Echequié 21:22 - Tupanaarü Ore

²² Rü yexguma nawonagütanügu ga naxnegü rü ãẽ̱xgacüarü tügünecüwagu nangu ga guma naxne ga Yerucharéü̃gu ãégane. Rü ngẽmawa nüxü̃ nacua̱x nax Yerucharéü̃cax tá íyachoõchixü̃ namaxã ga naxnegü. Rü ngẽmaãcü tá tagaãcü daica̱x nügüca̱x nacagü, rü yima ĩanearü ĩã̱xgügu tá napogüe, rü tá waixü̃mü nügüca̱x nagünagügü nax yima ĩanegu nachocuxü̃ca̱x, rü tá nüxü̃ ínachomaeguãchi ya yima ĩane.

Echequié 21:22 Referans Kwoze

Echequié 4:2

¡Rü ngẽmawena rü yima ĩanechicüna̱xãcüwagu naxüxchicüna̱xã i churaragü rü naxnegü i dairuxü̃ ixĩgüxü̃! ¡Rü naxüxchicüna̱xã i norü poxeguxü̃ i norü guxü̃cüwawa! ¡Rü naxüxchicüna̱xã i wüxi ya toxṍõne nax ngẽmaãcü yima ĩane ya ípoxegunewa dauxü̃ naxĩgüxü̃ca̱x i ngẽma churaragü!

Echequié 26:9

Rü naxnegümaxã tá cuxca̱x ínayaxüãchi nax yawa̱xẽẽgüãxü̃ca̱x i curü poxeguxü̃tápü̱xgü rü curü dauxü̃taechicagü i curü poxü̃ruxü̃gü ixĩgüxü̃.

Yeremía 52:4

Rü yexguma 9 ga taunecü marü ãẽ̱xgacü yixĩxgu ga Chedequía ga Yudáanewa, rü gumá taunecüarü 10 ga tauemacügu rü nüma ga Nabucudonochó rü guxü̃ma ga norü churaragümaxã Yerucharéü̃ca̱x ínayaxüãchi rü nüxü̃ ínachomaeguãchi. Rü guma ĩanetapü̱xwa waixü̃mümaxã nanagünagügü nax yemawa nagu nachocuxü̃ca̱x ga guma ĩane.

Yeremía 51:14

Rü nüma ya Cori ya Tupana ya Guxãétüwa Ngẽxmacü rü nügüégagu cumaxã nanaxuegu rü ñanagürü: “Pa Babiróniax, curü uanügümaxã tá chayapaxẽxẽ ya curü ĩane. Rü ñoma munügürüxü̃ tá namu. Rü nümagü rü tá tagaãcü aita naxüe i ngẽxguma cuxü̃ naporamaegügu”, ñanagürü.

Yeremía 33:4

Erü choma ya Cori ya Iraétanüxü̃arü Tupana rü ñachagürü: ‘Daa ĩanearü ĩpatagü rü yima Yudáanearü ãẽ̱xgacüpatagü rü tá nagu napogüe nax yimá norü nutagümaxã rü omütagümaxã daa ĩanearü poxegutapü̱x namaxã nacaxcugüxü̃ca̱x nax tama ngẽma uanügüarü günagüanexü̃maxã yawa̱xgüxü̃ca̱x i ngẽma norü poxeguxü̃, rü tama ngẽmaãcü ngẽma uanügü i Cadéugü taramaxã nachocuxü̃ca̱x.

Yeremía 32:24

Rü ñu̱xma i ngẽma Babiróniacüã̱x rü toxca̱x ínayaxüãchi rü torü ĩanetapü̱xwa waixü̃mümaxã nanagünagügü nax ngẽmawa nagu nachocuxü̃ca̱x ya daa ĩane. Rü ngẽma daigagu rü ngẽma taiyagagu rü ngẽma da̱xaweanegagu rü ngẽma Babiróniaanecüã̱xme̱xẽgu tá nangu ya daa ĩane. Pa Cori ya Tupanax, cuma rü marü nüxü̃ cudau nax ñu̱xma marü yanguxü̃ i ngẽma guxchaxü̃gü ga nüxü̃ quixuxü̃.

Yox 39:25

Rü ngẽxguma nagu yacuegügu ya cornétagü nax nügü nada̱i̱xü̃ca̱x rü ngẽma cowaru rü nanugamaraü̃. Rü yáxü̃gu nüxü̃ napa i naema i ngẽma dai, rü nüxü̃ naxĩnü i churaragüerugü nax tagaãcü norü churaragüxü̃ namuxü̃ nax nügü nada̱i̱xü̃ca̱x.

