Efesios 4:31 - Tupanaarü Ore

³¹ ¡Rü nüxü̃ perüxoe nax nagu perüxĩnüexechaxü̃ ega texé ta̱xacürü chixexü̃ pexca̱x uxgux! Rü ngẽxgumarüxü̃ ta name nixĩ nax nüxü̃ perüxoexü̃ nax pegüchi pexaiexü̃, rü pegümaxã penuexü̃, rü pegü nax pengaexü̃, rü pegümaxã peguxchigagüxü̃. Rü ngẽmaãcü name nax nüxü̃ perüxoexü̃ i guxü̃ma i ngẽma chixexü̃ i dexagü.

Efesios 4:31 Referans Kwoze

Colosenses 3:8

¡Natürü i ñu̱xma rü nüxü̃ perüxoe i guxü̃ma i ngẽma nax pegüchi pexaiexü̃, rü pegümaxã penuexü̃, rü chixexü̃gu pemaxẽxü̃, rü pegümaxã peguxchigagüxü̃, rü guxü̃ma i ngẽma chixexü̃ i dexa i nüxü̃ pixuxü̃!

Ngu̱xẽẽtaeruü̃arü ore 7:9

¡Rü taxṹ i cugü nüxna cuxã i ngẽma nu! Erü ngẽma nu nixĩ i duü̃xü̃gü i naechitamare maxẽxü̃maxã icuáxü̃.

Nüxíraxü̃xü̃ ga popera ga Pedru ümatüxü̃ 2:1

Rü ngẽmaca̱x name nixĩ i nüxü̃ perüxoe i guxü̃ma i chixexü̃gü, rü ngẽma nax pidorata̱a̱xgüxü̃, rü ngẽma nax togüpe̱xewa mea pemaxẽnetaxü̃, rü ngẽma nax pixãũxãchiwa̱xegüxü̃, rü ngẽma nax pixoregüta̱a̱xgüxü̃.

Popera ga Chantiágu ümatüxü̃ 1:19

Rü guxãma i pemax, Pa Chauenexẽgü ya Pexü̃ Changechaü̃güxe, rü ngẽxguma texé pemaxã idexagu, rü name nixĩ i mea iperüxĩnüe. Rü tama name i penue rü tüxü̃ pechoxü̃gagü.

Colosenses 3:19

Pa Yatügü i Ãma̱xgüxü̃x, rü name nixĩ i ngĩxü̃ pengechaü̃gü i pema̱xgü. Rü tama name nax ngĩmaxã pechixecümagüxü̃.

Popera ga Chantiágu ümatüxü̃ 3:14

Natürü ngẽxguma chi pixãũxãchiwa̱xegügu rü pegüchi pexaiegu rü togüarü yexera pegü pixĩxẽẽchaü̃gu, rü taxuca̱xma pegü picua̱xüü̃gü, rü ngẽma nagu perüxĩnüexü̃ rü wüxi i doramare nixĩ.

Efesios 4:26

Rü ngẽxguma ta̱xacüca̱x penúxgu rü ¡pegüna pedaugü nax tama pecadu pexüxü̃ca̱x! Rü name i ngẽmatama ngunexü̃gu perüngüxmü naxü̃pa nax yanaxücuxü̃ ya üa̱xcü.

Nüxíraxü̃xü̃ ga popera ga Cuáü̃ ümatüxü̃ 3:12

Rü tama tanaxwa̱xe nax Caíü̃rüxü̃ ixĩgüxü̃. Nüma rü Chatanáarü duü̃xü̃ nixĩ rü naenexẽxü̃ nima̱x. ¿Rü ta̱xacüca̱x nixĩ ga yamáaxü̃? Nayama̱x yerü yema nüma naxüxü̃ rü tama name, rü yema naenexẽ üxü̃ rü name.

Wiyaegü 101:5

Rü tá chayanangea̱xgüxẽxẽ i ngẽma duü̃xü̃gü i namücügüechita chixri tümachiga idexagüxü̃. Rü taxũtáma yáxna namaxã chaxĩnü i ngẽma duü̃xü̃gü i to̱xguã̱xétüwa nügü ügüxẽxẽchaü̃xü̃ rü ngẽma norü poramaxã nügü icua̱xüxü̃güxü̃.

