Efesios 4:24 - Tupanaarü Ore

²⁴ Rü name i penayaxu i ngẽma ngexwaca̱xü̃xü̃ i nacüma ya Tupana pexca̱x mexẽẽxü̃ i nacümarüxü̃ ixĩxü̃. Rü ngẽxguma aixcüma ngẽma nacümagu pexĩxgu rü nawe̱xgu i perü maxü̃ rü ngẽmawa nataxuma i ta̱xacürü chixexü̃.

Efesios 4:24 Referans Kwoze

2 Corintios 5:17

Rü ngẽxguma texé Cristuaxü̃́ yaxõ̱xgu, rü ngexwaca̱xü̃xü̃ i duü̃xü̃ tixĩ. Rü nũxcümaü̃xü̃ ga tümacüma rü marü tüxna inayarüxo, rü ngexwaca̱xü̃xü̃ i maxü̃ tüxü̃́ nangẽxma.

Efesios 2:10

Rü Tupana nixĩ ga tüxü̃ ngo̱xẽẽcü rü tüxü̃ maxẽxẽẽcü. Rü ñu̱xma rü Cristugagu tüxna nanaxã i ngẽma maxü̃ nax mexü̃ ixügüxü̃ca̱x. Rü ngẽmaãcü i ñu̱xma rü nagu taxĩ i ngẽma nacüma ga nũxcüma Tupana taxca̱x nagu rüxĩnüxü̃.

Romanos 13:14

Rü name i nacüma pexĩ i tórü Cori ya Ngechuchu ya Cristu. Rü tama name i naxca̱x pedau nax pexenearü ngúchaü̃gu pexĩxü̃.

Efesios 6:11

¡Rü pegü penaxǘ i guxü̃ma i ngẽma poxü̃ruxü̃gü ya Tupana pexna ãxü̃ nax ngẽmamaxã pegü ípepoxü̃xü̃ca̱x i ngẽxguma Chataná pexü̃ womüxẽxẽchaü̃gu!

Romanos 6:4

Rü yexguma íibaiü̃gu, rü Cristu yuxü̃rüxü̃ yexma nayu ga tacüma ga nũxcümaü̃xü̃, rü Cristu itáxü̃rüxü̃ inata̱x ga yema tacüma ga nũxcümaü̃xü̃. Rü yemaacü naxüpetü nax wena imaxẽxü̃ca̱x rü tüxü̃́ nangẽxmaxü̃ca̱x i maxü̃ i ngexwaca̱xü̃xü̃, yexgumarüxü̃ ga Ngechuchu nax yuwa írüdaxü̃ rü wena namaxü̃xü̃ ga yexguma Nanatü ga Tupana norü poramaxã ínadaxẽẽgu.

2 Corintios 3:18

Rü ngẽmaca̱x guxãma i yixema nax Cristuaxü̃́ yaxõgüxü̃ rü ñoma woruarüxü̃ tixĩgü, rü tawa nango̱x nax ñuxãcü namexẽchixü̃ ya tórü Cori, rü ñu̱xma rü nataxuma i ta̱xacü i tüxü̃ idüxüxü̃ naxcha̱xwa. Rü nüma ya tórü Cori i Naãxẽ ya Üünexü̃ ixĩcü, rü guxü̃guma yexeraãcü tüxü̃ nimexẽẽchigü nax naxrüxü̃ imexü̃ca̱x.

2 Corintios 4:16

Rü ngẽmaca̱x taguma nüxü̃ tarüxoe nax nüxü̃ tixuxü̃ i ngẽma ore. Rü woo yayachigügu rü yaturachigügu i toxone, natürü toõxẽwa rü guxü̃ i ngunexü̃gu rü yexeraãcü tiporaetanü.

Romanos 13:12

Rü woo nangẽxmagu i taxü̃ i chixexü̃ i ñoma ẽanexü̃rüxü̃ ixĩxü̃, natürü paxa tá ínangu ya Cristu nax nügüxü̃tawa tüxü̃ nagagüxü̃ca̱x. Rü ngẽmaca̱x name nixĩ i nüxü̃ tarüxoe i guxü̃ma i ngẽma chixexü̃ ixĩxü̃ rü nagu taxĩ i Tupanaarü ore i ñoma omürüxü̃ ixĩxü̃.

