Echequié 6:6 - Tupanaarü Ore

⁶ Rü guxü̃ma i ngẽma naane i nawa pemaxẽxü̃arü ĩanegü rü tá inayarüxo. Rü ngẽma perü tupananetagüarü ãmarearü guruü̃gü rü tá nagu nipogügü. Rü ngẽmaãcü i ngẽma ãmarearü guruü̃gü rü tá noxtacüma nayarüxo. Rü ngẽma perü tupananetachicüna̱xãgü rü íxraxü̃gu tá napoü̃gü. Rü ngẽma perü pumaraarü guruü̃gü rü tá niwa̱xgü. Rü guxü̃táma i ngẽma pema pexügüxü̃ rü tá inayarüxo.

Echequié 6:6 Referans Kwoze

Chacaría 13:2

Rü guxü̃wama i ñaa nachixü̃anewa rü tá ichayanaxoxẽxẽ i woo i naégagü i ngẽma tupananetachicüna̱xãgü nax ngẽmaãcü tama nüxü̃ yacua̱xüü̃güxü̃ca̱x i duü̃xü̃gü. Rü ñaa nachixü̃anewa rü ngẽxgumarüxü̃ tá ta ichayanaxoxẽxẽ i ngẽma tupananetagüarü orearü uruü̃gü rü guxü̃ma i chixexü̃ i naãẽgü. Rü choma ya Cori ya Tupana nixĩ i ngẽma ñachaxü̃.

Miquéa 1:7

Rü guxü̃ma i ngẽma norü tupananetachicüna̱xãgü rü tá nipue. Rü guxü̃ma i ngẽma norü naigü i namaxã natupanaã̱xgüxü̃ rü tá ínagu. Rü ngẽma diẽru i ngẽma Iraétanüxü̃ norü tupananetachicüna̱xãgüxü̃ namaxã icua̱xüü̃güxü̃, rü norü uanügü rü nachixü̃anewa tá nanana nax ngéma norü tupanachicüna̱xãxgüxü̃ namaxã yacua̱xüü̃güxü̃” —ñanagürü ga Miquéa.

Echequié 5:14

Rü chomax, Pa Yerucharéü̃cüã̱xgü rü tá nagu chapogü ya yima perü ĩane. Rü ĩpata ya iwa̱xgünexica tá ngéma nayaxügü. Rü ngẽmaãcü tá guxü̃ i togü i nachixü̃anegüpe̱xewa pexü̃ chaxãneexẽxẽ. Rü guxü̃ma i duü̃xü̃gü i ngéma chopetüxü̃ tá nüxü̃ nadaugü i ngẽma chixexü̃ i pexü̃ ngupetüxü̃.

Ichaía 6:11

Rü yexguma ga choma rü nüxna chaca rü ñachagürü: —¿Ñuxre i ngunexü̃ tá nixĩ i ngẽmaãcü yixĩxü̃, Pa Corix? —ñachagürü. Rü yexguma ga nüma rü choxü̃ nangãxü̃ rü ñanagürü: —Ngẽmaãcü tá nixĩ ñu̱xmatáta yima ĩanegü rü nagu napogüe, rü taxuxü̃táma i duü̃xü̃ ínayaxü rü ñu̱xmatáta ya yima ĩpatagü rü nangearü duü̃xü̃güã̱xgü rü naanegü rü nabáianemare rü ñu̱xmatáta íchanamuxü̃ i ngẽma duü̃xü̃gü i norü naanewa, rü ngẽmaãcü i nachixü̃ane rü nangeãcumare.

Echequié 6:4

Rü íxraxü̃gu tá chanapoü̃gü i ngẽma nachicagü i nawa perü ãmaregü pigugüxü̃ rü perü pumarate̱xe i yixichixü̃ nawa pigugüxü̃. Rü ngẽma curü duü̃xü̃gü i ngéma maxẽxü̃ rü tá chanadai nape̱xegu i ngẽma tupananetachicüna̱xãgü.

Lebítanüxü̃arü puracüchiga 26:30

Rü choma rü tá nagu chipogügü i ngẽma nachicagü i nawa perü tupananetaxü̃ picua̱xüü̃güxü̃. Rü taxregu tá chanamate i perü pumarate̱xearü guruü̃gü. Rü wüxigu tá chananutaque̱xe i pexene i yuexü̃ naétügu i ngẽma tupanachicüna̱xãgü i ngearü maxü̃ã́xü̃. Rü ngẽmawa tá pexü̃ chanawe̱x nax pexü̃ chaxoxü̃.

