Wenaxarü naxümatü ga Tupanaarü mugü 9:5 - Tupanaarü Ore

⁵ Rü tama nixĩ i perü mexü̃gagu rü bai nax mea pemaxẽxü̃gagu tá yixĩxü̃ i peyapu̱xü̃ i ngẽma naane. Rü nüma ya Cori ya Tupana rü ngẽma duü̃xü̃güarü chixexü̃gügagu tá nixĩ i pepe̱xewa ínawoxü̃ãxü̃ nax ngẽmaãcü yanguxẽẽãxü̃ca̱x ga yema uneta ga nũxcümaü̃güxü̃ ga perü o̱xigü ga Abraáü̃, rü Ichaá, rü Acóbumaxã nüxü̃ yaxuxü̃.

Wenaxarü naxümatü ga Tupanaarü mugü 9:5 Referans Kwoze

Popera ga Títoca̱x naxümatüxü̃ ga Pauru 3:5

Rü woo tama ta̱xacürü mexü̃ nax ixügüxü̃, natürü tüxü̃ namaxẽxẽxẽ yerü nüxü̃́ tangechaü̃tümüü̃gü. Rü Naãxẽ ya Üünexü̃arü poramaxã tüxü̃ namaxẽxẽxẽ, rü tüxü̃́ nanayauxgü i tórü pecadugü, rü tüxna nanaxã i ngexwaca̱xü̃xü̃ i tórü maxü̃.

Naanearü ügüchiga 26:4

Rü tá chayamuxẽxẽ i cutaagü, rü ñoma ẽxtagü ya daxũwa mucürüxü̃ tá nixĩ nax namuxũchixü̃. Rü tá nüxna chanaxã i guxü̃táma i ñaa naane. Rü naétü tá cutaagügagu nüxü̃ charüngü̃xẽxẽxü̃ i guxü̃ma i nachixü̃anegü i ñoma i naanewa ngẽxmagüxü̃. Erü cunatü ga Abraáü̃ rü chauga naxĩnü rü nayanguxẽxẽ ga yema namaxã nüxü̃ chixuxü̃, rü chorü mugü, rü chorü ucu̱xẽgü, rü chorü ngu̱xẽẽtaegü —ñanagürü.

Naanearü ügüchiga 17:8

Choma rü cuxna rü nüxna tá chanaxã i guxü̃ma i ñaa Canaáü̃ane i ñu̱xma nawa cumaxü̃xü̃. Rü tá guxü̃gutáma norü naane nixĩ i cutaagü. Rü choma rü tá norü Tupana chixĩ —ñanagürü.

Naanearü ügüchiga 15:7

Rü Tupana rü ñanagürü nüxü̃: —Choma nixĩ i Cori ya Tupana chixĩxü̃. Rü choma nixĩ ga cuxü̃ íchamuxũchixü̃ ga Úrwa ga Cadéutanüxü̃güarü ĩanewa nax cuxna chanaxãxü̃ca̱x i ñaa naane nax guxü̃gutáma cuxrü yixĩxü̃ca̱x —ñanagürü.

Naanearü ügüchiga 13:15

Rü choma rü tá cuxna chanaxã i guxü̃ma i ngẽma naane i nüxü̃ cudauxü̃. Rü guxü̃gutáma cuxrü rü cutaagüarü tá nixĩ.

Naanearü ügüchiga 12:7

Rü yema nachicawa rü Cori ya Tupana rü Abráü̃ca̱x nango̱x. Rü ñanagürü nüxü̃: —Ñaa naane tá nixĩ i cutaagüna chaxãxü̃ —ñanagürü. Rü yexguma ga Abráü̃ rü yexma Tupanaégagu nanaxü ga wüxi ga ãmarearü guruxü̃ yerü yéma nixĩ ga naxca̱x nangóxü̃.

Echequié 20:14

Natürü chaugünatama chachogü nax tama chanachixexẽẽxü̃ca̱x i chauéga, rü tama chixri chauchiga yadexagüxü̃ca̱x ga yema togü ga nachixü̃anegü ga nüxü̃ daugüxü̃ nax ñuxãcü Equítuanewa íchanagaxü̃xü̃ ga yema Iraétanüxü̃.