1 Chamué 17:20

Rü moxü̃ãcü ga nüma ga Dabí rü yexwacax yangóonechaü̃gu rü to ga daruü̃me̱xẽgu tüxü̃ namugü ga guxema nanatüarü carnérugü, rü inaxũãchi. Rü nayana ga yema õna ga nanatü ga Ichaxí nüxna naxü̃. Rü yéma naenexẽgü íyexmagüxü̃wa nangu ga yexguma yema churaragü inaxĩãchichaü̃gu ga Firitéugümaxã nügü nax nada̱i̱xü̃ca̱x. Rü tagaãcü nügü naxãũxũnegü.

Yochué 6:20

Rü yexguma ga nüma ga yema duü̃xü̃gü rü aita naxüe rü ga carnéruchatacu̱xregü rü naxãgatanüãchi. Rü yexguma guma carnéruchatacu̱xregügaxü̃ naxĩnüegu ga nüma ga Iraétanüxü̃ rü inanaxügüe nax poraãcü aita naxüexü̃. Rü yexguma ga guma ĩanearü poxeguxü̃ rü niwa̱xtapü̱x. Rü yexguma ga nüma ga Iraétanüxü̃ rü yexma nachocu rü namaxã inacua̱xgü.

Yochué 6:10

Rü nüma ga Yochué rü Iraétanüxü̃na naxãga nax yanachianegüxü̃ca̱x rü bexmamare inaxĩxü̃ca̱x ñu̱xmatáta nüma namua nax guxü̃ma wüxigu poraãcü aita naxüexü̃ca̱x.

Norü taxre ga popera ga ãẽ̱xgacügüchiga 25:1

Rü yemawena ga Chedequía rü tama Babiróniaanearü ãẽ̱xgacüga naxĩnü rü nanu. Rü yemaca̱x guma norü 10 ga tauemacüarü 10 ga ngunexü̃gu ga yexguma 9 ga taunecü ãẽ̱xgacü yixĩxgux ga Chedequía, rü nüma ga Babiróniaanearü ãẽ̱xgacü ga Nabucudonochó rü guxü̃ma ga norü churaragümaxã Yerucharéü̃ca̱x ínayagoõchi. Rü norü to̱xma̱xtawa nangugü rü nüxü̃ ínachomaeguãchi. Rü naxtapü̱xarü guxü̃cüwawa waixü̃mümaxã nanagünagügü nax nagu nachocuxü̃ca̱x ga guma ĩane.

Yeremía 4:16

Paxa nachixü̃anegüarü duü̃xü̃gümaxã, rü Yerucharéü̃cüã̱xgümaxã nüxü̃ pixugü nax wüxi i nachixü̃ane i yáxü̃xü̃wa ngẽxmaxü̃wa ne ĩxü̃ i uanügü i ngéma ne caetanüxü̃ nachiga nax Yudáanearü ĩanegümaxã tá nügü nada̱i̱xü̃.

Echequié 26:8

Rü ngẽma duü̃xü̃gü i curü ĩanexacügüwa ngẽxmagüxü̃ rü tá taramaxã nanadai. Rü curü guxü̃cüwawa tá nanachixẽxẽgü i norü poxü̃ruü̃gü. Rü tá curü poxeguxü̃tápü̱xwa nanagünagü i waixü̃mü nax ngẽmawa cugu nachocuxü̃ca̱x i norü churaragü i poxü̃ruxü̃ã́xü̃.

Amúx 1:14

Rü ngẽmaca̱x tá üxümaxã chayagu i Rabáarü poxeguxü̃gü. Rü wüxi i ngunexü̃ i nagu yaduruanexü̃ rü nagu nawaanexü̃ rü ngẽxguma nügü ínadaiyane tá nixĩ i üxüemamaxã íchanaguxü̃ ya yima norü ãẽ̱xgacüpatagü.

Echequié 5:12

Rü wüxi i norü tomaepü̱xtücumü i curü duü̃xü̃gü rü da̱xaweanemaxã rü taiyamaxã tá cugu nayue, Pa Yerucharéü̃x. Rü ngẽma to i tomaepü̱xtücumü rü cucüwagu tá norü uanügü nanadai. Rü ngẽma to i tomaepü̱xtücumü i íyaxügüxü̃ rü guxü̃ i naanegu tá chanawoone. Rü choma rü tá ngẽma duü̃xü̃güweama chixũchigü namaxã i wüxi i tara i cho̱xme̱xgu tá chingexü̃.

Echequié 5:13

Rü choma rü chorü numaxã tá chanapoxcue, rü ngẽxgumaxica tá nixĩ i charüngüxmüxü̃. Rü nawena nax chorü numaxã ngẽma duü̃xü̃güxü̃ chapoxcuxü̃, rü tá nüxü̃ nicua̱xãchitanü nax choma ya Cori ya Tupana chixĩxü̃ ga chorü numaxã namaxã chanaxueguxü̃ ga yema poxcu.