Echequié 21:7 - Tupanaarü Ore

⁷ Rü ngẽxguma cuxna nacagügu nax ta̱xacüca̱x cuxaxuxü̃, ¡rü namaxã nüxü̃ ixu nax cuxaxuxü̃ erü paxa tá ínangu i wüxi i ãũcümaxü̃chixü̃! Rü guxü̃ i duü̃xü̃gü tá naxca̱x rümaachigüxü̃ rü tá naxca̱x yanguãẽgüxü̃. Rü norü muü̃maxã tá nidu̱xruxe. Rü marü ningaicaxüchi nax ínanguxü̃ i ngẽma tá ngupetüxü̃. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü.

Echequié 21:7 Referans Kwoze

Echequié 7:17

Rü guxãtáma taturaechacüxü, rü tümaarü muü̃maxã tá tiyoyoã́pü̱xügü.

Popera ga Yudíugü ga yaxõgüxü̃ca̱x ümatüxü̃ 12:12

Rü ngẽmaca̱x i pema nax pexme̱xwa rü peãpü̱xüwa pipaexü̃, rü name nixĩ i pegü peporaexẽẽãma.

Naúü̃ 2:10

Rü Nínibe rü tá nagu napogüe rü nataxutama i duü̃xü̃gü. Rü nachicaxicatama ínayaxü. Rü norü duü̃xü̃gü rü poraãcü tá namuü̃e. Rü tá nidu̱xruxparagü. Rü tá ningearü poraã̱x, rü tá nayacho̱xõchichametügü.

Echequié 7:26

Rü nügüwe tá naxãgü i ngẽma guxchaxü̃gü i Yerucharéü̃cüã̱xgüca̱x ínguxü̃. Rü ngẽxgumarüxü̃ ta i ngẽma chixexü̃ i nachigagü rü tá nügüwe naxãgü. Rü tá naxca̱x nadaugü i wüxi i chorü orearü uruxü̃ nax ngẽma namaxã nüxü̃ ixuxü̃ca̱x nax ta̱xacüchiga yixĩxü̃ i ngẽma ngupetüxü̃. Natürü i ngẽma rü tá natüca̱xmamare nixĩ. Rü nataxutama i chacherdótegü i nangúexẽxẽxü̃ rü bai i yaxguã̱xgü i tayaxucu̱xẽgüxü̃.

Yeremía 50:43

Rü nüma ya Babiróniaanearü ãẽ̱xgacü rü ngẽxguma nüxü̃ nacuáchigagu nax ínangugüchaxü̃xü̃ i ngẽma uanügü, rü norü muü̃maxã inayanguãxẽ rü naxoegaãxẽ rü poraãcü ngúxü̃ ningẽgü ñoma wüxi i ngexü̃ i íxraxacüchaü̃xü̃rüxü̃.

Ichaía 13:7

Rü ngẽxguma i guxü̃ma i duü̃xü̃gü i Babiróniacüã̱x rü tá inarümaachitanü rü tá ningearü poraã̱x.

Ore i mexü̃ ga Luca ümatüxü̃ 21:26

Rü duü̃xü̃gü rü norü muü̃maxã tá niyuãchitanü i ngẽxguma nüxü̃ nadaugügu i ngẽma tá üpetüxü̃ i ñoma i naanewa. Erü woo guxü̃ma i ta̱xacü i daxũwa nüxü̃ idauxü̃ rü tá naxĩã̱xãchitanü rü tá nu ne nanaxĩmare.

Echequié 24:19

Rü yexguma ga yema duü̃xü̃gü rü choxna nacagü rü ñanagürügü: —¿Ta̱xacüchiga nixĩ i ngẽma cuxüxü̃? ¡Rü tomaxã nüxü̃ ixu! —ñanagürügü.

Echequié 20:49

Rü yexguma ga choma rü Tupanaxü̃ ñacharügü: —¡Pa Chorü Tupanax, ngẽma duü̃xü̃gü rü nüxü̃ nixugüe nax choma rü ore i taxúema nüxü̃ cuáxü̃maxã chidexaxü̃! —ñacharügü.

Auxexü̃chiga 5:17

Rü ngẽmagagu i ñu̱xma rü tayanguãẽgü, rü toxetü rü nixogü rü toxca̱x natauanemare.

