Echequié 7:11 - Tupanaarü Ore

¹¹ Rü paxa tá ínangu i pechixü̃anearü uanü i poraxü̃ rü daimaxã tá nanapoxcue i Yudáanearü duü̃xü̃güarü chixexü̃. Rü ngẽma duü̃xü̃gü i diẽruã̱xgüxü̃ rü taxuxü̃táma ínayaxü i norü duü̃xü̃gü rü bai i norü diẽrugü, rü bai ya napatagü ya mexẽchine. Rü ngẽmaãcü taxuxü̃táma ínayaxü i ta̱xacü i mexü̃.

Echequié 7:11 Referans Kwoze

Chofonía 1:18

Rü ngẽma Cori ya Tupanaarü ngunexü̃ i ãũcümaxü̃ i nagu norü numaxã duü̃xü̃güxü̃ napoxcuexü̃, rü woo i norü diẽru rü woo i norü úiru rü taũxtáma naétüwa nachogü, erü ngẽma Cori ya Tupanaarü poxcu i üxüema rü guxü̃táma i nachixü̃anexü̃ nigu. Rü guxü̃táma i ngẽma duü̃xü̃gü i ñoma i naanewa maxẽxü̃ rü wüxiü̃cüxü tá inayarüxo.

Echequié 7:23

Rü cumax, Pa Echequiéx ¡rü wüxi ya cadéna ínamexẽxẽ naxca̱x i chorü duü̃xü̃gü i Yerucharéü̃cüã̱xgü! Erü tá chanapoxcue naxca̱x nax poraãcü namáetagüxü̃. Rü yima norü ĩane ya Yerucharéü̃ rü poraãcü máetamaxã nanapá.

Popera ga Chantiágu ümatüxü̃ 2:13

Erü guxãma ya yíxema tama tümamücügü tüxü̃́ ngechaü̃tümüü̃güxe, rü Tupana rü taxũtáma nüxü̃́ tangechaü̃tümüü̃güãcüma tüxna naca i tümaarü maxü̃chiga. Natürü yíxema tümamücügü tüxü̃́ ngechaü̃tümüü̃güxe, rü taxũtáma tamuü̃e i ngẽxguma Tupana tüxna caxgux, erü nüxü̃́ tangechaü̃tümüü̃güãcüma tá tüxna naca.

Miquéa 6:12

Rü ngẽma diẽruã̱xgüxü̃ i daa ĩanegu ãpatagüxü̃ rü poraãcü duẽxẽgüxü̃́ nangĩ́e. Rü guxü̃ma i daa ĩanewa maxẽxü̃ rü dorata̱xaxgüxü̃ rü womüxẽẽwa̱xegüxü̃ nixĩgü.

Miquéa 2:2

Rü nüxü̃́ nangúchaü̃gü i toguxearü naanegü, rü nügüxü̃́ nanayauxgü. Rü nüxü̃́ nangúchaü̃gü i toguxepatagü rü tüxna nanayauxgü. Rü chixri nanaxütanü rü ngẽmaãcü tüxna nayapu ya tümapata. Rü ngẽmaãcü tangepata rü tangeane ya yíxema norü yora tümaãcügümaxã.

Amúx 6:3

Pema rü tama nagu perüxĩnüe i ngẽma ngunexü̃ i nagu tá poxcu pexca̱x ínguxü̃. Natürü ngẽma perü chixexü̃gü rü nayangaicaxẽxẽ i ngẽma ngunexü̃ i nagu tá pexü̃ nada̱i̱xü̃ i perü uanügü.

Amúx 3:10

Rü ngẽma duü̃xü̃gü rü tama naãẽxü̃ nacua̱xgüéga nax mexü̃ naxügüxü̃. Rü napatagü ya mexẽchínegu nananu ga yema namáetagüãcüma naxca̱x nangĩ̱xgüxü̃ —ñanagürü ya Cori ya Tupana.

