Echequié 8:16 - Tupanaarü Ore

¹⁶ Rü ñu̱xũchi Tupanapata ga taxü̃neã̱xtü ga aixepewaama yexmaxü̃wa choxü̃ naga ga Tupanapataca̱x ixücuxü̃wa. Rü yema ãmarearü guruü̃pe̱xewa nüxü̃ chadau ga 25 ga yatügü ga Tupanapata ga taxü̃nena ãca̱xwe̱xgüxü̃ ga ésteguama caxã́pü̱xügüxü̃. Rü waixü̃müanegu nangücuchitanü rü üa̱xcüxü̃ nicua̱xüü̃gü.

Echequié 8:16 Referans Kwoze

Wenaxarü naxümatü ga Tupanaarü mugü 4:19

Rü ngẽxguma daxũ pedaugügu rü nüxü̃ peda̱u̱xgu ya üa̱xcü, rü tauemacü, rü ẽxtagü, rü guxü̃ma i daxũwa naigüxü̃ rü ¡taxṹ i pexü̃́ nangúchaü̃xü̃ nax nüxü̃ picua̱xüü̃güxü̃ca̱x! Erü nüma ya Cori ya perü Tupana rü guxü̃ma i duü̃xü̃gü i ñoma i naanewa maxẽxü̃ca̱x nixĩ i nango̱xẽẽãxü̃ i ngẽma daxũwa naigüxü̃.

Yeremía 32:33

Rü nümagü rü choxna naxãgüca̱xwe̱xmare rü tama choxü̃ narüdaunüchaü̃. Rü woo guxü̃guma mea chanaxucu̱xẽ, natürü tama chauga naxĩnüe rü tama nanayauxgüchaxü̃ nax chayanawe̱xãchixẽẽgüxü̃.

Echequié 11:1

Rü nüma ga Tupanaãxẽ ya Üünecü rü choxü̃ nayachü̱xüxãchixẽxẽ rü Tupanapata ya taxü̃nearü ĩã̱x ya éstewaama üxü̃wa choxü̃ naga ga Yerucharéü̃wa. Rü yema ĩã̱xwa nayexmagü ga 24 ga yatügü. Rü yematanüwa nüxü̃ chacuáxü̃ nixĩ ga Yaachanía ga Achúx nane rü Peratía ga Benaía nane. Rü nümagü rü Yerucharéü̃cüã̱xarü ãẽ̱xgacügü nixĩgü.

Yeremía 2:27

Rü pemax, Pa Iraétanüxü̃x, rü wüxi ya nai rü ñaperügügü nüxü̃: “Cuma nixĩ i tonatü quixĩxü̃”, ñaperügügü nüxü̃. Rü wüxi ya nuta rü ñaperügügü nüxü̃: “Cuma nixĩ i toé”, ñaperügügü nüxü̃. Natürü i choma rü choxna pexãgüca̱xwexmare rü tama choxü̃ perüdaunüchaü̃. Natürü ngẽxguma ãũcümaxü̃wa pengẽxmagügu rü cha̱u̱xca̱x peca rü ñaperügügü: “¡Paxa nua naxũ nax toxü̃ curüngü̃xẽẽxü̃ca̱x!” ñaperügügü.

Joel 2:17

¡Rü pexauxe, Pa Chacherdótegüx i Tupanaarü Puracümaxã Icua̱xgüxex, rü ãmarearü guruü̃pe̱xewa Tupanamaxã nüxü̃ pixu rü ñaperügügü nüxü̃! —¡Nüxü̃ nangechaxü̃ i ñaa curü duü̃xü̃gü, Pa Torü Corix ya Tupanax! ¡Rü taxṹ i cunangexrüxü̃ nax togü nüxü̃ cugüexü̃! ¡Rü taxṹ i cunangexrüxü̃ nax togü i nachixü̃anecüã̱xgü namaxã icuáxü̃! ¡Rü taxṹ i cunangexrüxü̃ i ngẽma tama yaxõgüxü̃ nax curü duü̃xü̃güxü̃ nacugüexü̃ ñaxü̃maxã!: “¿Ngexcü ya yimá perü Tupana?” ñaxü̃maxã nacugüexü̃ —ñaperügügü.

