Echequié 14:8 - Tupanaarü Ore

⁸ Rü choma rü tá namaxã chanu i ngẽma yatü, rü wüxi i poxcu i duü̃xü̃güarü cua̱xruxü̃ tá nüxna chaxã nax ngẽmachiga yadexagüxü̃ca̱x i guxü̃ma i duü̃xü̃gü. Rü ñu̱xũchi ngẽma chorü duü̃xü̃gütanüwa tá ichayanaxoxẽxẽ. Rü ngẽxguma tá nixĩ i nüxü̃ picua̱xãchitanüxü̃ i pemax nax choma chixĩxü̃ ya Cori ya Tupana.

Echequié 14:8 Referans Kwoze

Echequié 15:7

Choma rü tá chaugü chixu nax Yerucharéü̃arü uanü chixĩxü̃. Rü norü duü̃xü̃gü rü wüxi ya üxücha̱xwa tá nibuxmü, natürü nai ya üxü tá ínanagu. Rü ngẽxguma chaugü chixuxgu nax perü uanü chixĩxü̃, rü ngẽxguma tá nixĩ i nüxü̃ picua̱xãchitanüxü̃ nax choma chixĩxü̃ i Cori ya Tupana.

Echequié 5:15

Rü ngẽxguma chorü numaxã perü chixexü̃gagu taxü̃ i poxcumaxã pexü̃ chapoxcuegu, rü guxü̃ma i ngẽma togü i duü̃xü̃gü rü tá pemaxã naguxchigagü rü pexü̃ nacugüe. Rü guxü̃ma i ngẽma togü i nachixü̃anegü i pexna ngaicamaxü̃arü dauxcüraxü̃ruxü̃ tá pixĩgü. Rü choma ya Cori ya Tupana nixĩ i nüxü̃ chixuxü̃ i ngẽma.

Yeremía 44:11

Rü ngẽmaca̱x i choma ya Cori ya Guxãétüwa Ngẽxmaxe ya perü Tupana i pema i Iraétanüxü̃, rü ñachagürü pexü̃: ‘Marü pemaxã chanaxuegu rü marü íchame nax pexca̱x íchananguxẽxẽxü̃ i poxcu, nax ngẽmaãcü pexü̃ ichayarüxoxẽxẽxü̃ca̱x ya guxãma i pema ya íyaxügüxe ya Yudátanüxü̃.

Echequié 6:7

Rü ngẽxguma nüxü̃ pedaugügu nax petanüwa nayuexü̃ i ngẽma muxü̃ma i duü̃xü̃gü, rü ngẽxguma tá nixĩ i nüxü̃ picua̱xãchitanüxü̃ nax aixcüma choma chixĩxü̃ ya perü Cori ya Tupana.

Ichaía 65:15

Rü ngẽma chorü duü̃xü̃gü rü peégamaxã tá nixĩ i togü i duü̃xü̃gümaxã chixexü̃ naxuegugüxü̃. Rü choma ya Cori ya Tupana ya Guxü̃étüwa Ngẽxmaxe rü tá pexü̃ chadai. Natürü ngẽma chorü duü̃xü̃güna tá chanaxã i wüxi i naéga i ngexwaca̱xü̃xü̃.

Wenaxarü naxümatü ga Tupanaarü mugü 28:37

Rü guxü̃nema ya yima ĩanegü ya Cori ya Tupana pexü̃ mugünewa, rü pema rü wüxi i baixãchixẽẽruxü̃ rü cugüruxü̃ tá pixĩgü.

Lebítanüxü̃arü puracüchiga 17:10

Choma rü tá naxchi chaxai i guxü̃ma i ngẽma Iraétanüxü̃ rüe̱xna ngẽma to i nachixü̃anecüã̱x i petanügu ãpataxü̃ i nagü ngṍxü̃. Rü ngẽma duü̃xü̃gü i nagü nangõ̱xgüxü̃ rü choma rü wüxicana tá íchanawoxü̃ i Iraétanüxü̃tanüwa.

