Echequié 36:3 - Tupanaarü Ore

³ ¡Rü ñu̱xma rü chauégagu namaxã idexa rü ñanagürü nüxü̃!: ‘Cori ya Tupana rü ñanagürü: Ñu̱xma rü guxü̃ i nachixü̃anewa ne ĩxü̃ i duü̃xü̃gü rü pexca̱x ínayachoõchi nax yadaiãxü̃ca̱x i perü duü̃xü̃gü. Rü guxü̃ma i ngẽma togü i nachixü̃anegüarü duü̃xü̃gü rü noxrüxü̃ pexü̃ nixĩgüxẽxẽ. Rü pexü̃ nacugüe rü pegu nidauxcüraxü̃gü.

Echequié 36:3 Referans Kwoze

Yeremía 18:16

Rü ngẽmaãcü nanachianexẽẽgü i ngẽma nachixü̃ane, rü ngẽma togü i duü̃xü̃gü rü namaxã naba̱i̱xãchie. Rü guxü̃ma i ngẽma duü̃xü̃gü i nawa chopetüxü̃ rü baixãchimaxã naneaerugü.

1 Corintios 4:13

Rü chixri tochiga nidexagü, natürü i toma rü mea nachiga tidexagü. Rü ñoma guxchirexü̃ nadaugüxü̃rüxü̃ tomaxã nixĩgü, rü ñoma duü̃xü̃gü i taxuwama mexü̃ãcü toxü̃ nixĩgüxẽxẽ. Rü ñu̱xma rü ta ngẽmaãcütama tomaxã nixĩgü.

Danié 9:16

Pa Cori Pa Tupanax, nüxü̃ tacua̱x rü cuma rü cumecümaxü̃chi. Rü ngẽmaca̱x cuxna taca nax namaxã icurüngüxmüxü̃ca̱x ya yima ĩane ya Yerucharéü̃cüã̱xgü. Erü yima ĩane rü cuxrü nixĩ, rü ngéma nangẽxma ya curü ma̱xpǘne ya üünene. Rü ñu̱xma rü guxü̃ma i ngẽma togü i nachixü̃anecüã̱xgü i duü̃xü̃gü rü nüxü̃ nacugüe i ngẽma curü duü̃xü̃gü rü nüxü̃ nacugüe ya yima Yerucharéü̃ nagagu i ngẽma chixexü̃gü i toma taxügüxü̃ rü torü o̱xigü ügüxü̃.

Echequié 13:10

Rü nümagü rü chorü duü̃xü̃güxü̃ nawomüxẽẽgü, rü namaxã nüxü̃ nixugü nax guxü̃ma mea ixũxü̃. Natürü tama aixcüma ngẽmaãcü nixĩ. Rü nümagü rü ñoma wüxi i naxtapü̱x i chixri üxü̃ i yixcama calmaxã chauxetüxü̃rüxü̃ nixĩgü.

Auxexü̃chiga 2:5

Rü nüma ga Cori ya Tupana rü ñoma wüxi i torü uanürüxü̃ nügü nixĩxẽxẽ. Rü nayachixexẽxẽ ga guxü̃nema ga ĩanegü ga Iraéanewa yexmagüne. Rü nagu napogü ga guxü̃nema ga norü ãẽ̱xgacügüpatagü rü nayawa̱xgüxẽxẽ ga guma ĩanegüarü poxeguxü̃tápü̱xgü. Rü yema naane ga mexẽchixü̃ ga Yudáane rü naxca̱x ínananguxẽxẽ ga guxchaxü̃gü rü axu ga nügüwe ãgüxü̃.

Auxexü̃chiga 2:2

Rü Cori ya Tupana rü noxtacüma guxü̃nema ga Acóbutanüxü̃patagü rü nayachixexẽxẽ, rü taxúnema ínayaxüxẽxẽ. Rü norü numaxã nagu napogüe ga norü poxeguxü̃ ga guma Yudáanearü ĩanegü ga imexẽchine. Rü guma ĩanegüarü ãẽ̱xgacügüxü̃ naxãneexẽxẽ namaxã ga norü ngü̃xẽẽruü̃gü.