Chofonía 1:18

Rü ngẽma Cori ya Tupanaarü ngunexü̃ i ãũcümaxü̃ i nagu norü numaxã duü̃xü̃güxü̃ napoxcuexü̃, rü woo i norü diẽru rü woo i norü úiru rü taũxtáma naétüwa nachogü, erü ngẽma Cori ya Tupanaarü poxcu i üxüema rü guxü̃táma i nachixü̃anexü̃ nigu. Rü guxü̃táma i ngẽma duü̃xü̃gü i ñoma i naanewa maxẽxü̃ rü wüxiü̃cüxü tá inayarüxo.

Abacú 2:18

Rü wüxi i naxchicüna̱xã i naiwa üxü̃ ¿rü ta̱xacüwa namexü̃ ega marü yanguxgu? ¿Rü ta̱xacüwa namexü̃ i wüxi i tupananetachicüna̱xã i wüxi i doramare ixĩxü̃? Rü ngẽma tupananetachicüna̱xãgü rü tama nidexagü. ¿Rü ñuxãcü nüxü̃́ yaxõõxü̃ ya yima yatü ya nümatama naxücü i ngẽma naxchicüna̱xã?

Miquéa 5:13

Rü tá nagu chapogü i perü tupananetachicüna̱xãgü rü perü nutapütagü i pexca̱x üünexü̃ nax taguma wena nüxü̃ picua̱xüü̃güxü̃ca̱x i ngẽma tupananetachicüna̱xãgü i pematama pexügüxü̃.

Miquéa 3:12

Pa Ãẽ̱xgacügüx, pegagu rü yima ma̱xpǘne ya Chióü̃ rü wüxi i naane i ngẽxma maxẽmaxã rüxümarexü̃ tá nixĩ. Rü yima ĩane ya Yerucharéü̃ rü naxtapü̱xgüxica tá ngẽxma naxãũxchita —ñanagürü.

Ochéa 10:8

Rü tá nagu napogüe i napatagü i ngẽma tupananetagü ga Iraéanecüã̱xgü chixexü̃ nawa ügüxü̃. Rü ngẽma norü ãmarearü guruü̃güétüwa tá narüxügü i chuxchuxü̃gü rü toragü. Rü nüma i ngẽma duü̃xü̃gü rü tá ngẽma ngüchitaerugüxü̃ ñanagürügü: “¡Toétüwa pebuemügü!” ñanagürügü. Rü yima ma̱xpǘnegüxü̃ tá ñanagürügü: “¡Toétügu peyi!” ñanagürügü —ñanagürü ga Ochéa.

Ochéa 10:2

Ngẽma Iraéanecüã̱xgü rü namuarü ĩnüã̱xgü, rü tama Tupanaguxica narüxĩnüe. Rü ngẽmaca̱x i ñu̱xma rü ngẽma norü chixexü̃gagu rü tá napoxcue. Rü nüma ya Cori ya Tupana rü tá inanaxoxẽxẽ i ngẽma ãmarearü guruü̃gü i norü tupananetagüca̱x naxügüxü̃. Rü tá nayapuexẽxẽ i ngẽma nutagü i nüxü̃ yacua̱xüü̃güxü̃.

Echequié 30:13

Rü choma ya Cori ya Tupana rü ñacharügü: ‘Choma rü tá nagu chipogügü i ngẽma Equítuanearü tupananetachicüna̱xãgü. Rü ĩane ya Ménfiwa tá chayanaxoxẽxẽ i ngẽma tupananetagü i ngéma ngẽxmagüxü̃. Rü Equítuane rü tá nangearü ãẽ̱xgacüã̱x. Rü choma rü tá chanamuü̃xẽxẽ i guxü̃ma i ngẽma duü̃xü̃gü i ngéma maxẽxü̃.

Echequié 16:39

Rü ngẽmagüme̱xẽwa tá cuxü̃ changexmaxẽxẽ nax ngẽmaãcü nagu napogüexü̃ca̱x i ngẽma nachicagü ga nawa cungeãẽxü̃ rü nawa ngẽma tupananetachicüna̱xãgüxü̃ quicua̱xüxü̃xü̃. Rü tá cuxna nanapuxü̃ i ngẽma cuxchiru i mexẽchixü̃ rü ngẽma mexẽchixü̃ i curü ngã̱xãẽruü̃gü. Rü tá nayana i guxü̃ma i curü ngẽmaxü̃gü rü ñoma cubáitücuxü̃rüxü̃ tá ngéma cuxü̃ nata̱xgü.