Ínachoxü̃xü̃chiga 32:13

¡Rü nüxna nacua̱xãchi ga gumá curü duü̃ ga Abraáü̃, rü Ichaá, rü Iraé ga Acóbugu ãégacü! Rü gumagümaxã nixĩ ga cugüégagutama cunaxueguxü̃ nax nüxü̃ curüngü̃xẽẽxü̃ rü ñacuxü̃: “Rü tá nüxü̃ charüngü̃xẽxẽxü̃ i petaagü rü tá namuxũchi ẽxtagürüxü̃, rü guxü̃ma i ñaa naane i pemaxã chaxueguxü̃ rü tá pexrü nixĩ i guxü̃gutáma”, ñacurügü —ñanagürü ga Moiché.

Naanearü ügüchiga 28:13

Rü yexgumarüxü̃ ta nüxü̃ nadau ga Cori ya Tupana ga naxü̃tagu chicü. Rü nüma ga Tupana rü ñanagürü nüxü̃: —Choma nixĩ i curü o̱xi ya Abraáü̃arü Tupana, rü cunatü ya Ichaáarü Tupana chixĩxü̃. Rü tá cuxna chanaxã i ñaa naane i nawa cupexü̃ nax cuxrü rü cutaagüarü yixĩxü̃ca̱x.

Romanos 15:8

Rü pemaxã nüxü̃ chixu rü Cristu núma naxũ nax Yudíugüxü̃ yanangü̃xẽẽxü̃ca̱x, nax yemaacü yanguxẽẽãxü̃ca̱x ga yema unetagü ga nũxcümaü̃güxü̃ ga tórü o̱xigümaxã nüxü̃ yaxuxü̃ ga Tupana. Rü yemaacü ga Cristu rü tüxü̃ nüxü̃ nadauxẽxẽ nax aixcümacü nax yixĩxü̃ ya Tupana rü aixcüma yangu̱xẽẽãxü̃ i ngẽma norü uneta.

Romanos 11:28

Natürü i nüma i Yudíugü rü Tupanamaxã narüxuanügü erü tama nayaxõgü i ngẽma ore i mexü̃. Rü ngẽmaãcü naxüpetü nax pexü̃́ natauxchaxü̃ca̱x nax peyaxõgüxü̃ca̱x i pema i tama Yudíugü nax pixĩgüxü̃. Natürü nüma ya Tupana rü ngẽma Yudíugüxü̃ nangechaü̃ama yerü nũxcümaü̃güxü̃ ga norü o̱xigümaxã nüxü̃ nixu nax nüxü̃ tá nangü̃xẽẽxü̃.

Ngechuchuarü ngúexü̃gü ga yamugüxü̃arü puracüchiga 3:25

Rü nũxcümaxü̃chima ga Tupana rü tórü o̱xi ga Abraáü̃maxã nüxü̃ nixu rü ñanagürü: “Wüxi i cutaxa tá nixĩ i nüxü̃ rüngü̃xẽẽxü̃ i guxü̃ma i duü̃xü̃gü i ñoma i naanecüã̱x”, ñanagürü. Rü yemaacü ta Tupana inaxuneta nawa ga nũxcümaü̃güxü̃ ga norü orearü uruü̃gü. Rü pemaxã nüxü̃ chixu i ñu̱xma, rü pexca̱x nixĩ ga yema unetagü ga nũxcümaü̃güxü̃ ga orearü uruü̃güwa tórü o̱xigümaxã nüxü̃ yaxuxü̃ ga Tupana.

Miquéa 7:20

¡Pa Corix, ẽcü guxü̃guma toxü̃ rüngü̃xẽxẽ rü toxü̃ nangechaxü̃ yema torü o̱xigü ga Abraáü̃maxã rü Acóbumaxã cunaxueguxü̃rüxü̃!

Naanearü ügüchiga 19:29

Rü yemaacü nixĩ ga Cori ya Tupana ga ínaguaxü̃ ga guma ĩanegü ga Lox nagu ãpatane ga doonexü̃wa yexmagüne. Natürü nüma ga Cori ya Tupana rü Abraáü̃na nacua̱xãchi rü Loxü̃ ínagaxüchi ga yema nachica ga yaguxü̃wa.

Lebítanüxü̃arü puracüchiga 18:25

Rü guxü̃ma ga yema naane rü nüxna naxüe i ngẽma chixexü̃gü ga duü̃xü̃gü ügüxü̃. Rü ngẽmaca̱x tá chanapoxcue i ngẽma duü̃xü̃gü naxca̱x i ngẽma chixexü̃ i ngẽma naanewa naxügüxü̃. Rü nümatama i ngẽma naane rü ínanawoxü̃ i ngẽma duü̃xü̃gü i nagu ãchiü̃güxü̃.

