Echequié 7:23 - Tupanaarü Ore

²³ Rü cumax, Pa Echequiéx ¡rü wüxi ya cadéna ínamexẽxẽ naxca̱x i chorü duü̃xü̃gü i Yerucharéü̃cüã̱xgü! Erü tá chanapoxcue naxca̱x nax poraãcü namáetagüxü̃. Rü yima norü ĩane ya Yerucharéü̃ rü poraãcü máetamaxã nanapá.

Echequié 7:23 Referans Kwoze

Echequié 9:9

Rü nüma ga Cori ya Tupana rü choxü̃ nangãxü̃ga rü ñanagürü: —Ngẽma Iraéanecüã̱xgüarü pecadu rü ngẽma Yudáanecüã̱xgüarü pecadu rü nataxüchi. Rü ngẽma nachixü̃ane rü máetagüxü̃maxã nanapá. Rü yima ĩane ya Yerucharéü̃wa rü norü duü̃xü̃gü rü chixeãcü nügümaxã inacua̱xgü. Rü nüma nagu naxĩnüegu rü marü nüxna chixũ i ngẽma nachixü̃ane, rü ngẽmaca̱x tama nüxü̃ chadau i ngẽma naxügüxü̃.

Yeremía 27:2

Rü ñanagürü choxü̃: —Chanaxwa̱xe i wüxi i naixmena̱xã i toxcunaxãruxü̃ cuxü! ¡Rü naxütü̱xü! ¡Rü ñu̱xũchi cugünaxãwa yachocuchi i ngẽma toxcunaxãruxü̃!

Ochéa 4:2

Rü tamuxũchi ya natüca̱xma Tupanaégagu ixunetaxe rü nataxüchi i dora, rü máeta, rü ngĩ̱x, rü namu i nai i ngexü̃maxã ipegüxü̃, rü nügü daixü̃, rü máetagüechaxü̃.

Echequié 11:6

Pemax rü muxẽma tüxü̃ pedai i daa ĩanewa, rü ñu̱xũchi yuexexü̃negümaxã peyapagüxẽxẽ ya daa ĩanearü namagü.

Norü taxre ga popera ga ãẽ̱xgacügüchiga 21:16

Rü yema Manaché üxü̃ rü Tupanape̱xewa poraãcü nachixe, rü ñu̱xũchi yema duü̃xü̃gü ga Yudáanecüã̱xgüxü̃ namu nax nümagü rü ta naxügüãxü̃ ga yema chixexü̃gü. Rü naétü rü nüma ga Manaché rü Yerucharéü̃wa nanadai ga muxü̃ma ga duü̃xü̃gü ga taxuxü̃ma ga chixexü̃ ügüxü̃. Rü yemaacü ga guma ĩane rü nagümaxã nanapa.

Naúü̃ 3:10

Natürü ga yema Tébacüã̱xgü rü to ga nachixü̃anecüã̱xgü nayagagü. Rü yema norü buxü̃gü rü namaarü poãchigu tüxü̃ nichi̱xgü. Rü yema yatügü ga guma ĩanewa tachigagüxü̃, rü norü uanügü rü sortéuãcüma nügü nayanu. Rü guma ĩanearü ãẽ̱xgacügü rü cadénamaxã ínayachotagü.

Miquéa 7:2

Rü ñoma i naanewa rü marü nataxuma i duü̃xü̃gü i mexü̃gu rüxĩnüexü̃ rü Tupanamaxã ixaixcümagüxü̃. Rü wüxichigü rü naxca̱x nadau nax ñuxãcü guxchaxü̃ togueca̱x naxüxü̃. Rü ngẽxguma guxchaxü̃ ngẽxmagu, rü guxü̃ma rü ínamemare nax nügü nada̱i̱xü̃.

Miquéa 2:2

Rü nüxü̃́ nangúchaü̃gü i toguxearü naanegü, rü nügüxü̃́ nanayauxgü. Rü nüxü̃́ nangúchaü̃gü i toguxepatagü rü tüxna nanayauxgü. Rü chixri nanaxütanü rü ngẽmaãcü tüxna nayapu ya tümapata. Rü ngẽmaãcü tangepata rü tangeane ya yíxema norü yora tümaãcügümaxã.

Echequié 22:27

Rü ñaa nachixü̃anearü ãẽ̱xgacügü rü ñoma dauxchitacüã̱x i airugü i naeü̃gü wagüexü̃rüxü̃ nixĩgü. Rü guxü̃guma ínamegümare nax tümaarü diẽruca̱x duü̃xẽ tüxü̃ yama̱xgüxü̃ nax ngẽmaãcü yadiẽruã́xü̃ca̱x.

Echequié 22:13

Rü ñanagürü ta: —Pa Yerucharéü̃x, rü ngẽma nax nangĩ́xü̃ rü namáetaxü̃ i curü duü̃xü̃gü, rü poraãcü cumaxã chanu.

Echequié 22:9

Rü cuwa nangẽxma i ñuxre i chixexü̃ i duü̃xü̃gü i ãẽ̱xgacügüpe̱xewa idorata̱xagüxü̃ rü ngẽmagagu nayue i ngẽma taxuxü̃ma i chixexü̃ ügüchiréxü̃. Rü ngẽma duü̃xü̃gü i chixexü̃gu maxẽxü̃ rü ma̱xpǘnegüwa nanaxüchiga i norü naxchicüna̱xãgü, rü ngẽmaãcü nanaxügü i taxü̃ i chixexü̃gü i ãũãchixü̃.