Echequié 7:16

Rü woo togü rü máxpüxanexü̃wa nabuxmügu ñoma muxtucugü i baixãchiexü̃rüxü̃, natürü guxãtáma tümaarü pecadugagu tayueama.

Echequié 6:11

Rü yemawena ga nüma ga Cori ya Tupana rü choxü̃ ñanagürü: —¡Ẽcü curü ngechaü̃maxã napéxme̱x rü cucutümaxã ipu̱xnecüxü! ¡Rü aixta naxü naxcha̱xwa i ngẽma Iraétanüxü̃arü taxü̃ i chixexü̃gü! Rü nümagü rü tá daigu rü taiyamaxã rü da̱xaweanemaxã nayue.

Echequié 5:11

Rü choma nax Cori ya Tupana chixĩxü̃ rü chauégagu poxcu pemaxã chaxuegu. Yerü ga pema rü penaxãũãchixẽxẽ ga guma chopata ya üünene namaxã ga perü naxchicüna̱xãgü ga ãũãchixü̃ rü pecümagü ga chixexü̃. Rü ngẽmaca̱x i choma rü tá pexü̃ chadai. Rü taxũtáma pemaxã chixãũxãchi rü taxũtáma choxü̃́ pengechaxütümüxü̃gü.

Echequié 5:4

¡Ngẽmawena rü nade i ñuxre i cuyae rü üxüwa yawocu nax yaxaexü̃ca̱x! Rü ngéma tá ínaxũxũ ya üxü i guxü̃táma i Iraétanüxü̃wa nguxü̃ne —ñanagürü.

Yeremía 25:33

Rü ngẽma ngunexü̃gu rü ngẽma duü̃xü̃gü i Cori ya Tupana daixü̃ rü guxü̃wama i ñoma i naanegu tá nawoone. Rü taxúetama naxca̱x taxauxe, rü taxúetama texe tanade i ngẽma naxü̃negü nax itanata̱xgüxü̃ca̱x. Rü ñoma naü̃rüxü̃ tá waixü̃müanewa nawogümare.

Yeremía 22:18

Rü Cori ya Tupana rü Yudáanearü ãẽ̱xgacü ya Yoaquíü̃ ya Yochía nanechiga nidexa rü ñanagürü: —Taxúetama cuxca̱x taxaxu i ngẽxguma cuyu̱xgu. Rü taxúetama texé ñatagürü: “¡Ãẽ̱xgacüca̱x changechaü̃, Pa Chauenexẽ! ¡Rü ãẽ̱xgacüca̱x changechaü̃, Pa Chaueya̱x! ¡Rü ãẽ̱xgacüca̱x changechaü̃, Pa Corix! ¡Rü cuxca̱x tangechaxü̃, Pa ãẽ̱xgacüx!” ñatagürü. Rü ngẽmaãcü taxúetama cuxca̱x tangechaxü̃ i ngẽxguma cuyu̱xgu.

Yeremía 6:7

Rü Yerucharéü̃wa nixĩ i nangóxü̃ i chixexü̃ ñoma wüxi ya puchuwa dexá ngóxü̃rüxü̃. Rü máetachiga rü chixexü̃chigaxicatama taxĩnü i Yerucharéü̃wa. Ngéma rü yapíxexü̃ rü ngúxü̃ ingexexü̃xicatama nixĩ i chadauxü̃.

Ichaía 14:29

—Pa Firitéutanüxü̃x, tama name i naxca̱x petaãẽgü i ngẽma nax nayuxü̃ i Achíriaanearü ãẽ̱xgacü ga naxme̱xwa peyexmagüxü̃ ga chixri pemaxã icuáxü̃. Erü ngextá curá ne ũxü̃wa rü wüxi i ãxtape i düraxü̃ tá ínaxũxũ. Rü ngẽma ãxtapewena rü tá ngéma ínaxũxũ i yexera rüdüramaexü̃chixü̃ i dragóü̃ i ãxpe̱xatüxü̃ rü igoexü̃.

