Efesios 6:12 - Tupanaarü Ore

¹² Erü tama duü̃xü̃gü i taxrüxü̃ ãmachixü̃ rü ãxchina̱xãxü̃maxã nixĩ i yigü ida̱i̱xü̃. Natürü ngẽma namaxã yigü ida̱i̱xü̃ nixĩ i Chatanáarü duü̃xü̃gü i ngo̱xogü i chixexü̃gü i poraexü̃. Rü nümagü rü namaxã inacua̱x i ñoma i naanearü chixexü̃gü rü guxü̃wama daxũwa nangẽxmagü rü tüxü̃ narüporamaegüchaü̃.

Efesios 6:12 Referans Kwoze

Colosenses 1:13

Yerü nüma ga Tupana rü marü Chatanáme̱xẽwa tüxü̃ ínanguxü̃xẽxẽ rü Nane ya nüxü̃ nangechaü̃cüme̱xẽwa tüxü̃ nangẽxmagüxẽxẽ.

2 Corintios 4:4

Erü nümagü nax tama yaxõgüãxü̃, rü ñoma i naanearü ãẽ̱xgacü i Chataná nixĩ i nüxü̃́ naguxchaxẽẽxü̃ nax tama nüxü̃ nacua̱xgüxü̃ca̱x i Cristu ya Üünecüarü ore i ñoma omürüxü̃ poraãcü nangóonexẽẽxü̃. Rü Cristuwa nixĩ i nügü nawéxü̃ ya Tupana.

Efesios 2:2

Yerü ga pemax rü nagu pexĩ ga yema chixexü̃ i ñoma i naanecüã̱x i duü̃xü̃gü nagu ĩxü̃. Rü pema rü naga pexĩnüe ga Chataná i ngo̱xogüarü ãẽ̱xgacü ixĩxü̃. Rü nüma nixĩ i nüxü̃́ nangúchaü̃xẽẽãxü̃ nax chixexü̃ naxügüxü̃ca̱x i ngẽma duü̃xü̃gü i tama Tupanaga ĩnüexü̃.

Colosenses 2:15

Rü yexguma curuchagu nayu̱xgu ga Cristu, rü yexguma nixĩ ga Tupana nüxna napuãxü̃ ga norü pora ga yema naãxẽgü ga iporaexü̃. Rü yexguma nixĩ ga guxü̃ ga duü̃xü̃güpe̱xewa naxãnexẽẽãxü̃, ñoma wüxi i churaragüarü ãẽ̱xgacü i norü uanü i nüxü̃ naporamaexü̃xü̃ naxãnexẽẽxü̃rüxü̃.

Ngechuchuarü ngúexü̃gü ga yamugüxü̃arü puracüchiga 26:18

Rü cuxü̃ chamu nax ngẽma duü̃xü̃güxü̃ choxü̃ cucua̱xẽẽxü̃ca̱x rü nüxü̃ naxoexü̃ca̱x i nacüma i chixexü̃gü rü chauga naxĩnüexü̃ca̱x. Rü cuxü̃ chamu nax Chatanáme̱xẽwa ícunanguxü̃xẽẽxü̃ca̱x i ngẽma duü̃xü̃gü nax chowe naxĩxü̃ca̱x rü choxü̃́ yaxõgüãxü̃ca̱x nax choma nüxü̃́ nüxü̃ icharüngümaxü̃ca̱x i norü pecadugü, rü nüxü̃́ nangẽxmaxü̃ca̱x i nachica natanüwa i guxü̃ma i chorü duü̃xü̃gü i üünegüxü̃”, ñanagürü choxü̃ ga Cori.

Efesios 1:21

Rü yemaacü guxü̃étüwa nanayexmaxẽxẽ. Rü ngẽmaca̱x i ñu̱xma rü Cristume̱xẽwa nangẽxmagü i guxü̃ma i daxũguxü̃ i naanecüã̱x i ãẽ̱xgacügü rü guxü̃ma i ñoma i naanecüã̱x i ãẽ̱xgacügü rü guxü̃ma i pora i ñu̱xma ngẽxmagüxü̃ rü guxü̃ma i pora i yixcüra tá ngẽxmagüxü̃.

