Wenaxarü naxümatü ga Tupanaarü mugü 9:3 - Tupanaarü Ore

³ Rü ñu̱xma i pema rü marü nüxü̃ pecua̱x nax tórü Cori ya Tupana yixĩxü̃ ga gumá pepe̱xegu ixũcü, rü nüma rü ñoma üxüema i tüxü̃ imáxü̃rüxü̃ tá pepe̱xegu nada̱i̱xü̃ rü iyanamaãchitanüxẽẽxü̃ i ngẽma duü̃xü̃gütücumügü. Pemax rü noxtacüma ngẽxgumatátama ípenawoxü̃ rü penadai, yema Cori ya Tupana pemaxã nüxü̃ ixuxü̃rüxü̃.

Wenaxarü naxümatü ga Tupanaarü mugü 9:3 Referans Kwoze

Wenaxarü naxümatü ga Tupanaarü mugü 4:24

Erü yimá Cori ya perü Tupana rü Tupana ya pexü̃ inuxü̃cü nixĩ. Rü nüma rü ñoma wüxi i üxüema i guxü̃ma iyarüxoxẽẽxü̃rüxü̃ nixĩ.

Popera ga Yudíugü ga yaxõgüxü̃ca̱x ümatüxü̃ 12:29

Erü tórü Tupana, rü wüxi ya üxü ya guxü̃ma ixaxẽẽcü nixĩ.

Romanos 8:31

¿Rü ñuxũ ñagüxü̃ tá i ñu̱xma i ngẽmachiga? Rü ngẽxguma Tupana taétüwa üxgu, ¿rü texé tá nüxü̃ tarüyexera nax chixexü̃ tamaxã taxüxü̃ca̱x?

Wenaxarü naxümatü ga Tupanaarü mugü 20:4

Erü nüma ya perü Cori ya Tupana rü pexü̃tawa nangẽxma, rü nüma tá nixĩ i nadaiaxü̃ i ngẽma perü uanügü, rü tá nüxü̃ pexü̃ narüporamaegüxẽxẽ”, ñanagürü tá.

Yochué 3:11

¡Rü dücax i ngẽma baú i Cori ya Tupana i guxü̃ i naanearü yora ixĩcüarü mugüchixü̃ nax ñuxãcü pepe̱xewa yaxüexü̃ i natü i Yudáü̃!

Miquéa 2:13

Rü chomatama ya Cori ya Tupana ya Iraétanüxü̃arü Ãẽ̱xgacü rü nape̱xegu tá chixũ, rü tá naxca̱x chayaxümachigü nax nüxü̃́ natauxchaxü̃ca̱x nax norü uanügüarü ĩanearü ĩã̱xwa ínachoxü̃xü̃ —ñanagürü ya Cori ya Tupana.

2 Tesalonicenses 1:8

Rü núma tá naxũ i nüma ya tórü Cori ya Ngechuchu nax napoxcueãxü̃ca̱x i ngẽma duü̃xü̃gü i tama Tupanaxü̃ cua̱xgüchaü̃xü̃ rü tama naga ĩnüexü̃ i ngẽma ore i mexü̃ i tórü Cori ya Ngechuchu ya Cristuchiga.

Wenaxarü naxümatü ga Tupanaarü mugü 1:30

Rü yimá tórü Cori ya Tupana rü tá pepe̱xegu nixũ. Rü nüma rü pexca̱x tá perü uanügümaxã nügü nadai, yema Equítuanewa pexca̱x naxüxü̃rüxü̃.

Yochué 3:14

Rü nüma ga yema Iraétanüxü̃ rü inaxĩãchi ga yema ínapegüxü̃wa ga natü ga Yudáü̃wa nax yachoü̃xü̃ca̱x. Rü nanetüarü buxgüarü tauemacü nixĩ ga yexguma, rü yema natü ga Yudáü̃ rü poraãcü narübai. Rü nümagü ga chacherdótegü rü duü̃xü̃güpe̱xegu naxĩ namaxã ga yema baú ga Tupanaarü mugü nawa yexmaxü̃. Rü yema chacherdótegü ga baú ingetaü̃güxü̃ rü yexguma yema natü ga Yudáü̃chíüwa nachoü̃gu, rü yema dexá ga dauxquena ne yáxü̃ rü ngürüãchi ínayachaxãchi. Rü gumá dauxquenaxü̃chi yexmane ga ĩane ga Adáü̃ ga dauxü̃taechica ga Charetáü̃arü ngaicamana, rü ngürü nabainagü ga dexá ga yéma, ñoma yapoxyepe̱xexü̃rüxü̃. Natürü yema íyachoü̃xü̃arü tawaama ga dexá rü niiya̱x ñu̱xmata Már ya Ngearü Maxü̃ã́xü̃wa nangu. Rü yemaacü ga yema natü ga Yudáü̃ rü taxregu niyauxye, rü yema Iraétanüxü̃ rü nichoü̃ ga ĩane ga Yericúarü to̱xma̱xtawa.