Echequié 43:5

Rü Tupanaãxẽ choxü̃ inachixẽxẽ, rü ĩã̱xtü ga aixepewa yexmaxü̃wa choxü̃ naga. Rü nüxü̃ chadau nax napata namaxã yapaxü̃ ga norü üüne.

Echequié 45:19

Rü nüma i chacherdóte rü tá nanayaxu i íxracü ya nagü i ngẽma wocaxacü i pecaduarü ütanüca̱x imáxü̃. Rü yimá nagümaxã rü tá chopataarü ĩã̱xarü caxtagü nichagü. Rü yimá nagümaxã tá nayachagü i ngẽma ãmarearü guruü̃arü ãgümücüpe̱xewa rü ñu̱xũchi norü caxtagü i ngẽma ĩã̱xgü i naa̱xtü i aixepewa ngẽxmagüxü̃.

Echequié 40:28

Rü yema súrwa yexmaxü̃ ga ücuchica ga nawa ixücuxü̃ naxca̱x ga yema naa̱xtü ga aixepewa yexmaxü̃wa choxü̃ naga. Rü inanangu ga yema ücuchica. Rü yema togü ga ücuchicagüarü ta nüxü̃́ nayexma.

Echequié 10:3

Rü yexguma yexma naxücugu ga yema yatü rü yema querubíü̃gü rü guma Tupanapata ga taxü̃nearü súrwaama nayexmagü. Rü wüxi ga caixanexü̃maxã nayapa ga yema Tupanapataã̱xtü ga aixepewaama yexmaxü̃.

Yeremía 44:17

Rü toma rü tá tanaxüama i ngẽma toma nagu tarüxĩnüexü̃ nax tanaxüxü̃. Rü torü tupana i “Dauxü̃guxü̃ i Naanearü Ãẽ̱xgacümaxã”, inaxugücü rü ngĩxca̱x tá tayagu i pumarate̱xe rü ngĩxna tá tanaxã ya bínu. Rü ngẽma ñu̱xma taxüxü̃ rü guxü̃gutáma tanaxü naxrüxü̃ ga yema torü o̱xigü, rü torü ãẽ̱xgacügü, rü Yudáanearü ĩanegüarü ãẽ̱xgacügü, rü yema Yerucharéü̃cüã̱xgü. Yerü ü̃pa rü toxü̃́ nayexma ga muxü̃ma ga õna, rü mea toxü̃ nangupetü rü taxuxü̃ma ga guxchaxü̃ toxca̱x ínangu.

Norü taxre ga to ga popera ga ãẽ̱xgacügüchiga ümatüxü̃ 29:6

Rü yema tanatügü rü nüxü̃ narüxoe nax Tupanaga naxĩnüexü̃. Rü yema naxügüxü̃ rü tama Tupanape̱xewa name yerü nüxna nixĩgachi. Rü ínanata̱xgü ga guma Cori ya Tupanapata.

Norü taxre ga popera ga ãẽ̱xgacügüchiga 23:11

Rü ínanawoxü̃ ga yema cowaruchicüna̱xãgü ga Yudáanearü ãẽ̱xgacügü namaxã üa̱xcüxü̃ icua̱xüü̃güxü̃. Rü yema cowaruchicüna̱xãgü rü Tupanapata ga taxü̃neca̱x íxücuxü̃wa nayexmagü ga Tupanapataarü dauruxü̃ ga Natáü̃-mérexarü ucapuarü ngaicamana. Rü guma carugü ga Yudáanearü ãẽ̱xgacügü üa̱xcüxü̃ namaxã icua̱xüü̃güne rü guma rü ta ínanagu.

