Echequié 20:47 - Tupanaarü Ore

⁴⁷ ¡Rü namaxã nüxü̃ ixu i ñaa chorü ore i ñaxü̃! Pa Naixnecü i Súrwaama Ngẽxmaxü̃x, choma rü cuwa tá chayanaixẽxẽ ya wüxi ya üxü ya tá ínaguxü̃ne ya guxü̃nema ya curü naigü ya maxẽne rü yuene. Rü yima üxü rü tá niyaura rü taxũtáma nixo. Rü nórtewa rü ñu̱xmata súrwa tá nangu nax yaxãxü̃ i ngẽma naane.

Echequié 20:47 Referans Kwoze

Yeremía 21:14

Choma rü tá pexü̃ chapoxcue, erü ngẽma nixĩ i pexna üxü̃ nagagu i ngẽma chixexü̃gü i pexügüxü̃. Rü nawa tá chanangixichi i ngẽma perü naixnecügü. Rü yima üxüema rü tá nayaxaxẽxẽ i guxü̃ma i ngẽma naixnecügü i perü ĩanecüwawa ngẽxmagüxü̃. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü ga Yeremía.

Ore i mexü̃ ga Luca ümatüxü̃ 23:31

Rü ñu̱xma nax ñaa chixexü̃ chomaxã naxügüxü̃ woo taxuxü̃ma i chixexü̃ chaxüchiréxü̃, ¿rü ñuxãcü tá namaxã nachopetü i ngẽma duü̃xü̃gü i aixcüma chixexü̃ ügüxü̃? —ñanagürü ga Ngechuchu.

Echequié 17:24

Rü guxü̃ma i ngẽma naigü i naanewa rüxügüxü̃ rü tá nüxü̃ nacua̱xgü nax choma chixĩxü̃ ya Cori ya Tupana. Choma rü chayadaxüchi i ngẽma nai i nügü írütaxü̃, rü chanayaxẽxẽ i ngẽma nai i nügü írüxíxraxü̃. Choma rü chanagüatüxẽxẽ i ngẽma nai i nügü írümetanüxü̃, rü wena chanaxüatüxẽxẽ i ngẽma nai i igüatüxü̃. Rü choma ya Cori ya Tupana nixĩ i pemaxã nüxü̃ chixuxü̃ rü ñu̱xũchi chayanguxẽẽxü̃ i ngẽma” —ñanagürü ga Cori ya Tupana.

Echequié 19:14

Rü ngẽma nachacüügüwa rü ninai ya wüxi ya üxü, rü ngẽma ngexwaca rüxügüxü̃ i nachacüügü rü nixae wüxigu norü omaxã. Rü marü nataxuma ga nachacüügü ga iporaxü̃ nax ãẽ̱xgacügüarü naixmena̱xãwa nangugüxü̃. Rü ngẽma nixĩ i wüxi i ngechaü̃arü wiyae, rü name nixĩ i nagu pewiyaegü i ngẽxguma ngechaü̃ ínguxgu.

Ichaía 66:24

Rü ñanagürü ta: —Ngẽxguma ínachoxü̃gu i ngẽma chorü duü̃xü̃gü rü tá nüxü̃ nadaugü nax nayuexü̃ i ngẽma duü̃xü̃gü i chomaxã rüxuanügüxü̃. Rü ngẽma õ̱xmigü i nangõ̱xgüxü̃ rü taguma nayue, rü yima üxüema ya ínaguxü̃ne rü taguma nixo. Rü guxü̃ma i duü̃xü̃gü i ngéma chopetüxü̃ rü tá poraãcü naxã̱ũ̱ã̱xgü i ngẽxguma nüxü̃ nadaugügu —ñanagürü ga Tupana.

Ichaía 30:33

Erü nũxcümacürüwatama nixĩ ga Achíriaanearü churaragüca̱x rü norü ãẽ̱xgacüca̱x ínamexẽẽãxü̃ i wüxi i nachica i taxü̃ rü mátamaxü̃ i üxü nawa ngẽxmaxü̃. Rü ngéma nangẽxma ya tacü ya üxü i muxü̃ma i üxü nawa ngẽxmane. Rü nüma ya Cori ya Tupana rü wüxi i cuemaxã tá nayanaixẽxẽ. Rü ñoma üxüema i achúfremaxã inaixü̃rüxü̃ tá nixĩ.

Ichaía 13:8

Rü tá poraãcü namuü̃e. Rü naxca̱x tá ínangu i taxü̃ i ĩ̱xãchiãxẽ. Rü poraãcü ngúxü̃ tá ningegü ñoma wüxi i ngecü i íxraxacüchaü̃cürüxü̃. Rü muü̃chametüãcü tá nügü narüdaunü rü norü ãnemaxã tá nayadauãchichametügü.

Wenaxarü naxümatü ga Tupanaarü mugü 32:22

Rü ngẽma chorü nu rü ñoma üxüxemarüxü̃ niyaura. Rü ngẽma üxüema rü woo naanearü aixepewa nangu nax yayauraxü̃. Rü tá nixa i ñoma i naane rü guxü̃ma i nanetüarü o i nawa ngẽxmagüxü̃. Rü woo yima ma̱xpü̃́negü rü tá niyaurapǘnegü.

Yeremía 17:27

Natürü ngẽxguma taxũtáma naga pexĩnüegu i ngẽma pexü̃ chamuxü̃ rü tama penaxauregu i ngẽma ngü̃chigaarü ngunexü̃, rü ngẽxguma ngẽma ngunexü̃gu Yerucharéü̃arü ĩã̱xgüwa penanucugu i ngẽma pexwetagü, rü choma rü daa ĩanearü ĩã̱xgüwa tá chayanaixẽxẽ ya üxü ya ínaguxü̃ne ya ãẽ̱xgacüpatagü i Yerucharéü̃wa. Rü yima üxü rü taxúxetáma tüxü̃́ natauxcha nax tayaxoxẽẽxü̃”, ñachagürü —ñanagürü ya Cori ya Tupana.

Echequié 21:10

Rü ngẽma chorü tara rü chanawaixmagu nax ngẽmamaxã chanadaixü̃ca̱x, rü chananaitachinüxẽxẽ nax yaba̱i̱xbexü̃ca̱x.

Echequié 21:32

Rü cumax, Pa Amóü̃x, rü tá quixa rü tá icuyarüxo. Rü yima cugü rü curü naanegu tá niya̱x. Rü taxúetama wena cuxna tacua̱xãchi. Rü choma ya Tupana nixĩ i nüxü̃ chixuxü̃ i ngẽma” —ñanagürü.

Echequié 16:35

Rü ngẽmaca̱x, Pa Nge i Ngeãẽcüx, ¡irüxĩnü i ñaa chorü ore! Rü choma ya Cori ya Tupana rü cumaxã nüxü̃ chixu rü ñachagürü: ‘Cuma, Pa Yerucharẽü̃x, rü tama ãneãcüma cugü ícucuxuchi nax cungeãẽxü̃ca̱x namaxã i curü yatügü rü curü tupananetachicüna̱xãgü ga ichixexü̃. Rü cunadai ga cuxacügü ga ãmarexü̃ icumugüxü̃.