Édra 9:8 - Tupanaarü Ore

⁸ Natürü i ñu̱xmax, Pa Corix, Pa Torü Tupanax, rü ngẽma nax tomaxã cumecümaxü̃gagu rü toxü̃́ cunatauxchaxẽxẽ nax ñuxre i toma rü wena ñaa naane i cuma cuxüünexẽẽxü̃ca̱x tawoeguxü̃ nax nagu taxãchiü̃güxü̃ca̱x. Rü cuma rü wüxi i ngexwaca̱xü̃xü̃ i ĩnü toxna cuxã, rü ngẽmaãcü paxaãchi toxü̃ cutaãẽxẽxẽ naétüwa i torü guxchaxü̃gü.

Édra 9:8 Referans Kwoze

Wiyaegü 13:3

Pa Cori Pa Chorü Tupanax ¡choxü̃ nadawenü rü choxü̃ nangãxü̃ rü cua̱x choxna naxã! Erü tama chanaxwa̱xe nax nagu changuxü̃ i ngẽma yu.

Ochéa 6:2

Rü ngẽmaãcü paxa tá inayanaxoxẽxẽ i ngẽma ngúxü̃ i ingegüxü̃ rü tá tüxü̃ ínarüdagüxẽxẽ nax mea nape̱xewa imaxẽxü̃ca̱x.

Abacú 3:2

Pa Corix, Pa Tupanax, ngẽma nüxü̃ chaxĩnüxü̃ i cuchiga rü nachiga ga guxü̃ma ga yema cuxüxü̃ rü poraãcü muü̃ choxna naxã erü cuxüünexüchi. ¡Rü towa naxü ga yema mexü̃ ga ü̃pa cuxüxü̃ nax ngẽmaãcü i toma rü ta nüxü̃ tadaugüxü̃ca̱x! Rü woo tomaxã nax cunuxü̃, natürü ¡toxü̃ nawe̱xama nax ñuxãcü cuxü̃́ tangechaü̃tümüxü̃güxü̃!

Ichaía 57:15

Erü choma ya Tupana ya Guxü̃étüwa Ngẽxmacü rü guxü̃guma chamaxü̃ rü chauéga rü Üünecü nixĩ. Rü ñachagürü: “Choma rü daxũwa chamaxü̃ i ngextá ínaxüünexü̃wa. Natürü tüxü̃ charüngü̃xẽẽxü̃ rü tüxü̃ chaporaxẽxẽ ya yíxema ngearü diẽruã̱xgüxe rü yíxema naxĩ̱xãchiãẽgüxe”.

Wiyaegü 85:6

¿Rü tama ẽ̱xna i wenaxarü toxü̃ ícurüdagüxẽxẽxü̃ nax ngẽmaãcü cumaxã tataãẽgüxü̃ca̱x i tomax i curü duü̃xü̃gü nax tixĩgüxü̃?

Yema Cuáü̃ nüxü̃ dauxü̃ i yixcüra tá ngupetüxü̃chiga 3:12

Rü yíxema nüxü̃ rüporamaegüxe i ngẽma chixexü̃, rü Chaunatü ya Tupanapatawa tá tüxü̃ chaxüchica nax tagutáma ngéma ítachoxü̃xü̃ca̱x. Rü tümagu tá chanaxümatü i naéga ya Chaunatü ya Tupana. Rü ngẽxgumarüxü̃ tá ta tümagu chanaxümatü i naéga ya Tupanaarü ĩane ya Yerucharéü̃ ya ngexwacaxü̃ne ya Tupanaxü̃tawa i daxũguxü̃ i naanewa írüxĩxü̃ne. Rü ngẽxgumarüxü̃ tá ta tümagu chanaxümatü i chauéga i ngexwaca̱xü̃xü̃’.

Romanos 9:27

Rü Iraétanüxü̃chiga rü ta nidexa ga Tupanaarü orearü uruxü̃ ga Ichaía rü ñanagürü: “Rü woo namuxũchichire̱x i Yudíugü yimá naxnücü ya márpechinüwa yimácürüxü̃, natürü noxre tátama nixĩ i aixcüma nayauxgüxü̃ i maxü̃ i taguma gúxü̃. Rü paxa tá ínangu ya tórü Cori nax napoxcueãxü̃ca̱x i guxü̃ma i ngẽma tama noxrü ixĩgüxü̃”, ñanagürü ga Ichaía.

