Echequié 22:26 - Tupanaarü Ore

²⁶ Rü ngẽma curü chacherdótegü rü ínayatoxẽẽgü i ngẽma chorü ngu̱xẽẽtaegü rü nanaxãũãchigü i ngẽma chorü ngẽmaxü̃gü i üünegüxü̃. Rü naxca̱x nawüxigu i ngẽma tama mexü̃ rü ngẽma üünexü̃. Rü tama toguxexü̃ nangúexẽxẽ i ta̱xacü nixĩ i chope̱xewa mexü̃ rü ta̱xacü nixĩ i chope̱xewa ãũãchixü̃. Rü tama nanaxaure i chorü ngü̃chigarü ngunexü̃gü. Rü tama choxü̃ nicua̱xüü̃gü.

Echequié 22:26 Referans Kwoze

Lebítanüxü̃arü puracüchiga 10:10

Erü penaxwa̱xe i mea peãẽxü̃ pecua̱x nax nüxü̃ pecuáxü̃ca̱x i ngexü̃rüüxü̃ nixĩ i ngẽma üünexü̃ rü ngexü̃rüüxü̃ nixĩ i ngẽma tama üünexü̃, rü ngexü̃rüüxü̃ nixĩ i ngẽma Tupanape̱xewa mexü̃ rü ngẽma Tupanape̱xewa ãũãchixü̃. Rü ngẽmaãcü tá meama penangúexẽxẽ i ngẽma Iraétanüxü̃gü nax nagu naxĩxü̃ i guxü̃ma i chorü mugü i Moichéwa pemaxã nüxü̃ chixuxü̃ —ñanagürü ga Tupana.

Maraquía 2:8

Natürü i pemax, Pa Chacherdótegüx, rü nüxna pixĩgachi i ngẽma ore i mexü̃. Rü ngẽma perü ngu̱xẽẽtaemaxã muxẽma ya duü̃xẽgü chixexü̃gu tüxü̃ peyixẽxẽ. Rü ngẽmaãcü i pemax rü ípeyatóxẽxẽ ga yema uneta ga perü o̱xigü ga Lebítanüxü̃maxã nüxü̃ chixuxü̃.

Echequié 22:8

Rü tama nüxü̃ nangechaxü̃gü ya yima chorü ngutaque̱xepataxü̃gü ya üünene. Rü tama nanaxaure i chorü ngü̃chigaarü ngunexü̃.

Echequié 44:23

Rü ngẽma chacherdótegü rü nanaxwa̱xe nax chorü duü̃xü̃güxü̃ nangúexẽẽxü̃ nax nüxü̃ nacua̱xgüxü̃ca̱x nax ngexü̃ yixĩxü̃ i ngẽma üünexü̃ rü ñu̱xũchi ngexü̃ yixĩxü̃ i ngẽma chixexü̃. Rü ngẽxgumarüxü̃ ta nanaxwa̱xe nax nangúexẽẽãxü̃ nax ngexü̃ yixĩxü̃ i ngẽma chope̱xewa mexü̃ rü ngexü̃ yixĩxü̃ i ngẽma chope̱xewa ãũãchixü̃.

Yeremía 2:8

Rü ngẽma perü chacherdótegü rü tama chaugu narüxĩnüe rü tama cha̱u̱xca̱x nadaugü. Rü ngẽma perü ucu̱xẽruü̃gü rü tama choxü̃ nacua̱xgü. Rü ngẽma perü ãẽ̱xgacügü rü chomaxã nanue, rü ngẽma perü orearü uruü̃gü rü Baáchigaxü̃ãma nixugüe rü ngẽma ngearü maxü̃ã́xü̃ i naxchicüna̱xãgüwe narüxĩ.

Echequié 36:20

Natürü yema Iraétanüxü̃ rü guxü̃ma ga guma ĩanegü ga nagu nawoonenewa rü chixri chauchiga nidexagü rü nanaxãũãchixẽxẽ ga chauéga i üünexü̃. Rü yemaca̱x ga yema togü ga duü̃xü̃gü rü ñanagürügü: “Ñaa nixĩ i Cori ya Tupanaarü duü̃xü̃gü, natürü nachixü̃anewa ínachoxü̃”, ñanagürügü —ñanagürü ya Tupana.

1 Chamué 2:22

Rü nüma ga gumá chacherdóte ga Erí rü marü poraãcü nayaxüchi. Natürü nüxü̃ nacua̱xama ga yema chixexü̃ ga nanegü Iraétanüxü̃tanüwa ixügüxü̃, rü ñuxãcü yema ngexü̃gü ga Tupanapataarü ücuchicawa puracüexü̃maxã nax namaxẽxü̃.

