Echequié 5:11 - Tupanaarü Ore

¹¹ Rü choma nax Cori ya Tupana chixĩxü̃ rü chauégagu poxcu pemaxã chaxuegu. Yerü ga pema rü penaxãũãchixẽxẽ ga guma chopata ya üünene namaxã ga perü naxchicüna̱xãgü ga ãũãchixü̃ rü pecümagü ga chixexü̃. Rü ngẽmaca̱x i choma rü tá pexü̃ chadai. Rü taxũtáma pemaxã chixãũxãchi rü taxũtáma choxü̃́ pengechaxütümüxü̃gü.

Echequié 5:11 Referans Kwoze

Echequié 7:20

Rü nümagü rü norü ngã̱xãẽruü̃gümaxã nügü nicua̱xüü̃gü rü yemawa nixĩ ga naxügüãxü̃ ga norü tupananetachicüna̱xãgü ga poraãcü ichixexü̃. Rü ngẽmaca̱x i choma rü tá guxchirexü̃ chayanguxuchixẽxẽ i ngẽma norü ngã̱xãẽruü̃gü.

Echequié 11:18

Rü nümagü rü nachixü̃aneca̱x tá nawoegu rü tá nagu napogüe i guxü̃ma i ngẽma naxchicüna̱xãgü ga ü̃pa nüxü̃ yacua̱xüü̃güxü̃. Rü ngẽmaãcü tá nüxü̃ narüxoe ga yema nacümagü ga chixexü̃ ga nagu namaxẽxü̃.

Echequié 7:9

Rü marü taxũtáma choxü̃́ pengechaxü̃tümüxü̃gü. Rü ngẽma pecüma i chixexü̃gagu tá pexü̃ chapoxcu nax ngẽmaãcü penaxütanüxü̃ca̱x ga yema chixexü̃gü ga pexügüxü̃. Rü pema rü ngẽmaãcü tá nüxü̃ picua̱xãchitanü nax choma ya Cori ya Tupana yixĩxü̃ nax pexü̃ chapoxcuexü̃.

Echequié 7:4

Rü marü taxũtáma choxü̃́ pengechaxü̃tümüxü̃gü. Rü ngẽma pecüma i chixexü̃gagu tá pexü̃ chapoxcu nax ngẽmaãcü penaxütanüxü̃ca̱x ga yema chixexü̃gü ga pexügüxü̃. Rü pema rü ngẽmaãcü tá nüxü̃ picua̱xãchitanü nax choma chixĩxü̃ ya Cori ya Tupana” —ñanagürü.

Norü taxre ga to ga popera ga ãẽ̱xgacügüchiga ümatüxü̃ 36:14

Rü yexgumarüxü̃ ta ga guxü̃ma ga Yudáanecüã̱xarü ãẽ̱xgacügü rü norü duü̃xü̃gü rü chacherdótegü rü ta, rü poraãcü chixri namaxẽ. Rü yema togü ga nachixü̃anegü ga tama Tupanaxü̃ cua̱xgüxü̃arü tupananetachicüna̱xãxü̃ nicua̱xüxü̃gü. Rü yemaacü chixexü̃ nawa naxügü ga guma Tupanapata ga taxü̃ne ga nüma ga Tupana nüxü̃ unetane nax napata yixĩxü̃ca̱x ga Yerucharéü̃wa.

Echequié 24:14

Rü ngẽma nagu charüxĩnüxü̃ rü taxũtáma chanaxüchicüxü, rü chomatátama chayanguxẽxẽ. Rü cuxü̃ tá chapoxcu nagagu ga cucüma ga nagu cumaxü̃xü̃ rü nagagu ga guxü̃ma ga yema chixexü̃ ga cuxüxü̃. Rü taxũtáma choxü̃́ cuxauxãchitümüxü̃. Rü choma ya Cori ya Tupana nixĩ i cumaxã nüxü̃ chixuxü̃ i ngẽma chorü ore, rü ngẽmaãcü tá chanaxü —ñanagürü ga Cori ya Tupana.

Echequié 11:21

Natürü ya yíxema nagu maxẽamáxẽ i ngẽma nacüma i chixexü̃ i naxchi chaxaixü̃, rü choma rü tá ngẽmaca̱x tüxna chaca. Rü choma ya Cori ya Tupana nixĩ i ngẽma ñachaxü̃ —ñanagürü.

