Echequié 39:9 - Tupanaarü Ore

⁹ Rü ngẽma duü̃xü̃gü i Iraéanearü ĩanegücüã̱x rü tá cuxca̱x ínachoxü̃, Pa Góx, rü tá nanade ya cuxnegü, rü curü poxü̃ruü̃gü, rü curü würagü, rü curü chuxchigü, rü curü wocaegü rü tá ínanagu. Rü ngẽmaãcü cuxnegümaxã tá 7 ya taunecüca̱x nüxü̃́ nangẽxma i norü üxü.

Echequié 39:9 Referans Kwoze

Wiyaegü 46:9

Yerü guxü̃wama ga ñoma i naanewa rü marü inayanaxoxẽxẽ nax nügü nada̱i̱xü̃ ga duü̃xü̃gü. Rü nüxü̃́ nayachixegüxẽxẽ ga norü würagü rü wocaxegü. Rü ínanagu ga naweü̃gü ga daiwa namaxã naxĩxü̃ne.

Ichaía 66:24

Rü ñanagürü ta: —Ngẽxguma ínachoxü̃gu i ngẽma chorü duü̃xü̃gü rü tá nüxü̃ nadaugü nax nayuexü̃ i ngẽma duü̃xü̃gü i chomaxã rüxuanügüxü̃. Rü ngẽma õ̱xmigü i nangõ̱xgüxü̃ rü taguma nayue, rü yima üxüema ya ínaguxü̃ne rü taguma nixo. Rü guxü̃ma i duü̃xü̃gü i ngéma chopetüxü̃ rü tá poraãcü naxã̱ũ̱ã̱xgü i ngẽxguma nüxü̃ nadaugügu —ñanagürü ga Tupana.

Maraquía 1:5

Rü pemax rü pexetümaxã tá nüxü̃ pedau i ngẽma nüxü̃ chixuxü̃. Rü ngẽxguma i pema rü tá ñaperügügü: “Cori ya Tupana rü nataxüchi. Rü ngẽma norü pora rü Iraéanearü üyeanearü yexerawa nangu”, ñaperügügü tá —ñanagürü.

Yochué 11:6

Natürü nüma ga Cori ya Tupana rü ñanagürü Yochuéxü̃: —¡Taxṹ i nüxü̃ cumuü̃xü̃ erü choma rü tá cuxü̃ charüngü̃xẽxẽ! Erü moxü̃arü ngunexü̃ i ñaatama oragu rü cuxme̱xgu tá chanayixẽxẽ rü guxü̃xü̃táma cudai. ¡Rü ngẽma norü cowarugü rü inapoepara, rü yima naweü̃gü ya daiwa namaxã naxĩxü̃ne rü ínagu! —ñanagürü.

Chacaría 9:10

Rü nüma rü tá inayanaxoxẽxẽ i Efraíü̃tanüxü̃arü daiweü̃gü rü Yerucharéü̃arü churaragüarü cowarugü rü yima würagü ya dai namaxã naxügüne. Rü guxü̃ i nachixü̃anegüca̱x tá nanaxunagü i mexü̃ i ĩnü. Rü tá namaxã inacua̱x i ngẽma naane i Már i Mediteráneuwa ixügüxü̃ rü ñu̱xmata taxtü i Dauchíüxü̃wa nangu. Rü ngẽma naane i taxtü i Eufrátewa ixügüxü̃maxã tá inacua̱x rü ñu̱xmata guxü̃wama i ñoma i naanewa nangu.

Echequié 39:10

Rü ngẽxguma i ngẽma Iraétanüxü̃ rü taxuca̱xtama norü üxüca̱x naxoegaãẽgü. Rü taxuca̱xtama naanegüwa rü naixnecüwa norü üxüwa naxĩ, erü guxü̃nema ya yima cuxnegü rü tá üxüwa nüxü̃́ name. Rü ngẽmaãcü i ngẽma Iraétanüxü̃ rü tá nüxí pexna nanapuxü̃ i perü ngẽmaxü̃gü yema pema norü yemaxü̃gü nüxna pepuxü̃xü̃rüxü̃. Rü choma ya Cori ya Tupana nixĩ i nüxü̃ chixuxü̃ i ngẽma, rü aixcüma tá ngẽmaãcü ningu’ ” —ñanagürü.

Echequié 39:8

Rü ngẽma ngunexü̃ rü paxa tá ínangu. Rü choma ya Cori ya Tupana nixĩ i nüxü̃ chixuxü̃ i ngẽma.