Norü taxre ga popera ga ãẽ̱xgacügüchiga 23:5

Rü yemawena rü ínanawoxü̃ ga yema tupananetagüarü chacherdótegü ga Yudáarü ãẽ̱xgacügü yexma mugüxü̃ nax pumarate̱xe ínagugüxü̃ca̱x nawa ga yema ãmarearü guruü̃gü ga ma̱xpǘnegüwa yexmagüxü̃ ga Yudáanearü ĩanegüwa rü Yerucharéü̃cüwawa. Rü ínanawoxü̃ ta ga yema chacherdótegü ga Baáca̱x rü üa̱xcüca̱x rü tauemacüca̱x rü woramacurigüca̱x rü guxü̃ma ga ta̱xacü i daxũwa ngẽxmagüxü̃ca̱x pumarate̱xe ígugüxü̃.

Echequié 23:35

Rü ngẽmaca̱x i choma ya Cori ya Tupana rü ñachagürü: “Ngẽma nax choxü̃ curüngü̃maxü̃gagu rü choxna quixũgachixü̃gagu rü tá cuyange i ngẽma poxcu. Rü ngẽmaãcü tá cupoxcu nagagu ga yema cuxunearü ngúchaü̃ nax cuxüxü̃ rü yema nax cungeãẽxü̃” —ñanagürü.

Norü taxre ga to ga popera ga ãẽ̱xgacügüchiga ümatüxü̃ 7:7

Rü nüma ga Charomóü̃ rü Tupanana nanaxuaxü̃ ta ga yema naa̱xtü ga ngãxü̃wa üxü̃ ga Tupanapata ga taxü̃nepe̱xewa yexmaxü̃. Rü yéma nixĩ ga ínaguaxü̃ ga yema ãmaregü ga naxü̃nagü rü yema norü chíxü̃ ga Tupanana naxãmaregüxü̃. Yerü yema Charomóü̃ üxü̃ ga ãmarearü guruxü̃ rü tama nagu name ga yema ãmaregü ga naxü̃nagü rü trigugü rü chíxü̃gü ga Tupanana naxãgüxü̃.

Norü taxre ga popera ga ãẽ̱xgacügüchiga 16:14

Rü nüma ga Acáx rü nayaxügachi ga yema Tupanaarü ãmarearü guruxü̃ ga bróũchenaxca̱x ga Tupanapata ga taxü̃nearü to̱xma̱xtagu üchiréxü̃. Rü nórteguama nayaxǘ yerü yema ngexwaca̱xü̃xü̃ ga ãmarearü guruxü̃ yéma naguxchachica. Rü ñu̱xũchi yema Tupanapata ga taxü̃nepe̱xewa yexmaxü̃ ga nachicagu nanaxǘ ga yema yexwaca̱xüxü̃ ga ãmarearü guruxü̃.

Nüxíraxü̃xü̃ ga popera ga ãẽ̱xgacügüchiga 8:29

¡Rü taxṹ i nüxü̃ curüchauxü̃ nax ngunecü rü chütacü nüxü̃ cudawenüxü̃ ya daa cupata ya taxü̃ne rü cuma tomaxã nüxü̃ quixu nax yimawa tá cungexmaxü̃! ¡Rü nüxü̃ naxĩnü i ñaa chorü yumüxẽ i cupata ya taxü̃newa cumaxã nüxü̃ chixuxü̃ i choma nax curü duü̃xü̃ chixĩxü̃!

Echequié 8:15

Rü yemawena ga nüma ga Tupana rü choxna naca rü ñanagürü choxü̃: —¿Rü nüxü̃ cudauxü̃ i ñaa? Rü tá nüxü̃ cudau i to i yexeraxü̃ chixexü̃ inaxügüxü̃ —ñanagürü choxü̃.

Echequié 23:39

Rü yematama ngunexü̃ ga nagu tüxü̃ ínaguxü̃ ga ngĩxacügü rü ngĩnegü nax yemaacü ngĩrü tupananetachicüna̱xãgüxü̃ yacua̱xüü̃güxü̃ca̱x rü chopatawa naxĩ rü nanaxãũãchigü ga guma chopata. Rü yema nixĩ ga naxügüxü̃ nawa ga guma chopata.

