Echequié 26:12 - Tupanaarü Ore

¹² Rü ngẽma norü churaragü rü tá nanadegü rü naxca̱x nangĩ̱xgü i curü ngẽmaxü̃gü i namaxã cutaxexü̃. Rü tá nayawa̱xgüxẽxẽ i ngẽma curü poxeguxü̃tápü̱xgü. Rü ngẽxgumarüxü̃ tá ta nayawa̱xgüxẽxẽ ya yima cupatagü ya imexẽchine. Rü ngẽmawena rü tá márwa nanawoü̃gü ya yima nutagü rü norü omütagü rü woo ngẽma natüchigü.

Echequié 26:12 Referans Kwoze

Ichaía 23:8

¿Rü texé tixĩ ya yíxema ãẽ̱xgacüarü ĩane ya Tírumaxã naxueguxe i ngẽma ñu̱xma ngupetüxü̃? Yima ĩanearü taxepataxü̃güarü yoragü rü natachigagü, rü norü taxetanüxü̃ rü guxü̃ma i togü i taxetanüxü̃ i ñoma i naanewa ngẽxmagüxü̃arü yexera nüxü̃ icua̱xüchixü̃ nixĩgü.

Amúx 5:11

Rü pemax, Pa Ãẽ̱xgacügüx, rü chixri tümamaxã ipecua̱x ya yíxema ingearü diẽruã́xẽ. Rü naétü tüxna peca nax tümaarü trigumaxã pexü̃́ tanaxütanüxü̃ca̱x naxca̱x nax penamexẽẽgüxü̃ i tümaarü guxchagü. Rü ngẽmaca̱x i pema rü taxũtáma nawa pemaxẽ ya yima ĩpatagü ya nutagümaxã pexüxü̃ne, rü bai tá peyaxagüxü̃ ya yimá bínu i peanegu petogüxü̃ i úbagüwaxü̃cü.

Norü taxre ga to ga popera ga ãẽ̱xgacügüchiga ümatüxü̃ 32:27

Rü nüma ga Echequía rü nüxü̃́ nayexma ga muxü̃ma ga norü yemaxü̃gü ga imexẽchixü̃. Rü natachiga. Rü namuxũchi ga norü úirugü, rü diẽrumügü, rü nutaxacügü ga ngã̱xãẽruü̃gü, rü pumaragü, rü poxü̃ruü̃gü, rü naguxü̃raü̃xü̃ ga yemaxü̃gü ga tatanüxü̃.

Naúü̃ 2:9

Rü norü uanügüarü churaragü rü tagaãcü ñanagürügü: —¡Penade i norü diẽrumü rü norü úirugü! Rü ngẽma nax namuxũchixü̃ i Nínibecüã̱xgüarü ngẽmaxü̃gü rü tama nagu̱xéga —ñanagürügü.

Ochéa 13:15

Rü woo ñoma maxẽ i baxcaxü̃rüxü̃ mea nüxü̃ naxüpetügu i ngẽma Iraéanecüã̱xgü i ñu̱xmax, natürü tá naxca̱x ínangu i wüxi i buanecü i éstewaama ne ũcü. Rü yimá buanecü ya poracü ya chianexü̃wa ne ũcü, rü tá nayachegüxẽxẽ i natüacügü rü bairawegü. Rü ngẽxguma i ngẽma Iraéanecüã̱xgüarü uanügü rü tá nanade i guxü̃ma i norü meruü̃gü.

Danié 11:8

Rü ñu̱xũchi Equítuanewa tá nanana i ngẽma nórtecüã̱xarü tupanachicüna̱xãgü i bróũchenaxca̱x wüxigu namaxã i norü ngẽmaxü̃gü i úirunaxca̱x rü diẽrumünaxca̱x. Rü ñuxre ya taunecü rü taxũtáma nügü nadai i ngẽma taxre i ãẽ̱xgacügü.

Echequié 28:8

Rü tá cuxü̃ nima̱xgü rü ngẽma ínawaanexü̃wa tá cuxü̃ nata̱xgü i mártamawa.

Echequié 26:5

Rü curü ĩane ya márgu iyanacuixü̃wa rü tá nabáianemare rü ngẽxma tá norü püchagü nipagü. Rü choma ya Cori ya Tupana nixĩ i nüxü̃ chixuxü̃ i ngẽma. Rü cumax, Pa Tírux, rü ngẽma togü i nachixü̃anegü rü tá cuxna nanapuxü̃ i curü ngẽmaxü̃gü. Rü curü ĩanexacügüwa ngẽxmagüxü̃ i duü̃xü̃gü rü taramaxã tá nanadai. Rü ngẽxguma i curü duü̃xü̃gü rü tá nüxü̃ nicua̱xãchitanü nax choma yixĩxü̃ i Iraétanüxü̃arü ãẽ̱xgacü.

Yeremía 25:34

¡Ẽcü pexauxe, Pa Duü̃xü̃güarü Ãẽ̱xgacügüx! ¡Rü pema i duü̃xü̃gümaxã ipecuáxü̃ rü waixü̃müanegu pidixgü! Erü marü nawa nangu i ngunexü̃ nax pexü̃ nada̱i̱xü̃ ñoma carnérugü i ngüexü̃ ida̱i̱xü̃rüxü̃. Rü ñoma wüxi i axepáü̃ i mexẽchixü̃ irünguxü̃rüxü̃ tá perüyi.

Ichaía 32:12

¡Perümaãchitanü rü pexauxe naxca̱x i perü naanegü ga noxri mexü̃ rü perü úbanecügu ga noxri oxochiréxü̃!

Ichaía 23:11

Rü nüma ya Cori ya Tupana rü márwa inanawe̱x i norü pora, rü nachixü̃anegüxü̃ namuü̃xẽxẽ. Rü nanamu nax nagu napogüexü̃ca̱x ya Canaáü̃arü ĩanegü ya meama ípoxegugüne.

Norü taxre ga to ga popera ga ãẽ̱xgacügüchiga ümatüxü̃ 36:10

Rü yexguma inaxügügu ga gumá taunecü, rü nüma ga ãẽ̱xgacü ga Nabucudonochó rü norü churaragüxü̃ namu nax Yoaquíü̃xü̃ Babiróniawa nagagüxü̃. Rü wüxigu namaxã nayana ga Tupanapata ga taxü̃nearü yemaxü̃gü ga itatanüxü̃. Rü Yoaquíü̃chicüxü nüxü̃ naxuneta ga Chedequía ga Yoaquíü̃ nanepü nax Yudáanewa rü Yerucharéü̃wa ãẽ̱xgacü yixĩxü̃ca̱x.

Yeremía 52:14

Rü yema churaragü ga íyaxümücügüxü̃ rü nayawa̱xgüxẽxẽ ga guma Yerucharéü̃arü poxeguxü̃tápü̱xgü.