Echequié 33:10 - Tupanaarü Ore

¹⁰ Rü ñanagürü ta: —Cuma Pa Yatüx, ¡rü Iraétanüxü̃maxã nüxü̃ ixu i chorü ore i ñaxü̃! “Pema rü ñaperügü: ‘Torü chixexü̃gü rü torü pecadugü rü toxü̃́ naya. Rü ngẽmaca̱x nachixe i torü maxü̃. ¿Rü ñuxãcü tá tanamexẽxẽ i torü maxü̃?’ ”

Echequié 33:10 Referans Kwoze

Echequié 37:11

Rü yexguma ga Cori ya Tupana rü ñanagürü choxü̃: —Ngẽma Iraétanüxü̃ rü daa naxchina̱xãgürüxü̃ nixĩgü. Rü nügümaxã ñanagürügü: “Rü yixemagü rü ñoma naxchina̱xãgü ya ipagünerüxü̃ tixĩgü erü nataxuma i tórü ngü̃xẽẽruxü̃, rü ngẽmaca̱x tagutáma wenaxarü tachixü̃aneca̱x tawoegu”, ñanagürügü.

Echequié 24:23

Rü taxũtáma ngepatexeãcü rü ngearü chapatuãcü ipexĩ. Rü taxũtáma pengechaxü̃gü rü tümaca̱x pexauxe. Rü ngẽma perü pecadugügagu rü tá pengearü poraã̱x. Rü pegümaxãxicatama tá pexauxe.

Ichaía 49:14

Nüma i Chióü̃cüã̱xgü rü ñanagürügü: —Cori ya Tupana rü marü tüxna nixũgachi rü tüxü̃ ínawogü —ñanagürügü.

Echequié 4:17

Rü tá nataxu i dexá rü õna. Rü duü̃xü̃gü rü muü̃ãcü tá nügü narüdaunü. Rü ngẽma norü pecadugügagu tá nituraetanü rü niyuetanü —ñanagürü choxü̃.

Lebítanüxü̃arü puracüchiga 26:39

Rü pema nax ngéma peyaxügüxü̃ rü pemaxẽxü̃ nawa i perü uanügüarü naane, rü perü chixexü̃gagu tá peyue. Rü wüxigu penatügümaxã tá peyue nagagu i norü pecadugü.

Yeremía 2:25

Pa Iraétanüxü̃, ¡taxṹ i pegü pengu̱xcutüxẽẽgüxü̃ nax ngearü chapatuãcüma ipexüãchixü̃ rü taxṹ i pegü pipaxmanaaxẽẽgüxü̃ nax ngẽma naxchicüna̱xãgüwe perüxĩxü̃ca̱x! Natürü ga pema rü ñaperügügüama: “Taxucürüwa nüxna tixĩgachi i ngẽma naxchicüna̱xãgü. Erü toma rü nüxü̃ tangechaxü̃ i ngẽma togü i nachixü̃anegüarü tupananetachicüna̱xãgü, rü ngẽmaca̱x nawe tarüxĩ”, ñaperügügü.

Ichaía 51:20

Pa Yerucharéü̃cüã̱x, pema rü ñoma cowügü i yütagu yixü̃rüxü̃ peturae rü namagüarü poxõchigüwa pecaquegü. Rü Tupanaarü nu rü pexna nangu rü ngẽmaca̱x ngúxü̃ pingegü.

Norü taxre ga to ga popera ga ãẽ̱xgacügüchiga ümatüxü̃ 34:24

Rü choma i Cori ya Tupana rü nüxü̃ chixu rü taxü̃ i guxchaxü̃ tá naxca̱x íchananguxẽxẽ ya daa ĩane rü norü duü̃xü̃gü. Rü aixcüma tá naxca̱x íchananguxẽxẽ i guxü̃ma i ngẽma poxcu i ngẽma popera i Yudáanearü ãẽ̱xgacüpe̱xewa nüxü̃ pedaumatüxü̃wa nüxü̃ yaxuxü̃.

Édra 9:15

Pa Cori ya Iraétanüxü̃arü Tupanax, cuma rü tomaxã cumecüma rü ngẽmaca̱x ícuyaxüxẽxẽ i ñuxre i totanüxü̃ i ñu̱xma maxẽxü̃. Tomagü rü aixcüma cupe̱xewa chixexü̃ taxügü, rü ngẽmaca̱x taxucürüwa cuxna tangaicamagü —ñachagürü nüxü̃.

Echequié 18:19

Rü pema rü tá choxna peca rü ñaperügügü tá: “¿Tü̱xcüü̃ ya yimá nane rü tama nanatüarü chixexü̃gagu napoxcu?” ñapegürügü tá. Dücax, nüma rü taxũtáma nanatüarü chixexü̃gagu napoxcu erü yimá nane rü aixcüma mexü̃ naxü, rü nayanguxẽxẽ ga chorü mugü rü nagu namaxü̃. Rü ngẽmaca̱x taxucürüwama nanatüarü chixexü̃gagu nayu.