Popera ga Chantiágu ümatüxü̃ 4:11

Pa Chauenexẽgüx, ¡Taxṹ i chixexü̃maxã pegü pixugüxü̃! Erü yíxema chixexü̃maxã tümaenexẽchigagu idexáxe rüe̱xna chixexü̃maxã nüxü̃ dawenüxẽ, rü chixexü̃ nüxü̃ tawogü ta i Tupanaarü mugü. Rü ngẽxguma chixexü̃gu Tupanaarü mugümaxã curüxĩnügu, rü Tupanaarü mugüarü yexera cugü quixĩxẽẽchaü̃, rü tama aixcüma naga cuxĩnü.

Ucu̱xẽgüchiga 26:20

Ngẽxguma nataxu̱xgu i naichacüxü rü yima üxü rü nixo. Rü ngẽxgumarüxü̃ ta ega taxúema oregüxü̃ ixuxgu rü nataxuma i nu.

Popera ga Títoca̱x naxümatüxü̃ ga Pauru 1:7

Erü yíxema yaxõgüxü̃arü ãẽ̱xgacü ixĩxẽ, rü Tupanaarü puracümaxã nixĩ i tacuáxü̃. Rü ngẽmaca̱x tanaxwa̱xe i aixcüma mea tamaxü̃. Rü tama name i wüxi i yatü i chixecümaxü̃ tixĩ rü chixexü̃gu rüxĩnüxü̃ tixĩ. Rü tama name nax tangãxü̃xü̃, rü nuca̱x tadauxü̃, rü duü̃xü̃güxü̃ tawomüxẽẽxü̃ norü diẽruca̱x.

Nüxíraxü̃xü̃ ga popera ga Timutéuca̱x naxümatüxü̃ ga Pauru 3:11

Rü naxma̱xgü i ngẽma yatügü i diácunugü, rü name nax duü̃xü̃gü nüxü̃ ngechaü̃güxü̃ yaxĩgüxü̃. Rü tama name i oregüta̱xaxgüxü̃ nixĩgü, natürü tanaxwa̱xe i mea namaxẽ rü aixcüma nayanguxẽẽgü i guxü̃ma i ngẽma nüxü̃ yaxugüxü̃.

2 Corintios 12:20

Erü chaxoegaãxẽ rü ngẽxguma wena pexü̃ íchayada̱u̱xgu, rü ngürüãchi taxũtáma choma chanaxwa̱xexü̃ãcüma pexü̃ ichayangau, rü pema rü taxũtáma penaxwa̱xexü̃ãcüma choxü̃ pedaugü. Rü chaxoegaãxẽ erü ngürüãchi tá pexü̃ ichayangau nax pegüchi ípexaiexü̃, rü pegüarü ngẽmaxü̃güca̱x pixãũxãchigüxü̃, rü pegümaxã penuexü̃, rü pegüguxicatama íperüxĩnüexü̃, rü pexoregüta̱a̱xgüxü̃, rü toguã̱xü̃ pixuxü̃, rü pegü picua̱xüü̃güxü̃, rü chixexü̃ ípexüexü̃, rü ngẽmaãcü chixri ípemaxẽxü̃.

1 Corintios 14:20

Pa Chauenexẽgüx, tama name i ñoma buxü̃gürüxü̃ nagu perüxĩnüe i ngẽma ore i pemaxã nüxü̃ chixuxü̃. Rü narümemae nixĩ i ñoma buxü̃gürüxü̃ pegü pixĩgüxẽxẽ na̱xcha̱xwa i ngẽma chixexü̃. Natürü ngẽma perü ĩnüwa rü penaxwa̱xe i duü̃xü̃gü i marü yáxü̃rüxü̃ mea nagu perüxĩnüe rü nagu pexĩ i ngẽma ore i pemaxã nüxü̃ chixuxü̃.

Ucu̱xẽgüchiga 29:22

Texé ya nuwa̱xexe rü nu ítanguxẽxẽ, rü poraãcü ítatü.

Ucu̱xẽgüchiga 14:17

Ngẽma nuwa̱xexü̃ rü naechitamare namaxü̃ rü chixexü̃ naxü. Natürü yíxema tümaãẽxü̃ cuáxe rü yáxna namaxã taxĩnü i ngẽxguma guxchaxü̃gü tümaca̱x ínguxgu.

Ucu̱xẽgüchiga 10:18

Ngẽma idorata̱xáxü̃ rü tama nanango̱xẽxẽ ega ngẽxguma duü̃xẽchi naxaixgu, rü ngẽma tama naãẽxü̃ cuáxü̃ rü naxoregüta̱a̱x.