Popera ga Títoca̱x naxümatüxü̃ ga Pauru 2:14

Rü nüma ga Ngechuchu rü taxca̱x nayu nax tüxü̃ ínanguxü̃xẽẽxü̃ca̱x nawa i guxü̃ma i chixexü̃, rü mea tüxü̃ yamexẽẽgüxü̃ca̱x nax norü duü̃xü̃gü ixĩgüxü̃ca̱x rü guxü̃guma mexü̃ ixügüxü̃ca̱x.

Nüxíraxü̃xü̃ ga popera ga Pedru ümatüxü̃ 2:2

Rü ñoma wüxi i õxchana i ngexwaca buxü̃ i naégünenixü̃ nüxü̃́ ngúchaü̃xü̃rüxü̃ penaxwa̱xe i poraãcü pexü̃́ nangúchaü̃ i Tupanaarü ore nax ngẽmawa peporaexü̃ca̱x rü mea peyaexü̃ca̱x i perü õwa nax ngẽmaãcü guxü̃wama namexü̃ca̱x i perü maxü̃ i taguma gúxü̃.

Romanos 8:29

Rü woetama nũxcümama ga Tupana rü marü tüxü̃ nacua̱x nax texégü tá tixĩgüxü̃ ya yíxema noxrü ixĩgüxe. Rü woetama nũxcümama tüxü̃ nade nax Nanerüxü̃ timexü̃ca̱x, rü Nane yixĩxü̃ ga nüxíra írüdacü natanüwa i muxü̃ma i yaxõgüxü̃.

Ore i mexü̃ ga Cuáü̃ ümatüxü̃ 17:17

Curü ore rü aixcüma nixĩ. Rü chanaxwa̱xe i curü oremaxã cuyamexẽxẽ i ngẽma choxna cumugüxü̃ nax aixcüma cupe̱xewa yaxüünexü̃ca̱x.

Gálatas 6:15

Erü ngẽxguma Ngechuchu ya Cristuarü duü̃xü̃gü ixĩgügu, rü Tupanape̱xewa rü taxuxü̃ma nixĩ i ngẽma nax íiwíecha̱xmüpe̱xechiraü̃xü̃ rüe̱xna tama. Natürü ngẽma aixcüma nape̱xewa mexü̃ nixĩ nax naxüchicüüxü̃ i tórü maxü̃ nax ngexwaca̱xü̃xü̃ i duü̃xü̃gü ixĩgüxü̃ca̱x.

Gálatas 3:27

Rü ñu̱xma nax Cristuégagu ípebaiü̃xü̃, rü Cristuarü pixĩgü, rü nüma rü pemaxã inacua̱x nax naxrüxü̃ pixĩgüxü̃ca̱x.

Ichaía 52:1

¡Peba̱i̱xãchie, Pa Chióü̃cüã̱xgüx, peba̱i̱xãchie! ¡Ipechigü rü peporae i pema i yima ĩane ya üünene ya Yerucharéü̃arü duü̃xü̃gü nax pixĩgüxü̃! ¡Rü mexü̃ i pexchirugu picu̱xgü! Erü ngẽma perü uanügü i tama choxü̃ cua̱xgüxü̃ rü tagutáma wena pexca̱x ínayaxüãchi.

1 Corintios 15:53

Erü ngẽma taxü̃ne i yixwa̱xexü̃ rü tá namaxã naxüchicüü i wüxi i naxü̃ne i taguma yixĩxü̃. Rü taxü̃ne i yuxwa̱xexü̃ rü tá namaxã naxüchicüü i wüxi i naxü̃ne i tagutáma yuxü̃.

Yox 29:14

Rü choma rü guxü̃guma mea duü̃xẽgümaxã ichacua̱x rü taguma changĩ̱x. Rü yema nixĩ ga chaucüma ga guxü̃ma ga ngunexü̃gu nagu chixũxü̃ ñoma chauxchiru ga guxü̃ ga ngunexü̃ nagu chicúxü̃rüxü̃.

Efesios 2:15

Rü nüma ya Cristu rü nayacua̱xẽxẽ ga yema nũxcümaü̃güxü̃ ga mugü ga noxri natüü̃wa tayexmagüxü̃. Rü nümatama rü wüxitama i duü̃xü̃gü i ngexwaca̱xü̃xü̃ tüxü̃ nixĩgüxẽxẽ i toma i Yudíugü nax tixĩgüxü̃ rü pema i tama Yudíugü nax pixĩgüxü̃. Rü yemaacü yigümaxã tüxü̃ inarüngü̃xmü̃exẽxẽ.