Romanos 2:24

Rü ngẽmaca̱x i Tupanaarü ore i ümatüxü̃wa rü ñanagürü: “Rü pegagu nixĩ nax chixri Tupanachiga yadexagüxü̃ i ngẽma duü̃xü̃gü i tama Yudíugü ixĩgüxü̃”, ñanagürü.

Auxexü̃chiga 4:13

Rü yema guma ĩane ga Yerucharéü̃maxã ngupetüxü̃ rü norü orearü uruü̃günetagagu nixĩ, rü norü chacherdótegüarü chixexü̃gagu nixĩ. Yerü nümagü rü guma ĩanewa nanadai ga duü̃xü̃gü ga taxuxü̃ma ga chixexü̃ ügüchiréxü̃.

Yeremía 15:19

Rü nüma ga Cori ya Tupana rü Yeremíaxü̃ nangãxü̃ rü ñanagürü: —Ngẽxguma cha̱u̱xca̱x cutaegu̱xgu, rü wena tá cuxü̃ chayaxu rü choxü̃́ tá cupuracü. Rü ngẽxguma chi nüxü̃ curüxoxgu nax natüca̱xmamare quidexamarexü̃, rü chi nüxü̃ quixuxgu i ore i aixcüma mexü̃, rü cuma tá nixĩ i aixcüma chorü orearü uruxü̃ quixĩxü̃. Rü name i nüma i duü̃xü̃gü cuxca̱x nawoegu, natürü tama name nax cuma naxca̱x cutaeguxü̃.

1 Chamué 2:29

¿Tü̱xcüü̃ chixri namaxã ipecua̱x i ngẽma ãmaregü i cha̱u̱xca̱x pedaixü̃ rü cha̱u̱xca̱x ípeguxü̃ rü ngẽma togü i ãmaregü i choma chamuxü̃ nax choxna naxãgüxü̃ i duü̃xü̃gü? ¿Tü̱xcüü̃ natanüwa i guxü̃ma i ngẽma ãmaregü i chorü duü̃xü̃gü i Iraétanüxü̃ choxna ãgüxü̃ rü cunegünaama cunaxã i ngẽma ãmaregü i rümemaegüxü̃ rü ngẽmamaxã cuyangüexẽxẽ i cunegü?

Lebítanüxü̃arü puracüchiga 20:25

Rü ngẽmaca̱x i pema rü name nax nüxü̃ pecuáxü̃ nax ngexü̃rüüxü̃ yixĩxü̃ i ngẽma naeü̃gü i mexü̃ nax penangṍxü̃ rü naeü̃gü i tama mexü̃ nax penangṍxü̃, rü ñu̱xũchi ngẽma naeü̃ i ãxpe̱xatüxü̃ i mexü̃ nax penangṍxü̃ rü ngẽma tama mexü̃ nax penangṍxü̃. ¡Rü taxṹ i pegü pexãũãchixẽxẽxü̃ namaxã i ngẽma naeü̃gü i tama mexü̃ nax penangṍxü̃, rü ngẽma ãxpe̱xatüxü̃ i tama mexü̃ nax penangṍxü̃, rü ngẽma waixü̃mügu nügü itúgüxü̃ i nüxü̃ chixuxü̃ nax tama namexü̃ nax penangṍxü̃!

Lebítanüxü̃arü puracüchiga 11:47

Rü pemaxã nüxü̃ chixu i ngẽma ucu̱xẽgü nax ngẽmaãcü nüxü̃ pecuáxü̃ca̱x nax ngexü̃rüüxü̃ yixĩxü̃ i ngẽma imexü̃ rü ngexü̃rüüxü̃ yixĩxü̃ i ngẽma ixãũãchixü̃, rü ngexü̃rüüxü̃ yixĩxü̃ i ngẽma naeü̃gütanüwa rü mexü̃ nax penangṍxü̃ rü ngexü̃rüüxü̃ yixĩxü̃ i ngẽma naeü̃gü i tama mexü̃ nax penangṍxü̃ —ñanagürü ga Tupana.

