Efesios 5:11 - Tupanaarü Ore

¹¹ Rü tama name i pema rü ta nagu pexĩ i ngẽma chixexü̃gü i taxuwama mexü̃ i ngẽma togü i duü̃xü̃gü i ẽanexü̃wa ngẽxmagüxü̃ ügüxü̃. Natürü narümemae nixĩ i penango̱xẽxẽ nax nachixexü̃ i ngẽma naxügüxü̃.

Efesios 5:11 Referans Kwoze

Romanos 13:12

Rü woo nangẽxmagu i taxü̃ i chixexü̃ i ñoma ẽanexü̃rüxü̃ ixĩxü̃, natürü paxa tá ínangu ya Cristu nax nügüxü̃tawa tüxü̃ nagagüxü̃ca̱x. Rü ngẽmaca̱x name nixĩ i nüxü̃ tarüxoe i guxü̃ma i ngẽma chixexü̃ ixĩxü̃ rü nagu taxĩ i Tupanaarü ore i ñoma omürüxü̃ ixĩxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 5:20

Natürü ngẽma yaxõgüxü̃arü ãẽ̱xgacügü i aixcüma pecadugu maxẽxü̃, rü name nixĩ i guxü̃ i yaxõgüxü̃pe̱xewa cunaxucu̱xẽ, nax guxü̃ma i ngẽma togü i yaxõgüxü̃arü ãẽ̱xgacügü rü ta namuü̃exü̃ca̱x nax naxügüãxü̃ i ta̱xacürü chixexü̃.

2 Tesalonicenses 3:6

Pa Chauenexẽgüx, tórü Cori ya Ngechuchu ya Cristuégagu pexü̃ tamu nax nüxna pixĩgachixü̃ca̱x i ngẽma yaxõxü̃ i tama nagu ixũxü̃ i ngẽma pexü̃ tangúexẽẽxü̃.

Romanos 16:17

Pa Chauenexẽgüx, pexü̃ chaca̱a̱xü̃ nax pegüna pedaugüxü̃ca̱x nüxna i ngẽma duü̃xü̃gü i pexü̃ itoyechaü̃xü̃ rü chixexü̃gu pexü̃ yixẽẽchaü̃xü̃. Erü ngẽma duü̃xü̃güarü ngu̱xẽẽtae rü tama namaxã nawüxigu i ngẽma ngu̱xẽẽtae ga noxri peyauxgüxü̃ ga yexguma noxri peyaxõgügu. Rü name nixĩ i noxtacüma nüxna pixĩgachi i ngẽma duü̃xü̃gü rü tama natanügu pexãgü.

Yema Cuáü̃ nüxü̃ dauxü̃ i yixcüra tá ngupetüxü̃chiga 18:4

Rü ñu̱xũchi nüxü̃ chaxĩnü ga to ga naga ga daxũguxü̃ ga naanewa inaxũxü̃ ga ñaxü̃: “¡Guxãma i pema ya chorü duü̃xü̃gü ixĩgüxe, rü ípechoxü̃ nawa ya yima ĩane nax tama yima ĩanecüã̱xrüxü̃ chixexü̃gu pemaxẽxü̃ca̱x rü tama naxrüxü̃ pipoxcuexü̃ca̱x namaxã i ngẽma poxcu i tá yima ĩanewa nguxü̃!

Popera ga Títoca̱x naxümatüxü̃ ga Pauru 2:15

Rü ngẽma ore tá nixĩ i Tupanaarü poramaxã duü̃xü̃güxü̃ namaxã cungúexẽẽxü̃ rü nüxü̃́ cunangúchaü̃xẽẽxü̃ rü namaxã cunaxucu̱xẽxü̃ nax Tupanaca̱x namaxẽxü̃ca̱x. Rü tama name nax texé cuxü̃ oxü̃.

2 Tesalonicenses 3:14

Rü ngẽxguma texé tama naga ĩnügu i ñaa ore i poperawa pemaxã nüxü̃ tixuxü̃, rü name i penangugü nax texé tixĩxü̃. Rü tama name i tümamaxã pexãmücü nax taxãneexü̃ca̱x i tümax.

Romanos 6:21

¿Natürü ta̱xacüwa pexü̃́ namexü̃ ga yema chixexü̃ ga ü̃pa pexüxü̃ rü ñu̱xma ãne pexna ãxü̃? Yerü yema chixexü̃ rü yuwamare pexü̃ nagagü.

Norü taxre ga popera ga Timutéuca̱x naxümatüxü̃ ga Pauru 3:5

Rü tá nügü nayaxõgünetaxẽxẽ natürü ngẽma norü chixexü̃ i naxügüxü̃wa tá nango̱xoma nax tama aixcüma yaxõgüãxü̃ i ngẽma ore i mexü̃. Rü ngẽma duü̃xü̃gü i ngẽmaãcü maxẽxü̃, rü tama name nax namaxã cuxãmücüxü̃ rü natanügu cuxãxü̃.