Yeremía 52:1

Nüma ga Chedequía rü 21 ga taunecü nüxü̃́ nayexma ga yexguma yangucuchigu nax Yudáanearü ãẽ̱xgacü yixĩxü̃. Rü 11 ga taunecü nixĩ nax ãẽ̱xgacü yixĩxü̃ ga Yerucharéü̃wa. Rü naé rü Amutá nixĩ ga tümaéga. Rü tüma rü Yeremía ga Lixnácüã̱xacü tixĩ.

Yeremía 51:34

Rü yima ĩane ya Yerucharéü̃ rü ñanagürü: —Nüma ga Babiróniaanearü ãẽ̱xgacü ga Nabucudonochó rü chaugu napogü rü nayagagü ga chorü duü̃xü̃gü rü nayana ga chorü ngẽmaxü̃gü rü ñoma wüxi i poratu ya ngeãcucürüxü̃ yéma choxü̃ nata̱x. Rü ñoma wüxi i ngo̱xo i márcüã̱xrüxü̃ choxü̃ ínaga rü nanayaxu ga guxü̃ma ga mexü̃gü ga choxü̃́ yexmaxü̃ ga nüxü̃́ ngúchaü̃xü̃ rü ñu̱xũchi ínanawogü ga yema íyaxügüxü̃. Rü ñu̱xma chanaxwa̱xe nax Babirónia naxütanüxü̃ naxca̱x ga yema chixexü̃ ga chomaxã naxüxü̃. Rü ñu̱xma chanaxwa̱xe nax ngẽma Cadéugü naxütanüxü̃ naxca̱x ga chorü duü̃xü̃gü ga nada̱i̱xü̃ —ñanagürü ya Yerucharéü̃.

Yeremía 33:24

—¿Tama ẽ̱xna nüxü̃ cuxĩnüxü̃ i ngẽma duü̃xü̃gü nüxü̃ ixuxü̃ nax choma rü marü nüxü̃ chaxoxü̃ i ngẽma Iraéanecüã̱xgü rü Yudáanecüã̱xgü, ñagüxü̃? Rü ngẽmaca̱x chixri chorü duü̃xü̃güxü̃ narüdaunü rü nüxü̃ naxoe, rü nüxü̃ nixugüe nax tama wüxi i nachixü̃ane yixĩxü̃ i ñu̱xma.

Yeremía 24:9

Rü poraãcü tá chanapoxcue i ngẽma duü̃xü̃gü rü ngẽmaca̱x i ngẽma togü i nachixü̃anecüã̱xgü rü ngẽxguma ngẽmaxü̃ nadaugügu rü tá poraãcü namaxã naba̱i̱xãchie. Rü ngẽma nachixü̃anegü i nagu chanawoonexü̃wa rü duü̃xü̃gü rü tá nagu nidauxcüraxü̃gü rü nüxü̃ nacugüe rü nüxü̃ naxoe rü chixexü̃ namaxã nixugüe.

Ucu̱xẽgüchiga 1:12

Nüetama ega woo duü̃xü̃gü i mexü̃ yixĩgügu rü tá tanadai, rü ñoma wüxi i duü̃xü̃ i yuxü̃ i waixü̃mü íga̱xaxü̃rüxü̃ tá namaxã tixĩgü.

Wiyaegü 79:10

Rü ngẽma duü̃xü̃gü i tama cuxü̃́ yaxõgüxü̃ rü taxuca̱xma tü̱xcüü̃ ñanagürügü: —¿Ngecü nixĩ ya yimá norü Tupana? —ñanagürügü. Rü ñu̱xma rü nüxü̃ tadauxchaü̃ nax ñuxãcü tá cunada̱i̱xü̃ i ngẽma torü uanügü ga curü duü̃xü̃güxü̃ daixü̃. Rü woo i ngẽma nachixü̃anecüã̱xgü i tama cuxü̃́ yaxõgüxü̃ rü tanaxwa̱xe nax nümagü rü ta nüxü̃ nacua̱xgüxü̃ca̱x i ngẽma cuxüxü̃.