Efesios 5:17

Rü ñu̱xma rü tama name i duü̃xü̃gü i ngẽãẽmarexü̃ãcü pemaxẽ. Rü name nixĩ nax nüxü̃ pecuáxü̃ i ta̱xacü nixĩ i tórü Cori pexü̃́ naxwa̱xexü̃ nax penaxüxü̃.

Ore i mexü̃ ga Márcu ümatüxü̃ 7:14

Rü yexgumawena duü̃xü̃güca̱x naca ga Ngechuchu, rü ñanagürü nüxü̃: —¡Mea choxü̃́ iperüxĩnüe, rü nüxü̃ pecuá i ñaa chorü ore!

Ore i mexü̃ ga Matéu ümatüxü̃ 15:10

Rü ñu̱xũchi ga Ngechuchu rü duü̃xü̃güca̱x naca, rü ñanagürü nüxü̃: —¡Mea iperüxĩnüe i ñaa chorü ore, rü nüxü̃ pecuá nax ta̱xacüchiga yixĩxü̃!

Ichaía 33:14

Rü Chióü̃wa nidu̱xruxe i ngẽma chixexü̃gu maxẽxü̃. Rü ngẽma tama yaxõgüxü̃ rü poraãcü namuü̃e rü ñanagürügü: —¿Texé chi i tatanüwa tamaxama naétüwa ya yima üxü ya tüxü̃ iguxü̃ne ya guxü̃guma inaiechane? —ñanagürügü.

Ichaía 30:33

Erü nũxcümacürüwatama nixĩ ga Achíriaanearü churaragüca̱x rü norü ãẽ̱xgacüca̱x ínamexẽẽãxü̃ i wüxi i nachica i taxü̃ rü mátamaxü̃ i üxü nawa ngẽxmaxü̃. Rü ngéma nangẽxma ya tacü ya üxü i muxü̃ma i üxü nawa ngẽxmane. Rü nüma ya Cori ya Tupana rü wüxi i cuemaxã tá nayanaixẽxẽ. Rü ñoma üxüema i achúfremaxã inaixü̃rüxü̃ tá nixĩ.

Ichaía 30:30

Rü nüma ya Cori ya Tupana rü tá pexü̃ nüxü̃ naxĩnüxẽxẽ i naga i tagaxüchixü̃ rü tá pexü̃ nanawe̱x i norü pora. Rü perü uanümaxã tá poraãcü nanu. Rü üxüema i guxü̃xü̃ iguxü̃ tá naxca̱x nango̱xẽxẽ, rü ãẽmacügü tá naxca̱x nanaxüxẽxẽ rü taxüchicü ya pucü tá ínanguxẽxẽ rü gáuxü̃püta tá narüyixẽxẽ.

Ichaía 30:27

Dücax, nüma ya Cori ya Tupana rü yáxü̃wa ne naxũ. Rü ngẽma norü nu rü ninai caixemaxü̃ i pamüemaxü̃maxã. Rü ngẽma naberagü rü numaxã nanapagü. Rü yima norü conü rü ñoma üxüema i tüxü̃ iguxü̃rüxü̃ nixĩ.

Ichaía 27:4

Rü tama nixĩ i Iraétanüxü̃maxã chanuxü̃, natürü ngẽxguma nangẽxmagügu i tama chauga ĩnüexü̃, rü choma rü tá ichayanaxoxẽxẽ ñoma tuxu rü natüane iguxü̃rüxü̃.

Wenaxarü naxümatü ga Tupanaarü mugü 9:6

Rü penaxwa̱xe nax nüxü̃ pecuáxü̃ nax Cori ya Tupana rü tama perü mexü̃gagu yixĩxü̃ i pexna naxããxü̃ i ngẽma naane i mexü̃, erü pema rü duü̃xü̃gü i tama ixĩnüechaxü̃xü̃ pixĩxgü —ñanagürü ga Moiché.

Wenaxarü naxümatü ga Tupanaarü mugü 7:16

Natürü penaxwa̱xe nax penadaixü̃ i guxü̃ma i ngẽma duü̃xü̃gü i Cori ya Tupana pexme̱xwa ngẽxmaxẽẽgüxü̃. ¡Rü taxṹ i pexü̃́ nangechaü̃tümüxü̃güxü̃! ¡Rü taxṹ i norü tupanagüxü̃ picua̱xüü̃güxü̃! Erü ngẽxguma ngẽma pexü̱xgu rü tá ipeyarütauxe.

