Efesios 6:11 - Tupanaarü Ore

¹¹ ¡Rü pegü penaxǘ i guxü̃ma i ngẽma poxü̃ruxü̃gü ya Tupana pexna ãxü̃ nax ngẽmamaxã pegü ípepoxü̃xü̃ca̱x i ngẽxguma Chataná pexü̃ womüxẽxẽchaü̃gu!

Efesios 6:11 Referans Kwoze

2 Corintios 10:4

Erü ngẽma toxne i namaxã ítanapoxü̃xü̃ i Tupanaarü ore rü tama ñoma i naanecüã̱x namaxã ãxnexü̃ nixĩ. Erü toma rü toxü̃́ nangẽxma i Tupanaarü pora nax ngẽmamaxã itayanaxoxẽẽxü̃ca̱x i Chatanáarü pora rü itayanaxoxẽẽxü̃ca̱x i guxü̃ma i ngẽma ore i duü̃xü̃güaxü̃́ naguxchaxẽẽxü̃ nax tama Tupanaaxü̃́ yaxõgüãxü̃ca̱x. Rü guxü̃ma i ta̱xacü i nagu naxĩnüexü̃ i ngẽma duü̃xü̃gü i chixexü̃, rü Cristuna tanaxuaxü̃ nax nüma namaxã inacuáxü̃ca̱x.

Romanos 13:12

Rü woo nangẽxmagu i taxü̃ i chixexü̃ i ñoma ẽanexü̃rüxü̃ ixĩxü̃, natürü paxa tá ínangu ya Cristu nax nügüxü̃tawa tüxü̃ nagagüxü̃ca̱x. Rü ngẽmaca̱x name nixĩ i nüxü̃ tarüxoe i guxü̃ma i ngẽma chixexü̃ ixĩxü̃ rü nagu taxĩ i Tupanaarü ore i ñoma omürüxü̃ ixĩxü̃.

1 Tesalonicenses 5:8

Rü yixema nax ngóonexü̃wa ingẽxmagüxü̃, rü tanaxwa̱xe i guxü̃guma taxũãẽgü. Rü tanaxwa̱xe i tórü õmaxã rü tórü ngechaü̃maxã rü tórü maxü̃ i taguma gúxü̃ i ínanguxẽẽxü̃maxã yigü ítapoxü̃gü ñoma wüxi i churara rü norü poxü̃remüruxü̃maxã rü napate̱xemaxã nügü ípoxü̃xü̃rüxü̃.

Efesios 6:13

Rü ngẽmaca̱x name nixĩ i penayauxgü i guxü̃ma i ngẽma poxü̃ruü̃gü ya Tupana pexna ãxü̃, nax ngẽmaãcü pegü ípepoxü̃xü̃ca̱x i ngẽxguma ngẽma naãxẽgü pexü̃ nachixexẽẽchaü̃gu. Rü ngẽmaãcü taxũtáma pemaxã tapora i ngẽma naãxẽgü i chixexü̃ rü tá nüxü̃ perüporamaegü.

Nüxíraxü̃xü̃ ga popera ga Pedru ümatüxü̃ 5:8

Rü name nixĩ i guxü̃guma pegüna pedaugü rü ípexuãẽgü, erü perü uanü i Chataná rü ñoma wüxi ya leóü̃ ya idüraxüchicürüxü̃ nanañaane rü tümaca̱x nadau nax texéxü̃ tá chixexü̃gu nanguxẽẽxü̃.

2 Corintios 2:11

Rü ngẽmaãcü chanaxü nax tama nayoxniexü̃ca̱x i Chataná nax chixexü̃gu tüxü̃ nayixẽẽxü̃ca̱x. Erü yixema rü meama nüxü̃ tacua̱x i nacüma i Chataná rü ñuxãcü chixexü̃gu tüxü̃ nayixẽẽchaü̃xü̃.

Efesios 4:14

Rü taũtáma ñoma buxü̃gürüxü̃ tixĩgü i tórü õwa. Rü ngẽxguma ta̱xacürü to i ngu̱xẽẽtaexü̃ ixĩnüegu rü taxũtáma naga taxĩnüe nax tama ñoma buanecü ngextámare cuecürüxü̃ tüxü̃ yaxĩgüxẽẽxü̃ca̱x. Rü taxũtáma nawe tarüxĩ i ngẽma duü̃xü̃gü i norü doramaxã tüxü̃ womüxẽẽgüxü̃ rü norü ngu̱xẽẽtaemaxã tüxü̃ ítüexẽẽchaü̃xü̃.

