Echequié 39:17 - Tupanaarü Ore

¹⁷ Rü Cori ya Tupana rü chomaxã nidexa rü ñanagürü: —Pa Yatüx, ¡namaxã nüxü̃ ixu i guxü̃ma i ngurucugü rü guxü̃ma i naeü̃gü i düraexü̃ i guxü̃wama ne ĩxü̃ nax Iraéanearü máxpü̱xanexü̃gu nangutaqu̱exegüxü̃ca̱x! Erü ngẽxma tá chanadai i Iraéanearü uanügü rü ngẽmaãcü tá ngẽma ngurucugüca̱x rü naeü̃güca̱x chanamexẽxẽ i wüxi i taxü̃ i õna nax nangõ̱xgüãxü̃ca̱x i namachi rü yaxaxgüãxü̃ca̱x ya nagü.

Echequié 39:17 Referans Kwoze

Chofonía 1:7

¡Rü Cori ya Tupanape̱xewa perüchianegü! Erü ngẽma norü ngunexü̃ i ãũcümaxü̃ i nagu tá napoxcuexü̃ i ngẽma chixexü̃ ügüxü̃ rü marü ningaica. Rü nüma rü marü nüxna naxu i ngẽma to i nachixü̃anecüã̱x nax nadaiaxü̃ca̱x i ngẽma nüxna ixĩgachitanüxü̃.

Echequié 39:4

Rü cuma rü guxü̃ma i curü churaragü rü duü̃xü̃gü i cuxü̃ ümücügüxü̃maxã tá Iraéanearü máxpü̱xanexü̃gu peyue. Rü tá chanamu i naguxü̃raü̃xü̃ i ngurucugü rü naeü̃gü i düraexü̃ nax pexü̃ nangõ̱xgüxü̃ca̱x.

Yeremía 12:9

Rü ngẽma chorü duü̃xü̃gü rü ñoma wüxi i weri i mexpachixü̃ i togü i werigü naxchi aiexü̃rüxü̃ nixĩgü. ¡Rü nua pexĩ, Pa Guxü̃ma i Naeü̃gü i Idüraexü̃x! ¡Rü wüxiwa pexĩ rü penangõ̱xcu!

Ichaía 34:6

Rü ngẽma Cori ya Tupanaarü tara rü nagümaxã tá nadutachinü rü chíxü̃maxã tá niyi̱xatachinücüxü. Rü ñoma ngẽxguma ãmareruxü̃ carnéruxacügü rü chíbuxacügü idaixgurüxü̃ tá nixĩ. Rü nüma ya Cori ya Tupana rü ĩane ya Bochráwa wüxi i ãmare tá nigu, rü Edóü̃anewa rü muxü̃tama i duü̃xü̃güxü̃ tá nadai.

Ichaía 56:9

Rü nüma ya Tupana rü ñanagürü: —Pa Iraétanüxü̃arü Uanügüx, ¡nua pexĩ rü ñoma naeü̃gü i düraexü̃rüxü̃ naxca̱x ípeyaxüãchi rü peyadai i chorü duü̃xü̃gü!

Yeremía 46:10

Rü ñaa nixĩ i ngunexü̃ i Cori ya Tupana ya Guxãétüwa Ngẽxmacü tá nagu nada̱i̱xü̃ i norü uanügü. Rü taramaxã tá nanadai rü tacü ya nagü tá inaba ñu̱xmata mea nüxü̃́ yangu. Rü nüma ya Cori ya Tupana ya Guxãétüwa Ngẽxmacü rü ngẽma naane i nórtewa ngẽxmaxü̃wa tá nanadai i norü uanügü i taxtü i Eufrátearü ngaicamawa ngẽxmaxü̃.

Ichaía 18:6

Rü ngẽxgumarüxü̃ tá ta nixĩ i ngẽma duü̃xü̃gü nax máxpü̱xanexü̃wa nawogümarexü̃ nax ngurucugü rü dauxchitacüã̱x i naeü̃gü namaxã ãwemügüxü̃ca̱x. Rü ngẽxguma taunecügu rü ngurucugü rü ngéma tá nangẽxmagü. Rü yimá tauemacügü i nagu nagáuanecügu rü guxü̃ma i ngẽma naeü̃gü i dauxchitacüã̱x rü ngéma tá namaxã naxãwemügü —ñanagürü ya Tupana.