Ínachoxü̃xü̃chiga 24:17

Rü yema Cori ya Tupanaarü üüne rü yema Iraétanüxü̃ca̱x nango̱x nawa ga guma ma̱xpǘne ga ngextá yexeraãcü ínachuchitaeruxü̃wa. Rü ñoma wüxi ga üxüema ga nawa ixaxü̃nerüxü̃ nixĩ ga nüxü̃ nadaugügu.

Ãẽ̱xgacügü ga guxchaxü̃güarü mexẽxẽruü̃gü 4:14

Rü yexguma ga ngĩma ga Débora rü Baráxü̃ ngĩgürügü: —Ñu̱xmawaxix nixĩ namexü̃ nax Chícharaca̱x quixũxü̃, erü nüma ya Cori ya Tupana rü curü churaragüpe̱xegu tá nixũ, rü tá cuxü̃́ nanatauxchaxẽxẽ nax Chícharaxü̃ curüporamaexü̃ —ngĩgürügü. Rü nüma ga Baráx rü guma ma̱xpǘne ga Tabóxwa nayarüxüe namaxã ga yema 10,000 ga norü churaragü.

Ínachoxü̃xü̃chiga 23:23

Rü chorü orearü ngeruxü̃ rü tá cupe̱xegu nixũ. Rü nawa tá cuxü̃ naga i ngẽma Amoréutanüxü̃arü naane, rü Itítanüxü̃arü naane, rü Ferechéutanüxü̃arü naane, rü Canaáü̃tanüxü̃arü naane, rü Ebéutanüxü̃arü naane, rü Yebuchéutanüxü̃arü naane. Rü choma rü tá chanadaixichi i ngẽma duü̃xü̃gü nax yanaxoxochixü̃ca̱x.

Wenaxarü naxümatü ga Tupanaarü mugü 7:22

Rü nüma ya Cori ya Tupana rü íxrarüwachigü tá ínayawoxü̃etanü i perü uanügü. Rü pemax rü taxũtáma wüxixü̃cüxü penadai, erü ngẽxguma wüxixü̃cüxü penadaixgu rü ngẽma aigü i ngẽma naanepechinüwa ngẽxmagüxü̃ rü tá nimu rü pexü̃ chi nangõ̱xcu.

Wenaxarü naxümatü ga Tupanaarü mugü 20:1

Rü ngẽxguma tá ipexĩãchigu nax perü uanügümaxã pegü pedaixü̃ca̱x, rü woo ngẽma perü uanügü rü pexü̃ namumaegu rü namuxgu i norü cowarugü rü norü carugü ya daiweü̃gü, rü taxũtáma nüxü̃ pemuü̃e, erü petanüwa tá nangẽxma ya perü Cori ya Tupana ga Equítuanewa pexü̃ ígaxü̃cü.

Yochué 11:8

Rü nüma ga Cori ya Tupana rü nanaporamaexẽxẽ ga Iraétanüxü̃. Rü yemaca̱x norü uanügüxü̃ nibuxmüxẽxẽ rü nawe nangẽgü ñu̱xmata guma ĩane ga taxü̃ne ga Chidóü̃wa rü Mirepóx-maíü̃wa nangugü rü ñu̱xmata Mispáarü éstewaama yexmaxü̃ ga doxonexü̃wa nangugü. Rü bai ga wüxi ga maxü̃xü̃ ga íyaxüxü̃, rü guxü̃xü̃ma nadai.

Yochué 11:12

Rü yemaacü nanadaiãcu ga guxü̃nema ga guma ĩanegü ga Iraétanüxü̃ca̱x nügü nutaque̱xegüne. Rü nanadai ga norü ãẽ̱xgacügü rü nagu napogüe ga norü ĩanegü, yerü yemaacü nixĩ ga Yochuéxü̃ namuxü̃ ga gumá Tupanaarü duü̃ ga Moiché.

Yochué 14:12

Rü ngẽmaca̱x i ñu̱xmax rü cuxna naxca̱x chaca nax choxna cunaxãxü̃ca̱x i ngẽma naane i ma̱xpǘneã́xü̃ ga nümatama ga Cori ya Tupana chomaxã namaxã ixunetaxü̃ nax choxna naxããxü̃ca̱x. Rü cumax, Pa Yochuéx, rü meama nüxü̃ cucua̱x nax ñu̱xma rü ta nangẽxmagüxü̃ i ngẽma nataagü ga gumá Anáx ga taxüchicü rü máchanexü̃chicütanüxü̃. Rü ngẽma norü ĩanegü rü nita rü meama ínapoxegugü. Natürü i chomax rü nüxü̃ chacua̱x nax Cori ya Tupana rü tá choxü̃ nangü̃xẽẽxü̃ nax ngéma ínawoxü̃ãxü̃ca̱x, yema chomaxã nüxü̃ yaxuxü̃rüü̃tama —ñanagürü ga Caréx.