Colosenses 3:10

Rü ñu̱xma rü marü penayaxu i ngexwaca̱xü̃xü̃ i perü maxü̃ rü ngexwaca̱xü̃xü̃ i duü̃xü̃gü pixĩgü. Rü guxü̃ i ngunexü̃gu rü Tupana pexü̃ ningexwacaxü̃xẽẽchigü nax yexeraãcü naxrüxü̃ pimexü̃ca̱x rü yexeraãcü nüxü̃ pecuáxü̃ca̱x ya Tanatü ya Tupana ya maxü̃ tüxna ãcü.

Romanos 13:14

Rü name i nacüma pexĩ i tórü Cori ya Ngechuchu ya Cristu. Rü tama name i naxca̱x pedau nax pexenearü ngúchaü̃gu pexĩxü̃.

2 Corintios 11:3

Natürü chaxoegaãxẽ erü yema ãxtape norü doramaxã Ébaxü̃ nawomüxẽẽxü̃rüxü̃, ngürüãchi tá ta texé pexü̃ tawomüxẽxẽ nax nüxü̃ perüxoexü̃ca̱x nax Cristugu perüxĩnüexü̃ rü naxca̱xicatama nax pemaxẽxü̃.

2 Corintios 6:7

Rü duü̃xü̃güxü̃ nüxü̃ tadauxẽxẽ nax aixcüma mea namaxã nüxü̃ tixu i ngẽma ore i aixcüma ixĩxü̃, rü itanawe̱x i Tupanaarü pora i towa ngẽxmaxü̃. Rü ngẽma toxne ixĩxü̃, rü ngẽma nixĩ i torü maxü̃ i aixcüma mexü̃. Rü ngẽmamaxã nixĩ i togü ítapoxü̃xü̃ i torü uanügüpe̱xewa.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:24

Natürü pemax i Tiatíracüã̱x i tama nagu ĩxẽ i ngẽma ngexü̃arü ngu̱xẽẽtae rü taguma nawa ngúexe i ngẽma ore i togü naxugügu rü Chatanáarü ore i ẽxü̃guxü̃ ixĩxü̃, rü pemaxã nüxü̃ chixu rü ngẽma pexü̃́ chanaxwa̱xexü̃ nixĩ nax peyaxõgüxü̃ i ngẽma chorü ore ñu̱xmatáta íchangu i chomax. Rü ngexicatama nixĩ i pexü̃́ chanaxwa̱xexü̃.

Efesios 4:24

Rü name i penayaxu i ngẽma ngexwaca̱xü̃xü̃ i nacüma ya Tupana pexca̱x mexẽẽxü̃ i nacümarüxü̃ ixĩxü̃. Rü ngẽxguma aixcüma ngẽma nacümagu pexĩxgu rü nawe̱xgu i perü maxü̃ rü ngẽmawa nataxuma i ta̱xacürü chixexü̃.

Popera ga Yudíugü ga yaxõgüxü̃ca̱x ümatüxü̃ 7:25

Rü ngẽmaca̱x nüxü̃́ natauxcha nax tüxü̃ namaxẽxẽẽxü̃ ya guxãma ya yíxema norü ngü̃xẽẽmaxã Tupanaxü̃tawa ngugüxe. Erü nüma ya Ngechuchu rü guxü̃guma namaxecha nax Tupanape̱xewa tümaétüwa nachogüxü̃ca̱x.

Popera ga Yúda ümatüxü̃ 1:24

Rü yimá nüxicatama Tupana ixĩcü ya tórü Maxẽxẽẽruxü̃ ixĩcü, rü nüxü̃́ nangẽxma i pora nax pexna nadauxü̃ nax tama pecadugu peyixü̃ca̱x. Rü nüxü̃́ nangẽxma i pora nax iyanaxoxẽẽãxü̃ca̱x i perü chixexü̃gü nax ngẽmaãcü ngearü pecaduãcüma rü taãẽãcüma nape̱xewa pengugüxü̃ca̱x i ngextá nüma ínaxüünexü̃wa ãẽ̱xgacü íyixĩxü̃wa. Rü tanaxwa̱xe i tórü Cori ya Ngechuchu ya Cristuégagu Tupanaxü̃ ticua̱xüü̃gü, erü nüma rü naxüüne, rü guxü̃étüwa nangẽxma, rü guxü̃arü yexera napora, rü guxü̃maxã inacua̱x. Rü yemaacü nixĩ ga nũxcüma, rü ngẽmaãcü nixĩ i ñu̱xmax, rü guxü̃gutáma ngẽmaãcü nixĩ. Rü ngẽmaãcü yixĩ.

