Echequié 34:25 - Tupanaarü Ore

²⁵ Rü chorü carnérugümaxã tá chanaxü i chorü uneta nax taãxẽwa nangẽxmagüxü̃ca̱x. Rü nachixü̃anewa tá chayanaxoxẽxẽ i ngẽma aigü i düraexü̃ nax ngẽmaãcü taãẽãcüma ngẽma naanewa namaxẽxü̃ca̱x rü naixnecügu napegüxü̃ca̱x.

Echequié 34:25 Referans Kwoze

Echequié 37:26

Rü ngẽma chorü duü̃xü̃gümaxã tá ichaxuneta nax ngẽmaãcü aixcüma nataãẽgüxü̃ca̱x. Rü ngẽma chorü uneta rü tagutáma inayacua̱x. Rü choma rü tá nüxü̃ charüngü̃xẽxẽxü̃ nax yamuxü̃ca̱x. Rü natanüwa tá chanangexmaxẽxẽ ya chopata ya üünene nax guxü̃gutáma ngéma nangẽxmaechaxü̃ca̱x.

Lebítanüxü̃arü puracüchiga 26:6

Rü pechixü̃anewa rü tá petaãẽgü. Rü ngẽxguma pepeegu rü taxuca̱xtama pemuü̃e, erü ngẽma naeü̃gü i düraexü̃ rü tá pexna chayaxĩgachitanüxẽxẽ. Rü pechixü̃anewa rü nataxutama i dai.

Echequié 34:28

Rü taxuxü̃táma i togü i nachixü̃anegü chorü duü̃xü̃gümaxã inacua̱x. Rü woo ngẽma naeü̃gü i düraexü̃ rü taxũtáma wena nanangõ̱xcu i chorü duü̃xü̃gü. Rü taãẽãcüma tá namaxẽ rü taxuca̱xtama namuü̃e.

Yeremía 33:16

Rü ngẽxguma nawa nanguxgu i ngẽma ngunexü̃, rü Yudáane rü tá nüxna ínanguxuchi i norü guxchaxü̃gü, rü taxũtáma ãũcümaxü̃wa nangẽxma ya Yerucharéü̃. Rü ngẽmaca̱x ya yima ĩane rü tá ñaxü̃gu nanaxüéga: “Cori ya Tupana rü Meama Tamaxã Inacua̱x”, ñaxü̃gu.

Yeremía 23:6

Rü ngẽxguma nüma ãẽ̱xgacü yixĩxgu rü Yudáane rü taxũtáma to i nachixü̃ane namaxã inacua̱x rü ngẽma Iraéanearü duü̃xü̃gü rü taxuca̱xtama namuü̃e. Rü ngẽma tá namaxã naxugüãxü̃ ya yimá ãẽ̱xgacü rü “Cori ya Tamaxã Poracü”, tá nixĩ i naéga —ñanagürü ga Tupana.

Ichaía 35:9

Ngẽma namawa rü nataxutama i leóü̃gü, rü nataxutama i aigü i düraexü̃ i tüxna nangaicamagüxü̃. Rü ngẽma namagu tá nawoegu i ngẽma duü̃xü̃gü i Cori ya Tupana ínguxü̃xẽẽxü̃ norü uanügüme̱xẽwa. Rü taãẽxü̃ i wiyaegümaxã tá Chióü̃gu nachocu, rü guxü̃gutáma ngéma nataãẽgüecha. Rü ngéma rü marü nataxutama i axu rü ngúxü̃, rü taãẽxicatatama nangẽxma.

Wiyaegü 4:8

Choma rü taãẽãcü ichayacaãchi rü ngẽxgumatama mea chape, erü nüxü̃ chacua̱x, Pa Corix, nax cuma rü choxna cudauxü̃.

Popera ga Yudíugü ga yaxõgüxü̃ca̱x ümatüxü̃ 13:20

Rü ñu̱xma chanaxwa̱xe i pexü̃ narüngü̃xẽxẽ ya Tupana ya tórü taãẽxẽẽruxü̃ rü tórü ngüxmüxẽẽruxü̃ ixĩcü. Rü nüma nixĩ ga yuwa ínadaxẽẽãxü̃ ga tórü Cori ya Ngechuchu ya Cristu ya yaxõgüxü̃arü dauruxü̃ ya guxãarü yexera ixĩcü. Rü yexguma curuchawa yapotagu rü nagü ibaxgu rü nayanguxẽxẽ ga norü uneta i taguma iyarüxoxü̃ i maxü̃ tüxna ãxü̃. Rü chanaxwa̱xe nax nüma ya Tupana pexü̃ nangü̃xẽẽxü̃ nax guxü̃wama pemexü̃ca̱x rü mea naga pexĩnüexü̃ca̱x. Rü ngẽxgumarüxü̃ ta tanaxwa̱xe nax Ngechuchu ya Cristugagu Tupana toxü̃ rüngü̃xẽẽxü̃ nax nüma nanaxwa̱xexü̃ãcüma tixĩgüxü̃ca̱x. Rü tanaxwa̱xe i guxü̃guma Cristuxü̃ ticua̱xüü̃gü. Rü ngẽmaãcü yixĩ.