Gálatas 6:8

Rü yíxema tümaxü̃nearü ngúchaü̃ üxe, rü ngẽma tümaxü̃nearü ngúchaü̃ rü tá yuwa tüxü̃ naga. Natürü yíxema Tupanaãxẽ i Üünexü̃arü ngúchaü̃ üxe, rü ngẽma Tupanaãxẽ i Üünexü̃wa tá tanayaxu i maxü̃ i taguma gúxü̃.

Ucu̱xẽgüchiga 29:1

Texé ya tama nayaxúxe i ucu̱xẽ, rü paxa tá guxchaxü̃ tümaca̱x ínangu, rü taxúetama tümaétüwa tachogü.

Ucu̱xẽgüchiga 13:18

Yíxema nüxü̃ oxe i ucu̱xẽ i mexü̃, rü tá tangearü diẽruã̱x, rü duü̃xü̃gü rü tá chixri tümachiga nidexagü. Natürü yíxema naga ĩnüxe i ucu̱xẽ i mexü̃, rü duü̃xü̃gü tá tümamaxã nataãẽgü.

Lebítanüxü̃arü puracüchiga 19:17

¡Rü taxṹ i naxchi cuxaiechaxü̃ i cuenexẽ! ¡Rü naxuxcu̱xẽ i cumücü i ngẽxguma chixexü̃ naxü̱xgu rü taxṹ i norü chixexü̃gu cuxãxü̃!

1 Tesalonicenses 5:7

Erü ngẽma duü̃xü̃gü i naechitamare maxẽxü̃ rü ñoma duü̃xü̃gü i chütacü peexü̃rüxü̃ nixĩgü. Rü ngẽma duü̃xü̃gü i axegüxü̃ rü chütacü nixĩ i nügü nangãxẽxẽẽxü̃.

Ore i mexü̃ ga Luca ümatüxü̃ 3:19

Rü Cuáü̃ rü ãẽ̱xgacü ga Eródexü̃ naxoregü, yerü ngĩmaxã naxãxma̱x ga Erodía ga naenexẽ ga Ferípe naxma̱x. Rü yexgumarüxü̃ ta nüxü̃ naxoregü naxca̱x ga yema togü ga chixexü̃ ga naxüxü̃.

Efesios 5:7

Rü ngẽmaca̱x tama name i namaxã pexãmücü rü naga pexĩnüe i ngẽma duü̃xü̃gü.

Efesios 4:22

Rü ngẽmaca̱x name nixĩ i nüxü̃ perüxoe i ngẽma nũxcümaü̃xü̃ i pecümagü ga ü̃pa nagu pexĩxü̃. Yerü yema nũxcümaü̃xü̃ ga perü maxü̃ rü nachixexüchi nagagu ga yema pexenearü ngúchaü̃gü i pexü̃ womüxẽẽxü̃.

Ichaía 29:21

Rü ngẽxgumarüxü̃ tá ta inayarüxo i ngẽma ãẽ̱xgacüpe̱xewa doraxü̃ ixugüexü̃ nax tapoxcuxü̃ca̱x ya yíxema taxuxü̃ma i chixexü̃ üchiréxe.

Ucu̱xẽgüchiga 25:12

Texé ya nüxü̃ ĩnüxe i ucu̱xẽ i cua̱x tüxna ãxü̃, rü ngẽma ucu̱xẽ rü ñoma wüxi i ãnera rü wüxi i nachagü i mexẽchixü̃ i úiruwa üxü̃rüxü̃ nixĩ nax tümaca̱x namexü̃ ya yíxema nayaxúxe.

Wiyaegü 141:5

Rü choxü̃́ rü wüxi i ngü̃xẽxẽ nixĩ ega ngẽxguma choxü̃ nawe̱xãchixẽẽgu i wüxi i duü̃xü̃ i cupe̱xewa mexü̃. Natürü ngẽma norü ucu̱xẽ i ngẽma chixexü̃ ügüxü̃ rü tama choxü̃́ name rü taxũtáma naga chaxĩnü. Rü guxü̃gutáma chayumüxẽ nax nüxü̃ naxoexü̃ca̱x i ngẽma chixexü̃ i nagu ínamaxẽxü̃ uxcuxẽ

Naanearü ügüchiga 20:16

Rü Cháraxü̃ ñanagürü: —Rü ngẽma cuenexẽna chaxãxü̃ rü 1,000 tachinü i diẽru naxãtanü. Rü ngẽmaãcü guxü̃ma i ngẽma duü̃xü̃gü i cumaxã ngẽxmagüxü̃ rü tá nüxü̃ nacua̱x nax taxuxü̃ma i chixexü̃ cuxüxü̃. Rü taxúetama chixri cuchiga tidexa —ñanagürü.

Ucu̱xẽgüchiga 19:25

Ngẽxguma napoxcugu i ngẽma tama ixĩnüchaü̃xü̃, rü ngẽma tama naãẽxü̃ cuáxü̃ rü tá naxuãxẽ rü tama chixexü̃ naxü. Natürü ngẽma naãẽxü̃ cuáxü̃, rü wüxi i ucu̱xẽmaxãtama nixĩ i yanawe̱xãchixü̃.