Echequié 9:10

Natürü taxũtáma choxü̃́ nangechaü̃tümüxü̃ i ngẽma duü̃xü̃gü, rü nüxna tá chaca naxca̱x ga yema chixri nax namaxẽxü̃ —ñanagürü.

Echequié 9:5

Rü yemawena nüxü̃ chaxĩnü ga Cori ya Tupana nax yema togü ga yatügüxü̃ ñaxü̃: —¡Rü ngẽma yatüwe pixĩxü̃tanü nawa ya daa ĩane! Rü guxü̃ma i ngẽma duü̃xü̃gü i ngeégacatüxü̃ ¡rü penadai! ¡Rü tauxü̃táma nüxü̃ pengechaxü̃ rü bai tá i pexü̃́ nax nangechaü̃tümüxü̃güxü̃!

Echequié 8:18

Rü ngẽmaca̱x i choma rü chorü numaxã tá chanapoxcue. Rü taxũtáma namaxã chixãũxãchi. Rü woo aita cha̱u̱xca̱x naxüegu rü taxũtáma nüxü̃ chaxĩnü —ñanagürü choxü̃.

Echequié 8:16

Rü ñu̱xũchi Tupanapata ga taxü̃neã̱xtü ga aixepewaama yexmaxü̃wa choxü̃ naga ga Tupanapataca̱x ixücuxü̃wa. Rü yema ãmarearü guruü̃pe̱xewa nüxü̃ chadau ga 25 ga yatügü ga Tupanapata ga taxü̃nena ãca̱xwe̱xgüxü̃ ga ésteguama caxã́pü̱xügüxü̃. Rü waixü̃müanegu nangücuchitanü rü üa̱xcüxü̃ nicua̱xüü̃gü.

Auxexü̃chiga 2:21

Rü ngẽma chorü ngextü̱xücügü rü pacügü rü yaxguã̱xgü rü taramaxã nanadai. Rü nüxü̃ tadau i ngẽma ngextü̱xücügü rü pacügü rü yaxguã̱xgü i yuexü̃ i ĩanearü namagüwa nuquegüxü̃. Rü ngẽma ngunexü̃ i nagu curü nu ínguxü̃ rü cunadai. Rü taxúema texé cuxü̃́ taxãũxãchitümüü̃gü.

Yeremía 16:18

Rü nawa tá ichanaxügü nax taxree̱xpü̱xcüna pexü̃ chapoxcuexü̃ naxca̱x i perü chixexü̃gü rü perü pecadugü. Erü penaxãũãchixẽxẽ i chorü naane namaxã i ngẽma perü tupananetachicüna̱xãgü i ingearü maxü̃ã́xü̃. Rü yema naane ga guxü̃guca̱x pexna chaxãxü̃wa rü penaxü ga yema chixexü̃gü ga naxchi chaxaixü̃ —ñanagürü ga Cori ya Tupana.

Popera ga Yudíugü ga yaxõgüxü̃ca̱x ümatüxü̃ 6:13

Rü dücax, yexguma tórü o̱xi ga Abraáü̃maxã inaxunetagu ga Tupana rü nügüégagutama inaxuneta, yerü tataxuma ga texé ga norü yexera ixĩxẽ nax tümaégagu inaxunetaxü̃ca̱x.

Romanos 11:21

Yerü yema Yudíugü ga noxri Tupanaarü ixĩgüxü̃, rü Tupana nüxü̃ naxo yerü tama nayaxõgü. Rü yexguma yemaacü Tupana nüxü̃ oxgu ga yema duü̃xü̃gü rü pexü̃ rü tá ta naxo ega taxũtáma peyaxõgüechagu.

Romanos 11:12

Rü ñu̱xma nax tama yaxõgüãxü̃ i Yudíugü, rü yemaca̱x ga Tupana rü nüxü̃ narüngü̃xẽxẽ ga yema tama Yudíugü ixĩgüxü̃. Natürü ngẽxguma Tupanaca̱x nawoegu̱xgu i guxü̃ma i Yudíugü, rü Tupana rü tá yexeraãcü nüxü̃ narüngü̃xẽxẽ i guxü̃ma i ngẽma duü̃xü̃gü i tama Yudíugü ixĩgüxü̃.

