Echequié 14:19 - Tupanaarü Ore

^19-20 Rü ngẽxguma chi da̱xaweanegü ngẽma nachixü̃anewa chamuxgu, rü ñu̱xũchi chorü numaxã yu ngéma changuxẽẽgu rü nayuegu i duü̃xü̃gü rü naeü̃gü, rü ngẽxguma chi ngéma namaxẽgu i Noé, rü Danié, rü Yox, rü nüxica chitama nixĩ i namaxẽxü̃, erü nayaxõgü. Natürü nümagü rü taxũchima nanegüxü̃ rü naxacügüxü̃ namaxẽxẽxẽ. Rü choma ya Cori ya Tupana nixĩ i chauégagu cumaxã nüxü̃ chixuxü̃ i ngẽma.

Echequié 14:19 Referans Kwoze

Echequié 7:8

Rü ñu̱xmatatama pegu chananguxẽxẽ i ngẽma chorü nu rü ngẽxgumaxica tá nixĩ i charüngüxmüxü̃. Rü pexna tá naxca̱x chaca i ngẽma pecüma i chixexü̃. Rü ñu̱xũchi tá pexü̃ chapoxcue naxca̱x i guxü̃ma i ngẽma chixexü̃gü i nagu pemaxẽxü̃.

Echequié 5:12

Rü wüxi i norü tomaepü̱xtücumü i curü duü̃xü̃gü rü da̱xaweanemaxã rü taiyamaxã tá cugu nayue, Pa Yerucharéü̃x. Rü ngẽma to i tomaepü̱xtücumü rü cucüwagu tá norü uanügü nanadai. Rü ngẽma to i tomaepü̱xtücumü i íyaxügüxü̃ rü guxü̃ i naanegu tá chanawoone. Rü choma rü tá ngẽma duü̃xü̃güweama chixũchigü namaxã i wüxi i tara i cho̱xme̱xgu tá chingexü̃.

Yeremía 14:12

Rü woo tá muẽ̱xpü̱xcüna cuxaureãcüma cuyumüxẽgu, rü taxũtáma nüxü̃ chaxĩnü i ngẽma curü yumüxẽwa choxna naxca̱x cucaxü̃. Rü woo tá ãmaregü i naxü̃nagü rü trigute̱xe cha̱u̱xca̱x ícuguxgu rü taxũtáma namaxã chataãxẽ. Rü daimaxã, rü taiyamaxã, rü da̱xaweanemaxã tá chanadai —ñanagürü choxü̃.

2 Chamué 24:15

Rü yexguma ga Cori ya Tupana rü yematama pa̱xmama Iraégütanüwa nanamu ga poraxü̃ ga da̱xaweane rü ñu̱xmata yangu ga yema tomaepü̱x ga ngunexü̃ ga nagu naxunetaxü̃. Rü Dáü̃anewa inaxügü ñu̱xmata Bechébagu yacuá nax nayuexü̃ ga 70,000 ga duü̃xü̃gü.

Ore i mexü̃ ga Matéu ümatüxü̃ 24:7

Erü wüxi i nachixü̃ane rü to i nachixü̃anemaxã tá nügü nadai. Rü wüxi i ãẽ̱xgacü rü to i ãẽ̱xgacümaxã tá nanu, rü norü churaragü rü ngẽma to i ãẽ̱xgacüarü churaragümaxã tá nügü nadai. Rü tá taiya nangu̱x, rü tá nataxüchi i da̱xaweanegü, rü muxü̃ma i nachicagüwa rü tá naxĩã̱xãchiane.

Amúx 4:10

—Rü pexca̱x íchanangugüxẽxẽ ga naweane yema Equítuaneca̱x íchanguxẽẽgurüxü̃. Rü chanayexrü ga perü ngextü̱xücügü nax perü uanügü daigu nada̱i̱xü̃ca̱x. Rü chanayexrü nax perü uanügü yagagüxü̃ca̱x ga perü cowarugü. Rü yema pegü ípeda̱i̱xü̃wa pexü̃ chanapaxẽxẽ ga yema yuexü̃arü yixixü̃. Natürü ga pema rü tama cha̱u̱xca̱x pewoegu. Rü choma i Cori ya Tupana nixĩ i nüxü̃ chixuxü̃ i ngẽma.

Echequié 36:18

Rü nümagü rü yema nachixü̃anewa namáetagü rü tupananetagüxü̃ nicua̱xüü̃gü. Rü yemaca̱x nixĩ ga chorü numaxã poxcu naxca̱x íchanguxẽẽxü̃.

