Echequié 44:7 - Tupanaarü Ore

⁷ Rü pemax rü penaxãũãchixẽxẽ ya chopata ya taxü̃ne erü nagu penachocuxẽxẽ i duü̃xü̃gü i to i nachixü̃anecüã̱xgü i tama íwiü̃cha̱xmüü̃pe̱xechiraü̃güxü̃ rü tama chorü mugügu maxẽxü̃. Rü naétü ga pema rü chorü õnaca̱x choxna penaxã ga paũ rü chíxü̃ rü nagü. Rü yemaacü yema taxü̃ ga ãũãchixü̃ ga pexügüxü̃maxã peyanaxoxẽxẽ i ngẽma uneta ga pemaxã chaxüxü̃.

Echequié 44:7 Referans Kwoze

Lebítanüxü̃arü puracüchiga 22:25

Rü tama name i wüxi i duü̃xü̃ i to i nachixü̃anecüã̱xaxü̃́ penayaxu i nangexgumaraü̃xü̃ i naxü̃na nax curü Cori ya Tupanana penaxãxü̃ca̱x. Erü ngẽma naxü̃nagü nüxü̃́ nangẽxma i norü chixexü̃ rü ngẽmaca̱x Tupana rü tama nanayaxu” —ñanagürü.

Yeremía 9:26

Rü ngẽmaãcü tá chanapoxcue i ngẽma Equítuanecüã̱xgü, rü Yudátanüxü̃, rü Edóü̃tanüxü̃, rü Amóü̃tanüxü̃, rü Moátanüxü̃, rü ñu̱xũchi guxü̃ma i ngẽma duü̃xü̃gü i ínachianexü̃wa maxẽxü̃ rü nügü idüerugüxü̃ i nügü iwiü̃cha̱xmüü̃pe̱xechiraü̃gümarexü̃ natürü tama chauga ĩnüexü̃. Rü tá chanapoxcue i guxü̃ma i ngẽma Iraétanüxü̃ erü chixexü̃gu namaxẽ rü tama chauga naxĩnüe —ñanagürü.

Echequié 44:9

Rü ngẽmaca̱x i choma i Cori ya Tupana rü ñachagürü: Rü taxuxü̃táma to i nachixü̃anecüã̱x i duü̃xü̃ i tama íwiecha̱xmüü̃pe̱xechiraü̃xü̃ rü tama chorü mugügu maxü̃xü̃ tá chopatagu naxücu, woo Iraétanügu naxãpatagu.

Yeremía 4:4

Pa Yudáanecüã̱xgüx rü Pa Yerucharéü̃cüã̱xgüx, ngẽma chixexü̃ i perü maxü̃wa ngẽxmaxü̃ ¡rü pegüwa nüxü̃ pexoó nax tama ngẽma perü chixexü̃gagu pexna nanguxü̃ca̱x i chorü nu, ñoma üxüema inaixü̃ i taxucürüwama texe ixoxẽẽxü̃rüxü̃! —ñanagürü.

Naanearü ügüchiga 17:14

Natürü ya yíxema tama tügü íwíecha̱xmüü̃pe̱xechiraü̃xẽ, rü name nixĩ i noxtacüma pegütanüwa tüxü̃ ípeta̱xüchi erü tama tayanguxẽxẽ i ngẽma yigümaxã ixunetaxü̃ —ñanagürü.

Ngechuchuarü ngúexü̃gü ga yamugüxü̃arü puracüchiga 21:28

Rü tagaãcü aita naxüe ñaxü̃maxã: —Pa Tomücügü Pa Iraétanüxü̃güx, ¡Paxa toxü̃ perüngü̃xẽxẽx! Ñaa nixĩ i ngẽma yatü i guxü̃wama yangúexẽẽchigüxü̃ i duü̃xü̃gü nax taxchi naxaiexü̃ca̱x i yixema i Iraétanüxü̃, rü naxchi nax naxaiexü̃ca̱x i ngẽma mugü ga Moiché ümatüxü̃ rü naxchi naxaiexü̃ca̱x ya daa Tupanapata ya taxü̃ne. Rü naétü i ñu̱xmax rü nuxã daa Tupanapata ya taxü̃negu nanamucu i ñuxre i duü̃xü̃gü i tama tacümagu ĩxü̃, rü ngẽmaãcü nanaxüxaxẽxẽ i ñaa nachica i üünexü̃ —ñanagürügü.

