Echequié 20:40 - Tupanaarü Ore

⁴⁰ Rü guxü̃ma i Iraétanüxü̃ rü yima Iraéanewa ngẽxmane ya chorü ma̱xpǘne ya máchanenewa tá choxü̃ nicua̱xüü̃gü. Rü choma ya Cori ya Tupana nixĩ i nüxü̃ chixuxü̃ i ngẽma. Rü ngéma rü taãẽãcüma tá pexü̃ chayaxu. Rü ngéma rü tá chanaxwa̱xe nax choxna penaxãgüxü̃ i perü ãmaregü. Rü tá chanaxwa̱xe nax ngéma cha̱u̱xca̱x penanaxü̃ i ngẽma nüxíraxü̃xü̃ i penetügüarü o rü guxü̃ma i ngẽma togü i ãmaregü i choxna pexãxü̃.

Echequié 20:40 Referans Kwoze

Maraquía 3:4

Rü ngẽxguma i nüma ya Cori ya Tupana rü tá namaxã nataãxẽ i ngẽma Yudátanüxü̃arü ãmaregü rü Yerucharéü̃cüã̱xarü ãmaregü yexguma noxri duü̃xü̃güarü ãmaregümaxã nataãẽgurüxü̃.

Ichaía 60:7

Rü ngẽma Quedáxanecüã̱xarü carnérugü rü pexrü tá nixĩgü. Rü ngẽma Nebaióxanearü carnérugü rü pexme̱xwa tá nangẽxmagü nax ãmare i namaxã chataãẽxü̃ cha̱u̱xca̱x piguxü̃ca̱x i chorü ãmarearü guruü̃wa. Rü choma rü tá yexera chanamexẽxẽ ya chopata ya taxü̃ne.

Nüxíraxü̃xü̃ ga popera ga Pedru ümatüxü̃ 2:5

Rü ngẽxgumarüxü̃ ta i pemax, rü Tupana pexü̃ nade nax napataarü nutagü ya maxẽcü pixĩgüxü̃. Rü pema nixĩ i Tupanaarü ngü̃xẽẽruü̃gü i üünexü̃ ya Ngechuchu ya Cristuégagu Tupanana ãmare pexãgüxü̃. Rü ngẽma ãmare i nüxna pexãgüxü̃ i namaxã nataãẽxü̃ rü ngẽma nixĩ i perü maxü̃.

Popera ga Yudíugü ga yaxõgüxü̃ca̱x ümatüxü̃ 13:15

Rü ngẽmaca̱x tanaxwa̱xe ya Ngechuchu ya Cristuégagu guxü̃guma Tupanaxü̃ ticua̱xüü̃gü. Rü ngẽma nax nüxü̃ icua̱xüü̃güxü̃, rü ngẽma nixĩ i ãmare i mexü̃ i nüxna ixãxü̃. ¡Rü ngĩxã taa̱xmaxã nüxü̃ ticua̱xüü̃gü!

Echequié 43:27

Rü 7 i ngunexü̃ tá nixĩ i ngẽmaãcü naxügüãxü̃ nax naxüünexü̃ca̱x i ngẽma ãmarearü guruxü̃. Rü ngẽxguma norü 8 i ngunexü̃wa nanguxgu rü ngẽma chacherdótegü tá inanaxügüe nax ngẽma ãmarearü guruü̃wa cha̱u̱xca̱x ínagugüãxü̃ i duü̃xü̃güarü ãmaregü rü ngẽma norü ãmaregü i choxü̃ namaxã nangüxmüxẽẽgüxü̃. Rü ngẽxguma i choma rü tá taãẽãcü pexü̃ chayaxu. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü.

Echequié 17:23

Rü yimá Iraéanewa ngẽxmane ya ma̱xpǘne ya rümáchanemaenewa tá narüxü rü tá namuchacüxü, rü tá namuarü oõ̱x, rü wüxi ya ocayiwa ya baxcane tá nixĩ. Rü naguxü̃raü̃xü̃ i naeü̃gü rü tá natüxü̃wa namaxẽ, rü ñu̱xũchi naguxü̃raü̃xü̃ i werigü tá natanütüxü̃gu nixüachiaxü̃.

Ichaía 66:23

Rü wüxichigü ya tauemacüarü ügügu rü ñu̱xũchi wüxichigü i yüxüarü chabadugu rü guxü̃ma i duü̃xü̃gü rü tá nua naxĩ nax choxü̃ yacua̱xüü̃güxü̃ca̱x. Rü choma ya Cori ya Tupana nixĩ i ngẽma ñachaxü̃ —ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 21:10

Rü yexguma Tupanaãxẽ ya Üünecü choxü̃ ngo̱xetüxẽẽgu, rü yema orearü ngeruxü̃ rü wüxi ga ma̱xpǘne ga taxü̃newa choxü̃ naga. Rü choxü̃ nüxü̃ nadauxẽxẽ ga guma ĩane ya üünene ga Yerucharéü̃ ga daxũguxü̃ ga naanewa Tupanaxü̃tawa írüxĩxü̃ne.

Yema Cuáü̃ nüxü̃ dauxü̃ i yixcüra tá ngupetüxü̃chiga 12:1

Rü ñu̱xũchi daxũwa nango̱x ga wüxi ga cua̱xruxü̃ ga taxü̃. Rü iyexma ga wüxi ga nge ga üa̱xcümaxã ãxchirucü. Rü tauemacüétügu ichi. Rü 12 ga woramacurigü nixĩ ga ngĩrü nga̱xcueruxü̃ ga ngĩeruwa yexmaxü̃.