Ucu̱xẽgüchiga 10:12

Ngẽma nax yigüchi ixaiexü̃ rü dai ínanguxẽxẽ, natürü yigü nax ingechaxü̃xü̃, rü yigüxü̃́ nüxü̃ itarüngüma i guxü̃ma i tórü guxchaxü̃gü.

Nüxíraxü̃xü̃ ga popera ga Timutéuca̱x naxümatüxü̃ ga Pauru 5:13

Rü ngĩmagü rü ĩpatawa iyaxĩxchigümare rü tama ipuracüechaü̃. Rü tama ngẽmaxicatama ixügü, natürü düxwa ixoregütaxáx, rü guxü̃raxü̃xü̃ i ore i tama mexü̃ i togüchiga iyaxugü.

Gálatas 5:20

Rü tupananetachicüna̱xãgüxü̃ nicua̱xüü̃gü, rü yuüca̱x nangúe, rü aigu narüxĩnüe, rü nachoxü̃gawa̱xegü, rü ta̱xacü ninuxü̃wa̱xegü, rü nanuxwa̱xegü, rü duü̃xü̃güxü̃ naxucu̱xẽgü nax tama wüxigu naxĩnüexü̃ca̱x. Rü nayatoye i duü̃xü̃gü, rü nügü nixüxchimüü̃gü.

1 Corintios 5:8

Rü ngẽmaca̱x nüxü̃ tarüxoe i nũxcümaü̃xü̃ i tacüma i chixexü̃gü rü taxü̃nearü ngúchaü̃gü i ñoma paũ i pu̱xẽẽruxü̃ã́xü̃rüxü̃ ixĩxü̃. Rü tanaxüchiga i tórü Üpetüchiga namaxã i tórü maxü̃ i aixcüma mexü̃ i ñoma paũ i ngearü pu̱xẽẽruxü̃ã́xü̃rüxü̃ ixĩxü̃.

Romanos 3:14

Rü tümaã̱x rü chixexü̃ i oremaxã rü numaxã nanapa.

Ucu̱xẽgüchiga 25:23

Yimá buanecü ya nórtewaama ne ũcü rü pucü ínanguxẽxẽ. Rü yimá conü ya chixexü̃maxã idexacü rü nu ínanguxẽxẽ.

Ucu̱xẽgüchiga 18:8

Ngẽma oregüta̱xáxü̃arü ore rü ñoma wüxi i maixcuraxü̃rüxü̃ nixĩ, rü tauxchaãcü duü̃xü̃güarü maxü̃wa nixücu.

Wiyaegü 140:11

¡Rü taxṹ i cunamaxẽxẽchaü̃xü̃ i ñoma i naanewa i ngẽma guxchigawa̱xexü̃! ¡Rü ngẽma máxwa̱xexü̃ rü nüxna nangu i ngẽma chixexü̃ nax ngẽma yamáxü̃ca̱x!

Wiyaegü 64:3

Erü norü conü rü ñoma tararüxü̃ nate̱xechi nax doraxü̃ yaxuxü̃. Rü ñoma naxnegürüxü̃ inanaña i norü dexagü i poraãcü tüxü̃́ nangu̱xẽẽxü̃.

Wiyaegü 50:20

Rü cuma rü chixri nachiga quidexa ya cumücü. Rü yimá cuenexẽxü̃chi rü namaxã cuguxchiga.

Wiyaegü 15:3

rü tama texéchiga chixri idexaxe, rü taxuxü̃ma chixexü̃ tümamücümaxã ǘxe, rü tama chixexü̃ i oremaxã tümamücüxü̃ nga̱xe,

2 Chamué 19:27

Rü cuxü̃tawa naxũ nax chauchiga doraxü̃ cumaxã yaxuxü̃ca̱x. Natürü cumax, Pa Ãẽ̱xgacüx, rü ñoma wüxi i Tupanaarü orearü ngeruü̃rüxü̃ i dauxü̃cüã̱xrüxü̃ quixĩ. Rü ngẽmaca̱x ẽcü ¡naxü i ngẽma cuxca̱x rümemaexü̃!

Naanearü ügüchiga 37:4

Natürü yexguma naenexẽgü nüxü̃ icua̱xãchitanügu nax norü yexera Yúchexü̃ tangechaü̃xü̃ ga nanatü, rü yemaca̱x Yúchechi naxaie, rü tama nüxü̃ narümoxẽgüchaü̃.