Romanos 8:38

Rü ngẽmaca̱x aixcüma chayaxõ nax taxuxü̃ma i ta̱xacü tá Tupanana tüxü̃ ixĩgachixẽẽxü̃ nax tama tüxü̃ nangechaü̃xü̃ca̱x. Rü woo iyuegu rü woo imaxẽgu, rü woo i orearü ngeruü̃gü i daxũcüã̱x, rü woo ngo̱xogü, rü woo naãxẽ i chixexü̃gü, rü woo ngẽma ñu̱xma nüxü̃ idauxü̃, rü woo ngẽma yixcüra tá nüxü̃ idauxü̃, rü woo i ngẽma daxũwa ngẽxmagüxü̃, rü woo i ngẽma naanetüü̃wa ngẽxmagüxü̃, rü woo i ta̱xacü Tupana üxü̃, rü taxũtáma Tupanana tüxü̃ nixĩgachixẽxẽ nax tama tórü Cori ya Ngechuchu ya Cristugagu tüxü̃ nangechaü̃xü̃ca̱x.

Efesios 3:10

Rü yemaacü choxü̃ namu ga Tupana nax ngẽma yaxõgüxü̃wa guxü̃ma i ngẽma daxũcüã̱x i poraexü̃ rü guxü̃ma i ngẽma daxũcüã̱x i ãẽ̱xgacügü ixĩgüxü̃ nüxü̃ cua̱xgüxü̃ca̱x i Tupanaarü cua̱x i naguxü̃raxü̃ãcü ngóxü̃.

Efesios 1:3

Rü name nixĩ i nüxü̃ ticua̱xüü̃gü ya Tanatü ya Tupana ya tórü Cori ya Ngechuchu ya Cristunatü ixĩcü. Erü nüma ya Tupana rü Cristugagu tüxna nanaxã i naguxü̃raü̃xü̃ i ngü̃xẽẽgü i üünexü̃ i daxũguxü̃ i naanewa taxca̱x ne namugüxü̃.

1 Corintios 15:50

Rü dücax, Pa Chauenexẽgüx, pemaxã nüxü̃ chixu rü ñaa taxü̃ne i namachinaxca̱x rü naxchina̱xãnaxca̱x, rü taxucürüwa Tupana ãẽ̱xgacü íyixĩxü̃wa nangu. Erü ngẽma iyarüxoxü̃, rü taxucürüwama Tupanaxü̃tawa i ngextá taxuxü̃ma íyarüxoxü̃wa nixücu.

Nüxíraxü̃xü̃ ga popera ga Pedru ümatüxü̃ 3:22

Rü nüma ga Ngechuchu ya Cristu, rü daxũguxü̃ i naanewa naxũ, rü ñu̱xma rü Tupanaarü tügünecüwawa nangẽxma. Rü ñu̱xma rü naxme̱xwa nangẽxmagü i guxü̃ma i Tupanaarü orearü ngeruü̃gü i daxũcüã̱x, rü guxü̃ma i ngẽma naãxẽgü i ãẽ̱xgacügü ixĩgüxü̃, rü guxü̃ma i ngẽma naãxẽgü i poraexü̃.

Popera ga Yudíugü ga yaxõgüxü̃ca̱x ümatüxü̃ 12:1

Rü yema muxü̃ma ga duü̃xü̃gü ga Tupanaaxü̃́ yaxõgüxü̃ ga yuexü̃, rü ñu̱xma torü ngaicamana nangẽxmagü nax tórü cua̱xruü̃gü yixĩgüxü̃ca̱x. Rü ngẽmaca̱x i ñu̱xmax, ¡rü ngĩxã nüxü̃ tarüxoe i guxü̃ma i ngẽma guxchaxü̃gü rü pecadugü i tüxü̃́ naguxchaxẽẽxü̃ nax mea yaxõgüxü̃! ¡Rü ngĩxã pora taxüe nax nawa ingugüxü̃ca̱x i ngẽma maxü̃ i tape̱xewaama ngẽxmaxü̃!