Romanos 8:32

Nüma ga Tupana rü tama tüxna nayanuxũ ga Nanexü̃chi, natürü taxca̱x inanamu ga Nane nax taxca̱x nayuxü̃ca̱x i guxãma i yixema. Rü ñu̱xma nax taxca̱x inamuãxü̃ ga Nane nax taxca̱x nayuxü̃ca̱x, ¿rü taux ẽ̱xna tüxna naxããxü̃ i guxü̃ma i ngẽma inaxwa̱xexü̃ nax mea naxca̱x imaxẽxü̃ca̱x?

Maraquía 3:17

Rü nüma ya Cori ya Tupana ya Guxãétüwa Ngẽxmacü rü ñanagürü: —Choma rü íchanamexẽxẽ i wüxi i ngunexü̃ i nagu tá cha̱u̱xca̱x nawoeguxü̃ nax wena chorü duü̃xü̃gü yixĩgüxü̃ca̱x i Iraétanüxü̃. Rü ñoma wüxi i papa i nane i nüxü̃́ puracüxü̃xü̃ ngechaü̃xü̃rüxü̃, rü ngẽmaãcü tá choxü̃́ nangechaü̃tümüxü̃gü.

Chacaría 11:6

Rü ngẽxgumarüxü̃ ta i ngẽma duü̃xü̃gü i ñaa nachixü̃anewa maxẽxü̃ rü taxũtáma choxü̃́ nangechaü̃tümüxü̃gü. Rü to i nachixü̃aneme̱xẽgu rü ngẽmaarü ãẽ̱xgacüme̱xẽgu tá chanayixẽxẽ. Rü ngẽma ãẽ̱xgacü rü tá nanachixexẽxẽ i ñaa nachixü̃ane. Rü ngẽxguma i choma rü taxúexü̃táma naxme̱xwa íchapoxü̃. Rü choma i Cori ya Tupana nixĩ i nüxü̃ chixuxü̃ i ngẽma —ñanagürü.

Amúx 8:7

Rü ñanagürü ta: —Choma ya perü Cori ya Tupana rü Acóbuégagu pemaxã nüxü̃ chixu rü tagutáma nüxü̃ charüngüma ga yema chixexü̃ ga pexügüxü̃.

Echequié 44:7

Rü pemax rü penaxãũãchixẽxẽ ya chopata ya taxü̃ne erü nagu penachocuxẽxẽ i duü̃xü̃gü i to i nachixü̃anecüã̱xgü i tama íwiü̃cha̱xmüü̃pe̱xechiraü̃güxü̃ rü tama chorü mugügu maxẽxü̃. Rü naétü ga pema rü chorü õnaca̱x choxna penaxã ga paũ rü chíxü̃ rü nagü. Rü yemaacü yema taxü̃ ga ãũãchixü̃ ga pexügüxü̃maxã peyanaxoxẽxẽ i ngẽma uneta ga pemaxã chaxüxü̃.

Echequié 29:15

Rü wüxi i nachixü̃ane i guxü̃ i nachixü̃anegüarü yexera tama poraxü̃ tá nixĩ. Rü marü taxũtáma wena togü i nachixü̃anegüétüwa nangẽxma. Rü choma rü tá chanaxíxraxẽxẽ nax ngẽmaãcü taxuacüma togü i nachixü̃anegümaxã inacuáxü̃ca̱x.

Echequié 23:28

Rü choma ya Cori ya Tupana rü aixcümaxü̃chi cumaxã nüxü̃ chixu rü naxme̱xwa tá cuxü̃ changexmaxẽxẽ i ngẽma duü̃xü̃gü i ñu̱xmax naxchi cuxaixü̃ rü nawa cunaxoxégaxü̃.

Yeremía 44:4

Rü muẽ̱xpü̱xcüna petanüwa chanamu ga chorü orearü uruü̃gü nax pemaxã nüxü̃ yaxugüexü̃ca̱x nax tama penaxügüxü̃ca̱x ga yema chixexü̃gü i ãũãchixü̃gü i poraãcü naxchi chaxaixü̃.

Yeremía 32:34

Rü taxü̃ ga chixexü̃ naxügü, yerü ñu̱xmata chopatagu nananucu ga yema norü tupananetachicüna̱xãgü ga naxchi chaxaixü̃. Rü yemaacü nanaxãũãchixẽxẽ ga chopata ga cha̱u̱xca̱xicatama ixĩxü̃ne.

