Echequié 7:26 - Tupanaarü Ore

²⁶ Rü nügüwe tá naxãgü i ngẽma guxchaxü̃gü i Yerucharéü̃cüã̱xgüca̱x ínguxü̃. Rü ngẽxgumarüxü̃ ta i ngẽma chixexü̃ i nachigagü rü tá nügüwe naxãgü. Rü tá naxca̱x nadaugü i wüxi i chorü orearü uruxü̃ nax ngẽma namaxã nüxü̃ ixuxü̃ca̱x nax ta̱xacüchiga yixĩxü̃ i ngẽma ngupetüxü̃. Natürü i ngẽma rü tá natüca̱xmamare nixĩ. Rü nataxutama i chacherdótegü i nangúexẽxẽxü̃ rü bai i yaxguã̱xgü i tayaxucu̱xẽgüxü̃.

Echequié 7:26 Referans Kwoze

Yeremía 4:20

Rü nüxü̃ taxĩnüchiga nax ngẽma uanügü rü guxü̃wama naporamaegüxü̃ i tachixü̃anewa. Rü yima tórü ĩanegü rü nachitaxü̃xica íyaxügüxü̃. Rü ngürüãchi changepata erü marü nagu napogüe ya yima chopatagü ya naxchirunaxca̱x.

Miquéa 3:6

Rü pemax i orearü uruü̃güneta rü chütacü rü marü taxũtáma pengo̱xetügü. Rü ngẽxguma rü marü taxũtáma nüxü̃ pecua̱x i ngẽma Tupana nagu rüxĩnüxü̃. Rü ñoma üa̱xcü rütaxuxü̃rüxü̃ tá inarütaxu nax pengo̱xetüxü̃ rü taxũtáma Tupana pexü̃ nüxü̃ nacua̱xẽxẽ i ngẽma tá ngupetüxü̃.

Echequié 14:1

Rü ñuxre ga Iraétanüxü̃arü ãẽ̱xgacügü rü chauxü̃tawa naxĩ rü chope̱xewa nayarütogü.

Wiyaegü 74:9

Rü ñu̱xma rü marü nataxuma ya cupata rü nataxuma i curü orearü uruü̃gü. Rü tama nüxü̃ tacua̱x nax ñuxgu tá nangupetüxü̃ i ñaa guxchaxü̃ i toétüwa ngẽxmaxü̃.

Yeremía 37:17

Rü nüma ga ãẽ̱xgacü ga Chedequía rü norü churaragüxü̃ namu nax ãẽ̱xgacüpatawa Yeremíaxü̃ nagagüxü̃ca̱x. Rü yexguma Yeremía ãẽ̱xgacüpe̱xewa nagagüãgu, rü nüma ga ãẽ̱xgacü rü bexma Yeremíana naca rü ñanagürü: —¿Nangexmaxü̃ i to i ore i Cori ya Tupana cumaxã nüxü̃ yaxuxü̃? —ñanagürü. Rü nüma ga Yeremía rü nanangãxü̃ rü ñanagürü: —Ngü̃, ngẽmáacü nangẽxma. Rü Tupana rü ñanagürü: “Cumax, Pa Ãẽ̱xgacüx, rü naxme̱xgu tá cungu i ngẽma Babiróniaanearü ãẽ̱xgacü” —ñanagürü.

Yeremía 21:2

—¡Toxü̃ rüngü̃xẽxẽ, rü toxca̱x Cori ya Tupanamaxã idexa! Erü Nabucudonochó i Babiróniaanearü ãẽ̱xgacü rü toxca̱x ínayaxüãchi. Rü ngürüãchi nüma ya Cori ya Tupana rü norü poramaxã wüxi i mexü̃ toxca̱x naxü̱x nax ngẽmaãcü Nabucudonochó toxna yaxĩgachixü̃ca̱x —ñanagürügü. Rü yexguma ga Cori ya Tupana rü Yeremíamaxã nidexa. Rü nüma ga Yeremía rü nanangãxü̃ ga yema duü̃xü̃gü ga Chedequía yéma mugüxü̃ rü ñanagürü nüxü̃:

Yeremía 18:18

Rü yema duü̃xü̃gü rü ñanagürügü: —Ngĩxã nagu tarüxĩnüe i ta̱xacü namaxã taxü i Yeremía nax nüxü̃ naxoxü̃ca̱x nax guxchaxü̃chiga tamaxã yaxuxü̃. Erü tagutáma nataxu i togü i chacherdótegü i tüxü̃ ngúexẽẽxü̃, rü tagutáma nataxu i togü i yatügü i nüxü̃ icuáxü̃ i tüxü̃ ucu̱xẽgüxü̃, rü tagutáma nataxu i togü i orearü uruü̃gü i Tupanaarü orexü̃ tamaxã ixugüxü̃. Ngĩxã ãẽ̱xgacüpe̱xewa ítanaxuaxü̃ nax ngẽmaãcü yama̱xgüãxü̃ca̱x. Rü taxũtáma naga taxĩnüe i ngẽma nüxü̃ yaxuxü̃ —ñanagürügü.

Echequié 33:31

Rü ngẽmaãcü i chorü duü̃xü̃gü rü cuxca̱x naxĩ, rü cupe̱xewa nayarütogü guxü̃gurüxü̃ nax yanaxĩnüexü̃ca̱x i ngẽma ore i nüxü̃ quixuxü̃. Natürü woo nüxü̃ naxĩnüegu i ngẽma ore natürü tama aixcüma nagu namaxẽ. Rü naã̱xmaxã choxü̃ nicua̱xüü̃gü, natürü norü maxü̃wa rü yexeraãcü diẽruguama narüxĩnüe.

Echequié 8:1

Rü guma norü 6 ga taunecüarü 6 ga tauemacüarü 5 ga ngunexü̃gu rü choma rü chopatawa charüto namaxã ga Yudáanearü ãẽ̱xgacügü. Rü ngürüãchi Cori ya Tupana choxü̃ ningogü.

Auxexü̃chiga 2:9

Rü yemaacü ga guma ĩane rü nüxü̃́ nataxuma ga norü ĩã̱xgü rü nüxü̃́ nataxuma ga norü chotaruü̃gü yerü naxtapü̱xmaxã wüxigu niwa̱xgü ga ĩã̱xgü rü nipue ga norü chotaruü̃gü. Rü Yerucharéü̃arü ãẽ̱xgacü rü norü ngü̃xẽẽruü̃gü rü duü̃xü̃gü i tama yaxõgüxü̃me̱xẽwa nangẽxmagü. Rü ngẽma Cori ya Tupanaarü mugü rü marü nataxuma i natanüwa. Rü ngẽma Tupanaarü orearü uruü̃gü rü nüma ya Tupana rü marü tama nanango̱xetüxẽẽgü.

Ichaía 47:11

Natürü tá pexca̱x ínangu i guxchaxü̃gü. Rü taxũtáma ípenapoxü̃ woo nax piyuüechiréxü̃ rü ẽxü̃guxü̃xü̃ picuáxü̃. Rü pexca̱x tá ínangu i wüxi i taxü̃ i guxchaxü̃ i taxucürüwa na̱xcha̱xwa pibuxmüxü̃. Rü wüxi i guxchaxü̃ i tama nagu perüxĩnüexü̃ tá ngürüãchi pexca̱x ínangu.

Wenaxarü naxümatü ga Tupanaarü mugü 32:23

Rü ngẽma chixexü̃ ügüxü̃ca̱x tá íchananguxẽxẽ i naguxü̃raxü̃xü̃ i guxchaxü̃gü. Rü tá nagu chanacuxgü ya guxü̃nema ya chorü chuxchigü.