1 Corintios 10:11

Rü guxü̃ma ga yema nũxcümaü̃güxü̃ ga tórü o̱xigüxü̃ ngupetüxü̃, rü tórü cua̱xruxü̃ nixĩ. Rü naxümatü nax ngẽmawa nüxü̃ icuáxü̃ca̱x nax ñuxãcü Tupana naxwa̱xexü̃ nax imaxẽxü̃ i yixema i ñomaü̃cüü.

Romanos 11:22

Dücax, aixcüma namecüma ya Tupana. Natürü tama tüxü̃ naxüpetümare ya yíxema tama naga ĩnüxe. Rü nanapoxcue ga yema chixexü̃gu yixü̃, natürü pemaxã namecüma i pema ega naga pexĩnüegu rü aixcüma nüxü̃́ peyaxõgügu. Natürü ngẽxguma tama peyaxõgüechagu rü tama nüma naxwa̱xexü̃ãcüma pemaxẽgu, rü nüma rü pexü̃ rü tá ta naxo.

Echequié 13:23

Rü ngẽmaca̱x i pema rü taxũtáma wena doraxü̃ pedaugü rü doraxü̃ pixugü. Choma rü tá pexme̱xwa íchananguxü̃xẽxẽ i ngẽma chorü duü̃xü̃gü. Rü ngẽxguma i pema rü tá nüxü̃ picua̱xãchitanü nax choma chixĩxü̃ ya Cori ya Tupana’ ” —ñanagürü.

Yeremía 29:22

Rü ngẽmaca̱x i pema, Pa Yudáanecüã̱x i Babiróniaanewa Ngẽxmagüxex, rü ngẽxguma texémaxã chixexü̃ pexueguchaxü̃gu rü ñaperügügü tá: ‘¡Cori ya Tupana cumaxã naxü̱x ga yema Chedequíamaxã rü Acáxmaxã naxüxü̃ ga Babiróniaanearü ãẽ̱xgacü ga yexguma maxẽxãcü̃ üxüwa ínaguãgu!’ ñaperügügü tá.

Yeremía 24:9

Rü poraãcü tá chanapoxcue i ngẽma duü̃xü̃gü rü ngẽmaca̱x i ngẽma togü i nachixü̃anecüã̱xgü rü ngẽxguma ngẽmaxü̃ nadaugügu rü tá poraãcü namaxã naba̱i̱xãchie. Rü ngẽma nachixü̃anegü i nagu chanawoonexü̃wa rü duü̃xü̃gü rü tá nagu nidauxcüraxü̃gü rü nüxü̃ nacugüe rü nüxü̃ naxoe rü chixexü̃ namaxã nixugüe.

Yeremía 21:10

Erü choma rü daa ĩanemaxã chanaxuegu nax guxchaxü̃ naxca̱x íchanguxẽẽxü̃ rü taxuxü̃ma i mexü̃. Rü Babiróniaanearü ãẽ̱xgacüme̱xẽgu tá chananguxẽxẽ ya daa ĩane, rü nüma rü tá nayagu. Rü choma ya Cori ya Tupana nixĩ i nüxü̃ chixuxü̃ i ngẽma”, ñanagürü.

Wiyaegü 37:22

Rü yíxema Cori ya Tupana tüxü̃ rüngü̃xẽẽgüxe rü tümaarü tá nixĩ i naane. Natürü i ngẽma tama naga ĩnüexü̃ rü Tupana tá chixexü̃wa nanawogü rü tá inayarüxogü.

Wiyaegü 34:16

Natürü nüxü̃ naxo i ngẽma chixexü̃ ügüxü̃ rü inayanaxoxẽxẽ i ñoma i naanewa nax taxúema nüxna cua̱xãchixü̃ca̱x.