Yox 5:22

Rü tá nüxü̃ cucugü i ngẽma taiya rü ngẽma taxü̃ i guxchaxü̃gü. Rü taxũtáma nüxü̃ cumuü̃ i ngẽma naeü̃gü i idüraexü̃.

Ichaía 55:3

¡Rü cha̱u̱xca̱x pexĩ, rü choxü̃́ iperüxĩnüe! ¡Chauga pexĩnüe rü tá pemaxẽ! Rü choma rü tá pemaxã chanaxü i wüxi i uneta i taguma gúxü̃. Rü ngẽmaãcü tá chayanguxẽxẽ ga yema chorü uneta ga ãẽ̱xgacü ga nüxü̃ changechaü̃xü̃chicü ga Dabímaxã nüxü̃ chixuxü̃.

Lebítanüxü̃arü puracüchiga 26:5

Rü ngẽma tríguarü buxu rü tá úbaarü buxuwa nangu, rü ngẽma úbaarü buxu rü tá toearü ngunexü̃wa nangu. Rü paũmaxã tá pixãwemü ñu̱xmata mea pingãxpütüwegü. Rü taxuxü̃táma i ta̱xacü pexü̃ nachixewe i pechixü̃anewa.

Iraétanüxü̃arü muxchiga 25:12

¡Rü Finéemaxã nüxü̃ ixu rü tá nüxü̃ chaxuneta nax nüma rü nataagü Iraétanüxü̃arü chacherdótegü yixĩgüxü̃ca̱x i guxü̃gutáma! Erü nüma rü cha̱u̱xca̱x nayanuxũ rü yemagagu nixĩ ga choxü̃ nangüxmüxẽẽxü̃ namaxã i ngẽma Iraétanüxü̃ —ñanagürü.

Yox 5:23

Rü yimá nutagü rü cuanewa rü taxũtáma curü guxcharuü̃gü nixĩgü. Rü ngẽma naeü̃gü i idüraexü̃ rü cumücügü tá nixĩgü.

Yeremía 32:37

Rü yexguma chorü duü̃xü̃gümaxã poraãcü chanuxgu rü muxü̃ma ga nachixü̃anegu chanawoone. Natürü wena tá chananutaque̱xe i ngẽma chorü duü̃xü̃gü rü daa Yerucharéü̃cax tá chanawoeguxẽxẽ. Rü ngẽxguma i nümagü rü taãẽãcüma tá namaxẽ rü taxũtáma ãũcümaxü̃wa nangẽxmagü.

Echequié 16:60

Natürü i choma rü tá nüxna chacua̱xãchi ga yema uneta ga cumaxã chaxueguxü̃ ga yexguma cupaxgu, Pa Yerucharéü̃x. Rü ñu̱xũchi cumaxã tá chanaxuegu i wüxi i uneta i guxü̃guca̱x ixĩxü̃.

Echequié 16:62

Rü choma rü tá wena cumaxã chanaxü i ngẽma chorü uneta, rü ñu̱xũchi tá nüxü̃ quicua̱xãchi nax choma chixĩxü̃ ya Cori ya Tupana.

Echequié 20:37

Rü ñachagürü: —Rü ñoma wüxi i carnéruarü dauruxü̃ i norü carnéru tüxü̃ ngugüxü̃rüxü̃ tá pexü̃ changugü. Rü wüxíechigü rü tá tüxü̃ chacua̱x nax texégü tá tixĩxü̃ ya yíxema chorü duü̃xü̃gü ixĩgüxe. Rü yíxemagümaxã tá chorü uneta chaxü.

Echequié 28:26

Rü ngéma rü tá taãẽãcüma namaxẽ rü taxúetama tanachixewegü. Rü tá naxüpatagü rü úbamaxã tá natoegü. Rü choma rü tá chanapoxcue i guxü̃ma i ngẽma nachixü̃anegü i nüxna ngaicamagüxü̃ i guxchaxü̃ naxca̱x ínguxẽẽxü̃. Rü ngẽmaãcü i ngẽma duü̃xü̃gü rü tá nüxü̃ nacua̱xgü nax choma yixĩxü̃ i Iraétanüxü̃arü Cori ya Tupana chixĩxü̃” —ñanagürü ga Tupana.