Lebítanüxü̃arü puracüchiga 26:21

Rü ngẽxguma peyadaxẽẽgu nax tama chauga pexĩnüexü̃, rü choma rü wena tá 7 e̱xpü̱xcüna pexü̃ chapoxcue naxca̱x i ngẽma pecadugü i pexüxü̃.

Lebítanüxü̃arü puracüchiga 26:18

Rü naétü nax ngẽma pexü̃ ngupetüxü̃, rü ngẽxguma tama chauga pexĩnü̃egu, rü choma rü 7 e̱xpü̱xcüna tá wena pexü̃ chapoxcue naxca̱x i perü pecadugü.

1 Chamué 3:1

Rü nüma ga ngextü̱xücü ga Chamué rü Cori ya Tupanaaxü̃́ napuracü yema Erí namuxü̃ãcüma. Rü yexguma ga Tupana rü ñuxguacürica texémaxã nidexa. Rü ñuxguacürica texéca̱x nanango̱xẽxẽ ga ẽxü̃guxü̃.

Echequié 11:2

Rü yexguma ga nüma ga Cori ya Tupana rü choxü̃ ñanagürü: —Pa Yatüx, ñaagü nixĩ i ngẽma yatügü i máetagu rüxĩnüexü̃ rü chixexü̃maxã duü̃xü̃güxü̃ ixucu̱xẽgüxü̃ i daa ĩanewa.

Echequié 21:7

Rü ngẽxguma cuxna nacagügu nax ta̱xacüca̱x cuxaxuxü̃, ¡rü namaxã nüxü̃ ixu nax cuxaxuxü̃ erü paxa tá ínangu i wüxi i ãũcümaxü̃chixü̃! Rü guxü̃ i duü̃xü̃gü tá naxca̱x rümaachigüxü̃ rü tá naxca̱x yanguãẽgüxü̃. Rü norü muü̃maxã tá nidu̱xruxe. Rü marü ningaicaxüchi nax ínanguxü̃ i ngẽma tá ngupetüxü̃. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü.

Echequié 22:26

Rü ngẽma curü chacherdótegü rü ínayatoxẽẽgü i ngẽma chorü ngu̱xẽẽtaegü rü nanaxãũãchigü i ngẽma chorü ngẽmaxü̃gü i üünegüxü̃. Rü naxca̱x nawüxigu i ngẽma tama mexü̃ rü ngẽma üünexü̃. Rü tama toguxexü̃ nangúexẽxẽ i ta̱xacü nixĩ i chope̱xewa mexü̃ rü ta̱xacü nixĩ i chope̱xewa ãũãchixü̃. Rü tama nanaxaure i chorü ngü̃chigarü ngunexü̃gü. Rü tama choxü̃ nicua̱xüü̃gü.

Maraquía 2:7

Rü wüxi i chacherdótearü puracü nixĩ nax duü̃xẽgü tüxü̃ nangúexẽẽxü̃ nax choxü̃ tacua̱xgüxü̃ca̱x. Rü ngẽmaca̱x name nax guxü̃ma i duü̃xü̃gü naxü̃tawa ĩxü̃ nax tüxü̃ nangúexẽẽxü̃ca̱x, erü choma nax guxãétüwa changexmaxü̃ rü nüxü̃ chaxuneta nax chorü orearü uruü̃gü yixĩgüxü̃ca̱x.

Maraquía 2:9

Rü ñu̱xma i pema rü tama chauga pexĩnüe rü naétü ñuxre i duü̃xü̃gümaxãxica pemecüma rü tama guxãma wüxigu mea tüxü̃ pengúexẽxẽ. Rü ngẽmaca̱x i choma rü pemaxã chanaxuegu nax guxü̃ma i duü̃xü̃gü rü chixexü̃maxã pexü̃ nadaunüxü̃ca̱x rü pexü̃ naxoexü̃ca̱x —ngẽma ñachagürü i chomax ya Cori ya Tupana ya Guxãétüwa ngẽxmaxe.