perüxĩnüexü̃ nax chixexü̃ chaxüxü̃ ¿rü ta̱xacüwa choxü̃́ name nax pora chaxüxü̃ nax pemaxã nüxü̃ chixuxü̃ nax taguma chixexü̃ chaxüxü̃?

Yema Cuáü̃ nüxü̃ dauxü̃ i yixcüra tá ngupetüxü̃chiga 7:14

Rü choma chanangãxü̃, rü ñacharügü: “Pa Corix, cuma nixĩ i nüxü̃ cucuáxü̃ nax texégü tixĩgüxü̃”, ñacharügü. Rü yexguma ga nüma rü ñanagürü: “Yíxemagü tixĩgü ga nawa ngupetütanüxe ga yema ngúxü̃ ga taxü̃ rü marü tügü iyauxgüchiruxe nawa ga nagü ya yimá Carnéruxacü. Rü ngẽmaca̱x nixĩ i ticómüchiruxü̃.

Nüxíraxü̃xü̃ ga popera ga Pedru ümatüxü̃ 1:2

Rü pexü̃ nixĩ ga nadexü̃ ga Tanatü ya Tupana, yerü woetama yema nixĩ ga nũxcümaxü̃chima nagu naxĩnüxü̃. Rü nüma ya Tupana rü Naãxẽ ya Üünecümaxã pexü̃ nimexẽẽgü nax nape̱xewa pixüünegüxü̃ca̱x rü Ngechuchu ya Cristuga nax pexĩnüexü̃ca̱x rü nagümaxã nax piyauxgüxü̃ca̱x nax nataxuxü̃ca̱x i perü chixexü̃gü. Rü chanaxwa̱xe i Tanatü ya Tupana poraãcü pexü̃ narüngü̃xẽxẽ rü pexü̃ nataãẽgüxẽxẽ.

Romanos 4:24

Natürü guxãma i yixema nax yaxõgüxü̃chiga ta nixĩ i ngẽma ore. Erü Tupana rü tórü õgagu tüxü̃ nade nax nape̱xewa imexü̃ i yixema i nüxü̃́ nax yaxõgüxü̃ ya yimá yuwa tórü Cori ya Ngechuchuxü̃ írüdaxẽẽcü.

Ngechuchuarü ngúexü̃gü ga yamugüxü̃arü puracüchiga 4:12

Rü yimá Ngechuchuxicatama nixĩ ya tórü maxẽxẽxẽruxü̃, erü yixicatama nixĩ ga Tupana nüxü̃ unetacü i ñoma i naanewa nax tüxü̃ namaxẽxẽẽxü̃ca̱x —ñanagürü ga Pedru.