Ore i mexü̃ ga Cuáü̃ ümatüxü̃ 14:30

Marü taxũtáma muxü̃ i orexü̃ pemaxã chixu, erü marü paxa tá ínangu i Chataná i ñoma i naanemaxã icuáxü̃. Natürü nüma rü taxuwama choxü̃ narüyexera.

Ore i mexü̃ ga Cuáü̃ ümatüxü̃ 12:31

Rü ñu̱xma tá nixĩ i napoxcuexü̃ i duü̃xü̃gü naxca̱x i norü pecadugü. Rü ñu̱xma tá nixĩ i ínata̱xüchixü̃ i ngẽma ñoma i naanewa poraxü̃ i Chataná.

Ore i mexü̃ ga Cuáü̃ ümatüxü̃ 16:11

Rü Naãxẽ ya Üünexü̃ tá duü̃xü̃güxü̃ nüxü̃ nacua̱xẽxẽ nax texé tixĩxü̃ ya yíxema Tupana marü poxcu tümamaxã naxueguxe. Rü nüma nixĩ i Chataná i ñoma i naanemaxã icuáxü̃.

Yox 2:2

Rü nüma ga Cori ya Tupana rü nüxna naca rü ñanagürü: —¿Ngextá ne cuxũ i cumax? —ñanagürü. Rü nüma ga Chataná rü nanangãxü̃ rü ñanagürü: —Nawa ne chaxũ nax nagu íchayaxüeguxü̃ i ngẽma naane —ñanagürü.

Ore i mexü̃ ga Luca ümatüxü̃ 22:53

Rü guxü̃ ga ngunexü̃gu ga yexguma petanüwa chayexmagu ga Tupanapata ga taxü̃newa, rü tama choxü̃ piyauxgü. Natürü marü nawa nangu nax pexü̃́ natauxchaxü̃ nax choxü̃ piyauxgüxü̃, erü ñoma nixĩ i perü ora i nagu pemaxã naporaxü̃ i Chataná —ñanagürü.

Ore i mexü̃ ga Luca ümatüxü̃ 13:24

—Dauxü̃guxü̃ i naanearü ĩã̱x rü naxíraxüchi. ¡Rü paxa naxca̱x pedau nax nawa pichocuxü̃ca̱x! Erü pemaxã nüxü̃ chixu rü muxũchixü̃ma i duü̃xü̃gü tá nüxü̃́ nangúchaü̃ nax nawa yachocuxü̃, natürü taxũtáma nawa nangu nax nawa yachocuxü̃.

Norü taxre ga popera ga Timutéuca̱x naxümatüxü̃ ga Pauru 2:5

Rü ngẽxgumarüxü̃ ta wüxi i duü̃xü̃ i wüxi i ĩnücawa ixücuxü̃, rü taxuacüma nanayaxu i norü ãmare ega tama nagu yaxũxgu i ngẽma ĩnü̃caarü mugü.

Ore i mexü̃ ga Matéu ümatüxü̃ 16:17

Rü Ngechuchu nanangãxü̃ rü ñanagürü nüxü̃: —Cuma rü aixcüma cutaãxẽ, Pa Chimóü̃, Pa Yoná Nanex, erü taxuxü̃ma i duü̃xü̃ nixĩ i cuxü̃ nüxü̃ cua̱xẽẽxü̃ i ngẽma, natürü Chaunatü ya daxũgucü nixĩ ya cuxü̃ nüxü̃ cua̱xẽẽcü nax Nane chixĩxü̃.

Popera ga Yudíugü ga yaxõgüxü̃ca̱x ümatüxü̃ 12:4

Rü ñu̱xma i pema nax peyaxõgüxü̃, rü ngúxü̃ pingegü erü pecaduxü̃ perüxoe. Natürü taxúema i petanüwa rü ngẽmaca̱x yuwa tangu.

2 Corintios 11:14

Rü ngẽma rü taxuca̱xma namaxã pebaixãchiãẽgü. Erü woo i Chataná rü ta rü Tupanaarü orearü ngeruü̃gü i daxũcüã̱x i ya̱u̱xracüxü̃rüü̃ãcü nügü nango̱xẽxẽ.