Wenaxarü naxümatü ga Tupanaarü mugü 9:8 - Tupanaarü Ore

⁸ Rü guma ma̱xpǘne ga Oréxwa rü poraãcü Cori ya Tupanaxü̃ penuexẽxẽ, rü yemaca̱x poraãcü pemaxã nanu rü wixgutaa̱x pexü̃ nadai.

Wenaxarü naxümatü ga Tupanaarü mugü 9:8 Referans Kwoze

Ínachoxü̃xü̃chiga 32:16

Rü nümatama ga Tupana nixĩ ga naxüaxü̃ ga yema taxre ga nutatachinü rü naxümatüaxü̃ namaxã ga yema norü mugü.

Édra 9:14

¿Rü ñuxãcü chi i wena ngẽmaãcü tama naga taxĩnüexü̃ i ngẽma curü mugü rü tayaxügümáxü̃ i tonegü namaxã i ngẽma duü̃xü̃gü i chixexü̃ i nacümagu imaxẽxü̃? Rü taxucürüwa erü ngẽxguma chi tanaxüamagu i ngẽma chixexü̃ rü cuma rü tá tomaxã cunu rü tá toxü̃ cudai ñu̱xmata taxúema íyaxü.

Echequié 20:13

Natürü yexguma chianexü̃wa nayexmagügu rü chomaxã nanue rü tama chauga naxĩnüechaü̃ rü tama naga naxĩnüechaü̃ ga yema chorü mugü ga maxü̃ chi tüxna ãxü̃ ya guxãma ya naga ĩnüe. Rü woo ga chorü ngü̃chigaarü ngunexü̃gü rü tama nanaxauregü rü tama nagu choxü̃ nicua̱xüü̃gü. Rü yemaca̱x ga choma rü poraãcü namaxã chanu rü nagu charüxĩnü nax wüxicana chi yexma chianexü̃gu chanadaixü̃.

Wenaxarü naxümatü ga Tupanaarü mugü 1:6

—Cori ya tórü Tupana rü ma̱xpǘne ya Oréxwa tamaxã nüxü̃ nixu rü ñanagürü: “Pemax rü marü mucüma ya taunecü daa ma̱xpǘnewa pengẽxmagü.

Wenaxarü naxümatü ga Tupanaarü mugü 9:19

Choma rü namaxã chaba̱i̱xãchi ga yema norü nu ga Cori ya Tupana. Yerü noxtacüma pexü̃ nadaixchaü̃ nax wüxicana peyarüxoxü̃ca̱x. Natürü nüma rü wenaxarü nüxü̃ naxĩnü ga chorü yumüxẽ.