Echequié 8:17

Rü yexguma ga nüma ga Cori ya Tupana rü choxna naca rü ñanagürü choxü̃: —¿Nüxü̃ cudauxü̃ i ngẽma chixexü̃ i ngẽma Yudátanüxü̃ ügüxü̃? Natürü naétü rü máetamaxã nayapaxẽxẽ i ñaa nachixü̃ane. Rü guxü̃ i ngunexü̃gu choxü̃ nanuxẽẽgüecha. Rü ngẽma norü ãũãchixü̃ i naxügüxü̃ rü düxwa choxmaraü̃wa nanguema.

Auxexü̃chiga 3:7

Rü nüma rü wüxi ga poxcuchicaxü̃ ga ngearü ũxũchicaãxü̃gu choxü̃ nitacuchi rü cadénamaxã choxü̃ nichota.

Yeremía 40:1

Rü nüma ga Babiróniaanecüã̱xarü churaragüeru ga Nabucharadáü̃ rü Ramágu nanangutaque̱xexẽxẽ ga yema Yerucharéü̃cüã̱xgü rü Yudáanecüã̱xgü ga Babiróniawa gagüchaü̃xü̃. Rü yematanügu Yeremíaxü̃ inayangau ga cadénamaxã ichotacü. Rü nüma ga Nabucharadáü̃ rü ínananguxuchixẽxẽ. Rü yemawena rü nüma ga Cori ya Tupana rü Yeremíamaxã nidexa.

Yeremía 22:17

“Natürü i cuma rü naxca̱x cuxoegaãxẽ i ngẽma curü ngẽmaxü̃gü i chixexü̃wa cuyaxuxü̃. Rü cuyama̱x ya yíxema taxuxü̃ma i ta̱xacürü chixexü̃ ügüxe. Rü ñu̱xũchi chixri tümamaxã icucua̱x rü ngetanüãcü tüxü̃ cupuracüexẽxẽ ya yíxema curü duü̃xẽgü” —ñanagürü ga Cori ya Tupana.

Yeremía 2:34

Rü guxü̃wama cuxãũãchichiru tümagümaxã ya yíxema duü̃xẽ ya ingearü diẽruã́xẽ rü yíxema taxuxü̃ma i chixexü̃ ügüxe, rü yíxema i tama tümawa nüxü̃ cuyangauxe i ta̱xacürü chixexü̃ nax taxügüxü̃.

Ichaía 59:7

Rü pepaxaãẽgü nax pemáetagüxü̃ rü tüxü̃ pima̱x ya yíxema taxuxü̃ma i chixexü̃ üxe. Rü máetaguxicatama perüxĩnüe rü ngẽmaca̱x penadai i duü̃xü̃gü rü ngẽma ípechopetüxü̃wa rü guxü̃ma nachixe.

Ichaía 59:3

Rü pema rü nagümaxã pixãũãchime̱xẽ nagagu nax pimáetagüxü̃. Rü pidorata̱xagü rü chixexü̃maxã pidexagü.

Ichaía 1:15

Rü ngẽxguma pema pexunagüme̱xẽgüãcü peyumüxẽgügu, rü choma rü pexcha̱xwa chidaugachi. Rü woo namuxgu i perü yumüxẽ natürü i choma rü taxũtáma pexü̃ chaxĩnü, erü pema rü pemáeta rü pexme̱xgü rü nagümaxã nixãũãchi.

Yeremía 6:7

Rü Yerucharéü̃wa nixĩ i nangóxü̃ i chixexü̃ ñoma wüxi ya puchuwa dexá ngóxü̃rüxü̃. Rü máetachiga rü chixexü̃chigaxicatama taxĩnü i Yerucharéü̃wa. Ngéma rü yapíxexü̃ rü ngúxü̃ ingexexü̃xicatama nixĩ i chadauxü̃.

Echequié 45:9

Rü chomax ya Cori ya Tupana rü ñacharügü: —¡Pa Iraétanüxü̃arü Ãẽ̱xgacügüx, marütama nax namaxã penuexü̃ rü nüxü̃́ pengĩ́xü̃ i duü̃xü̃gü! ¡Rü aixcüma mea namaxã ipecuá i chorü duü̃xü̃gü! Rü choma ya Cori ya Tupana nixĩ i pemaxã nüxü̃ chixuxü̃ i ngẽma.

Echequié 8:16

Rü ñu̱xũchi Tupanapata ga taxü̃neã̱xtü ga aixepewaama yexmaxü̃wa choxü̃ naga ga Tupanapataca̱x ixücuxü̃wa. Rü yema ãmarearü guruü̃pe̱xewa nüxü̃ chadau ga 25 ga yatügü ga Tupanapata ga taxü̃nena ãca̱xwe̱xgüxü̃ ga ésteguama caxã́pü̱xügüxü̃. Rü waixü̃müanegu nangücuchitanü rü üa̱xcüxü̃ nicua̱xüü̃gü.

Echequié 12:19

¡Rü ñaa nachixü̃anecüã̱xmaxã, rü Yerucharéü̃cüã̱xmaxã, rü ñu̱xũchi guxü̃ma i Iraétanüxü̃maxã nüxü̃ ixu i ñaa ore i ñaxü̃: “Cori ya Tupana rü ñanagürü: ‘Oegaãẽacüma tá penangõ̱x i pewemü, rü muü̃ãcüma tá peyaxaxü i perü dexá! Rü ñaa nachixü̃ane rü tá inayarüxo rü tá nangeãcu nagagu i ngẽma máeta i naxügüxü̃ i norü duü̃xü̃gü.