Ucu̱xẽgüchiga 15:12

Ngẽma naechitamare maxü̃xü̃, rü tama tüxü̃ nangechaü̃ ya yíxema ucu̱xẽ nüxna ãxe, rü tama tümamaxã naxãmücü ya yíxema cua̱x tüxü̃́ ngẽxmaxe.

Ore i mexü̃ ga Matéu ümatüxü̃ 18:15

Rü ngẽxguma cuenexẽ chixexü̃ cuxca̱x ínguxẽẽgu, rü name nixĩ i nüxicatama namaxã quidexa. ¡Rü naxucu̱xẽ, rü nüxna nüxü̃ nacua̱xãchixẽxẽ i ngẽma chixexü̃ i cuxca̱x ínanguxẽẽxü̃! Rü ngẽxguma cuga naxĩnügu, rü cuma rü marü wenaxarü mexü̃ca̱x cunatáeguxẽxẽ i ngẽma cuenexẽ.

Yeremía 15:17

Rü choma rü tama namaxã chaxãmücü i ngẽma duü̃xü̃gü i norü petaguxicatama rüxĩnüexü̃. Rü yexguma cuma choxü̃ cuyaxu̱xgucürüwatama rü marü chaxicatama ichayarüxũü̃xü̃. Erü cuma naxchi choxü̃ cuxaixẽxẽ i ngẽma duü̃xü̃gücüma i chixexü̃.

Ucu̱xẽgüchiga 1:31

Nagagu i ngẽma pecüma i chixexü̃gü rü tá ngúxü̃ pingegü, rü düxwa tá namaxã penaxĩ̱xãchiãẽgü i ngẽma perü ĩnügü i chixexü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:5

Rü ngẽmaãcü i ngẽma duü̃xü̃gü i chixeãẽgüxü̃, rü nügümaxã nanueecha, rü tama nüxü̃ nacua̱xgü i ngẽma ore i aixcüma ixĩxü̃, rü nagu narüxĩnüe rü Tupanaarü orewa yixĩxü̃ i diẽru ngĩxü̃ nayauxgüxü̃.

Ucu̱xẽgüchiga 1:10

Ngẽxguma ngẽma chixexü̃gu maxẽxü̃ cuxü̃ womüxẽẽgüchaü̃gu ¡rü taxṹ i naga cuxĩnüxü̃, Pa Chaunex!

Ucu̱xẽgüchiga 28:4

Ngẽma nüxna ixĩgachitanüxü̃ i Cori ya Tupanaarü mugü, rü nüxü̃ nicua̱xüü̃gü i ngẽma chixexü̃ ügüxü̃. Natürü ngẽma naga ĩnüexü̃ i Coriarü mugü, rü tama namaxã nataãẽgü i ngẽma chixexü̃ ügüxü̃.

Ngechuchuarü ngúexü̃gü ga yamugüxü̃arü puracüchiga 26:18

Rü cuxü̃ chamu nax ngẽma duü̃xü̃güxü̃ choxü̃ cucua̱xẽẽxü̃ca̱x rü nüxü̃ naxoexü̃ca̱x i nacüma i chixexü̃gü rü chauga naxĩnüexü̃ca̱x. Rü cuxü̃ chamu nax Chatanáme̱xẽwa ícunanguxü̃xẽẽxü̃ca̱x i ngẽma duü̃xü̃gü nax chowe naxĩxü̃ca̱x rü choxü̃́ yaxõgüãxü̃ca̱x nax choma nüxü̃́ nüxü̃ icharüngümaxü̃ca̱x i norü pecadugü, rü nüxü̃́ nangẽxmaxü̃ca̱x i nachica natanüwa i guxü̃ma i chorü duü̃xü̃gü i üünegüxü̃”, ñanagürü choxü̃ ga Cori.

Efesios 5:12

Erü ngẽma chixexü̃ i cúãcüma naxügüxü̃ i ngẽma yatügü rü ngexü̃gü, rü woo nachiga idexagümaregu rü wüxi i ãnexüchi nixĩ.

Colosenses 1:12

Rü ngẽmaãcü penaxwa̱xe nax taãẽãcüma Tanatü ya Tupanana moxẽ pexãgüxü̃, erü nüma pexü̃ nimexẽẽgü nax pema rü ta penayauxgüxü̃ca̱x i ngẽma mexü̃gü i nüma tá nüxna naxãxü̃ i ngẽma norü duü̃xü̃gü ixĩgüxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 5:22

Rü ngẽxguma texéxü̃ quingucuchixẽẽchaü̃gu nax ngẽma yaxõgüxü̃arü ãẽ̱xgacü tixĩxü̃ca̱x, ¡rü taxṹ i cuñuxãẽxü̃ nax namaxã cuyumüxẽxü̃ i wüxi i duü̃xü̃ i tama nüxü̃ cucuáxü̃ i norü maxü̃! Natürü name nixĩ i noxri mea nagu curüxĩnü i ngẽma, erü ngürüãchi tá wüxi i duü̃xü̃ i pecadu üechaxü̃ quingucuchixẽxẽ, rü cugagu tá nixĩ, erü tama ícuxuãxẽ. ¡Rü mea cugüna nadau nax tama pecadugu cunguxü̃ca̱x!