Echequié 6:13 - Tupanaarü Ore

¹³ Rü ngẽxguma ngẽma maxẽxü̃ i duü̃xü̃gü nüxü̃ daugügu i ngẽma yuexü̃ i naxchicüna̱xãgüpe̱xegu nuquegüxü̃, rü ãmarearü guruü̃gücüwagu nuquegüxü̃, rü guxü̃ma i ngüchitaerugüxü̃gu nuquegüxü̃, rü ma̱xpǘnegügu nuquegüxü̃, rü guxü̃ma i nai i taetaxü̃tüü̃gu nuquegüxü̃, rü guxü̃ma i castaña i taetaxü̃tüü̃gu nuquegüxü̃, rü ñu̱xũchi ngẽma nachicagü i norü naxchicüna̱xãgüca̱x pumarate̱xe íyagugüxü̃gu nuquegüxü̃, rü ngẽxguma ngẽmaxü̃ nadaugügu i ngẽma duü̃xü̃gü i íyaxügüxü̃ rü tá nüxü̃ nicua̱xãchitanü nax choma chixĩxü̃ ya Cori ya Tupana.

Echequié 6:13 Referans Kwoze

Echequié 20:28

Rü yexguma nagu chanachocuxẽẽgu ga yema naane ga namaxã chaxueguxü̃ nax nüxna chanaxãxü̃ca̱x, rü nümagü ga perü o̱xigü rü yexguma nüxü̃ nadaugügu ga wüxi ga ma̱xpǘne rüe̱xna wüxi ga nai ga taetane rü guma ma̱xpǘnewa rü guma naixtüü̃wa norü tupananetagüca̱x nanadai rü ínanagu ga norü ãmaregü ga poraãcü naxchi chaxaixü̃. Rü yema norü ãmareétügu nanabagü ga norü bínugü rü norü tupananetagüca̱x ínanagu ga norü pumarate̱xe.

Ochéa 4:13

Rü ma̱xpǘnegüwa rü ngẽma naigü i taxü̃arü gáuxchipetawa norü tupananetagüca̱x ínanagugü i pumarate̱xegü rü norü ãmaregü. Rü ngẽmaca̱x pexacügü rü peneã̱xgü rü ngeãẽgüxü̃ nixĩgü.

Yeremía 2:20

Rü nũxcümacürüwatama nixĩ ga choxna pixĩgachixü̃ rü tama chauga pexĩnüechaxü̃xü̃. Rü ñaperügügü: “Tama cuga taxĩnüechaü̃”, ñaperügügü. Pema rü pechauechitae ñoma wüxi i ngexü̃ i natena ngeãẽxü̃rüxü̃, yerü guxü̃ma ga ma̱xpǘnegüwa rü guxü̃ma ga naigü ga imeetaxü̃tüü̃wa nüxü̃ picua̱xüü̃gü ga yema tupananetachicüna̱xãgü.

Nüxíraxü̃xü̃ ga popera ga ãẽ̱xgacügüchiga 14:23

Yerü nümagü ga duü̃xü̃gü rü wüxichigü ga ma̱xpǘnewa rü wüxichigü ga nai ga itaetaxü̃tüxü̃wa norü tupananetagüca̱x nanaxü ga norü cua̱xüxü̃chicagü. Rü yéma nanatogüxẽxẽ ga nutagü rü naixpǘtagü nax yemaxü̃ yacua̱xüü̃güxü̃ca̱x.

Ichaía 1:29

Rü pema rü tá na̱xcha̱xwa pexãnee i ngẽma naigü i taxü̃ rü putüraanecügü i perü me ixĩxü̃ i nawa nüxü̃ picua̱xüü̃güxü̃ i ngẽma tupananetachicüna̱xãgü.

Norü taxre ga popera ga ãẽ̱xgacügüchiga 16:4

Rü yema nachicagü ga tupananetagüca̱x ãmare íyagugüxü̃ ga ma̱xpǘnegüwa rü guxü̃ma ga naigü ga imeetaxü̃tüü̃wa, rü nüma ga Acáx rü yemawa ínanagu ga naxü̃nagü rü pumarate̱xegü.

Yeremía 3:6

Rü yexguma Yochía ãẽ̱xgacü ixĩxgu ga Yudáanewa rü yexguma nixĩ ga Cori ya Tupana ga choxü̃ ñaxü̃: —¿Nüxü̃ cudauxü̃ i ngẽma naxügüxü̃ i ngẽma Iraéanecüã̱xgü i tama ixĩnüechaü̃xü̃? Rü nümagü rü guxü̃nema ya ma̱xpǘnegüwa, rü guxü̃ma i nai i imeetaxü̃tüü̃wa rü tupanachicüna̱xãxgüxü̃ nicua̱xüü̃gü. Rü ngẽmaãcü choxna nixĩgachi ñoma wüxi i nge i ngĩtena ngeãẽcürüxü̃.