Yeremía 49:23

Rü ñanagürü ta: —Ñaa nixĩ i ore i Damácuca̱x ixĩxü̃. Rü yima ĩanegü ga Amá rü Arpáx rü naxoegaãẽgü, erü nachiga marü nüxna nangu i ore i chixexü̃. Rü poraãcü namuü̃e rü tama nataãẽgü.

Yeremía 8:18

Rü ngẽma ngúxü̃ i chingexü̃ rü nangearü üxüxü̃ã̱x, rü yima chorü maxü̃ne rü natura.

Ichaía 35:3

Rü ngẽma turaexü̃ ¡rü penaporaãchitanüxẽxẽ! Rü ngẽma ipaexü̃ ¡rü nüxü̃ perüngü̃xẽxẽ!

Ichaía 28:19

Rü ngẽxguma ínangugügu i ngẽma churaragü i ãũcümaxü̃ rü tá pexü̃ nigagü. Rü guxü̃ i ngunexü̃ tá ínangugüxü̃, rü ngunecü rü chütacü tá ínangugüxü̃. Rü ngẽxguma nüxü̃ pexĩnüechigagu rü muü̃maxã tá pidu̱xrue.

Ichaía 7:2

Rü Acáxmaxã rü napatacüã̱xmaxã nüxü̃ nayarüxugüe ga ore ga ñaxü̃: —Ngẽma Chíriacüã̱xgü rü Efraíü̃tanüxü̃maxã nügü narüngüxẽẽgü nax taxca̱x íyaxü̃ãchixü̃ca̱x —ñaxü̃. Rü yemaxü̃ naxĩnügu rü nüma ga Yudáanearü ãẽ̱xgacü rü norü duü̃xü̃gü rü inanaxügüe nax muü̃maxã yadu̱xruxexü̃ ñoma naixnecüwa ngẽxmagüxü̃ i naigü i buanecüemamaxã íxiã̱xtanücüüxü̃rüxü̃.

Norü taxre ga popera ga ãẽ̱xgacügüchiga 21:12

Rü ngẽmaca̱x i choma ya Cori ya Iraétanüxü̃arü Tupana, rü namaxã chanaxuegu rü ñacharügü: “Poraãcü tá chanapoxcue i Yerucharéü̃cüã̱xgü rü Yudáanecüã̱xgü. Rü yíxema nüxü̃ ĩnüexe i ngẽma guxchaxü̃gü rü tá poraãcü taba̱i̱xãchie rü tangu̱xmachixegü.

2 Chamué 17:10

Rü woo ngẽma curü churaragü i nügü írüporaexü̃ rü ñoma leóü̃ idüxraxü̃rüxü̃ ixĩgüxü̃ rü tá poraãcü nüxü̃ ínayamuü̃ãchitanü, erü guxü̃ma i Iraéanecüã̱xgü rü nüxü̃ nacua̱xgü rü cunatü rü norü churaragü rü nax naporaexüchixü̃.

Yochué 5:1

Rü guxü̃ma ga norü ãẽ̱xgacügü ga Amoréugü ga natü ga Yudáü̃cutüarü éstewaama yexmagüxü̃, rü norü ãẽ̱xgacügü ga Cananéugü ga Már ga Mediteráneuarü ngaicamana yexmagüxü̃ rü nüxü̃ nacuáchigagü ga Cori ya Tupana rü nayapayetamaxẽẽãxü̃ ga natü ga Yudáü̃ nax yachoü̃xü̃ca̱x ga Iraétanüxü̃. Rü nümagü ga yema ãẽ̱xgacügü rü poraãcü namuü̃e ga yemaxü̃ nacuáchigagügu, rü yemaca̱x tama Iraétanüxü̃maxã nügü nadaixchaü̃.

Wenaxarü naxümatü ga Tupanaarü mugü 20:8

Rü ngẽmawena rü ngẽma churaragüerugü rü wena tá norü churaragüxü̃ ñanagürügü: “Rü ngẽxguma texé muü̃gu, rü name nax tümapataca̱x tataeguxü̃ nax ngẽmaãcü tama tanamuü̃xẽẽxü̃ca̱x i ngẽma togü i tümamücügü”, ñanagürügü tá.