2 Corintios 4:4

Erü nümagü nax tama yaxõgüãxü̃, rü ñoma i naanearü ãẽ̱xgacü i Chataná nixĩ i nüxü̃́ naguxchaxẽẽxü̃ nax tama nüxü̃ nacua̱xgüxü̃ca̱x i Cristu ya Üünecüarü ore i ñoma omürüxü̃ poraãcü nangóonexẽẽxü̃. Rü Cristuwa nixĩ i nügü nawéxü̃ ya Tupana.

1 Corintios 10:13

Rü taguma pexca̱x ínangu i ta̱xacürü ngúchaü̃ i chixexü̃ i taxucürüwama duü̃xü̃ yáxna namaxã ĩnüxü̃. Rü name nixĩ i Tupanaaxü̃́ peyaxõ erü nüma rü taxũtáma nawa pexü̃ nawogü i ngúchaü̃gü i taxucürüwama yáxna namaxã pexĩnüexü̃. Natürü ngẽxguma tá ngúchaü̃gü i chixexü̃ pexca̱x ínguxgu, rü nüma rü tá pexü̃ ínapoxü̃ nax tama nagu peyixü̃ca̱x.

Ore i mexü̃ ga Márcu ümatüxü̃ 13:22

Erü Cristunetagü rü Tupanaarü orearü uruü̃netagü tá ínangugü. Rü tá nanaxügü i muxü̃ma i cua̱xruü̃gü i taxü̃gü. Rü ngẽmaãcü, ega nüxü̃́ natauxchagu, rü tá tüxü̃ nawomüxẽẽgü woo ya yíxema duü̃xẽgü ya Tupanatama tüxü̃ dexe.

Yema Cuáü̃ nüxü̃ dauxü̃ i yixcüra tá ngupetüxü̃chiga 12:9

Rü ínata̱xüchi ga daxũguxü̃ ga naanewa ga yema coya ga yema nũxcümaü̃xü̃ ga ãxtape. Rü nüma rü Ngo̱xogu rü Chatanágu naxãéga. Rü nüma nixĩ i guxü̃ma i ñoma i naanecüã̱x i duü̃xü̃güxü̃ nawomüxẽẽxü̃. Rü nüma rü norü orearü ngeruü̃gümaxã ñoma ga naanegu narüwoü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:20

Rü yema nüxíraxü̃xü̃ ga ngo̱xo rü niyaxu. Rü wüxigu namaxã niyaxu ga yema to ga ngo̱xo ga orearü uruü̃neta ixĩxü̃ ga yema nüxíraxü̃xü̃ ga ngo̱xope̱xewa naxüxü̃ ga cua̱xruü̃gü ga duü̃xü̃gü tama nüxü̃ cuáxü̃ nax naxügüãxü̃. Rü yema cua̱xruü̃gümaxã nixĩ ga nawomüxẽẽãxü̃ ga yema duü̃xü̃gü ga nüxü̃ icua̱xüü̃güxü̃ ga naxchicüna̱xã ga yema nüxíraxü̃xü̃ ga ngo̱xo rü nügü ixãgüxü̃ nax yema ngo̱xoégamaxã nax yaxüégagüxü̃. Rü yema nüxíraxü̃xü̃ ga ngo̱xo rü yema to ga ngo̱xo ga orearü uruü̃neta ixĩxü̃, rü wüxigu maxẽxacü̃ma nawa nawoü̃ ga gumá naxtaxa ga achúfremaxã iya̱u̱xrachiüne.

Popera ga Chantiágu ümatüxü̃ 4:7

Pa Chauenexẽgüx, ¡Mea Tupanaga pexĩnüe! ¡Rü nüxü̃ pexoó i ngo̱xo i Chataná! Rü nüma rü tá pexna niña.

Ãẽ̱xgacügü ga guxchaxü̃güarü mexẽxẽruü̃gü 3:2

Nüma ga Cori ya Tupana rü yéma Canaáü̃arü naanewa nayaxügüxẽxẽ ga yema duü̃xü̃gütücumü nax yemaacü daixü̃ yacuáxü̃ca̱x ga yema Iraétanüxü̃ ga taguma daiwa ĩxü̃.

Neemía 4:13

Rü yemaca̱x ga choma rü chanamu ga duü̃xü̃gü nax nügütanüxü̃chigüãcü nügü iyanuxü̃ca̱x ga yema naxtapü̱xpechitagu ga ínanuxchanexü̃wa rü ínaxãxmaxetüchigüxü̃wa, rü taramaxã, rü wocaemaxã, rü würamaxã ixãxnexü̃ nax yemamaxã nügü ínapoxü̃güxü̃ca̱x.