Yeremía 24:10

Rü ngẽma Yerucharéü̃wa yaxügüxü̃ rü tá naxca̱x íchanguxẽxẽxü̃ i guxchaxü̃gü. Rü ngẽxma tá nixĩ nax nadaiaxü̃, rü taiya naxca̱x íngugüxü̃ ñu̱xmatáta taxuxü̃táma íyaxü nawa i ñaa naane ga nüxna chaxãxü̃, rü norü o̱xigüna chaxãxü̃” —ñanagürü ga Cori ya Tupana.

Yeremía 21:9

Rü yíxema daa ĩanewatama tügü inuxü̃güxe rü aixcüma daigu rüe̱xna taiyamaxã rüe̱xna da̱xaweanemaxã tá tayue. Natürü yíxema tügü ixãgüxe rü nawe rüxĩxe i ngẽma Cadéutanüxü̃ i ñu̱xma daa ĩaneca̱x íyaxüãchixü̃ rü taxũtáma tayue. Rü ngẽmaãcü tá yuwa tügü ítanguxü̃xẽxẽ.

Yeremía 21:6

Rü tá chanadai i guxü̃ma i duü̃xü̃gü i daa ĩanecüã̱x. Rü wüxi i da̱xaweane i poraxü̃maxã tá nayue i duü̃xü̃gü rü naxü̃nagü.

Ichaía 37:36

Rü yematama chütaxü̃gu rü wüxi ga daxũcüã̱x ga Tupanaarü orearü ngeruxü̃ rü nanadai ga 185,000 ga churaragü ga Achíriaanecüã̱x. Rü yexguma yangunegu rü guxü̃ma nayue.

Wiyaegü 91:6

Rü marü taxuca̱xma naxca̱x cumuü̃ i ngẽma da̱xaweane i chütacü ínguxü̃ rü woo ngẽma ãũcümaxü̃ i ngunecü ínguxü̃.

Wiyaegü 91:3

Rü Tupanaxicatama nixĩ ya cuxü̃ ípoxü̃cü nüxna i ngẽma ãũcümaxü̃ i cuechita duü̃xü̃gü cuxca̱x ixügüxü̃, rü nüxna i ngẽma da̱xaweanegü i yuwa tüxü̃ gaxü̃.

Norü taxre ga to ga popera ga ãẽ̱xgacügüchiga ümatüxü̃ 20:9

“Rü ngẽxguma tá to̱xca̱x ínanguxgu i guxchaxü̃gü i namaxã tá toxü̃ cupoxcuxü̃ rü woo dai rü woo da̱xaweane rü woo taiya, rü ngẽxguma daa cupata ya taxü̃ne ya nawa cungexmanepe̱xewa tayumüxẽgügu rü ngü̃xẽẽca̱x ítacaxgu, rü cuma rü tá toxü̃ cuxĩnü rü tá toxü̃ ícupoxü̃”, ñatagürügü.

Norü taxre ga to ga popera ga ãẽ̱xgacügüchiga ümatüxü̃ 7:13

Rü ngẽxguma perü chixexü̃gagu íchananguxẽxẽgu nax yapagüanexü̃ rü íchayachaxãchixẽxẽgu nax napuxü̃, rü ngẽxguma munügü íchangugüxẽxẽgu nax penetügü nangṍxü̃ca̱x rüe̱xna pexca̱x da̱xaweane íchanguxẽxẽgu, natürü ngẽxguma chope̱xegu pegü íperüxíragügu i pemax nax chorü duü̃xü̃gü pixĩgüxü̃, rü ngẽxguma peyumüxẽgügu rü cha̱u̱xca̱x pewoeguxgu, rü nüxü̃ perüxoegu i ngẽma chixexü̃ i pecümagü, rü choma rü tá pexü̃ chaxĩnü i yea daxũguxü̃ i naanewa íchangexmaxü̃wa. Rü tá pexü̃́ nüxü̃ icharüngüma i perü chixexü̃gü rü tá ichayanaxoxẽxẽ i ngẽma guxchaxü̃ i perü naanewa ngẽxmaxü̃.

Norü taxre ga to ga popera ga ãẽ̱xgacügüchiga ümatüxü̃ 6:28

Rü ngẽxguma ñaa nachixü̃anewa nangemagu i taiya, rüe̱xna ínanguxgu i nanetüarü da̱xaweane, rüe̱xna naianexü̃maxã nayuegu i nanetügü, rüe̱xna ínangugügu i munügü, rüe̱xna õxmigü, rüe̱xna naweanegü, rüe̱xna torü uanügü nüxü̃ íchomaeguãchigu i torü ĩanegü, rüe̱xna ta̱xacürü to i guxchaxü̃ rüe̱xna da̱xaweanegü toxca̱x ínguxgu, natürü ngẽxguma wüxi i curü duü̃xü̃ rüe̱xna guxü̃ma i curü duü̃xü̃gü i Iraétanüxü̃ nüxü̃ icua̱xãchigügu nax norü chixexü̃gagu ngúxü̃ yangegüxü̃ rü daa cupata ya taxü̃newa naxunagüãcüma yayumüxẽgügu, ¡rü daxũguxü̃ i naanewa nüxü̃ naxĩnü rü nüxü̃́ nüxü̃ irüngüma i norü chixexü̃gü! ¡Rü nüxü̃́ naxütanü i wüxichigü i duü̃xü̃ ngẽxgumarüxü̃ nax ñuxãcü cupe̱xewa namaxü̃xü̃! Erü cuxicatama nixĩ i nüxü̃ cucuáxü̃ i wüxichigüarü maxü̃.