Echequié 34:27

Rü ngẽma nanetügü i naanewa rüxügüxü̃ rü tá nixo. Rü ngẽma naanegü i nanetügü nagu natogüxü̃ rü muxü̃ma i nanetügüarü o tá nawa nabuxgü. Rü ngẽxguma norü uanügüme̱xẽwa íchanguxü̃xẽẽgu i chorü duü̃xü̃gü, rü tá nüxü̃ nicua̱xãchitanü nax choma chixĩxü̃ i norü Tupana.

Echequié 39:26

Rü ngẽma Iraétanüxü̃ i togü i nachixü̃anegüwa ngẽxmagüxü̃ i norü uanügüchixü̃anegüwa rü wena tá wüxiwa chanagagü. Rü ngẽxguma rü taãẽãcü tá norü naanewa nangẽxmagü, rü taxúetama texe ítanabai̱xgügü. Rü ngẽmaãcü tá ichanawe̱x i chorü pora rü chorü üüne nax muxü̃ma i nachixü̃anegü nüxü̃ nadaugüxü̃ca̱x. Rü ngẽma Iraétanüxü̃ rü tá nüxü̃ narüngümae ga yema poxcu ga ü̃pa norü chixexü̃gagu naxca̱x íchanguxẽẽxü̃.

Chacaría 14:11

Rü yima ĩane ya Yerucharéü̃ rü tá namuarü duü̃xü̃güã̱x, rü taxũtáma wenaxarü norü uanügü nagu napogüe. Rü ngẽma duü̃xü̃gü i nagu ãpatagüxü̃ rü tá taãẽxãcü nawa namaxẽ.

Lebítanüxü̃arü puracüchiga 25:19

Rü penetügü rü tá meama nixo, rü pemax rü taxuxü̃táma i ta̱xacü pexü̃ nachixewe nawa i ngẽma perü naane. Rü tá penangõ̱x i penetügüarü o ñu̱xmata pengãxpütüwegü.

Ucu̱xẽgüchiga 3:24

Ngẽxguma icurüngüxgu rü taxuca̱xma tü̱xcüü̃ cumuü̃ rü ngẽxguma icucaxgu rü mea tá cupe.

Ichaía 54:10

Rü woo yima ma̱xpǘnegü ixĩgachigu rü yima ma̱xpǘnegü rümáchanemaegüne rü yawa̱xgügux, Pa Yerucharéü̃x, natürü ngẽma chorü ngechaü̃ cuxca̱x rü tagutáma naxüchicüxü. Rü chorü uneta ga curü duü̃xü̃gümaxã nüxü̃ chixuxü̃ nax namaxã charüngüxmüxü̃ rü tagutáma nüxü̃ charüngüma —ñanagürü.

Ichaía 61:8

Erü nüma ya Tupana rü naxchi naxai i ngẽma ngĩ́ta̱a̱x rü máeta, natürü nüxü̃ nangechaü̃ i ngẽma aixcüma mexü̃. Rü tá pexna nanaxã i taxü̃ma i perü natanü, rü pemaxã tá nanaxü i wüxi i uneta i tagutáma yagúxü̃.

Yeremía 23:4

Rü natanügu tá chanamugü i ãẽ̱xgacügü i aixcüma mea nüxna dauxü̃ nax ngẽmaãcü taxuca̱xma namuü̃exü̃ca̱x, rü taxuxü̃ma iyarütaxuxü̃ca̱x. Rü chomatama ya Cori ya Tupana nixĩ i nüxü̃ chixuxü̃ i ngẽma —ñanagürü.

Echequié 38:8

Rü mucü ya taunecü ngupe̱xtüguwena rü cuxca̱x tá ínangu i wüxi i mu nax naxca̱x ícuyagoõchixü̃ca̱x i wüxi i nachixü̃ane ga daiwa yexmaxü̃ natürü i ñu̱xma rü wenaxarü marü mexü̃. Rü yema duü̃xü̃gü rü noxri muxü̃ma ga nachixü̃anegu nawoonemare rü norü naane rü poraãcü nangeãcu. Natürü wenaxarü Iraéane i máxpü̱xanexü̃ca̱x nawoegu. Rü ñu̱xma rü guxü̃ma i nümagü rü ngéma nangẽxmagü rü taãẽãcü ngéma namaxẽ.