Yeremía 10:24

¡Rü toxü̃ íyarüwe̱xãchixẽxẽgü, natürü tama cunuãcüma nax tama tayuexü̃ca̱x!

Wiyaegü 107:39

Rü ngẽxguma tümaarü uanügü chixri tümamaxã icua̱xgügu rü ngúxü̃ tüxü̃ yangexẽẽgügu rü ngẽmagagu tiyuetanü rü tinoxreetanü, natürü Tupana rü tá tüxü̃ naxütanü rü tá nüxü̃ naxõõ̱x i ngẽma tümaarü uanügü. Rü ínachianexü̃gu tá ínayatüexẽxẽ i norü uanügü nax nu ne naxĩmarexü̃ca̱x.

Wiyaegü 95:11

Rü yemaca̱x chorü numaxã namaxã chanaxuegu nax taxũtáma nawa nangugüxü̃ i ngẽma naane i nagu chanangü̃güxẽẽchaü̃xü̃ —ñanagürü ya Tupana.

Norü taxre ga to ga popera ga ãẽ̱xgacügüchiga ümatüxü̃ 33:7

Rü yema tupananetachicüna̱xã ga naxüxü̃ rü Tupanapata ga taxü̃negu nayaxǘcuchi woo nüma ga Cori rü Dabíxü̃ rü nane ga Charomóü̃xü̃ ñanagürü: —Choma rü guxü̃nema ya Iraéanearü ĩanegütanüwa rü chanayaxu ya Yerucharéü̃ nax yimawa nangẽxmaxü̃ca̱x ya chopata ya taxü̃ne ya nawa guxü̃gutáma changexmane.

Norü taxre ga to ga popera ga ãẽ̱xgacügüchiga ümatüxü̃ 33:4

Rü Cori ya Tupanapata ga taxü̃negu ínanaxüxü̃ ga tupananetagüarü ãmarearü guruü̃gü woo nüma ga Cori rü ñanagürü: —Daa chopata ya Yerucharéü̃wa ngẽxmane rü guxü̃gutáma choxrütama nixĩ —ñanagürü.

Norü taxre ga popera ga ãẽ̱xgacügüchiga 23:12

Rü yexgumarüxü̃ ta nagu napogüe ga yema ãmarearü guruü̃gü ga Yudáanearü ãẽ̱xgacügü Acháxarü ucapuétügu naxügüxü̃. Rü ñu̱xũchi nanamu nax nagu yapogügüxü̃ca̱x ga yema tupananetagüarü ãmarearü guruü̃gü ga Manaché Tupanapata ga taxü̃neã̱xtügügu íxüxãxü̃. Rü yema nachitügü rü natüxacü ga Chedróü̃wa nayawoü̃.

Norü taxre ga popera ga ãẽ̱xgacügüchiga 21:7

Rü Cori ya Tupanapata ga taxü̃negu nayaxǘ ga wüxi ga Acheráchicüna̱xã ga nainaxca̱x. Rü yemaca̱x nixĩ ga Cori ya Tupana rü marü Dabímaxã rü nane ga Charomóü̃maxã nüxü̃ yaxuxü̃ rü ñanagürü: —Choma rü guxü̃nema ga Iraégüarü ĩanegütanüwa nüxü̃ chaxuneta ga Yerucharéü̃ nax nawa nangẽxmaxü̃ca̱x ya chopata. Rü yima chopata ya taxü̃newa tá guxü̃gutáma changexma.

Norü taxre ga popera ga ãẽ̱xgacügüchiga 21:4

Rü guma Tupanapata ga taxü̃nechiãwa rü nayaxüagü ga ãmaregüarü guruxü̃ naxca̱x ga tupananetachicüna̱xãgü woo nüma ga Tupana rü nüxü̃ nixu nax naxca̱xicatama yixĩxü̃ ga guma napata ga Yerucharéü̃wa.

