Wenaxarü naxümatü ga Tupanaarü mugü 8:8 - Tupanaarü Ore

⁸ Rü ngẽma naanewa rü nangẽxma i trigunecügü, rü chebádanecügü, rü úbanecügü, rü igunecügü, rü boxranecügü, rü oribunecügü, rü taxü̃ i ira.

Wenaxarü naxümatü ga Tupanaarü mugü 8:8 Referans Kwoze

Ore i mexü̃ ga Cuáü̃ ümatüxü̃ 6:13

Rü yema norü ngúexü̃gü rü nanade ga yema naxchipe̱xegü ga yema 5 ga paũwa íyaxüxü̃, rü 12 ga pexchi namaxã nanaxüãcugü.

Wiyaegü 147:14

Rü nüma nixĩ i pexü̃ nangüxmüexẽẽxü̃ i pechixü̃anewa rü muxũchixü̃ i trigumaxã pexü̃ nataãẽxẽẽgü.

Wenaxarü naxümatü ga Tupanaarü mugü 32:14

Rü pexü̃́ nayexma ga perü wocagünenixü̃ rü ñu̱xũchi pexü̃́ nayexma ga perü wocagünenixü̃ ga marü itaigüne. Rü pema rü namaxã pexãwemü ga yema rümemaegüxü̃ ga carnérugü ga Bacháü̃anewa yexmagüxü̃ rü chíbugü ga iyatüxü̃, rü yema rümemaexü̃ ga trigu. Rü peyaxagü ga yema rümemaexü̃ ga úbatüxü̃ ga bínu.

Abacú 3:17

Rü woo i ngẽma igunecü rü yangechacugu, rü woo i ngẽma úba rü ngẽma oribu rü nangearü õõ̱xgu, rü woo ngẽma naanegüwa rü nataxuxguma i ori̱x i buxgüxü̃, rü woo nayuegu i ngẽma carnérugü i nachitaxü̃wa, rü woo marü nataxuxguma i wocagü i naxpüü̃wa, natürü i choma rü taãẽãcüma ta nüxü̃ chicua̱xüxü̃ ya Cori ya Tupana ya chorü maxẽẽruxü̃.

Miquéa 4:4

Rü guxãtáma taxũtáma muü̃eãcü tamaxẽ. Rü wüxíechigü rü tá tümaarü úbapechitagu, rü tümaarü igunecüpechitagu tarüngü̃. Rü ñaa ore rü noxrütama nixĩ ya yimá Cori ya Tupana ya Guxãétüwa Ngẽxmacü.

Ochéa 2:8

Natürü nümagü i ngẽma Iraétanüxü̃ rü ngẽma ngeruxü̃ nixĩgü nax tama nüxü̃ nacua̱xgüégaxü̃ nax choma yixĩxü̃ ga nüxna chanaxãxü̃ i trigu rü bínu rü chíxü̃ rü diẽru rü úiru. Natürü nümagü rü yema diẽrumaxã rü úirumaxã nanaxügü ga norü tupananetagü ga Baáchicüna̱xãgü.

Echequié 27:17

Rü yexgumarüxü̃ ta ga Yudáanecüã̱xgü rü Iraéanecüã̱gü rü cuxü̃tawa nayataxegü. Rü Miníxcüã̱x ga trigumaxã, rü paũ i maixcuraxü̃maxã, rü iramaxã, rü chíxü̃maxã rü pumara ga bálsamumaxã cuxü̃́ nanaxütanügü ga curü yemaxü̃gü.

Yeremía 5:17

Rü tá nanangõ̱xgü i ngẽma penetügü, rü pewemügü. Rü woo yíxema penegü rü pexacügü rü tá tüxü̃ nadai rü tá tüxü̃ nangõ̱xcu. Rü yíxema perü carnérugü rü perü wocagü rü tüxü̃ tá nangõ̱xcu. Rü perü úbagü rü perü igunecüarü o rü tá ta nanangõ̱xgü. Rü naxnegümaxã tá nagu nipogügü ya yima perü ĩanegü ya ípoxegugüne ya namaxã pegü íperüporaene —ñanagürü.

Ichaía 7:23

Rü ngẽma ngunexü̃gu rü ngẽma naane ga noxri 1,000 i úba nawa rüxügüxü̃ rü 1,000 i diẽrugu ãtanüxü̃, rü tá tuxunecüxü̃ rü maxẽnecüxü̃ nananguxuchi.

Nüxíraxü̃xü̃ ga popera ga ãẽ̱xgacügüchiga 5:11

Rü nüma ga Charomóü̃ rü Iráü̃na nanana ga õnagü naxca̱x ga yema duü̃xü̃gü ga napatawa yexmagüxü̃. Rü nüxna nanaxã ga 4’400,000 quíru naguxü̃ ga trigu rü 4,400 litru ga oribuarü chíxü̃. Rü yema nixĩ ga Charomóü̃ Iráü̃na ãxü̃ ga wüxichigü ga taunecügu.