Echequié 40:6

Rü yemawena ga yema yatü rü yema ücuchica ga éstewaama üxü̃wa naxũ. Rü guma toxṍõnewa naxĩnagü rü nanangu ga yema ücuchicaarü tatachinü. Rü nüxü̃́ nayexma ga 3 metru ga norü tatachinü.

Echequié 43:8

Yema Iraétanüxü̃ rü norü taxü̃ ga chixexü̃gümaxã nagu nidauxcüraxü̃gü ga chauéga i üünexü̃. Yerü chorü ãmarearü guruü̃gücüwagu nanaxü ga norü tupananetagüarü ãmarearü guruü̃gü. Rü wüxi ga naxtapü̱xicatama nixĩ ga nügüna nayaxü̃guxẽẽxü̃. Rü yemaca̱x nixĩ ga namaxã chanuxü̃ rü chanadaixü̃.

Echequié 46:1

Rü choma ya Cori ya Tupana rü nüxü̃ chixu rü ñachagürü: —Rü ngẽma ĩã̱x i chopataarü ĩã̱xtü i aixepewa ngẽxmaxü̃ i éstewaama, rü name nax nawãxtaxü̃ i ngẽma 6 i ngunexü̃gü i nagu penaxügüxü̃ i perü puracü. Natürü tá peyawãxna i ngẽma ĩã̱x ngẽxguma ngü̃xchigaarü ngunexü̃wa nanguxgu rü ñu̱xũchi ngẽxguma ngexwacaxü̃cü ya tauemacü ngo̱xgu.

Norü taxre ga popera ga ãẽ̱xgacügüchiga 21:5

Rü yema taxre ga Tupanapata ga taxü̃neã̱xtüwa rü üa̱xcüca̱x, rü tauemacüca̱x rü woramacurigüca̱x nayaxüagü ga ãmaregüarü guruxü̃.

Yeremía 7:18

Rü ngẽma nanegü rü üxümena̱xãgü nanutaque̱xegü, rü nanatügü rü üxü ninaixẽẽgü, rü ngẽma ngexü̃gü rü arína niñumücharagü nax ngẽmaãcü paũ i maixcuraxü̃ naxügüxü̃ca̱x ngĩxca̱x i ngẽma tupananeta i “Dauxü̃guxü̃ i Naanearü Ãẽ̱xgacümaxã”, inaxugücü. Rü choxü̃ nachixeãẽgü erü tupananetagüna nanaxãgü ya bínu.

Yeremía 8:2

Rü ñu̱xũchi nüma i uanügü rü yima naxchina̱xãgü ga yema duü̃xü̃gü rü ü̱a̱xcüemagu, rü tauemacüemagu, rü guxü̃ma i ẽxtagüemagu tá nayapagü, yerü yema duü̃xü̃gü rü üa̱xcüxü̃ rü tauemacüxü̃ rü ẽxtagüxü̃ nixĩ ga nangechaxü̃güxü̃, rü nüxü̃́ napuracüexü̃, rü nawe naxĩxü̃, rü namaxã yadexagüxü̃, rü ñu̱xũchi nüxü̃ yacua̱xüü̃güxü̃. Rü taxúetama tanade ya yima naxchina̱xãgü nax itanata̱xgüxü̃ca̱x. Rü ngẽmaãcü tá ñoma naü̃rüxü̃ waixü̃müxü̃ nixũ.

Echequié 7:23

Rü cumax, Pa Echequiéx ¡rü wüxi ya cadéna ínamexẽxẽ naxca̱x i chorü duü̃xü̃gü i Yerucharéü̃cüã̱xgü! Erü tá chanapoxcue naxca̱x nax poraãcü namáetagüxü̃. Rü yima norü ĩane ya Yerucharéü̃ rü poraãcü máetamaxã nanapá.