Lebítanüxü̃arü puracüchiga 26:36

Rü ñuxre i pema i perü uanügüanewa maxẽãcü ngẽxmagüxe, rü tá muü̃ pexca̱x íchanguxẽxẽ. Rü ngẽxguma wüxi i naixatü rünguxgu rü nagacha̱xwa tá pibuxmü, ñoma taramaxã pewe nangẽgüxü̃rüxü̃. Rü tá ipeyayi woo taxuxü̃ma pewe ngẽgügu.

Ínachoxü̃xü̃chiga 15:15

Rü ngẽma Edóü̃anearü ãẽ̱xgacügü rü tá namuü̃e, rü ngẽma Moáanearü ãẽ̱xgacügü rü tá muü̃maxã nidu̱xrue. Rü guxü̃ma i ngẽma Canaáü̃anecüã̱xgü rü norü muü̃maxã tá nibuxmü.

Nüxíraxü̃xü̃ ga popera ga Pedru ümatüxü̃ 4:7

Rü marü ningaica nax nagúxü̃ i ñoma i naane rü guxü̃ma i ta̱xacü i nawa ngẽxmaxü̃. Rü ngẽmaca̱x name nixĩ nax pexuãẽgüxü̃, rü mea peãxẽxü̃ pecuáxü̃, rü guxü̃guma peyumüxẽgüxü̃.

Yochué 7:5

Rü 36 ga Iraétanüxü̃xü̃ nadai, rü yema togü rü nawe nangẽgü ñu̱xmata guma ĩanearü ĩxpemawa nangugü, rü yexma norü tuãchianexü̃gu nayadai. Rü yemaca̱x ga Iraétanüxü̃ rü narümaachitanü rü poraãcü namuü̃e.

Wiyaegü 58:7

¡Rü noxtacüma yanaxoxẽxẽ i norü pora ñoma dexá natanüme̱xẽwa nichuruxü̃rüxü̃! ¡Rü nüxna nayaxu i norü maxü̃ ñoma maxẽ ya namawa nawa inga̱xcürüxü̃!

Echequié 21:6

Rü cumax, Pa Yatüx, ¡curü ngechaü̃maxã poraãcü naxaxu nape̱xewa i guxü̃ma i Iraétanüxü̃ nax ngẽmaãcü nüxü̃ nacua̱xgüxü̃ca̱x nax ngúxü̃ quingexü̃ i curü maxü̃newa!

Echequié 21:8

Rü nüma ga Cori ya Tupana rü chomaxã nidexa rü ñanagürü:

Echequié 21:15

Rü ngẽma tara rü tá poraãcü nanamuü̃xẽxẽ i duü̃xü̃gü. Rü tá nangẽxma i muxü̃ma i yuexü̃. Rü guxü̃nema ya ĩpatawa tá nangu i ngẽma tara i dairuxü̃. Rü ngẽma nixĩ i ngẽma tara i ya̱u̱xracüüxü̃ rü yaba̱i̱xbeanexẽẽxü̃ rü meama waixmaguxü̃ nax duü̃xü̃güxü̃ nada̱i̱xü̃ca̱x.

Echequié 22:14

Rü ngẽxguma tá cuxü̃ chapoxcugu, Pa Yerucharéü̃x, rü taxuacütáma cho̱xme̱xwa cugü ícupoxü̃. Rü choma ya Cori ya Tupana nixĩ i nüxü̃ chixuxü̃ i ngẽma. Rü choma rü tá chayanguxẽxẽ.

Yeremía 26:12

Rü yexguma ga nüma ga Yeremía rü yema ãẽ̱xgacügüca̱x, rü ñu̱xũchi yema duü̃xü̃güca̱x nixũ, rü nüxü̃ ñanagürü: —Cori ya Tupana nixĩ ya nua choxü̃ mucü nax naégagu pemaxã nüxü̃ chixuxü̃ca̱x nax taxü̃ i guxchaxü̃ tá nüxü̃ ngupetüxü̃ ya daa Tupanapata, rü ñu̱xũchi ya daa ĩane, ngẽma nüxü̃ pexĩnüexü̃rüxü̃.