Echequié 8:10 - Tupanaarü Ore

¹⁰ Rü yexma chaxücu, rü guxü̃ma ga yema naxtapü̱xarü ma̱xwa nüxü̃ chadau nax yexma naxüchicüna̱xãgüxü̃ ga naguxü̃raü̃xü̃ ga yema waixü̃müanegu nügü itúgüxü̃chicüna̱xãgü, rü ñu̱xũchi naeü̃gü ga ãũãchixü̃chicüna̱xãgü, rü naguxü̃raü̃xü̃ ga Iraétanüxü̃arü tupananetachicüna̱xãgü.

Echequié 8:10 Referans Kwoze

Ínachoxü̃xü̃chiga 20:4

¡Rü taxuxü̃táma ta̱xacümare cugüca̱x cuxüxchicüna̱xã nax ngẽmamaxã cutupanaã́xü̃ca̱x, rü bai i ta̱xacü i daxũguxü̃ i naanewa nüxü̃ cudauxü̃, rü bai i ta̱xacü i ñoma i naanewa ngẽxmaxü̃, rü bai i ta̱xacü i márwa ngẽxmaxü̃ tá cuxüxchicüna̱xã nax ngẽmamaxã cutupanaã́xü̃ca̱x!

Yeremía 16:18

Rü nawa tá ichanaxügü nax taxree̱xpü̱xcüna pexü̃ chapoxcuexü̃ naxca̱x i perü chixexü̃gü rü perü pecadugü. Erü penaxãũãchixẽxẽ i chorü naane namaxã i ngẽma perü tupananetachicüna̱xãgü i ingearü maxü̃ã́xü̃. Rü yema naane ga guxü̃guca̱x pexna chaxãxü̃wa rü penaxü ga yema chixexü̃gü ga naxchi chaxaixü̃ —ñanagürü ga Cori ya Tupana.

Yeremía 3:9

Rü yema Yudáanecüã̱xgü rü Iraéanecüã̱xgürüxü̃ tama naxca̱x nachixe ga yema chixexü̃ ga naxügüxü̃. Rü yemaacü norü taãẽmaxã nüxü̃ nicua̱xüü̃gü ga norü tupanachicüna̱xãgü ga nutanaxca̱x rü nainaxca̱x.

Wenaxarü naxümatü ga Tupanaarü mugü 14:3

Rü tama name i penangõ̱x i ngẽma naeü̃ ya Tupana pexna chu̱xuxü̃. Rü ñaagü nixĩ i ngẽma naeü̃gü i mexü̃ nax penangṍxü̃: rü wocagü, rü carnérugü, rü chíbugü,

Ichaía 44:13

¡Rü dücax, nüxü̃ peda̱u̱x i ngẽma duü̃xü̃ i naxchicüna̱xãarü üwa puracüxü̃! Rü noxri rü norü ngugüruü̃maxã nanangugü rü lapimaxã ínanawǘxüchi. Rü ngẽmawena rü purumaumaxã nanaxü i ngẽma naxchicüna̱xã nax naduü̃xü̃raü̃xü̃ca̱x. Rü ñu̱xũchi ngutaque̱xepataü̃gu nayaxǘ i ngẽma naxchicüna̱xã i ngearü maxü̃ã́xü̃.

Yeremía 44:4

Rü muẽ̱xpü̱xcüna petanüwa chanamu ga chorü orearü uruü̃gü nax pemaxã nüxü̃ yaxugüexü̃ca̱x nax tama penaxügüxü̃ca̱x ga yema chixexü̃gü i ãũãchixü̃gü i poraãcü naxchi chaxaixü̃.

Yeremía 44:21

—¿Ẽ̱xna pema nagu perüxĩnüegu rü nüma ya Cori ya Tupana tama nüxü̃ nacuáx, rüe̱xna nüxü̃ yanangümaxü̃ ga yema pemax, rü perü o̱xigü, rü perü ãẽ̱xgacügü, rü norü ngü̃xẽẽruü̃gü, rü guxü̃ma ga yema duü̃xü̃gü ügüxü̃ ga yexguma yema tupananetagüca̱x pumarate̱xe pigugügu nawa ga Yudáanearü ĩanegü, rü Yerucharéü̃arü namagüwa?

Echequié 8:9

Rü yexguma rü choxü̃ ñanagürü: —¡Ngẽxma naxücu! Rü tá nüxü̃ cudau i ngẽma chixexüchixü̃gü i ngéma naxügüxü̃ —ñanagürü choxü̃.

Echequié 8:11

Rü yéma nayexmagü ga 70 ga Iraétanüxü̃arü ãẽ̱xgacügü. Rü yematanüwa nayexma ga Yaachanía ga Chapáü̃ nane. Rü guxü̃ma ga yemagü rü yema tupananetachicüna̱xãgüxü̃ nicua̱xüü̃gü. Rü wüxichigü ga yema ãẽ̱xgacügü rü naxme̱xwa nanange ga wüxi ga pumarate̱xearü guruxü̃. Rü yema pumarate̱xearü guruü̃wa ínaxũxũ ga wüxi ga caixemaxü̃ ga pamüemaxü̃ ga yixixü̃.

Echequié 11:12

Rü ngẽxguma tá nixĩ i nüxü̃ picua̱xãchitanüxü̃ nax choma chixĩxü̃ ya Cori ya Tupana. Pema rü tama ngẽma chorü mugü nüxü̃ ixuxü̃ãcüma pemaxẽ, rü bai nagu pexĩxü̃ ga yema chorü mugü. Natürü nagu pexĩ ga yema pexna ngaicamagüxü̃ ga nachixü̃anecüã̱xgü nagu maxẽxü̃ ga chixexü̃gü” —ñanagürü ga Cori ya Tupana.

Echequié 23:14

Natürü ngĩma ga Aoribá rü ngĩeya̱xarü yexera chixexü̃ naxü. Rü ĩxtapü̱xwa nüxü̃ idau ga Babiróniacüã̱xchicüna̱xãgü. Rü nümagü rü nidauchiru rü nigoyexü̃ã̱x rü nixãpate̱xeeru. Rü yema naxchicüna̱xãwa nango̱x nax churaragüerugü yixĩgüxü̃ ga yema Babiróniacüã̱x nax Cadéugü yixĩgüxü̃.

Wenaxarü naxümatü ga Tupanaarü mugü 4:23

¡Natürü pexuãxẽgü nax tama nüxü̃ iperüngümaexü̃ca̱x ga yema uneta ga Cori ya perü Tupana pemaxã nüxü̃ ixuxü̃! ¡Rü taxũtáma pegüca̱x penaxü i ta̱xacürü naxchicüna̱xãgü nax namaxã petupanaã́xü̃ca̱x! Erü nüma ya Cori ya perü Tupana rü nanachu̱xu i ngẽma.

Wenaxarü naxümatü ga Tupanaarü mugü 4:25

Rü ngẽxguma ngẽma naanegu pichocugu rü ngéma pexãxacügügu rü pexãtaagügu rü ngẽxma peyaegu, ¡rü taxũtáma petoṍxẽgü rü penaxü i ta̱xacürü naxchicüna̱xãgü nax namaxã petupanaã̱xgüxü̃ca̱x! Erü ngẽma rü wüxi i taxü̃ i chixexü̃ tá nixĩ i Tupanape̱xewa pexüxü̃ rü nüma rü tá poraãcü pemaxã nanu.