Ichaía 66:17

Tupana rü ñanagürü: —Wüxigu tá nayue i ngẽma duü̃xü̃gü i nügü imexẽẽgüxü̃ nax putüranecüwa naxchicüna̱xãgüxü̃ yacua̱xüü̃güxü̃ca̱x rü ngẽma duü̃xü̃gü i nangõ̱xgüxü̃ i cuchimachi rü ü̃cagü rü togü i naeü̃gü i ãũãchixü̃. Rü wüxicana tá nayue i ngẽma duü̃xü̃gü, erü meama nüxü̃ chacua̱x i ngẽma chixexü̃ i naxügüxü̃ rü nagu naxĩnüexü̃. Rü ngẽxguma i choma rü tá íchangu nax chanangutaque̱xexẽẽxü̃ca̱x i guxü̃ne ya ĩanecüã̱xgü rü nachixü̃anecüã̱xgü. Rü nüma rü tá nua naxĩ rü tá nüxü̃ nadaugü i ngẽma chorü üünemaxã chaxüxü̃.

Ichaía 37:20

Rü ñu̱xmax, Pa Corix, Pa Torü Tupanax ¡rü toxü̃ ínanguxü̃xẽxẽ naxme̱xwa i ngẽma Achíriaanearü ãẽ̱xgacü nax ngẽmaãcü guxü̃ i nachixü̃anegü i ñoma i naanewa ngẽxmagüxü̃ nüxü̃ cua̱xgüxü̃ca̱x nax cuxicatama yixĩxü̃ nax Tupana quixĩxü̃! —ñanagürü ga norü yumüxẽwa.

Yeremía 13:27

Rü pemax, Pa Yerucharéü̃cüã̱x, marü nüxü̃ chadau i ngẽma perü ngúchaü̃gü i chixexü̃gü, rü ñoma nai ya ngexü̃maxã nax ípepegüxü̃rüxü̃ pixĩgü, rü ngẽma pecüma i chixexü̃ nax pengeãẽgüxü̃, rü ngẽma chixexü̃ i pecüma i ngüchitaerugüxü̃wa rü naanegüwa pexüxü̃. Rü wüxi i taxü̃ i ngechaü̃ nixĩ i cuxca̱x, Pa Yerucharéü̃x. ¿Rü ñuxgura tá ta nüxü̃ curüxoxü̃ nax chixexü̃maxã cugü cuxãũãchixü̃? —ñanagürü ya Cori ya Tupana.

Echequié 18:6

Rü yíxema rü tama natanügu taxã i ngẽxguma togü ma̱xpǘnegüwa taxü̃ i õna naxügügu nax norü tupananetachicüna̱xãgüxü̃ yacua̱xüü̃güxü̃ca̱x. Rü tama nüxü̃́ tayaxõ i ngẽma Iraétanüxü̃arü tupananetagü. Rü yíxema rü tama tümamücüxü̃ tayapu̱xma̱x, rü tama tümama̱xmaxã tamaxü̃ ega ngẽxguma tümaarü da̱xawexü̃newa tangexmagu.

Echequié 43:7

Rü choxü̃ ñanagürü: —Ñaa nixĩ i cha̱u̱xma̱xwe̱xechica, rü nachica i nagu chacuaixcutüxü̃. Rü ñaa nachicawa tá nixĩ i guxü̃gutáma Iraégütanügüwa chamaxü̃xü̃. Rü woo Iraétanüxü̃, rü woo norü ãẽ̱xgacügü rü taxũtáma wena norü tupananetagüca̱x nanaxãũãchixẽxẽ i chauéga i üünexü̃. Rü taxũtáma norü ãẽ̱xgacügü i yuexü̃chique̱xewa naxĩ nax nüxü̃ yacua̱xüü̃güxü̃ca̱x.

Chofonía 1:10

Rü nüma ya Cori ya Tupana rü ñanagürü ta: —Ngẽma ngunexü̃gu rü tá nüxü̃ taxĩnüe i duü̃xü̃gü i aita üexü̃ nax ngü̃xẽẽca̱x ínacagüxü̃ i Choxnigüarü ĩã̱xwa. Rü yima Ngexwacaxü̃ ya Ĩanewa ngẽxmagüxü̃ i duü̃xü̃gü rü tá ta aita naxüe. Rü ngẽxgumarüxü̃ tá ta nüxü̃ taxĩnüe nax tagaãcü nawĩẽmügüxü̃ ya yima ma̱xpǘnegü.

Echequié 23:41

Rü ngĩmagü rü mexẽchixü̃ ga pechicaxü̃wa irütogü nape̱xewa ga wüxi ga mecha ga marü ímemarexü̃. Rü yexma mechagu inaxügü ga yema chíxü̃ rü yema pumarate̱xe ga choxrü ixĩxü̃.