Chacaría 10:4

Rü Yudátanüxü̃tanüwa tá nangóe i poraexü̃ i ãẽ̱xgacügü i chorü duü̃xü̃gümaxã tá icua̱xgüxü̃. Rü nümagü rü narüxü̃ tá nixĩgü ya yimá nuta ya nüxíra yaxǘcuchicü nax naxüaxü̃ca̱x ya wüxi ya ĩpata ya taxü̃ne. Rü ñoma norü tairuxü̃ ya yima ĩpata ya naxchirunaxca̱xrüxü̃ tá nixĩgü. Rü ñoma würa i daica̱x mexü̃rüxü̃ tá nixĩgü ya yima ãẽ̱xgacügü,

Chacaría 8:12

Erü petanüwa rü tá nangẽxma i meãxẽ. Rü ngẽma perü úbanecü rü tá meama nixo. Rü dauxü̃guxü̃ i naanewa tá narüngu ya pucü nax ngẽmaãcü i penetügü i peanewa ipetogüxü̃ namuarü oṍxü̃ca̱x. Rü ngẽma duü̃xü̃gü i daa ĩanewa íyaxügüxü̃na tá chanaxã i guxü̃ma i ngẽma nax noxrü yixĩxü̃ca̱x.

Chacaría 8:6

Rü ngẽxguma ngẽmaãcü wena namexgu ya Yerucharéü̃ rü chorü duü̃xü̃gü i núma yaxügüxü̃ rü tá naba̱i̱xãchie, erü taguma nagu narüxĩnüe nax wena tá namexü̃ ya yima ĩane. Natürü cha̱u̱xca̱x rü taxuxü̃ma naguxcha i ngẽma. Rü choma i Cori ya Tupana ya Guxãétüwa Ngẽxmaxe nixĩ i nüxü̃ chixuxü̃ i ngẽma.

Echequié 14:22

Natürü noxretátama nixĩ i íyaxügüxü̃. Rü nümagü rü nanegümaxã rü naxacügümaxã tá Yerucharéü̃wa ínachoxü̃. Rü ngẽxguma tá Babiróniawa nangugügu i nümagü, rü pemax i ngéma pengẽxmagüxü̃ rü tá nüxü̃ pecua̱x nax ñuxãcü chixexü̃gu namaxẽxü̃ i ngẽma duü̃xü̃gü rü ngẽma chixexü̃ i naxügüxü̃. Rü ñu̱xũchi taxũtáma pengechaxü̃gü naxca̱x i guxü̃ma i ngẽma poxcugü i Yerucharéü̃ca̱x íchanguxẽẽxü̃.

Yeremía 44:14

Rü yíxema noxretama i pema i Yudátanüxü̃ i íyaxügüxe ga Equítuanewa ĩxẽ nax ngéma pemaxẽxü̃ca̱x rü bai tá texé tiña erü guxãtáma tayue. Rü woo texé tanaxwa̱xe nax Yudáaneca̱x tawoeguxü̃ nax ngẽxma tayaxãchiü̃xü̃ca̱x rü taxũtáma tawoegu. Rü yíxema noxretama ya tüxü̃ yagagümarexexicatama tá tawoegu’ ” —ñanagürü ga Yeremía.

Ichaía 1:9

Ega ngẽxguma Cori ya Tupana ya Guxãétüwa Ngẽxmacü taxũchima ñuxre i yixema nua tüxü̃ yaxügüxẽẽgu, rü Yerucharéü̃ rü Chodómarüxü̃ rü Gomórarüxü̃ nixĩ.

Ngu̱xẽẽtaeruü̃arü ore 12:11

Rü ngẽma yatügü i nüxü̃ cua̱xüchixü̃arü ucu̱xẽgü rü ñoma wüxi i carnéruarü dauruü̃arü naixmena̱xã ya ãmaguxü̃rüxü̃ nixĩgü. Rü ngẽxguma wüxigu mea inanuxgu i ngẽma ucu̱xẽgü rü ñoma ĩpataarü naparagü i wüxitama carnérugüarü dauruxü̃ meama ipugünerüxü̃ nixĩgü.

Wiyaegü 138:7

Rü ngẽxguma ãũcümaxü̃wa changexmagu, rü cuma rü choxü̃ ícupoxü̃ nax tama choxü̃ yama̱xgüxü̃ca̱x. Rü icunawe̱x i curü pora rü choxü̃ ícunguxuchixẽxẽ naxme̱xwa i chorü uanügü i chomaxã nuexü̃.

Wiyaegü 34:5

Rü yíxema Cori ya Tupanaxü̃ rüdaunüxe nax tüxü̃ nangü̃xẽẽxü̃ca̱x rü guxü̃gutáma tataãẽgü, rü tagutáma ãne tingegü.

Neemía 9:31

Natürü yema nax cuxü̃́ nangechaü̃tümüxü̃güxü̃ca̱x rü tama noxtacüma cunadaixüchi rü tama nüxna quixũ. Erü cuma rü Tupana ya mecümaxü̃chicü rü ngechaü̃wa̱xecü quixĩ.

Neemía 1:11

Pa Corix, cuxü̃ chachixewe nax choxü̃́ nüxü̃ cuxĩnüxü̃ca̱x i ñaa chorü yumüxẽ i cumaxã nüxü̃ chixuxü̃ i chomax nax curü duü̃xü̃ chixĩxü̃. Erü ngẽma chorü ngúchaü̃ i nagu charüxĩnüxü̃ nixĩ nax cuxü̃ chicua̱xüüxü̃. Rü ngẽxgumarüxü̃ ta cuxna naxca̱x chaca nax choxü̃ curüngü̃xẽẽxü̃ nax chomaxã namecümaxü̃ca̱x ya ãẽ̱xgacü —ñachagürü. Rü yexgumaü̃cüxü rü choma rü ãẽ̱xgacü ga Artayérearü bínuarü baeruxü̃ chixĩ.