Wenaxarü naxümatü ga Tupanaarü mugü 29:20

Rü nüma ya Cori ya Tupana rü taxũtáma nüxü̃́ nüxü̃ narüngüma i ngẽma norü chixexü̃, rü naétügu tá nananguxẽxẽ i norü nu. Rü naxca̱x tá ínangugü i guxü̃ma i ngẽma guxchaxü̃gü i ñaa poperagu ümatüxü̃. Rü ñu̱xũchi nataagü i ngẽma yatü rü Tupana rü ñoma i naanewa tá inayanaxoxẽxẽ.

Lebítanüxü̃arü puracüchiga 15:31

Rü ngẽmaãcü i pema rü tá norü ãũãchixü̃na peyaxĩgachixẽxẽ i ngẽma Iraétanüxü̃ nax tama nayuexü̃ca̱x nagagu nax naxãũãchigüãxü̃ ya yima chopata ya choma nawa changexmane i natanüwa” —ñanagürü ga Cori ya Tupana.

Yox 27:22

Rü yimá buanecü rü tá nagu nanguema rü taxũtáma namaxã nixauxãchi. Rü woo naxcha̱xwa yañagu rü yimá buanecü rü tá nawe ningechigüama.

Auxexü̃chiga 2:17

Rü nüma ga Cori ya Tupana rü marü nayanguxẽxẽ ga yema nagu naxĩnüxü̃. Rü marü nayanguxẽxẽ ga yema norü ore ga nüxü̃ yaxuxü̃. Rü marü tama nüxü̃́ nangechaü̃tümüxü̃ãcüma nagu napogü ga guma ĩane ga Yerucharéü̃. Rü nüma rü curü uanügüaxü̃́ nanatauxchaxẽxẽ nax cuxü̃ nacugüexü̃. Rü nanaporaexẽxẽ nax cumaxã inacuáxü̃ca̱x.

Echequié 23:38

Rü naétü wüxitama ga ngunexü̃gu inaxãũãchigü ga chopata rü tama inaxauregü ga chorü ngü̃chigaarü ngunexü̃gü.

Echequié 33:11

Natürü choma ya Cori ya Tupana rü chauégagu nüxü̃ chixu nax tama chanaxwa̱xexü̃ nax texe tümaarü pecadugu yuxü̃. Natürü ngẽma chanaxwa̱xexü̃ nixĩ nax nüxü̃ tarüxoxü̃ i tümacüma i chixexü̃ nax ngẽmaãcü tüxü̃́ nangẽxmaxü̃ca̱x i maxü̃. Pa Iraétanüxü̃x, ¡nüxna pixĩgachitanü i ngẽma chixexü̃ i nacüma i nagu pemaxẽxü̃! ¿Rü ta̱xacüca̱x yuwa pegü pexĩxẽxẽ?

Echequié 5:7

Rü ngẽmaca̱x i chomax ya Cori ya Tupana rü ñachagürü: “Pemax rü guxü̃ i togü i duü̃xü̃gü i pexna ngaicamaxü̃arü yexera tama ipexĩnüechaü̃ rü tama naga pexĩnüe i ngẽma chorü mugü rü bai i ngẽma togü i nachixü̃anegüarü mugü.

Echequié 8:15

Rü yemawena ga nüma ga Tupana rü choxna naca rü ñanagürü choxü̃: —¿Rü nüxü̃ cudauxü̃ i ñaa? Rü tá nüxü̃ cudau i to i yexeraxü̃ chixexü̃ inaxügüxü̃ —ñanagürü choxü̃.

Echequié 23:39

Rü yematama ngunexü̃ ga nagu tüxü̃ ínaguxü̃ ga ngĩxacügü rü ngĩnegü nax yemaacü ngĩrü tupananetachicüna̱xãgüxü̃ yacua̱xüü̃güxü̃ca̱x rü chopatawa naxĩ rü nanaxãũãchigü ga guma chopata. Rü yema nixĩ ga naxügüxü̃ nawa ga guma chopata.

Echequié 43:8

Yema Iraétanüxü̃ rü norü taxü̃ ga chixexü̃gümaxã nagu nidauxcüraxü̃gü ga chauéga i üünexü̃. Yerü chorü ãmarearü guruü̃gücüwagu nanaxü ga norü tupananetagüarü ãmarearü guruü̃gü. Rü wüxi ga naxtapü̱xicatama nixĩ ga nügüna nayaxü̃guxẽẽxü̃. Rü yemaca̱x nixĩ ga namaxã chanuxü̃ rü chanadaixü̃.