Echequié 5:12 - Tupanaarü Ore

¹² Rü wüxi i norü tomaepü̱xtücumü i curü duü̃xü̃gü rü da̱xaweanemaxã rü taiyamaxã tá cugu nayue, Pa Yerucharéü̃x. Rü ngẽma to i tomaepü̱xtücumü rü cucüwagu tá norü uanügü nanadai. Rü ngẽma to i tomaepü̱xtücumü i íyaxügüxü̃ rü guxü̃ i naanegu tá chanawoone. Rü choma rü tá ngẽma duü̃xü̃güweama chixũchigü namaxã i wüxi i tara i cho̱xme̱xgu tá chingexü̃.

Echequié 5:12 Referans Kwoze

Echequié 5:2

Rü ngẽxguma marü yapugüãgu ya yima ĩane ya Yerucharéü̃ ¡rü ngẽma tomaepü̱xtücumü i cuyaewa nayaxu i wüxitücumü, rü ĩanearü ngãxü̃wa yagu! ¡Ngẽmawena rü nayaxu i ngẽma norü taxretücumü i cuyae! ¡Rü wüxi ya cüxchimaxã yima ĩanecüwagu yawíü̃güchigü! ¡Rü ngẽma norü tomaepü̱xtücumü i cuyae rü buanecügu nawogü! Rü choma rü yimá ĩanecüã̱xgü i duü̃xü̃güweama tá chixũchigü namaxã i wüxi i tara i cho̱xme̱xgu tá chingexü̃.

Yeremía 15:2

Rü ngẽxguma tá cuxna nacagügu ¿rü ngextá chi itaxĩxü̃? ñagügu, rü chauégagu tá ñacurügü nüxü̃: “Yíxema marü tümamaxã naxuegugüxe nax da̱xaweanemaxã tayuexü̃, rü da̱xaweanemaxã tá tayue. Rü yíxema marü tümamaxã naxuegugüxe nax daigu tayuexü̃ rü daigu tá tayue. Rü yíxema marü tümamaxã naxuegugüxe nax taiyamaxã tayuexü̃ rü tá taiyamaxã tayue. Rü yíxema marü tümamaxã naxuegugüxe nax ítawoxü̃xü̃ i ñaa nachixü̃anewa rü tá ítawoxü̃” —ñanagürü.

Echequié 12:14

Rü guxü̃ i naanegu tá chanawoone i ngẽma norü dauruü̃gü i ínachomaegugüxü̃ nax ínapoxü̃güãxü̃ca̱x. Rü ngẽxgumarüxü̃ tá ta chanawoone i ngẽma togü i norü churaragü. Rü ngẽma cho̱xme̱xgu chingexü̃ i taramaxã tá nawe change.

Yeremía 21:9

Rü yíxema daa ĩanewatama tügü inuxü̃güxe rü aixcüma daigu rüe̱xna taiyamaxã rüe̱xna da̱xaweanemaxã tá tayue. Natürü yíxema tügü ixãgüxe rü nawe rüxĩxe i ngẽma Cadéutanüxü̃ i ñu̱xma daa ĩaneca̱x íyaxüãchixü̃ rü taxũtáma tayue. Rü ngẽmaãcü tá yuwa tügü ítanguxü̃xẽxẽ.

Echequié 5:10

Curü duü̃xü̃gütanüwa, Pa Yerucharéü̃x, rü tá nangẽxma i duü̃xü̃gü i nanegüxü̃ tátama ngõ̱xgüxü̃, rü nanegü i nanatügüxü̃ tátama ngõ̱xgüxü̃. Rü cuxü̃ tá chapoxcu, Pa Yerucharéü̃x, rü ngẽma duü̃xü̃gü i maxẽxü̃ i íyaxügüxü̃ rü guxü̃ i naanegu tá chanawoone.

Yeremía 44:27

Erü choma rü marü íchame nax pexca̱x íchananguxẽẽxü̃ i taxü̃ i guxchaxü̃gü, rü tama i ta̱xacürü mexü̃gü. Rü guxü̃ma i Yudátanüxü̃ i ñu̱xma Equítuanewa maxẽxü̃ rü aixcüma tá nayue nagu i dai rüe̱xna nagu i taiya, rü ngẽmaãcü tá nagu̱x i guxü̃ma.