Maraquía 1:11

Rü guxü̃ma i nachixü̃anegü i ñoma i naanecüã̱x rü duü̃xü̃gü choxü̃ nicua̱xüü̃gü, rü pumarate̱xe cha̱u̱xca̱x nigugü rü ãmare choxna naxãgü.

Abdía 1:16

Rü ñanagürü ta: —Pema, Pa Iraétanüxü̃x, rü chorü ma̱xpǘne ga chopata nawa yexmanewa rü poraãcü ngúxü̃ pingegü. Rü ngẽxgumarüxü̃ tá ta i ngẽma to i nachixü̃anegü rü ngúxü̃ ningegü rü ngẽmaãcü tá inayarüxogü. Rü ñoma taguma ñoma i naanewa nax nangóexü̃rüxü̃ tá nixĩgü.

Yeremía 31:12

Rü nümagü rü tá Yerucharéü̃wa nangugü, rü Chióü̃arü ma̱xpǘnewa tá taãẽãcü nayawiyaegü. Rü mexü̃wa tá nangẽxmagü, erü Cori ya Tupana rü tá nüxna nanaxã i guxü̃ma i mexü̃gü i trigu rü bínu, rü chíxü̃, rü carnérugü rü wocagü. Rü tá mea nachibüe rü naporae. Rü ñoma wüxi i putüranecü i mea maixnecüxü̃rüxü̃ tá nixĩgü. Rü wüxi i nachixü̃ane i poraxü̃ tá nixĩ, rü taxũtáma wena ngúxü̃ ningegü.

Ichaía 66:20

Rü nua chorü ma̱xpǘne ya üünene ya Yerucharéü̃wa ngẽxmanewa tá nanagagü i ngẽma petanüxü̃ i guxü̃ i nachixü̃anegüwa ne nagagüxü̃. Rü nümaxü̃ rü tá cowaruétügu rü togü i carugu, rü togü i caruü̃gu rü togü i mulaétügu rü togü i caméyuétügu tá nua nanagagü, ñoma Iraétanüxü̃ naxpáü̃ i mexü̃gu norü ãmaregü chopata ya taxü̃newa ngẽgüxü̃rüxü̃ —ñanagürü.

Wiyaegü 2:6

—Choma rü marü nüxü̃ chaxuneta ya yimá ãẽ̱xgacü ya choma chanaxwa̱xecü nax yima ma̱xpǘne ya üünene ya Chióü̃wa ãẽ̱xgacü yixĩxü̃ca̱x —ñanagürü.

Romanos 8:23

Rü tama ñaa naanexicatama nixĩ i ngúxü̃ ingexü̃ i ñu̱xma, natürü yixema i tüxü̃́ ngẽxmaxü̃ i Tupanaãxẽ ya Üünexü̃ rü ta ngúxü̃ tingegü. Rü ñu̱xma nax tüxü̃́ nangẽxmaxü̃ i Naãxẽ ya Üünexü̃ ya Tupana tüxna muxü̃, rü ngẽma nixĩ i norü ügü i ngẽma mexü̃gü ya Tupana tüxna ãxchaü̃xü̃ i daxũguxü̃ i naanewa. Rü ñu̱xma rü ítanangu̱xẽxẽ nax Tupana tüxü̃ dexü̃ rü ngexwaca̱xü̃xü̃ i taxü̃negü tüxna naxãxü̃.

2 Chamué 24:23

Rü guxü̃ma i ngẽma rü cuxna chanana, Pa Ãẽ̱xgacüx —ñanagürü. Rü nüma ga Aráuna rü ñanagürü ta: —Chierüx, Pa Ãẽ̱xgacüx, i ngẽma ãmaremaxã nataãẽgu ya Cori ya Tupana —ñanagürü.

Echequié 17:22

Rü choma ya Cori ya Tupana rü ñachagürü: “Choma rü tá chayabüe i ngẽma rümáchanemaexü̃ i ocayiwaarü doxchacaxü̃, rü ñu̱xũchi chomatátama wüxi ya ma̱xpǘne ya rümáchanenegu tá chayato.

Echequié 28:14

Rü choma rü wüxi ga chorü orearü ngeruxü̃ ga dauxü̃cüã̱xme̱xẽwa cuxü̃ chayexmaxẽxẽ nax cuxna nadauxü̃ca̱x. Rü wüxi ga ma̱xpǘne ga choma chaxüünexẽẽnewa cuyexma. Rü nutagü i naicüarü ngãxü̃tanügu cuyarüxũũxü̃.

Echequié 43:12

Rü ñaa nixĩ i ngẽma norü mugü ya chopata: Rü guxü̃ma i ngẽma naane i chopatagu íyadaeguxü̃ i ma̱xpǘnechitaeruwa ngẽxmaxü̃ rü wüxi i nachica i üünexü̃ tá nixĩ —ñanagürü.

Chofonía 3:11

Rü ngẽma ngunexü̃gu, Pa Chorü Duü̃xü̃güx, rü taxũtáma naxca̱x pexãnee ga yema chixexü̃ ga noxri chope̱xewa pexügüxü̃ ga yexguma tama chauga pexĩnüegu. Erü choma rü tá Yerucharéü̃na chayaxĩgachitanüxẽxẽ i ngẽma nügü icua̱xüü̃güxü̃ rü nügü írütagüxü̃. Rü ngẽmaãcü tagutáma yima chorü ma̱xpǘne ya üünenewa nangẽxmagü i ngẽma ãẽ̱xgacügü i nügü írütagüxü̃.