2 Chamué 4:6

Ngĩma ga ĩã̱xarü dauruxü̃ rü trigu ícuexechite̱xe, natürü düxwa yéma iyapeãchi. Rü yemaca̱x tama nüxü̃ idau ga Recáx rü naenexẽ ga Baaná nax ĩxgu nachocuxü̃.

Wiyaegü 81:16

Natürü ngẽxguma chi norü duü̃xü̃gü ya Tupana naga ĩnüegu rü chi mexü̃ i trigumaxã nanaxüwemü rü chi mexü̃ i berurewa mea nayaxaxegüxẽxẽ.

Naanearü ügüchiga 49:11

Rü nüma ya Yudá rü úbanegu nanangãxü̃ i norü búru, rü úbachacüxü i rümemaexü̃gu nanangãxü̃ i norü búruxacü. Rü bínuwa naya̱u̱xchiru. Rü úbatüü̃wa nixĩ ga naya̱u̱xãxü̃ i norü gáuxü̃chiru.

Wenaxarü naxümatü ga Tupanaarü mugü 8:7

Erü nüma ya Cori ya Tupana rü wüxi i naane i mexü̃wa tá pexü̃ nagagü i ngextá namu i natüxacügü, rü puchugü, rü bairawegü i ma̱xpǘnearü doxraewa ichuxchugüxü̃.

Wenaxarü naxümatü ga Tupanaarü mugü 8:9

Rü ngẽma naanewa rü taxũtáma pexoegaãẽgü naxca̱x i perü õna, rü taxũtáma pexü̃́ nataxu. Rü norü ma̱xpǘnegüwa tá nüxü̃ peyangau i fierumü rü cóbremü.

Wenaxarü naxümatü ga Tupanaarü mugü 32:13

Rü pexü̃ naporaexẽxẽ nax máxpü̱xanexü̃gu pexü̃ nagagüxü̃. Rü nanetügü ga nüechama yema naanewa rüxügüxü̃arü omaxã pexü̃ nixüwemü. Rü wüxi ga nutapütawa berure pexca̱x nichuruxẽxẽ, rü nuta ga taipütacüwa pexca̱x ínanagoxü̃chíüxẽxẽ ga chíxü̃.

Iraétanüxü̃arü muxchiga 13:23

Rü yema doxonexü̃ ga Ecúwa nangugü, rü yéma nayadaegü ga wüxi ga úbamaxü̃chacüxü ga ta̱xya̱xaarü oṍxü̃. Rü wüxi ga naiwa nayawe̱xgü rü yemaacü nügümaxã nayangetaü̃gü. Rü ori̱x ga igu rü ori̱x ga boxra rü ta ningegü.

Wenaxarü naxümatü ga Tupanaarü mugü 6:3

Rü ngẽmaca̱x, Pa Iraétanüxü̃x, rü name nixĩ i mea nagu pemaxẽ i ngẽma mugü. Erü ngẽxguma mea nagu pemaxẽgu rü tá mea pexü̃ nangupetü, rü tá pimu nawa i ngẽma naane i ngextá lechi rü ira rü ñoma dexárüxü̃ taguma ítaxuxü̃wa yema Cori ya Tupana perü o̱xigümaxã nüxü̃ ixuxü̃rüxü̃.

Norü taxre ga popera ga ãẽ̱xgacügüchiga 18:32

Rü ngẽmawena rü wüxi i nachixü̃ane i pechixü̃anerüxü̃ ixĩxü̃wa tá pexü̃ nagagü. Rü ngẽma nixĩ i wüxi i nachixü̃ane i ngextá trigunecügü nawa ngẽxmaxü̃ nax penaxüxü̃ca̱x i perü paũ, rü nawa ngẽxmaxü̃ i úbanecügü nax penaxüxü̃ca̱x i perü bínu. Rü ñu̱xũchi ngẽma nachixü̃anewa nangẽxma i oribuarü chíxü̃ rü berure rü ta. Rü ngéma rü taãẽãcü tá pemaxẽ rü taxũtáma peyue. ¡Natürü taxṹ i Echequíaga pexĩnüexü̃! Erü nüma rü pexü̃ nawomüxẽxẽ i ngẽxguma nüxü̃ yaxuxgu nax Cori ya Tupana tá pexü̃ ínguxü̃xẽẽxü̃.

Yeremía 2:7

Rü choma nixĩ i ñaa naane i guxü̃ nawa rüxüxü̃wa chanagagüxü̃ nax yemaacü nangõ̱xgüãxü̃ca̱x ga nanetüarü ogü ga rümemaegüxü̃. Natürü i pema rü nua pexĩ rü chixexü̃ nawa pexügü i ñaa chorü naane rü ngẽmaãcü naxchi choxü̃ pexaixẽxẽ i ñaa naane i choxrü ixĩxü̃.