Amúx 9:4

Rü ngẽxguma norü uanügü nachixü̃anegüwa nagagügu, rü choma rü tá ngémacüã̱xü̃ chamu nax taramaxã nadaiaxü̃ca̱x. Choma rü guxü̃gutáma poxcumaxã nüxü̃ chadawenü rü tama ta̱xacürü mexü̃maxã —ñanagürü.

Echequié 6:8

Rü tá nangẽxma i ñuxre i petanüxü̃ i taxũtáma yuexü̃. Natürü nümagü rü togü i nachixü̃anegügu tá nawoone.

Echequié 5:17

Rü aixcüma pexca̱x tá íchananguxẽxẽ i taiya rü da̱xaweane rü yu. Rü ngéma tá chanamugü i aigü i pexacügü tüxü̃ ngõ̱xcuxü̃. Rü ngẽxgumarüxü̃ ta ngéma tá chanamugü i perü uanügü nax daigu peyuexü̃ca̱x. Rü choma ya Cori ya Tupana nixĩ i chanaxunagüxü̃ i ngẽma’ ” —ñanagürü.

Yeremía 42:22

Rü dücax, ngẽmaca̱x daigu rü taiyamaxã rü da̱xaweanemaxã tá peyue nagu i ngẽma nachixü̃ane i nawa pexĩchaü̃xü̃ nax ngéma pemaxẽxü̃ca̱x” —ñanagürü.

Yeremía 9:16

Rü nagu tá chanawoone i nachixü̃anegü i nümagü rü nanatügü rü woo norü o̱xigü tama nüxü̃ cua̱xgüxü̃. Rü norü uanügü rü taramaxã tá nawe changegüxẽxẽ nax nadaiaxü̃ca̱x nax ngẽmaãcü bai i wüxi íyaxüxü̃ca̱x” —ñanagürü ga Cori ya Tupana.

Wenaxarü naxümatü ga Tupanaarü mugü 28:65

Rü ngẽxguma ngẽma nachixü̃anegüwa nangẽxmagügu i cutanüxü̃ rü tagutáma nataãẽgü rü tagutáma inarüngü̃gü, erü Cori ya Tupana rü guxü̃gutáma muü̃wa nanangexmagüxẽxẽ. Rü ngẽmaca̱x tá nangechaxü̃xetügü rü tá naxoegaãẽgü.

Lebítanüxü̃arü puracüchiga 26:33

Rü pema rü togü i nachixü̃anegu tá pexü̃ chawoone. Rü chorü taramaxã tá pewe chingẽchigü. Rü ngẽma pechixü̃ane rü tá chianexü̃xü̃ chayaxĩxẽxẽ. Rü perü ĩanegü rü nachitaxü̃xica tá ínayaxügü.

Yema Cuáü̃ nüxü̃ dauxü̃ i yixcüra tá ngupetüxü̃chiga 6:8

Rü ichadawenü rü nüxü̃ chadau ga wüxi ga cowaru ga dexexü̃. Rü yema naétüwa rütoxü̃ rü Yu nixĩ ga naéga. Rü yema naweama ne ũxü̃, rü Yuexü̃chica nixĩ ga naéga. Rü yema taxre nanayauxgü ga pora nax ñoma ga naanewa rü wüxi cuarto ga duü̃xü̃güxü̃ nada̱i̱xü̃ca̱x taramaxã rü taiyamaxã rü da̱xaweanemaxã rü naeü̃gü i düraexü̃maxã.

Yeremía 13:24

Rü ngẽmaca̱x tá pexü̃ chawoone ñoma chianexü̃wa ne ũcü ya buanecü maxẽ ya pacü woonecürüxü̃.

Yeremía 24:10

Rü ngẽma Yerucharéü̃wa yaxügüxü̃ rü tá naxca̱x íchanguxẽxẽxü̃ i guxchaxü̃gü. Rü ngẽxma tá nixĩ nax nadaiaxü̃, rü taiya naxca̱x íngugüxü̃ ñu̱xmatáta taxuxü̃táma íyaxü nawa i ñaa naane ga nüxna chaxãxü̃, rü norü o̱xigüna chaxãxü̃” —ñanagürü ga Cori ya Tupana.

