Echequié 11:17 - Tupanaarü Ore

¹⁷ ¡Rü ngẽxgumarüxü̃ ta namaxã nüxü̃ ixu i ñaa to i chorü ore i ñaxü̃: —Ngẽma nachixü̃anegü ga nagu nawoonexü̃wa rü tá chananutaque̱xe rü wena tá nüxna chanaxã i ngẽma Iraéane nax noxrü yixĩxü̃ca̱x!

Echequié 11:17 Referans Kwoze

Echequié 28:25

Rü ngẽmaca̱x i choma ya Cori ya Tupana rü ñacharügü: “Ngẽma Iraétanüxü̃ i togü i nachixü̃anegu woonexü̃ rü choma rü tá wüxiwa chanagagü. Rü ngẽma nachixü̃anegüpe̱xewa tá ichanawe̱x i chorü pora. Rü ngẽma Iraétanüxü̃ rü wena táxarü naxca̱x nawoegu ga yema naane ga chorü duü̃ ga Acóbuna chaxãxü̃. Rü ngẽmaãcü noxrütama naanewa tá nangẽxmagü.

Echequié 34:13

Rü ngẽma togü i nachixü̃anegü i nagu nawoonexü̃wa rü tá íchanagaxü̃, rü wüxigu tá chanangutaque̱xexẽxẽ. Rü norü naanewa tátama chanagagü. Rü ngẽma Iraéanearü ma̱xpǘnegüwa tá chanamugü nax ngéma nachibüexü̃ca̱x rü natügüwa naxaxegüxü̃ca̱x. Rü ngẽmaãcü i ngẽma duü̃xü̃gü i yaxǘgüxü̃ i ngẽma naanewa íngẽxmagüxü̃wa tá nangẽxmagü i ngẽma chorü carnérugü.

Yeremía 3:18

Rü ngẽxguma tá nawa nanguxgu i ngẽma ngunexü̃, rü Yudáanecüã̱xgü rü Iraéanecüã̱xgü rü nügümaxã wüxiwa tá nangẽxmagügu. Rü wüxigu tá nüxna nawoegu i ngẽma nachixü̃ane i nórtewa ngẽxmaxü̃. Rü ngẽma naane ga nũxcümaü̃güxü̃ ga perü o̱xigüna chaxãxü̃wa tá naxĩ.

Echequié 36:24

Rü choma, Pa Iraétanüxü̃x, rü tá pexü̃ íchagaxü̃ nawa i guxü̃ma i ngẽma nachixü̃anegü i nawa pengẽxmagüxü̃. Rü wüxiwa tá pexü̃ chagagü, rü ñu̱xũchi perü naaneca̱x tá pexü̃ chawoeguxẽxẽ.

Yeremía 24:5

—Choma ya Cori ya Iraétanüxü̃arü Tupana rü ñachagürü: “Rü ngẽma igu i mexü̃rüü̃ãcü tá nüxü̃ chadau i ngẽma duü̃xü̃gü i Yudáanecüã̱xgü ga ñaa naanewa íchawoxü̃xü̃ rü Cadéugüchixü̃anewa chamugüxü̃. Rü ngẽmagü rü tá namaxã chataãxẽ rü tá nüxü̃ charüngü̃xẽxẽ.

Echequié 20:41

Rü ngẽxguma pexü̃ íchagaxü̃gu nawa i ngẽma nachixü̃anegü rü yima ĩanegü i ñu̱xma nagu pewoonene, rü tá pexü̃ chayaxu ñoma ãmare i chi̱xemaxü̃rüxü̃. Rü ngẽmaãcü guxü̃ i togü i nachixü̃anecüã̱xpe̱xewa tá ichanawe̱x i chorü üüne i petanüwa tá chango̱xẽxẽxü̃.

Yeremía 3:12

¡Rü nórtewa naxũ, rü ngéma nüxü̃ yarüxu i ñaa ore!: “Cori ya Tupana rü ñanagürü pexü̃, ‘¡Cha̱u̱xca̱x pewoegu, Pa Iraéanecüã̱xgü i Tama Ixĩnüechaü̃xü̃! Rü taxũtáma nuãcü pexü̃ chayaxu, rü taxũtáma guxü̃gu pemaxã chanuecha, erü choma rü ngechaü̃wa̱xecü chixĩ. Rü ngẽma nixĩ i chorü ore i choma ya Cori ya Tupana.