Ngechuchuarü ngúexü̃gü ga yamugüxü̃arü puracüchiga 7:51

Rü ñanagürü ga Estébaü̃: —Dücax Pa Ãẽ̱xgacügüx, pema rü guxü̃guma nüxü̃ pexoe i Tupanaarü ore, rü tama iperüxĩnüechaü̃. Rü peãẽwa rü tama peyaxõgüchaü̃. Rü pema rü guxü̃guma Tupanaãxẽ ya Üünecümaxã penueecha. Rü ngẽmaãcü i pema rü yema nũxcümaü̃güxü̃ ga perü o̱xigürüü̃tama pixĩgü.

Wenaxarü naxümatü ga Tupanaarü mugü 10:16

¡Rü ngẽmaca̱x nüxü̃ perüoe i ngẽma pecüma i chixexü̃ i perü maxü̃wa ngẽxmaxü̃! Rü tama name i duü̃xü̃gü i tama ixĩnüechaü̃xü̃ pixĩgü.

Popera ga Yudíugü ga yaxõgüxü̃ca̱x ümatüxü̃ 8:9

Natürü ngẽma chorü uneta i ngexwaca̱xü̃xü̃, rü taxũtáma namaxã nawüxigu ga yema nüxíraxü̃xü̃ ga chorü uneta ga nũxcümaü̃güxü̃ ga perü o̱xigümaxã nüxü̃ chixuxü̃ ga yexguma nüxü̃ charüngü̃xẽẽgu nax ínachoxü̃xü̃ca̱x ga Equítuanewa. Yerü nümagü ga yema duü̃xü̃gü rü tama chauga naxĩnüe rü tama nayanguxẽxẽ ga yema nüxíraxü̃xü̃ ga chorü uneta, rü yemaca̱x íchanawogü.

Maraquía 1:7

Rü pema rü chorü ãmaregüarü guruü̃wa penana i ãmaregü i tama imexü̃, rü ngẽxguma rü ípeca rü ñaperügügüama: “¿Ta̱xacüwa i chixexü̃ cumaxã taxüexü̃?” ñaperügügü. Dücax, pema rü chixexü̃ chope̱xewa pexüe erü chorü ãmarechicawa penana i ãmare i tama imexü̃.

Echequié 22:26

Rü ngẽma curü chacherdótegü rü ínayatoxẽẽgü i ngẽma chorü ngu̱xẽẽtaegü rü nanaxãũãchigü i ngẽma chorü ngẽmaxü̃gü i üünegüxü̃. Rü naxca̱x nawüxigu i ngẽma tama mexü̃ rü ngẽma üünexü̃. Rü tama toguxexü̃ nangúexẽxẽ i ta̱xacü nixĩ i chope̱xewa mexü̃ rü ta̱xacü nixĩ i chope̱xewa ãũãchixü̃. Rü tama nanaxaure i chorü ngü̃chigarü ngunexü̃gü. Rü tama choxü̃ nicua̱xüü̃gü.

Echequié 7:20

Rü nümagü rü norü ngã̱xãẽruü̃gümaxã nügü nicua̱xüü̃gü rü yemawa nixĩ ga naxügüãxü̃ ga norü tupananetachicüna̱xãgü ga poraãcü ichixexü̃. Rü ngẽmaca̱x i choma rü tá guxchirexü̃ chayanguxuchixẽxẽ i ngẽma norü ngã̱xãẽruü̃gü.

Yeremía 31:32

Ngẽma uneta rü taxũtáma yema nüxíraxü̃xü̃ ga uneta ga perü o̱xigümaxã chaxüxü̃rüxü̃ tá nixĩ, yerü yexguma Equítuanewa íchananguxü̃xẽẽgu rü nümagü rü tama aixcüma nayanguxẽẽgü ga yema chorü uneta woo norü yora nax chixĩxü̃ ga chomax. Rü chomatama ya Cori ya Tupana nixĩ i nüxü̃ chixuxü̃ i ngẽma.

Yeremía 11:10

Rü naxca̱x nawoegu ga yema pecadugü ga nũxcümaü̃güxü̃ ga norü o̱xigü ügüxü̃, rü yemaca̱x tama chauga naxĩnüechaü̃ rü tupananetachicüna̱xãgüwe narüxĩ rü nüxü̃ nicua̱xüü̃gü. Rü yemaacü ga yema duü̃xü̃gü ga Iraéanecüã̱xgü rü Yudáanecüã̱xgü rü nüxü̃ naxoe ga yema uneta ga nũxcümaü̃güxü̃ ga norü o̱xigümaxã nüxü̃ chixuxü̃.