Echequié 7:15

Rü yima ĩanearü düxétüwa rü dai nangẽxma, rü aixepewa rü da̱xaweanegü rü taiya nangẽxma. Rü yíxema naanewa ngẽxmagüxe rü daigu tá tayue. Rü yíxema ĩanewa ngẽxmagüxe rü taiyamaxã rü da̱xaweanemaxã tá tayue.

Echequié 14:17

Rü ngẽxguma chi dai naxca̱x íchanguxẽẽgu i guxü̃ma i ngẽma nachixü̃ane, rü nayuegu i duü̃xü̃gü rü naeü̃gü, rü ngẽxguma chi ngéma namaxẽgu i ngẽma tomaepü̱x i yatügüx rü nüxica chitama nixĩ i namaxẽxü̃. Natürü nümagü rü taxũchima nanegüxü̃ rü naxacügüxü̃ namaxẽxẽxẽ. Rü choma ya Cori ya Tupana nixĩ i chauégagu cumaxã nüxü̃ chixuxü̃ i ngẽma.

Echequié 14:19

Rü ngẽxguma chi da̱xaweanegü ngẽma nachixü̃anewa chamuxgu, rü ñu̱xũchi chorü numaxã yu ngéma changuxẽẽgu rü nayuegu i duü̃xü̃gü rü naeü̃gü, rü ngẽxguma chi ngéma namaxẽgu i Noé, rü Danié, rü Yox, rü nüxica chitama nixĩ i namaxẽxü̃, erü nayaxõgü. Natürü nümagü rü taxũchima nanegüxü̃ rü naxacügüxü̃ namaxẽxẽxẽ. Rü choma ya Cori ya Tupana nixĩ i chauégagu cumaxã nüxü̃ chixuxü̃ i ngẽma.

Echequié 33:27

Rü ngẽmaca̱x name i ngẽma duü̃xü̃gümaxã nüxü̃ quixu i chorü ore i ñaxü̃: “Chauégagu pemaxã nüxü̃ chixu rü pema ya yima ĩanegü ya nagu napogüenewa ngẽxmagüe rü tá pexü̃ nadai. Rü pema i naanewa ngẽxmagüxe rü tá ai pexca̱x íchangugüxẽxẽ nax ngẽma pexü̃ ngṍxü̃ca̱x. Rü pema i cu̱xchicaxü̃wa rü ma̱xpǘnearü ãxmaxü̃güwa ngẽxmagüxe, rü tá da̱xaweanemaxã peyue.

Echequié 36:19

Rü yema norü poxcu ga naxca̱x íchanguxẽẽxü̃ nagagu ga yema chixexü̃ ga naxügüxü̃, rü yemaca̱x nixĩ nax togü ga nachixü̃anegügu chanawoonexü̃.

Amúx 9:9

Rü tá chanamu nax nawooneãxü̃ca̱x i ngẽma Iraétanüxü̃ i chixexü̃gu maxẽxü̃ ngẽxgumarüxü̃ i trigu i norü papetüxü̃wa ipapetüxü̃ nax ínayixü̃ca̱x i ngẽma norü üxaxü̃. Natürü yima mexü̃ne ya napüxüchire rü taxunetáma waixü̃mügu nangu.

Ichaía 1:24

Rü ngẽmaca̱x ya Cori ya Tupana ya Guxãétüwa Ngẽxmacü ya Iraétanüxü̃arü Tupana ya poraxüchicü, rü ñanagürü: —Ñu̱xma i choma rü tá nüxü̃́ chaxütanü i chorü uanügü naxca̱x i ngẽma chixexü̃ i naxügüxü̃. Rü tá chanapoxcue.

Yeremía 9:15

Rü ngẽmaca̱x i choma ya Cori ya Tupana ya Guxãétüwa Ngẽxmacü ya Iraétanüxü̃arü Tupana rü ñachagürü: “Choma rü tá õna i üxüxü̃ tá nüxü̃ changõ̱xẽxẽ, rü dexá i nawa iyuxü̃wa tá chayaxaxexẽxẽgü.