Yeremía 34:22

Rü choma, Pa Yeremíax, rü tá chanamu i Babiróniaanearü ãẽ̱xgacüarü churaragü nax wena daa ĩaneca̱x nawoeguxü̃ca̱x. Rü tá naxca̱x ínayaxüãchi rü tá nagu nachocu, rü tá nayagugü. Rü yima naigü ga Yudáanearü ĩanegü rü chianexü̃xü̃ tá nixĩgü rü nataxutama i duü̃xü̃gü i nawa ngẽxmagüxü̃ —ñanagürü.

Yeremía 10:22

¡Dücax, Iperüxĩnüe! Nua nangu i wüxi i ore. Rü wüxi i nachixü̃ane i nórtewaama ngẽxmaxü̃wa inanaxũ i wüxi i taxü̃ i naga i ãũcümaxü̃. Rü ngẽma nachixü̃anearü churaragü rü tá nagu napogüe i Yudáanearü ĩanegü nax wüxi i chianexü̃ yaxĩxü̃ca̱x i ngexta ngowagüxicatama nawa maxẽxü̃.

Yeremía 9:19

Rü Chióü̃gu nüxü̃ taxĩnü i naga i duü̃xü̃gü nax aixta naxüexü̃ namaxã nax ngúxü̃ yangegüxü̃. Rü ñaãcü aixta naxüe: Taxü̃ i ngechaü̃wa tangexmagü erü tórü ĩane rü nachitaxü̃xica ínayaxü. Rü ngẽmaca̱x poraãcü taxãnee. Rü ñu̱xma i tórü uanügü rü tachixü̃anena to i nachixü̃anewa tá tüxü̃ nagagü. Rü tapatagü rü nachitaxü̃xica ngéma nayaxügü.

Yeremía 9:11

Rü Tupana rü ñanagürü: —Nutagüxü̃ tá chayanguxuchixẽxẽ ya Yerucharéü̃, rü wüxi i ngowagüarü pegüchicaxü̃ tá chayaxũxẽxẽ. Rü yima Yudáanearü ĩanegü rü chianexü̃xü̃ tá chananguxuchixẽxẽ, rü taxuxü̃táma i duü̃xü̃gü nawa namaxẽ —ñanagürü.

Yeremía 2:15

¿Rü ta̱xacüca̱x norü uanügü ñoma leóü̃gü nada̱i̱xü̃rüxü̃ nanadai, rü tagaãcü aita naétü naxüe? Rü nachixü̃ane rü nachitaxü̃icatama ínayaxü. Rü norü ĩanegü rü ínanagu. Rü taxúema nawa tayaxü.

Ichaía 64:10

Rü yima curü ĩanegü ya üünegüne rü nachica i taxúema nagu ãpataxü̃ nixĩgü. Rü Chióü̃ rü wüxi i chianexü̃ nixĩ. Rü Yerucharéü̃ rü nagu napogüe rü taxuwama name.

Ichaía 27:9

Natürü nüma ya Cori ya Tupana rü tá nüxü̃́ nüxü̃ inayarüngüma i ngẽma Iraétanüxü̃arü chixexü̃gü rü tá ínanapi i norü pecadugü i ngẽxguma nagu napogüegu i norü tupananetagüarü ãmarearü guruü̃güarü nutagü, ñoma nuta ya cal íxraxü̃gu pocürüxü, rü ngẽxguma ínawogüãgu i ngẽma naigü i Acheráchicüna̱xãgü i namaxã natupanaã̱xgüxü̃ rü nagu napogüegu i ngẽma guruü̃gü i nawa norü tupananetagüca̱x pumarate̱xe ínagugüxü̃.

Ichaía 2:20

Rü ngẽma ngunexü̃gu rü duü̃xü̃gü rü tá ü̃cagüna rü chü̱xürigüna nanawoxochitanü i norü tupananetachicüna̱xãgü i úirunaxca̱x rü diẽrumünaxca̱x i nümatama ínaxüxüxü̃ nax nüxü̃ yacua̱xüü̃güxü̃ca̱x.

Ichaía 2:18

Rü nüma rü tá inayanaxoxẽxẽ i guxü̃ma i ngẽma tupananetachicüna̱xãgü.

