Ester 9:18 - Tupanaarü Ore

¹⁸ Natürü ga yema Yudíugü ga ĩane ya Chúchawa yexmagüxü̃ rü naxĩtaque̱xe ga norü 13 rü 14 ga ngunexü̃gu. Rü norü 15 ga ngunexü̃gu narüngü̃gü rü napetaegü rü nataãẽgü.

Ester 9:18 Referans Kwoze

Ester 9:21

Rü yema poperawa rü Yudíugümaxã nüxü̃ nixu nax gucü ya taunecügu ga Adáü̃arü tauemacüarü 14 rü 15 ga ngunexü̃gu naxüchigagüãxü̃ca̱x nax yemaacü nüxna nacua̱xãchiexü̃ca̱x ga yema ngunexü̃gü ga nagu norü uanügüme̱xẽwa ínanguxü̃xü̃ ga nümagü ga Yudíugü rü yemaacü ga norü ngechaü̃gü rü norü axu rü taãẽxü̃ yanguxuchixü̃ca̱x. Rü yema poperawa nüxü̃ nixu rü ngẽxguma naxüchigagüãgu rü name nax nügümaxã nataãẽgüxü̃ rü nügümaxã nachibüexü̃ rü ãmare nügüna naxãgüxü̃ rü diẽru ngĩxü̃ nanutaque̱xegüxü̃ tümaca̱x ya guxema ngearü diẽruã̱xgüxe.

Ester 9:15

Rü yema Yudíugü ga Chúchawa maxẽxü̃ rü meama norü 14 ga ngunexü̃gu ga Adáarü tauemacügu rü wenaxarü naxĩtaque̱xe rü yexguma nanadai ga to ga 300 ga norü uanügü, natürü tama nanade ga norü yemaxü̃gü.

Ester 9:13

Rü yexguma ga ngĩma ga Ité inangãxü̃ rü ngĩgürügü: —Pa Ãẽ̱xgacüx, ngẽxguma marü cuxca̱x namexgu, rü chanaxwa̱xe i moxü̃ rü ngẽma curü mu nüxü̃ ixuxü̃rüxü̃ nanaxügü i ngẽma Yudíugü i Chúchawa maxẽxü̃. Rü chanaxwa̱xe i ngẽma 10 i Amáü̃ nanegü wẽxnaxãruü̃wa natúgüxẽẽãxü̃ i naxü̃negü —ngĩgürügü.

Ester 9:1

Rü yema ãẽ̱xgacüarü mu ga Yudíugüétüwa chogüxü̃ rü meama norü 12 ga tauemacü ga Adáguarü 13 ga ngunexü̃gu nangu. Rü yematama ngunexü̃ nixĩ ga nanguxchaü̃chiréxü̃ ga Amáü̃arü mu ga Yudíugüarü daixchigaxü̃ ixuxü̃. Natürü tama yema Amáü̃ nagu rüxĩnüxü̃rüxü̃ ínanguxuchi, yerü yema ngunexü̃gu nixĩ ga Yudíugü norü uanügüxü̃ naporamaegüxü̃.

Ester 9:11

Rü yexguma ãẽ̱xgacü ga Achuéru nüxü̃ cua̱xgu nax 500 ga Yudíugüarü uanügü nayuexü̃ ga ĩane ga Chúchawa, rü yematama ga ngunexü̃gu rü naxma̱x ga Itémaxã nüxü̃ nixu rü ñanagürü: —Yudíugü rü daa ĩane ya Chúchagu nanadai i 500 i norü uanügü. Rü ngẽxgumarüxü̃ ta nanadai i 10 i Amáü̃ nanegü. Rü ngẽmaétüwa tama nüxü̃ tacua̱x nax ñuxre nada̱i̱xü̃ i ngẽma togü i naanegü i choma namaxã ichacuáxü̃wa. ¿Rü ñu̱xma ta̱xacü i to i cunaxwa̱xexü̃ nax cuxca̱x chanaxüxü̃? ¡Rü choxna naxca̱x naca i ngẽma cuma cunaxwa̱xexü̃ rü choma tá cuxna chanaxã! —ñanagürü.

Ester 8:11

Rü yema poperawa rü nüma ga ãẽ̱xgacü rü guxü̃ma ga Yudíugüna naxãga nax nügü nanutaque̱xegüxü̃ca̱x nax nügütama ínapoxü̃güxü̃ca̱x rü nadaiaxü̃ca̱x ga guxü̃ma ga duü̃xü̃gü ga guxchaxü̃ namaxã üxü̃ rü noxrüxü̃ yaxĩxẽẽgüãxü̃ca̱x ga yema naxca̱x íyaxüãchiü̃arü naanegü rü norü yemaxü̃gü.

Ester 9:2

Rü guxü̃ma ga Achuéruarü naanegüwa rü nüma ga Yudíugü rü guma norü ĩanegüwa nügü ninutaque̱xegüchigü nax naxca̱x itaxüãchixü̃ca̱x ga norü uanügü ga nadaixchaü̃xü̃. Natürü nataxuma ga ngexü̃rüüxü̃ ga norü uanü ga naxca̱x yéma ĩxü̃ nax nadaiaxü̃ca̱x, yerü guxü̃nema ga ĩanewa rü Yudíugüxü̃ namuü̃e.