Yeremía 14:12

Rü woo tá muẽ̱xpü̱xcüna cuxaureãcüma cuyumüxẽgu, rü taxũtáma nüxü̃ chaxĩnü i ngẽma curü yumüxẽwa choxna naxca̱x cucaxü̃. Rü woo tá ãmaregü i naxü̃nagü rü trigute̱xe cha̱u̱xca̱x ícuguxgu rü taxũtáma namaxã chataãxẽ. Rü daimaxã, rü taiyamaxã, rü da̱xaweanemaxã tá chanadai —ñanagürü choxü̃.

Yeremía 15:9

Rü yíxema mamagü ya muxacüxe rü tá tiyuãchitanü. Rü tá tingearü buanecüã̱xgü nax tingü̃ãtanücüüxü̃ca̱x rü cugüruü̃gü tá tixĩgü erü nayue i tümaxacügü. Rü ngẽma ngóonexü̃ rü waanexü̃xü̃ tá tümaca̱x nayanguxuchigü. Rü poraãcü tá taxãneexü̃chi rü taxuwatáma time. Rü yíxema maxü̃́xẽ íyaxügüxe rü ngẽma tümaarü uanügüxü̃ tá tüxü̃ chadaixẽxẽ. Rü choma ya Cori ya Tupana nixĩ i nüxü̃ chixuxü̃ i ngẽma chorü ore —ñanagürü ya Cori ya Tupana.

Echequié 7:3

Rü marü nawa nangu i perü gu̱x, Pa Iraéanecüã̱x. Rü chorü numaxã tá pexü̃ chapoxcu. Rü pexna tá naxca̱x chaca i ngẽma pecüma i chixexü̃, rü tá pexü̃ chapoxcu naxca̱x ga yema chixexü̃gü ga pexügüxü̃.

Echequié 14:21

Rü choma i Cori ya Tupana rü nüxü̃ chixu rü wüxi i taxü̃ i guxchaxü̃ tá nixĩ i ngẽxguma Yerucharéü̃ca̱x íchanguxẽẽgu i ngẽma ãgümücü i poxcu i ãũcümaxü̃chixü̃; i dai, rü taiya, rü naeü̃gü i idüraexü̃, rü ñu̱xũchi da̱xaweanegü. Rü ngẽmamaxã tá nixĩ i chanadaixü̃ i duü̃xü̃gü rü naeü̃gü.

Echequié 16:42

Rü ngẽxguma tá nixĩ i cumaxã icharüngü̃xmüxü̃ nax cumaxã chanuxü̃ rü cuxü̃ chinuxuxü̃. Rü ngẽxguma tá nixĩ i choxü̃ nangupetüxü̃ nax cumaxã chanuxü̃.

Echequié 21:22

Rü yexguma nawonagütanügu ga naxnegü rü ãẽ̱xgacüarü tügünecüwagu nangu ga guma naxne ga Yerucharéü̃gu ãégane. Rü ngẽmawa nüxü̃ nacua̱x nax Yerucharéü̃cax tá íyachoõchixü̃ namaxã ga naxnegü. Rü ngẽmaãcü tá tagaãcü daica̱x nügüca̱x nacagü, rü yima ĩanearü ĩã̱xgügu tá napogüe, rü tá waixü̃mü nügüca̱x nagünagügü nax yima ĩanegu nachocuxü̃ca̱x, rü tá nüxü̃ ínachomaeguãchi ya yima ĩane.

Echequié 24:13

Rü cumax, Pa Yerucharéü̃x, rü ñoma panera ya aüxǘchicürüxü̃ quixĩ. Rü choma rü nüxü̃ chadau nax poraãcü curü ngúchaü̃ cuxüxü̃. Rü ngẽma nixĩ i cuwa íchapixchaü̃xü̃ nax cumexü̃ca̱x. Natürü i cuma rü tama cunaxwa̱xe. Rü ngẽxguma chorü numaxã cuxü̃ chapoxcuguxicatama tá cume.

Echequié 43:8

Yema Iraétanüxü̃ rü norü taxü̃ ga chixexü̃gümaxã nagu nidauxcüraxü̃gü ga chauéga i üünexü̃. Yerü chorü ãmarearü guruü̃gücüwagu nanaxü ga norü tupananetagüarü ãmarearü guruü̃gü. Rü wüxi ga naxtapü̱xicatama nixĩ ga nügüna nayaxü̃guxẽẽxü̃. Rü yemaca̱x nixĩ ga namaxã chanuxü̃ rü chanadaixü̃.