1 Chamué 17:46

Rü ñu̱xma ya Cori ya Tupana rü tá cho̱xme̱xgu cunangu̱xẽxẽ nax cuxü̃ chimáxü̃ca̱x. Rü tá cuxü̃ íchadaeeru rü ngẽma curü churaragü i yuexü̃ rü tá ngurucugüna rü ngo̱xogüna chanana. Rü ngẽmaãcü tá guxü̃ i naanewa nüxü̃ nacua̱xgü nax Iraéanewa nangẽxmaxü̃ ya Tupana.

1 Chamué 16:3

¡Rü ngẽmawena rü nüxna naxu i Ichaxí nax cuxü̃ naxümücüxü̃ca̱x i ngẽma naxü̃naarü ma̱xwa! Rü choma rü tá cumaxã nüxü̃ chixu nax ngexcürüücü ya nane tá yixĩxü̃ ya cubaerucü nax Iraétanüxü̃arü ãẽ̱xgacü yixĩxü̃ca̱x —ñanagürü.

1 Chamué 9:13

Rü ngẽxguma nawa pengugügu ya yima ĩane ¡rü paxa naxca̱x peda̱u̱x naxü̃pa nax ngutaque̱xechicawa naxũxü̃ naxca̱x i ngẽma õna! Rü ngẽma duü̃xü̃gü rü taxũtáma nachibüe ñu̱xmata nüma ngéma nanguxgu. Erü nüma tá namaxã nayumüxẽ i ngẽma Tupanaarü ãmare i yagugüxü̃. Rü ngẽmawena tá nixĩ i nachibüexü̃ i ngẽma duü̃xü̃gü i nüxna naxuxü̃. ¡Rü ngẽmaca̱x paxãma ngéma pexĩ i ñu̱xmax! Rü tá ngẽxma nüxü̃ ipeyangau —ngĩgürügügü.

Naanearü ügüchiga 31:54

Rü ñu̱xũchi ga Acóbu rü yexma guma ma̱xpǘnegu nanadai ga ñuxre ga naxü̃nagü rü ñu̱xũchi Tupanaca̱x ínanagu. Rü guxü̃ma ga natanüxü̃ca̱x naca nax nachibüexü̃ca̱x. Rü yemaacü guxü̃ma nachibüe rü yexma ma̱xpǘnegu napegü ga yema chütaxü̃gu.

Ore i mexü̃ ga Matéu ümatüxü̃ 24:28

Rü duü̃xü̃gü rü tá cha̱u̱xca̱x nangutaque̱xegü ñoma ẽxchagü nawemüca̱x ngutaque̱xexü̃rüxü̃.

Ichaía 34:7

Rü ngẽma ãẽ̱xgacügü i Edóü̃cüã̱xgü rü tá nadai ñoma wocagü iyatüxü̃ daiwa nagagüxü̃rüxü̃. Rü ñoma wocaacügürüxü̃ rü wocagü iyatüxü̃rüxü̃ tá nayue i ngẽma Edóü̃cüã̱xgü rü waixü̃mü rü tá nagümaxã nawaiane rü waixü̃müte̱xe rü norü chíxü̃maxã tá guxü̃wama niwaite̱xe.

Yeremía 25:33

Rü ngẽma ngunexü̃gu rü ngẽma duü̃xü̃gü i Cori ya Tupana daixü̃ rü guxü̃wama i ñoma i naanegu tá nawoone. Rü taxúetama naxca̱x taxauxe, rü taxúetama texe tanade i ngẽma naxü̃negü nax itanata̱xgüxü̃ca̱x. Rü ñoma naü̃rüxü̃ tá waixü̃müanewa nawogümare.

Echequié 39:16

Rü ngẽmaãcü tá nixĩ i Tupanape̱xewa namexẽxẽgüaxü̃́ i nachixü̃ane —ñanagürü. Rü ngẽma nachica i Metachinüxü̃ i Góxarü Churaragü Nagu Ta̱xgüxü̃wa tá nangẽxma ya wüxi ya ĩane ya Churaragügu ãégane.

Echequié 29:5

Rü ngẽmawena rü tá chianexü̃wa cuxü̃ chayata̱x namaxã i guxü̃ma i ngẽma choxnigü i curü taxtüwa maxẽxü̃. Rü ngéma tá cungexma rü taxúetama cuxü̃ tayayauxgü nax cuxü̃ yata̱xgüxü̃ca̱x. Rü tá chanamu i ngẽma naeü̃gü i düraexü̃ rü ngẽma ngurucugü nax cuxü̃ nangõ̱xgüxü̃ca̱x.