Ichaía 59:17

Wüxi i churara rü nicuxcuchi i norü churarachiru rü nananucu i norü poxü̃ruxü̃ nax inawéãxü̃ca̱x i norü pora. Rü nüma ya Tupana rü ngẽxgumarüxü̃ ta inanawe̱x i norü pora. Rü inanawe̱x i nacüma i aixcüma we̱xguxü̃, rü norü pora i namaxã ínanguxü̃xẽẽãxü̃ i norü duü̃xü̃gü. Rü inanawe̱x i norü pora i namaxã napoxcueãxü̃ i ngẽma norü duü̃xü̃güarü uanügü, erü poraãcü nüxü̃́ nachu̱xu i norü duü̃xü̃gü.

Popera ga Yudíugü ga yaxõgüxü̃ca̱x ümatüxü̃ 12:14

¡Rü naxca̱x peda̱u̱xgü nax guxü̃ i duü̃xü̃gümaxã pemecümaxü̃! Rü ngẽxgumarüxü̃ ta name nixĩ i naxca̱x pedaugü nax Tupanape̱xewa pexüünegüxü̃ca̱x. Erü yíxema tama Tupanape̱xewa üünexe rü taxũtáma tórü Corixü̃ tadau.

Popera ga Yudíugü ga yaxõgüxü̃ca̱x ümatüxü̃ 1:8

Natürü yexguma Nanechiga yadexaxgu ga Tupana rü ñanagürü: “Cuma nax chauxrüxü̃ Tupana quixĩxü̃ rü guxü̃gutáma ãẽ̱xgacü quixĩ, rü aixcüma meama guxü̃maxã icucua̱x.

Naanearü ügüchiga 5:1

Rü yexguma nüxíraü̃cü ga duü̃ naxüãgu ga Tupana, rü nügüraxü̃ãcü nanaxü. Rü yatüxü̃ rü ngexü̃ naxü rü ñu̱xũchi mexü̃ namaxã naxuegu, rü ñanagürü: —Nümagü rü duü̃xü̃gü tá nixĩ i naéga —ñanagürü. Rü ñaagü nixĩ ga naégagü ga yema Adáü̃wa ngóexü̃ ga natanüxü̃.

Romanos 7:6

Natürü i ñu̱xma rü marü tama ngẽma mugütüü̃wa tangexmagü, erü Tupana rü marü nüxna tüxü̃ ínanguxü̃xẽxẽ. Rü ngẽmaca̱x i ñu̱xma rü ñoma duü̃xü̃gü i iyuexü̃rüxü̃ tixĩgü nape̱xewa i ngẽma mugü, erü marü tama tamaxã inacua̱x. Rü ñu̱xma rü marü nüxna ítanguxü̃ i ngẽma mugü nax Tupanaarü ngúchaü̃ ixügüxü̃ca̱x rü naxca̱x nax imaxẽxü̃ca̱x namaxã i tórü maxü̃ i ngexwaca̱xü̃xü̃ i Naãxẽ ya Üünexü̃ tüxna ãxü̃.

Romanos 12:2

Rü tama name i ñoma i naanecüã̱x i duü̃xü̃gücümagu pexĩ. Natürü name nixĩ i Tupanana pegü pexãgü nax nüma pexü̃ naxüchicüüxü̃ca̱x rü ngexwaca̱xü̃xü̃ i peãxẽ pexü̃́ ngẽxmaxü̃ca̱x. Rü ngẽmaãcü tá nüxü̃ pecua̱x i ta̱xacü nixĩ ya Tupana pexü̃́ naxwa̱xexü̃, rü ta̱xacü nixĩ i nape̱xewa mexü̃, rü ta̱xacü nixĩ i namaxã nataãẽxü̃ rü ta̱xacü nixĩ i aixcüma mexü̃.

Norü taxre ga popera ga Pedru ümatüxü̃ 1:4

Rü yema nacüma i mexü̃maxã Tupana tüxna nanaxã i norü unetagü i aixcüma mexẽchixü̃ nax ngẽmaãcü naxrüxü̃ pimexü̃ca̱x rü nüxna pixĩgachixü̃ca̱x i guxü̃ma i ngẽma chixexü̃gü i duü̃xü̃güarü ngúchaü̃gagu ñoma i naanewa ngẽxmagüxü̃.