Ichaía 24:5

Rü ngẽma duü̃xü̃gü i nawa maxẽxü̃ i ñoma i naane rü chixexü̃maxã nanapáxẽẽgü, erü tama nayanguxẽẽgü i Tupanaarü mugü, rü tama naga naxĩnüe i norü ucu̱xẽgü. Rü woo Tupanamaxã nüxü̃ nixugüe nax guxü̃gutáma yanguxẽẽgüãxü̃ ga yema uneta ga Tupanamaxã naxügüxü̃, natürü tama aixcüma nayanguxẽẽgü.

Wenaxarü naxümatü ga Tupanaarü mugü 31:20

Erü choma rü tá nagu chanachocuxẽxẽ i ngẽma naane ga chauégagu norü o̱xigümaxã nüxü̃ chixuxü̃ i ngextá yima lechi rü berure rü ñoma dexárüxü̃ taguma ínataxuxü̃wa. Rü ngẽxguma tá marü lechi nixaxgügu, rü berure ne niwexgu, rü nawa nangaxpütüwegügu rü nawa yangüegu, rü ngẽxguma i nümagü rü tá tupananetagüwe narüxĩ rü ngẽmaxü̃ãma tá nicua̱xüü̃gü rü chauxchi rü tá naxaixe. Rü ngẽxguma i ngẽma uneta i pemaxã chaxüxü̃ rü tá nagu narüchixe.

Wenaxarü naxümatü ga Tupanaarü mugü 31:16

Rü yexguma ga Cori ya Tupana rü Moichémaxã nidexa rü ñanagürü: —Marü paxa tá cuyu, rü ñaa chorü duü̃xü̃gü i Iraétanüxü̃ rü paxa tá nawe narüxĩ i ngẽma tupananetagü i ngẽma naane i tá peyaxuxü̃wa ngẽxmagüxü̃. Rü ngẽxguma rü tá choxna nixĩgachitanü, rü ngẽmaãcü tá nagu narüchixe i ngẽma uneta i namaxã chaxüxü̃.

Wenaxarü naxümatü ga Tupanaarü mugü 30:6

Rü nüma ya perü Cori ya Tupana rü peãẽwa rü petaagüãẽwa tá nayanaxoxẽxẽ i ngẽma chixexü̃ i ngéma ngẽxmaxü̃ nax ngẽmaãcü aixcüma nüxü̃ pengechaü̃güxü̃ca̱x perü maxü̃nemaxã rü peãẽmaxã nax ngẽmaãcü pexü̃́ nangẽxmaxü̃ca̱x i perü maxü̃.

Lebítanüxü̃arü puracüchiga 21:21

Rü ngẽmaãcü taxuxü̃táma i Aróü̃taxa i naxü̃newa chixexü̃ rü ãmare i guxü̃ Tupanana naxã, erü naxü̃newa rü nachixe. Rü ngẽmaca̱x taxucürüwama ãmare i paũ Tupanana nayaxã.

Lebítanüxü̃arü puracüchiga 21:17

—¡Aróü̃maxã nüxü̃ ixu, rü ngẽma nataagü i naxü̃newa nüxü̃́ nangẽxmaxü̃ i ta̱xacürü chixexü̃ rü taxũtáma choxna nanaxã i ngẽma paũ i cha̱u̱xca̱x ixĩxü̃!

Lebítanüxü̃arü puracüchiga 21:8

Rü cupe̱xewa naxüüne i ngẽma chacherdóte, erü nüma nixĩ i choxna naxããxü̃ i ngẽma paũ i üünexü̃ i cha̱u̱xca̱x ixĩxü̃. Rü tá cuxca̱x naxüüne i ngẽma chacherdóte, erü choma ya Cori ya Tupana rü chaxüüne. Rü choma nixĩ i chaxunetaxü̃ i ngẽma chacherdóte nax chope̱xewa naxüünexü̃ca̱x.

Lebítanüxü̃arü puracüchiga 21:6

Rü ngẽma chacherdótegü rü name nax aixcüma Tupanana nügü naxãgüxü̃ rü nügüna nadaugüxü̃ nax tama naxãũãchigüãxü̃ca̱x i Tupanaéga. Erü nümagü nixĩ i Tupanana naxãgüãxü̃ i ãmaregü i igugüxü̃ rü paũ i Tupanaca̱x ixĩxü̃, rü ngẽmaca̱x name nax guxü̃guma Tupanape̱xewa nügüna nadaugüxü̃ nax tama yaxãũãchigüxü̃ca̱x.