Yeremía 30:18

Rü Cori ya Tupana rü ñanagürü: —Choma rü tá nüxü̃ charüngü̃xẽẽxü̃ i guxü̃ma i Acóbutanüxü̃. Rü tá choxü̃́ nangechaxü̃tümüxü̃ i ngẽma nachixü̃ane. Rü yima norü ĩanegü i ñu̱xma nachitaxü̃xica íyaxügüne rü tá wena nachicawa tátama nimexẽẽgü. Rü yima ãẽ̱xgacüpatagü rü tá nachicagüwa tátama nimexẽẽgü.

Yeremía 24:6

Rü ngẽma naanewa rü nüxna tá chadau rü ñaa nachixü̃aneca̱x tá chanawoeguxẽxẽ. Rü nua tá nüxü̃ charüngü̃xẽxẽxü̃ rü tagutáma wena chanadai. Rü ñoma wüxi i nanetü itoxü̃rüxü̃ nua tá chanangexmagüxẽxẽ rü tagutáma wena íchanawoxü̃.

Yeremía 31:16

Natürü nüma ya Cori ya Tupana rü ñanagürü: “¡Pa Raquétanüxü̃ rü taxṹ i pexauxexü̃! ¡Rü marütama nax ípenaxũxü̃xẽẽxü̃ i pegüxü̃xetü! Erü perü ngechaü̃ rü tá naxãtanü. Rü pexacügü rü penegü rü tá nüxna nawoegu i perü uanügüarü nachixü̃ane. Rü choma ya Cori ya Tupana nixĩ i nüxü̃ chixuxü̃ i ngẽma.

Echequié 20:42

Rü ngẽxguma wena tá perü naane ga perü o̱xigümaxã chaxueguxü̃wa pexü̃ chagagügu rü pema rü tá nüxü̃ picua̱xãchie nax choma ya Cori yixĩxü̃ i Iraétanüxü̃arü Tupana.

Echequié 34:11

Rü choma ya Cori ya Tupana rü ñachagürü: —Chomatátama nüxna chadau i ngẽma chorü carnérugü.

Ichaía 60:21

Rü guxü̃ma i ngẽma Yerucharéü̃wa maxẽxü̃ rü duü̃xü̃gü i aixcüma mexü̃gu rüxĩnüexü̃ tá nixĩgü. Rü guxü̃gutáma nachixü̃anearü yora tá nixĩgü. Rü ngẽma duü̃xü̃gü rü ñoma wüxi i nanetü i chomatama ichatoxü̃rüxü̃ tá nixĩgü rü ngẽmatanüwa tá nango̱x i chorü pora.

Yeremía 24:7

Rü cua̱x tá nüxna chaxã nax ngẽmaãcü choxü̃ nacua̱xgüxü̃ca̱x nax choma chixĩxü̃ ya Cori ya Tupana. Rü nümagü rü chorü duü̃xü̃gü tá nixĩgü, rü choma rü tá norü Tupana chixĩ erü guxü̃ma i norü ngúchaü̃maxã tá cha̱u̱xca̱x nawoegu.

Yeremía 29:10

Rü choma ya Cori ya Tupana rü ñachagürü: ‘Ngẽxguma 70 ya taunecü marü inguxgu nax Babiróniaanewa pengẽxmagüxü̃ rü ngẽxguma i choma rü tá pexü̃ charüngü̃xẽxẽxü̃ rü tá chayanguxẽxẽ i ngẽma chorü uneta ga pemaxã nüxü̃ chixuxü̃ nax wena tá pexü̃ chawoeguxẽẽxü̃ naxca̱x i ngẽma naane i pexna chaxãxü̃.

Echequié 20:34

Rü choma rü tá pexü̃ chade natanüwa i ngẽma duü̃xü̃gü rü nachixü̃anegü i ñu̱xma nagu pewoonexü̃. Rü chorü poramaxã rü chorü numaxã tá pexü̃ chapoxcu rü ngẽmaãcü tá pemaxã ichacua̱x.

Chacaría 8:7

Rü choma rü tá íchananguxü̃xẽxẽ i chorü duü̃xü̃gü naxme̱xwa i ngẽma nachixü̃ane i éstewaama ngẽxmaxü̃ rü ngẽma nachixü̃ane i oéstewaama ngẽxmaxü̃.