Wenaxarü naxümatü ga Tupanaarü mugü 12:31

Rü tama name nax ngẽma duü̃xü̃gü naxüxü̃rüxü̃ penaxü i ngẽxguma Cori ya Tupanaxü̃ picua̱xüü̃gügu. Erü nüma ya Cori ya Tupana rü nüxü̃́ nawa̱xtümüxü̃ i ngẽma chixexü̃ i naxügüxü̃ i ngẽma duü̃xü̃gü i ngẽxguma norü tupananetaxü̃gü yacua̱xüü̃gügu. Rü nümagü rü norü tupananetagüca̱x tüxü̃ nigu ga naxacügü.

Wenaxarü naxümatü ga Tupanaarü mugü 18:9

Rü ngẽxguma marü nagu pechocugu i ngẽma nachixü̃ane i perü Cori ya Tupana tá pexna ãxü̃, rü tama name i naxca̱x pedauxü̃tae i ngẽma nacümagü i chixexü̃ i ngẽma duü̃xü̃gü.

Echequié 36:22

Rü ngẽmaca̱x, Pa Echequiéx, ngẽma Iraétanüxü̃maxã nüxü̃ ixu i ñaa ore: “Cori ya Tupana rü ñanagürü: ‘Choma rü tá pechixü̃aneca̱x pexü̃ chawoeguxẽxẽ, natürü tama ta̱xacürü mexü̃ nax pexüxü̃ca̱x tá nixĩ. Natürü tá pexü̃ chawoeguxẽxẽ nax ngẽmaãcü íchanapoxü̃xü̃ca̱x i chauéga i üünexü̃ i pegagu chixri nachiga yadexagüxü̃ i ngẽma togü i nachixü̃anegü i natanügu pewoonexü̃.

Echequié 36:32

Rü choma ya Cori ya Tupana nüxü̃ chixu rü ñachagürü: Pa Iraétanüxü̃x, chanaxwa̱xe nax nüxü̃ pecuáxü̃ nax tama ta̱xacürü mexü̃ nax pexüxü̃gagu nixĩ i pexü̃ charüngü̃xẽẽxü̃. Rü ngẽmaca̱x tá pexãnee rü pexoegaãẽgü yerü chixexü̃ pexügü’ ” —ñachagürü.

Naanearü ügüchiga 15:16

Rü ngẽxguma 400 ya taunecüguwena rü cutaagü rü tá ñaa naaneca̱x nawoegu. Erü ngẽma duü̃xü̃gü i Amoréutanüxü̃ i ñu̱xma ñaa naanegu ãchiü̃güxü̃ rü taxũta nangupetüxüchi i ngẽma norü chixexü̃ nax chanapoxcuexü̃ca̱x —ñanagürü ga Tupana.

Lebítanüxü̃arü puracüchiga 18:24

¡Rü taxṹ i ngexü̃rüü̃xü̃ i ngẽma nacümagümaxã pegü pechixexẽẽxü̃! Erü ngẽma nacümagümaxã nixĩ ga nügü yachixexẽẽxü̃ i ngẽma duü̃xü̃gütücumügü i pepe̱xewa tá íchawoxü̃xü̃.

Wenaxarü naxümatü ga Tupanaarü mugü 1:8

Choma rü marü pexna chanaxã i ngẽma naane. ¡Rü ngéma pexĩ rü penayaxu i ngẽma naane i choma ya Cori ya Tupana yema nũxcümaü̃güxü̃ ga perü o̱xigü ga Abraáü̃, rü Ichaá, rü Acóbu, rü ñu̱xũchi nataagümaxã chaxueguxü̃ nax nüxna chanaxãxü̃!” ñanagürü ga Tupana.

Wenaxarü naxümatü ga Tupanaarü mugü 18:12

Erü ya Tupana rü naxchi naxai i ngẽma duü̃xü̃gü i ngẽma nacümagügu maxẽxü̃. Rü ngẽmaca̱x nixĩ ya Cori ya perü Tupana i pepe̱xewa tá ínawoxü̃ãxü̃ i ngẽma nachixü̃anecüã̱xgü, erü nümagü rü ngẽma nacüma i chixexü̃gu nixĩ i namaxẽxü̃.