Naanearü ügüchiga 27:41

Rü yexgumacürüwa ga Echaú rü Acóbuchi naxai naxca̱x ga yema mexü̃ ga Acóbumaxã taxueguxü̃ ga nanatü. Rü nüma ga Echaú rü ñaxü̃gu narüxĩnü: —Papa rü paxa tá tayu, rü tümawena rü tá chayama̱x ya chauenexẽ ya Acóbu —ñaxü̃gu narüxĩnü.

Naanearü ügüchiga 4:8

Rü wüxi ga ngunexü̃gu rü Caíü̃ rü naenexẽ ga Abéna naxu nax naanegu naxĩaneãxü̃ca̱x. Rü yexguma marü naanewa nayexmagügu, rü Caíü̃ rü naenexẽ ga Abéna nayuxu rü nayama̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 12:10

Rü ñu̱xũchi nüxü̃ chaxĩnü ga wüxi ga naga ga daxũguxü̃ ga naanewa tagaãcü ñaxü̃: “Ñu̱xma rü marü nawa nangu nax tórü Tupana namaxẽxẽẽãxü̃ i duü̃xü̃gü. Rü nüma rü marü nua naxũ nax norü poramaxã guxü̃arü ãẽ̱xgacü yixĩxü̃ca̱x. Rü Nane ya Cristu rü marü ínangu nax nüma guxü̃maxã inacuáxü̃ca̱x. Erü marü daxũguxü̃ i naanewa ínata̱xüchi i Chataná ga ngunecü rü chütacü tórü Tupanape̱xewa taenexẽgüxü̃ ixugüechaxü̃.

Nüxíraxü̃xü̃ ga popera ga Cuáü̃ ümatüxü̃ 3:15

Rü yíxema tümaenexẽchi aixe rü wüxi i máẽtaxü̃ tixĩ. Rü pema nüxü̃ pecua̱x rü wüxi i máẽtaxü̃ rü nüxü̃́ nataxuma i norü maxü̃ i taguma gúxü̃.

Popera ga Títoca̱x naxümatüxü̃ ga Pauru 2:3

Rü ngẽxgumarüxü̃ ta chanaxwa̱xe i mea cuyaxucu̱xẽgü i ngẽma ngexü̃gü i yáxü̃ nax mea Tupanape̱xewa namaxẽxü̃ca̱x. Rü tama name nax yaxoregüta̱a̱xgüxü̃, rü nangãxẽwa̱xegüxü̃. Rü name nixĩ i guxü̃ i duü̃xü̃güpe̱xewa mea namaxẽ.

Norü taxre ga popera ga Timutéuca̱x naxümatüxü̃ ga Pauru 2:23

¡Rü taxṹ i naga cuxĩnüxü̃ i ngẽma dexagü i taxuwama mexü̃! Erü ngẽma dexagügagu rü duü̃xü̃gü rü düxwa nügümaxã nanue.

Nüxíraxü̃xü̃ ga popera ga Timutéuca̱x naxümatüxü̃ ga Pauru 3:3

Rü tama name i wüxi i ngãxwa̱xexü̃ rü nuwa̱xexü̃ tixĩ. Rü tama name i tümaarü diẽruguama rüxĩnüxe tixĩ. Natürü name nixĩ i guxü̃ i duü̃xü̃gümaxã yáxna taxĩnü rü namaxã tamecüma.

Ngechuchuarü ngúexü̃gü ga yamugüxü̃arü puracüchiga 21:30

Rü guxü̃ma ga yema ĩanecüã̱xgü rü poraãcü nanue. Rü Tupanapata ga taxü̃neca̱x nibuxmü, rü Pauruxü̃ niyauxgü, rü Tupanapataarü ĩã̱xtüwa nanatúchigügü. Rü yexguma paxa nanawãxtagü ga gumá Tupanapataarü ĩã̱xgü.

Yeremía 6:28

Rü ñachagürü: —Pa Corix, guxü̃ma i nümagü rü tama cuga naxĩnüechaü̃. Rü duü̃xü̃gü i oregüta̱a̱xgüxü̃ i chixexü̃gu maxẽxü̃ nixĩgü. Nümagü rü ñoma bróũcherüxü̃ rü fierurüxü̃ nitaiarü maxü̃neã̱x. Rü guxü̃ma poraãcü chixexü̃ naxügü.

Ucu̱xẽgüchiga 29:9

Yíxema tümaãẽxü̃ cuáxe rü ngẽxguma chi namaxã tanuxgu i wüxi i tama naãẽxü̃ cuáxü̃, rü nüma rü tá nanu rü tá tüxü̃ nacugü, rü taxuxü̃ma tá tamexẽxẽ.