Iraétanüxü̃arü muxchiga 26:10

Rü yemaca̱x ga waixü̃müane rü ninge̱x, rü yemagu nayicu ga yema taxre wüxigu Corémaxã. Rü yema íyaxügüxü̃ ga 250 ga Corémücügü rü üxüemagu nixae. Rü yema ngupetüxü̃ rü wüxi ga cua̱xruxü̃ nixĩ naxca̱x ga yema togü ga Iraétanüxü̃.

Iraétanüxü̃arü muxchiga 19:20

Rü yíxema duü̃xẽ ya ãũãchíxe ya tama tügü mexẽẽchaü̃xẽ, rü tanaxwa̱xe nax wüxicana itarüxoxü̃ i petanüwa erü chopataxü̃ taxãũãchixẽxẽ. Rü taxãũãchiecha, erü tama ngẽma dexá i mexẽẽruü̃maxã tamaxcuxü̃ne.

Lebítanüxü̃arü puracüchiga 26:17

Rü choma rü tá pemaxã charüxuanü, rü perü uanügü rü tá pexü̃ narüporamae, rü tá pemaxã inacua̱x i ngẽma pexchi aiexü̃. Rü pema rü tá naxcha̱xwa pibuxmü woo taxuxü̃ma pewe ngẽgügu.

Lebítanüxü̃arü puracüchiga 22:3

Rü Aróü̃maxã nüxü̃ ixu rü ngẽxguma ngexü̃rüüxü̃mare i nataagü rü ãũãchiãcü chope̱xewa nangegüãgu i ãmare i üünexü̃ i Iraétanüxü̃ choxna ãgüxü̃, rü choma rü tá íchanata̱xüchi i chope̱xewa. Erü choma rü Cori ya Tupana chixĩ.

Iraétanüxü̃arü muxchiga 16:38

Rü ngẽma norü pumarate̱xearü guruü̃gü i ngẽma yatügü i norü pecadugagu yuexü̃, rü nixüüne erü marü cha̱u̱xca̱x pumarate̱xe nawa nigugü. ¡Rü ngẽma norü pumarate̱xearü guruü̃gü rü peyapomügü nax naxãtachinüxü̃ca̱x! ¡Rü ngẽma natachinümaxã penatüxüne i ngẽma ãmarearü guruxü̃ nax ngẽma rü wüxi i cua̱xãchiruxü̃ yixĩxü̃ca̱x naxca̱x i Iraétanüxü̃! —ñanagürü.

Wenaxarü naxümatü ga Tupanaarü mugü 28:46

Rü ngẽma guxchaxü̃gü i tá cuxca̱x íngugüxü̃ rü guxü̃gutáma cuxca̱x rü cutaagüca̱x rü taxü̃ i cua̱xruxü̃ tá nixĩ.

Wenaxarü naxümatü ga Tupanaarü mugü 29:19

Rü nawena nax marü nüxü̃ pexĩnüexü̃ i ñaa unetaarü dexa, rü ngẽxguma chi ngexerüxe i petanüwa rü nüxü̃ ixuxgu nax taxuxü̃ma i chixexü̃ naxüxü̃ rü ñaxü̃gu naxĩnügu: “Rü guxü̃ma i ta̱xacü i chaxüxü̃wa rü mea tá choxü̃́ ínanguxuchi woo ngẽma choma chanaxwa̱xexü̃ chaxümaregu”, ñaxü̃gu naxĩnügu, rü nagagu tá nixĩ i Cori ya Tupana poxcu naxca̱x ínguxẽẽxü̃ i guxü̃ma i Iraétanüxü̃.

Wiyaegü 34:17

Rü yíxema ixaixcümagüxe rü Cori ya Tupanaarü ngü̃xẽẽca̱x ítacagü, rü nüma rü nüxü̃ naxĩnü i tümaarü yumüxẽ rü guxü̃ma i tümaarü oegaãẽgüwa tüxü̃ ínanguxü̃xẽxẽ.