Gálatas 1:9 - Tupanaarü Ore

⁹ Rü ñu̱xma rü wena pemaxã nüxü̃ chixu ga yema noxri pemaxã nüxü̃ chixuxü̃. Rü ngẽxguma chi texé pexü̃ ngúexẽẽgu i wüxi i to i ore i tama namaxã wüxiguxü̃ i ngẽma ore i mexü̃ ga peyaxuxü̃, rü name nixĩ i noxtacüma Tupana poxcu tümamaxã naxuegu.

Gálatas 1:9 Referans Kwoze

Romanos 16:17

Pa Chauenexẽgüx, pexü̃ chaca̱a̱xü̃ nax pegüna pedaugüxü̃ca̱x nüxna i ngẽma duü̃xü̃gü i pexü̃ itoyechaü̃xü̃ rü chixexü̃gu pexü̃ yixẽẽchaü̃xü̃. Erü ngẽma duü̃xü̃güarü ngu̱xẽẽtae rü tama namaxã nawüxigu i ngẽma ngu̱xẽẽtae ga noxri peyauxgüxü̃ ga yexguma noxri peyaxõgügu. Rü name nixĩ i noxtacüma nüxna pixĩgachi i ngẽma duü̃xü̃gü rü tama natanügu pexãgü.

Ucu̱xẽgüchiga 30:6

Tama name i cunayexeraxẽxẽ i Tupanaarü ore. Erü ngẽxguma cunaxüétügu, rü nüma rü ngürüãchi tá cuxna naca, rü ngẽmaãcü tá dorata̱xáxü̃ quixĩ.

Wenaxarü naxümatü ga Tupanaarü mugü 4:2

¡Rü taxṹ i to i mugü pixücuchixü̃ rüe̱xna ípenaxíxraãchixü̃ i ngẽma Cori ya Tupanaarü mugü i pexü̃ changúexẽxẽxü̃! ¡Rü peyangu̱xẽxẽ i ngẽma norü mugü i choma pemaxã nüxü̃ chixuxü̃!

Wenaxarü naxümatü ga Tupanaarü mugü 12:32

Natürü i pema rü penaxwa̱xe nax guxü̃guma nagu pexĩxü̃ i guxü̃ma i ngẽma mugü i pemaxã nüxü̃ chixuxü̃. Rü taxũtáma ta̱xacürü to i mugü pixücuchi rüe̱xna ípenaxüxüchi nawa i ngẽma pemaxã nüxü̃ chixuxü̃.

2 Corintios 1:17

Bexmana pema nagu perüxĩnüegu rü tama mea nagu charüxĩnüãcü nixĩ i pemaxã nüxü̃ chixuxü̃ nax petanüwa chaxũxchaü̃xü̃. ¿Ẽ̱xna pema nagu perüxĩnüegu rü ñoma wüxi i duü̃xü̃ i tama Tupanaaxü̃́ yaxõxü̃ãcü nagu charüxĩnü rü “Ngü̃”, ñachagürü rü ngẽxgumatama “Tama”, ñachagürü?

Filipenses 3:1

Rü ñu̱xma Pa Chauenexẽgüx, rü chanaxwa̱xe i petaãẽgü erü tórü Coriarü duü̃xü̃gü pixĩgü. Rü yema ore ga noxri pexca̱x chaxümatüxü̃ rü tama choxü̃́ nawa̱xtümüü̃ nax wena pexca̱x chanaxümatüxü̃ erü aixcüma pexü̃́ name i ngẽma ore.

Filipenses 4:4

Rü chanaxwa̱xe nax guxü̃guma tórü Corimaxã petaãẽgü. Rü wena pemaxã nüxü̃ chixu, rü ¡petaãxẽgü!

Yeremía 23:16

Rü Cori ya Tupana ya Guxü̃étüwa Ngẽxmacü rü ñanagürü: —¡Pa Iraétanüxü̃, taxṹ i naga pexĩnüexü̃ i ngẽma orearü uruü̃güneta nüxü̃ ixugüxü̃! Erü ngẽma nüxü̃ yaxugüxü̃ rü doramare nixĩ, rü dexagü i nügüãẽwatama nayauxgüxü̃ i tama choma namaxã nüxü̃ chixuxü̃ nixĩ.

Ngechuchuarü ngúexü̃gü ga yamugüxü̃arü puracüchiga 18:23

Rü yexguma marü ñuxre ga ngunexü̃ yéma Antioquíawa nayexmagu, rü wenaxarü inaxũãchi ga Pauru nax wüxichigü ga ĩane ga Gárataanewa rü Fríquiaanewa yexmagünewa íyadauxü̃ca̱x rü yataãẽxẽẽgüaxü̃ca̱x ga guxü̃ma ga yema yaxõgüxü̃ ga guma ĩanegüwa yexmagüxü̃.

Romanos 9:3

Rü aixcüma pemaxã nüxü̃ chixu rü guxü̃guma ngẽma chautanüxü̃gu charüxĩnü, rü poraãcü chanaxwa̱xe nax Cristuaxü̃́ yaxõgüãxü̃. Rü choma rü aixcüma íchamemare nax poxcuwa choxü̃ namuxü̃ ya Tupana rü Cristuna choxü̃ yaxũgachixẽẽxü̃ ega ngẽmaãcü chi nüxü̃ chayaxõgüxẽẽgu rü chanamaxẽxẽẽgu i ngẽma chautanüxü̃ i Iraétanüxü̃.