Ucu̱xẽgüchiga 19:12

Ngẽxguma nanuxgu ya ãẽ̱xgacü rü ñoma leóü̃ i ngĩ̱xnecüüxü̃rüxü̃ nixĩ. Natürü ngẽxguma nataãẽgu ya ãẽ̱xgacü, rü ñoma cherena i maxẽte̱xe iwaixẽẽxü̃rüxü̃ nixĩ.

2 Chamué 19:43

Rü yexguma nüma ga Iraéanecüã̱xgü rü nanangãxü̃gü rü ñanagürügü: —Natürü i toma rü perü yexera 10 e̱xpü̱xcüna toxü̃́ nangẽxma i tauxcha nax ãẽ̱xgacüna tangaicamagüxü̃ erü pexü̃ tarümumae. ¿Rü ngẽmaca̱x tü̱xcüü̃ toxü̃ pexoe? ¿Rü tama ẽ̱xna toxíra yixĩxü̃ ga nagu tarüxĩnüexü̃ nax tanataeguxẽẽxü̃ ya ãẽ̱xgacü? —ñanagürügü. Natürü nüma ga yema Yudáanecüã̱xgü rü yexeraãcü Iraéanecüã̱xgümaxã niporagatanücüxü.

2 Chamué 13:22

Rü yexgumacürüwa nüma ga Acharóü̃ rü Anóü̃chi naxai rü taguma namaxã nidexachaü̃ yerü naeya̱x ga Tamáraxü̃ niyaxu ga Anóü̃.

Naanearü ügüchiga 37:21

Rü yexguma yemaxü̃ naxĩnügu ga Rubéü̃, rü Yúchexü̃ ínapoxü̃ nüxna ga naenexẽgü. Rü ñanagürü nüxü̃: —Tama name nax yamáxü̃ rü nagü ipenabaxẽẽxü̃. ¡Rü ñaa ãxmaxü̃gu peyata̱xcuchimare, rü taxṹ i peyamáxü̃! —ñanagürü. Rü yema ñanagürü ga Rubéü̃ yerü Yúcheétüwa nachogü nax tama yama̱xgüãxü̃ca̱x rü nanatüca̱x nax natáeguxẽxẽxü̃ca̱x.

Norü taxre ga popera ga Timutéuca̱x naxümatüxü̃ ga Pauru 3:3

Rü taxúexü̃ tá nangechaü̃gü, rü taxúe tá nüxü̃́ nangechaü̃tümüü̃gü. Rü tá naxoregüta̱a̱xgü, rü taxũtáma yáxna namaxã naxĩnüe i naxü̃nearü ngúchaü̃gü. Rü tá nichixecüma, rü tá naxchi naxaie i guxü̃ma i ngẽma mexü̃.

Yeremía 9:4

Rü wüxichigü i pema rü pegüna pedaugü nax tama pexü̃ nawomüxẽẽxü̃ca̱x i pemücü. Rü woo i peenexẽxü̃chi rü tama name i nüxü̃́ peyaxõgü. Erü guxü̃ma i ngẽma peenexẽgü rü nawomüxẽẽwa̱xegü. Rü guxü̃ma i pemücügü rü chixri pechiga nidexagü.

Wiyaegü 37:8

¡Rü nüxü̃ rüxo nax cunuxwa̱xexü̃ rü nüxna ixũgachi nax cunuxü̃! ¡Rü taxṹ i nugu curüxĩnüxü̃! Erü ngẽxguma ngẽmagu curüxĩnügu rü yexera cugütama cuchixeãxẽ.

Efesios 4:22

Rü ngẽmaca̱x name nixĩ i nüxü̃ perüxoe i ngẽma nũxcümaü̃xü̃ i pecümagü ga ü̃pa nagu pexĩxü̃. Yerü yema nũxcümaü̃xü̃ ga perü maxü̃ rü nachixexüchi nagagu ga yema pexenearü ngúchaü̃gü i pexü̃ womüxẽẽxü̃.

Efesios 4:25

Rü ngẽmaca̱x i ñu̱xma nax Cristuarü pixĩgüxü̃ rü tama name nax pidorata̱a̱xgüxü̃. Natürü name nixĩ i wüxichigü rü tümamücümaxã aixcümaxü̃ tixu. Erü guxãma i yixema rü yigütanüxü̃ i yaxõgüxü̃ tixĩgü.