Ichaía 1:31

Rü yimá yatü ya poracü rü ñoma maxẽ ya ipacürüxü̃ tá nixĩ, rü ngẽma chixexü̃ i naxüxü̃ rü üxüarü ya̱u̱xraxü̃rüxü̃ tá nixĩ. Rü ngẽma taxre rü tá wüxigu niyaura, rü taxucürüwa tá texé tayaxoxẽxẽ —ñanagürü ga Tupana.

Wiyaegü 115:8

Rü ngẽma duü̃xü̃gü i nügüca̱xtama naxchicüna̱xãgü ügüxü̃ rü nüxü̃́ yaxõgüxü̃ rü naxrüü̃tama nixĩgü nax taxuwama yamexü̃.

Lebítanüxü̃arü puracüchiga 26:31

Rü tá nagu chipogügü i perü ĩanegü rü nachitaxü̃güxica tá ngéma nayaxügü. Rü ngẽxgumarüxü̃ tá ta nagu chipogügü i ngẽma nachicagü i nawa perü tupananetaxü̃ picua̱xüü̃güxü̃. Rü taxũtáma namaxã chataãxẽ i naema i ngẽma pumarate̱xe i cha̱u̱xca̱x pigugüxü̃.

1 Chamué 5:4

Natürü yexguma moxü̃ãcü pa̱xmama yéma naxĩxgu ga yema Adúxcüã̱x, rü nüxü̃ inayangaugü ga Dagóü̃chicüna̱xã ga wenaxarü ñaxtüanegu ümarexü̃ nape̱xegu ga yema baú ga Tupanaarü mugü nawa yexmaxü̃. Rü ga naeru rü gumá taxre ga naxme̱x rü nabüü̃ rü ĩã̱xgu nayanumare. Rü yema naxü̃nerica nixĩ ga mexü̃.

Echequié 6:7

Rü ngẽxguma nüxü̃ pedaugügu nax petanüwa nayuexü̃ i ngẽma muxü̃ma i duü̃xü̃gü, rü ngẽxguma tá nixĩ i nüxü̃ picua̱xãchitanüxü̃ nax aixcüma choma chixĩxü̃ ya perü Cori ya Tupana.

Echequié 12:19

¡Rü ñaa nachixü̃anecüã̱xmaxã, rü Yerucharéü̃cüã̱xmaxã, rü ñu̱xũchi guxü̃ma i Iraétanüxü̃maxã nüxü̃ ixu i ñaa ore i ñaxü̃: “Cori ya Tupana rü ñanagürü: ‘Oegaãẽacüma tá penangõ̱x i pewemü, rü muü̃ãcüma tá peyaxaxü i perü dexá! Rü ñaa nachixü̃ane rü tá inayarüxo rü tá nangeãcu nagagu i ngẽma máeta i naxügüxü̃ i norü duü̃xü̃gü.

Echequié 35:4

Rü tá nagu chipogügü ya curü ĩanegü rü tá chianexü̃xü̃ chayaxĩxẽxẽ i curü naane. Rü ngẽxguma ngẽma cuxü̃ ngupetügu rü tá nüxü̃ quicua̱xãchi nax choma yixĩxü̃ ya Cori ya Tupana chixĩxü̃.

Nüxíraxü̃xü̃ ga popera ga ãẽ̱xgacügüchiga 14:23

Yerü nümagü ga duü̃xü̃gü rü wüxichigü ga ma̱xpǘnewa rü wüxichigü ga nai ga itaetaxü̃tüxü̃wa norü tupananetagüca̱x nanaxü ga norü cua̱xüxü̃chicagü. Rü yéma nanatogüxẽxẽ ga nutagü rü naixpǘtagü nax yemaxü̃ yacua̱xüü̃güxü̃ca̱x.

Yeremía 9:10

Rü duü̃xü̃gü rü yima ma̱xpǘnegüca̱x rü wocachitaü̃güca̱x naxaxu rü ningü̃necüü, erü nixae rü marü taxúema ngéma taxüpetü. Rü marü taxuxü̃ma i wocagaxü̃ taxĩnü. Rü werigü rü naeü̃gü i idüraexü̃ rü nibuxmü.

Yeremía 51:18

Rü ngẽma tupananetachicüna̱xãgü rü taxuwama name rü cugüruü̃gümare nixĩgü. Rü nüma ya Cori ya Tupana rü ngẽxguma napoxcuegu i duü̃xü̃gü rü tá nayanaxoxẽxẽ i ngẽma tupananetagü.