Nüxíraxü̃xü̃ ga popera ga ãẽ̱xgacügüchiga 8:37

Rü ngẽxguma ñaa nachixü̃anewa nangemagu i taiya, rüe̱xna ínanguxgu i nanetüarü da̱xaweane, rüe̱xna naianexü̃maxã nayuegu i nanetügü, rüe̱xna ínangugügu i munügü, rüe̱xna õxmigü, rüe̱xna naweanegü, rü ngẽxguma torü uanügü nüxü̃ íchomaeguãchigu i torü ĩanegü nax toxü̃ nada̱i̱xü̃ca̱x, rüe̱xna ta̱xacürü to i guxchaxü̃, rüe̱xna da̱xaweanegü toxca̱x ínguxgu, natürü ega curü duü̃xü̃gü i Iraétanüxü̃ nüxü̃ naxoegu i norü chixexü̃gü rü daa cupata ya taxü̃newa yayumüxẽgügu, ¡rü daxũguxü̃ i naanewa nüxü̃́ nüxü̃ naxĩnü rü nüxü̃́ nüxü̃ irüngüma i norü chixexü̃gü! ¡Rü nüxü̃́ naxütanü i wüxichigü i duü̃xü̃ ngẽxgumarüxü̃ nax ñuxãcü cupe̱xewa namaxü̃xü̃! Erü cuxicatama nixĩ i nüxü̃ cucuáxü̃ i wüxichigüarü maxü̃.

2 Chamué 24:13

Rü nüma ga Gáx rü Dabíxü̃tawa naxũ rü nüxna naca rü ñanagürü nüxü̃: —¿Ta̱xacü i cunaxwa̱xexü̃ nax naxüaxü̃ ya Tupana? ¿Cunaxwa̱xe nax 7 ya taunecü taiya ngúxü̃ i ñaa nachixü̃anewa, rüe̱xna cunaxwa̱xe nax 3 ya tauemacü curü uanügücha̱xwa nu ne cunañaxü̃, rüe̱xna cunaxwa̱xe i 3 i ngunexü̃ poraxü̃ i da̱xaweane naxca̱x ínguxü̃ i ñaa nachixü̃anewa? ¡Nagu rüxĩnü rü ñu̱xũchi nüxü̃ ixu i ñu̱xma i ngẽma tá namaxã chanangãxü̃xü̃ i ngẽma nua choxü̃ muxü̃! —ñanagürü.

Iraétanüxü̃arü muxchiga 14:12

Rü naxca̱x tá núma chanamu i wüxi i da̱xaweane i nawa nayuexü̃ nax ngẽmaãcü tama nawa nangugüxü̃ca̱x i ngẽma naane. Natürü cuwa tá nixĩ ichanango̱xẽxẽxü̃ i to i duü̃xü̃gü i ñaa duü̃xü̃güxü̃ rümumaexü̃ rü rüporamaegüxü̃ —ñanagürü.

Ichaía 34:3

Rü ngẽma yuexü̃ rü ngéma tá nawogümare. Rü ngẽma naxü̃negü rü tá nanayixanexẽẽgü. Rü nagü rü ma̱xpǘnegüwa tá narüyáü̃gü.

Echequié 14:21

Rü choma i Cori ya Tupana rü nüxü̃ chixu rü wüxi i taxü̃ i guxchaxü̃ tá nixĩ i ngẽxguma Yerucharéü̃ca̱x íchanguxẽẽgu i ngẽma ãgümücü i poxcu i ãũcümaxü̃chixü̃; i dai, rü taiya, rü naeü̃gü i idüraexü̃, rü ñu̱xũchi da̱xaweanegü. Rü ngẽmamaxã tá nixĩ i chanadaixü̃ i duü̃xü̃gü rü naeü̃gü.

Echequié 21:31

Rü ngẽma chorü nu rü tá cugu chananguxẽxẽ ñoma wüxi i üxüema i ãũcümaxü̃rüxü̃. Rü ngẽma duü̃xü̃gü i taxúema ngechaü̃güxü̃ rü máxwa̱xegüxü̃me̱xẽgu tá cuxü̃ changuxẽxẽ.