Ichaía 9:4

Yerü yema Madiáü̃anearü ãẽ̱xgacüme̱xẽwa toxü̃ ícunguxü̃xẽẽgurüxü̃ rü cuma rü toxü̃ ícunguxü̃xẽxẽ nawa ga yema ngúxü̃ ga tingegüxü̃ rü toxü̃ yaxĩ̱xãchitanüãẽxẽẽxü̃ ga yexguma naxme̱xwa tayexmagügu ga yema ãẽ̱xgacü ga chixri tomaxã icuáxü̃.

Ichaía 5:7

Rü ngẽma norü úbanecü i nüxü̃́ ngúchaü̃xü̃ ya Cori ya Tupana ya Guxãxétüwa Ngẽxmacü, rü ngẽma nixĩ i Iraétanüxü̃ i Yudáanewa ngẽxmagüxü̃. Rü nüma ya Cori ya Tupana rü nanaxwa̱xe i nagu naxĩxü̃ i ngẽma norü mugü. Natürü ngẽma Iraétanüxü̃ rü máetaguxicatama narüxĩnüe. Rü nüma ya Tupana rü ínananguxẽxẽ nax nügü nangechaü̃güxü̃, natürü ngẽma natanüwa nüxü̃ ĩnüxü̃ nixĩ nax ngúxü̃maxã aita naxüexü̃.

Wiyaegü 78:64

Rü yema norü chacherdótegü rü taramaxã nanadai. Rü naxma̱xgü rü taxucürüwa tümateca̱x taxauxe.

Wiyaegü 73:8

Rü duü̃xü̃güxü̃ nacugüe rü tümagu nidauxcüraxü̃gü rü chixexü̃ tümamaxã nixugüe. Rü chixexü̃maxã rü ma̱xmaxã duü̃xü̃güxü̃ naxãxũnegü. Rü nügü yacua̱xüü̃güãcüma nidexagü.

Wiyaegü 125:3

Rü ngẽma chixecümaxü̃ i ãẽ̱xgacü rü taxũtáma guxü̃gu duü̃xü̃gümaxã inacuáecha nawa i ñaa naane ya Tupana norü duü̃xü̃güxü̃ nagu namugüxü̃. Erü nüma ya Tupana rü tama nanaxwa̱xe nax norü duü̃xü̃gü nagu maxẽxü̃ i nacüma i ngẽma chixexü̃ i duü̃xü̃gü.

Echequié 8:17

Rü yexguma ga nüma ga Cori ya Tupana rü choxna naca rü ñanagürü choxü̃: —¿Nüxü̃ cudauxü̃ i ngẽma chixexü̃ i ngẽma Yudátanüxü̃ ügüxü̃? Natürü naétü rü máetamaxã nayapaxẽxẽ i ñaa nachixü̃ane. Rü guxü̃ i ngunexü̃gu choxü̃ nanuxẽẽgüecha. Rü ngẽma norü ãũãchixü̃ i naxügüxü̃ rü düxwa choxmaraü̃wa nanguema.

Echequié 45:9

Rü chomax ya Cori ya Tupana rü ñacharügü: —¡Pa Iraétanüxü̃arü Ãẽ̱xgacügüx, marütama nax namaxã penuexü̃ rü nüxü̃́ pengĩ́xü̃ i duü̃xü̃gü! ¡Rü aixcüma mea namaxã ipecuá i chorü duü̃xü̃gü! Rü choma ya Cori ya Tupana nixĩ i pemaxã nüxü̃ chixuxü̃ i ngẽma.

Yeremía 7:34

Rü ngẽma Yudáanearü ĩanegüwa rü Yerucharéü̃arü namagüwa tá ichayanaxoxẽxẽ nax nagu nawiyaegüxü̃ i petaarü wiyaegü, rü taãẽarü wiyaegü, rü ngĩgüarü wiyaegü. Rü guxü̃táma i ngẽma nachixü̃ane rü wüxi i chianexü̃mare tá nixĩ —ñanagürü.