Édra 9:9

Rü woo to ga ãẽ̱xgacüme̱xẽwa nax tayexmagüxü̃ natürü i cumax rü tama toxü̃ ícuwogü. Rü ngẽma Pérchiaanearü ãẽ̱xgacügüãẽwa ícunanguxẽxẽ nax tomaxã namecümagüxü̃ca̱x. Rü toxna cudau nax ñu̱xma rü ta tamaxẽxü̃ca̱x, rü ngẽmaãcü tawoeguxü̃ca̱x, rü wena noxrirüxü̃ ga nachicagutama tanaxüxü̃ca̱x ya yima cupata ya taxü̃ne. Rü cumax, Pa Tupanax, rü toxna cudau i guxü̃ma i ñaa naane i Yudáanewa rü daa ĩane ya Yerucharéü̃wa.

Norü taxre ga popera ga ãẽ̱xgacügüchiga 19:4

Chierüx nüma ya Cori ya curü Tupana rü marü nüxü̃ naxĩnügu i ngẽma ore i nüxü̃ yaxuxü̃ i ngẽma Achíriaanearü churaragüeru nax namaxã naguxchigaxü̃. Rü chierüna napoxcuãgu ya curü Cori ya Tupana naxca̱x i ngẽma ore i nümatama nüxü̃ naxĩnüxü̃. Rü ngẽmaca̱x chanaxwa̱xe i toxca̱x cuyumüxẽ nax ítayaxǘgüxü̃ —ñanagürü ga ãẽ̱xgacü.

1 Chamué 14:29

Rü nüma ga Yonatáü̃ rü nanangãxü̃ rü ñanagürü: —Chaunatü rü poraãcüxüchima Iraétanüxü̃maxã chixexü̃ naxü. Dücax i chomax nax íxrane ya berure nax changṍxü̃ rü choxü̃ naporaxẽxẽ.

1 Chamué 14:27

Natürü ga Yonatáü̃ ga tama nüxü̃ ĩnüxü̃ ga yema nanatü churaragümaxã ueguxü̃, rü nanayaxu ga gumá norü naixmena̱xã rü wüxi ga berurechiãü̃gu nayawe̱xcuchi rü yemaacü nanawe ga guma berure. Rü yexgumatama nawa niporaxüneãchi.

Ucu̱xẽgüchiga 29:13

Yíxema ngearü diẽruã́xẽ rü ngẽma ãẽ̱xgacü i chixri tümamaxã icuáxü̃, rü Tupanape̱xewa rü nawüxigumare. Erü ngẽma taxre rü Tupana nayaxüxetü nax nüxü̃ nadaugüxü̃ca̱x.

Ichaía 14:3

Rü pemax, Pa Duü̃xü̃gü i Iraétanüxü̃x, rü ngẽxguma nüma ya Cori ya Tupana pexü̃ ínguxü̃xẽẽgu naxme̱xwa i ngẽma Babiróniaanearü ãẽ̱xgacü i ngúxü̃ pexü̃ ingegüxẽẽxü̃ rü ngechaü̃ pexna ãxü̃, rü ñaa oremaxã tá nüxü̃ pecugüe rü penaxuchi̱xẽ: —Dücax ¿ta̱xacüwa cungu i cuma nax cuchixecümaxü̃? rü ¿ta̱xacügu nayagu̱x i ngẽma nax cugü quicua̱xüxü̃xü̃?

Wiyaegü 13:4

Rü ngẽmaãcü i chorü uanü rü taxũtáma ñanagürü: —Marü nüxü̃ charüporamae —ñanagürü. ¡Rü choxna nadau nax tama nataãẽxü̃ca̱x i ngẽma chorü uanü i ngẽxguma guxchaxü̃gu changuxgux!

Ichaía 6:13

Rü woo chi 100 tanüwa rü 10 i duü̃xü̃gü íyaxüxgu nawa ya yima ĩane rü ngẽma rü tá ta nadai ñoma wüxi i nai i daxüchixü̃rüxü̃. Natürü ñoma wüxi i naixchimewa ngexwaca̱xü̃xü̃ i nane rüxüamaxü̃rüxü̃ tá nixĩ i ngẽma Iraétanüxü̃. Erü noxretama tá ínayaxü, rü ngẽmatanüwa tá ne naxĩ i duü̃xü̃gü i aixcüma chauga ĩnüexü̃ —ñanagürü ga Tupana.

Chofonía 3:12

“Pa Yerucharéü̃x, cuwa tá chayaxügüxẽxẽ i ñuxre i duü̃xü̃gü i mecümaxü̃ i tama nügü icua̱xüü̃güxü̃. Rü nümagü rü tá choxü̃́ nayaxõgü.