Lebítanüxü̃arü puracüchiga 13:43

Rü ngẽxguma i ngẽma chacherdóte rü tá tüxü̃́ nüxü̃ nadau i ngẽma o̱xri. Rü ngẽxguma nadauxragu i ngẽma o̱xri i ngẽma ítangeyaexü̃wa rügoxü̃, ngẽxgumarüxü̃ ega chi ngẽma chaxüne rü tümaxü̃newa iyanagóxgurüxü̃, rü ngẽmawa nüxü̃ nacua̱x nax chaxünearü da̱xawe nax yixĩxü̃. Rü ngẽxguma i nüma i chacherdóte rü tá nüxü̃ nixu nax chaxüne yixĩxü̃ i ngẽma tümaeruwa iyarügoxü̃ rü ngẽmaca̱x tá tümamaxã nanaxuegu nax Tupanape̱xewa taxãũãchixü̃.

Echequié 7:26

Rü nügüwe tá naxãgü i ngẽma guxchaxü̃gü i Yerucharéü̃cüã̱xgüca̱x ínguxü̃. Rü ngẽxgumarüxü̃ ta i ngẽma chixexü̃ i nachigagü rü tá nügüwe naxãgü. Rü tá naxca̱x nadaugü i wüxi i chorü orearü uruxü̃ nax ngẽma namaxã nüxü̃ ixuxü̃ca̱x nax ta̱xacüchiga yixĩxü̃ i ngẽma ngupetüxü̃. Natürü i ngẽma rü tá natüca̱xmamare nixĩ. Rü nataxutama i chacherdótegü i nangúexẽxẽxü̃ rü bai i yaxguã̱xgü i tayaxucu̱xẽgüxü̃.

Echequié 42:20

Rü guxü̃ma ga norü ãgümücücüwa ga yema naane rü nanangu. Rü yema naane ga Tupanapata ga taxü̃ne nagu üxü̃ rü norü wüxicüwawachigü rü nüxü̃́ nayexma ga norü poxeguxü̃ ga 250 metru ga norü ma̱x. Rü yema norü poxeguxü̃ nixĩ ga yema Tupanapata ga taxü̃nearü naane ga üünexü̃ yáxü̃guxẽẽxü̃ nüxna ga yema naane ga düxétüwa yexmaxü̃ ga tama üünexü̃.

Echequié 44:10

Rü yema Lebítanüxü̃ ga choxna ixĩgachitanüxü̃ ga yexguma Iraéanecüã̱x choxna ixĩgachitanügu nax yema tupananetachicüna̱xãgüxü̃ yacua̱xüü̃güxü̃ca̱x, rü ngẽma Lebítanüxü̃ rü tá nanaxütanügü ga yema pecadu ga naxügüxü̃.

Norü taxre ga to ga popera ga ãẽ̱xgacügüchiga ümatüxü̃ 36:14

Rü yexgumarüxü̃ ta ga guxü̃ma ga Yudáanecüã̱xarü ãẽ̱xgacügü rü norü duü̃xü̃gü rü chacherdótegü rü ta, rü poraãcü chixri namaxẽ. Rü yema togü ga nachixü̃anegü ga tama Tupanaxü̃ cua̱xgüxü̃arü tupananetachicüna̱xãxü̃ nicua̱xüxü̃gü. Rü yemaacü chixexü̃ nawa naxügü ga guma Tupanapata ga taxü̃ne ga nüma ga Tupana nüxü̃ unetane nax napata yixĩxü̃ca̱x ga Yerucharéü̃wa.

Echequié 23:38

Rü naétü wüxitama ga ngunexü̃gu inaxãũãchigü ga chopata rü tama inaxauregü ga chorü ngü̃chigaarü ngunexü̃gü.

Echequié 44:24

Rü ngẽxguma duü̃xü̃gü nügümaxã nuegu rü ngẽma chacherdótegü tá nixĩ i chorü mugüwa nüxü̃ yaxuxü̃ãcü namexẽẽgüaxü̃́ i ngẽma guxchaxü̃gü. Rü nümagü rü tá nayanguxẽẽgü i chorü mugü rü chorü ucu̱xẽgü nachiga i chorü petagü. Rü mea tá nanaxaure i ngẽma chorü ngü̃xchigaarü ngunexü̃gü.

Maraquía 2:7

Rü wüxi i chacherdótearü puracü nixĩ nax duü̃xẽgü tüxü̃ nangúexẽẽxü̃ nax choxü̃ tacua̱xgüxü̃ca̱x. Rü ngẽmaca̱x name nax guxü̃ma i duü̃xü̃gü naxü̃tawa ĩxü̃ nax tüxü̃ nangúexẽẽxü̃ca̱x, erü choma nax guxãétüwa changexmaxü̃ rü nüxü̃ chaxuneta nax chorü orearü uruü̃gü yixĩgüxü̃ca̱x.