Lebítanüxü̃arü puracüchiga 17:11

Erü guxü̃ma i ta̱xacü i maxü̃xü̃ rü yimá nagüwa nixĩ i nangẽxmaxü̃ i norü maxü̃. Choma rü marü pexna chanaxã ya yimá nagü nax ãmarearü guruü̃wa yimá nagümaxã penaxütanüxü̃ca̱x i perü pecadugü. Erü yimá nagü nixĩ i chope̱xewa naétüwa chogücü i perü maxü̃ nax pexü̃́ nüxü̃ charüngümaxü̃ca̱x i perü pecadugü.

Ínachoxü̃xü̃chiga 12:48

Rü ngẽxguma nangẽxmagu i to i nachixü̃anecüã̱x i duü̃xü̃ i petanüwa maxü̃xü̃ rü ngẽxguma naxüchigachaü̃ãxgu i ngẽma chorü Üpetüchiga rü nanaxwa̱xe nax guxü̃ma i napatacüã̱x i iyatüxü̃ rü nügü ínawiü̃cha̱xmüü̃pe̱xechiraü̃güxü̃. Rü ngẽxguma ngẽma yanguxẽẽgu rü marü ñoma Iraétanüxü̃ yaxĩgüxü̃rüü̃tama nixĩgü. Natürü ngẽma tama íwíecha̱xmüü̃pe̱xechiraü̃xü̃ rü taxucürüwa nanangõ̱x i ngẽma naxü̃na.

Ínachoxü̃xü̃chiga 12:43

Rü nüma ga Cori ya Tupana rü Moichémaxã rü Aróü̃maxã nidexa rü ñanagürü: —Ñu̱xma rü tá pemaxã nüxü̃ chixu i ñuxãcü tá penaxüchiga i Üpetüchiga. Rü tama name i ngẽma duü̃xü̃gü i tama Iraétanüxü̃ ixĩgüxü̃ rü nax nangṍoxü̃ i ngẽma naxü̃na i cha̱u̱xca̱x imáxü̃.

Echequié 44:15

“Rü yema chacherdótegü ga Lebítanüxü̃ ga Chadóxtaagü ixĩgüxü̃, rü yemagü nixĩ ga naxügüamaxü̃ ga chopataarü puracü ga yexguma yema Iraétanüxü̃ choxna ixĩgachitanügu. Rü ñu̱xma rü ngẽma Chadóxtaagü tá nixĩ i choxna ngaixcamagüxü̃ nax chorü puracü naxügüxü̃ca̱x. Rü nümagü tá nixĩ i choxna naxãgüãxü̃ i ngẽma naxü̃nagü i cha̱u̱xca̱x nada̱i̱xü̃arü chíxü̃ rü yimá nagü. Rü choma ya Cori ya Tupana ya Guxãétüwa Ngẽxmacü rü ngẽmaãcü chanaxuegu.

Yeremía 9:25

Rü nüma ya Cori ya Tupana rü nüxü̃ nixu rü ñanagürü: —Tá inangu i ngunexü̃ i nagu chanapoxcuexü̃ i guxü̃ma i duü̃xü̃gü i nügü iwiü̃cha̱xmüü̃pe̱xechiraü̃gümarexü̃ natürü tama chauga ĩnüexü̃.

Maraquía 2:4

Rü ngẽmaãcü düxwa tá nüxü̃ pecua̱x nax chomax yixĩxü̃ i pexna chaxãxü̃ i ñaa ucu̱xẽ nax naxca̱x pewoeguxü̃ca̱x i ngẽma chorü mugü ga perü o̱xigü ga Lebítanüxü̃maxã nüxü̃ chixuxü̃. Rü choma ya Cori ya Tupana ya Guxãétüwa Ngẽxmaxe nixĩ i nüxü̃ chixuxü̃ i ngẽma.

Maraquía 2:8

Natürü i pemax, Pa Chacherdótegüx, rü nüxna pixĩgachi i ngẽma ore i mexü̃. Rü ngẽma perü ngu̱xẽẽtaemaxã muxẽma ya duü̃xẽgü chixexü̃gu tüxü̃ peyixẽxẽ. Rü ngẽmaãcü i pemax rü ípeyatóxẽxẽ ga yema uneta ga perü o̱xigü ga Lebítanüxü̃maxã nüxü̃ chixuxü̃.