Wiyaegü 69:12

Rü duü̃xü̃gü rü ĩanearü plazawa chauchiga nidexagü rü ngẽma ngãxẽxü̃ rü chaugu nawiyaegü.

Wiyaegü 61:1

Pa Chorü Tupanax ¡nüxü̃ naxĩnü nax cuxca̱x aita chaxüxü̃! ¡Rü choxü̃́ nüxü̃ naxĩnü i chorü yumüxẽ rü choxü̃ nangãxü̃!

Wiyaegü 35:25

Rü tama chanaxwa̱xe i chauchiga nidexagü rü chauchiga chixexü̃gu narüxĩnüe ñaxü̃maxã: —Ñaa nixĩ i ngẽma inaxwa̱xegüxü̃ rü düxwa marü chixexü̃gu tananguxẽxẽ —ñanagürügü.

Wenaxarü naxümatü ga Tupanaarü mugü 28:37

Rü guxü̃nema ya yima ĩanegü ya Cori ya Tupana pexü̃ mugünewa, rü pema rü wüxi i baixãchixẽẽruxü̃ rü cugüruxü̃ tá pixĩgü.

Lebítanüxü̃arü puracüchiga 26:43

Rü ngẽxguma tama perü naanewa pengẽxmagüyane, rü ngẽma naane rü tá inarüngü̃. Natürü i pema rü tá penaxütanü i perü pecadu, yerü nüxü̃ pexo ga chorü ucu̱xẽgü rü naxchi pexai ga chorü mugü.

Yeremía 2:15

¿Rü ta̱xacüca̱x norü uanügü ñoma leóü̃gü nada̱i̱xü̃rüxü̃ nanadai, rü tagaãcü aita naétü naxüe? Rü nachixü̃ane rü nachitaxü̃icatama ínayaxü. Rü norü ĩanegü rü ínanagu. Rü taxúema nawa tayaxü.

Auxexü̃chiga 3:62

Rü cuma rü nüxü̃ cucua̱x nax guxü̃ma i oragügu chixri chauxchiga yadexagüechaxü̃ i chorü uanügü.

Echequié 12:20

Rü guxü̃nema ya daa ĩanegü i nawa namaxẽne i ngẽma duü̃xü̃gü rü tá inayarüxogü. Rü ñaa nachixü̃ane rü tá chianexü̃xü̃ nayanguxuchi. Rü ngẽxguma tá nixĩ i pemax rü nüxü̃ picua̱xãchitanüxü̃ nax choma chixĩxü̃ ya Cori ya Tupana’ ” —ñanagürü.

Echequié 35:13

Rü cuma rü quidexa rü curü conümaxã chauchiga quidexa rü choxü̃ cunuxẽxẽ. Rü choma rü meama nüxü̃ chaxĩnü ga curü dexa.

Echequié 36:5

Erü Cori ya Tupana rü ñanagürü: Choma rü chorü numaxã chidexa ga yexguma poxcu namaxã chaxueguxgu ga yema togü ga nachixü̃anegü. Rü yexera yema Edóü̃chixü̃aneca̱x nixĩ i ngẽma poxcu yerü taãẽãcüma nügüaxü̃́ nanayauxgü ga chorü naane rü ñu̱xũchi chorü duü̃xü̃gü ga Iraétanüxü̃xü̃ nacugüeãcüma norü naanegüwa nayabuxgü ga nanetügüarü o rü nayagagü ga naxü̃nagü’ ” —ñanagürü.

Abdía 1:13

Rü pema rü taxũchima name ga nagu pechocu ga chorü ĩane ga Yerucharéü̃ ga yexguma guxchaxü̃wa nayexmayane. Rü taxũchima name ga petaãẽgüama namaxã ga yema guxchaxü̃gü ga nüxü̃ ngupetüxü̃. Rü taxũchima name ga naxca̱x pengĩ́e ga norü yemaxü̃gü ga yexguma guxchaxü̃wa nayexmayane.

Wiyaegü 79:4

Rü ngẽma nachixü̃anegü i torü ngaicamana ngẽxmagüxü̃ rü togu nidauxcüraxü̃gü rü toxü̃ nacugüe.