Wenaxarü naxümatü ga Tupanaarü mugü 8:2 - Tupanaarü Ore

² ¡Rü nüxna pecua̱xãchie ga ñuxãcü Cori ya Tupana rü 40 ga taunecü yema chianexü̃gu pexü̃ nimugü! Rü pexü̃ naxãneexẽxẽ rü pexü̃ naxü nax nüxü̃ nacuáxü̃ca̱x rü aixcüma naga tá pexĩnüe rü tá peyangu̱xẽxẽ i norü mugü rüe̱xna tama.

Wenaxarü naxümatü ga Tupanaarü mugü 8:2 Referans Kwoze

Popera ga Chantiágu ümatüxü̃ 1:3

Erü pema nüxü̃ pecua̱x rü ngẽxguma guxchaxü̃maxã perü õxü̃ naxü̱xgu, rü ngẽmawa pengúe nax yáxna namaxã pexĩnüexü̃ca̱x i ngẽma guxchaxü̃gü i pingegüxü̃.

Nüxíraxü̃xü̃ ga popera ga Pedru ümatüxü̃ 1:7

Rü ngẽma perü õ rü ñoma úirurüxü̃ nixĩ. Rü ngẽma úiru rü üxümaxã nüxü̃ taxü nax nüxü̃ icuáxü̃ca̱x rü aixcüma úiruxüchi yixĩxü̃. Rü ngẽxguma peyaxõgüamagu ega woo guxchaxü̃gü pexca̱x ínguxgu, rü ngẽma perü õ rü wüxi i úiruarü yexera nixĩ nax namexü̃. Rü ngẽma úiru rü woo namexẽchi natürü düxwa nangau. Natürü ngẽxguma peyaxõgüamagu ega guxchaxü̃gü pexca̱x ínguxgu rü tá Tupanape̱xewa pime rü tá pexü̃ nicua̱xüxü̃ rü tá pemaxã nataãxẽ rü mexü̃ i pechica tá pexna naxã i ngẽxguma wena núma naxũxgu ya Ngechuchu ya Cristu.

Wenaxarü naxümatü ga Tupanaarü mugü 8:16

Rü yema chianexü̃wa rü pexü̃ naxüwemü namaxã ga maná ga õna ga nũxcümaü̃güxü̃ ga perü o̱xigü tama nüxü̃ cua̱xgüxü̃. Rü yemaacü nanaxü nax pexü̃ naxãneexẽẽxü̃ca̱x rü pexü̃ naxüxü̃ca̱x nax ngẽmawena mexü̃ peyaxuxü̃ca̱x. Rü nüma yixĩxü̃ ga Cori ya Tupana ga pexca̱x ínanguxẽẽãxü̃ ga yema guxü̃ma nax yemaacü mea pemaxẽxü̃ca̱x.

Ínachoxü̃xü̃chiga 16:4

Rü yexguma ga Cori ya Tupana rü Moichéxü̃ ñanagürü: —Ñu̱xma rü tá chanaxü nax õna naxca̱x charüyi̱xẽẽxü̃ i daxũguxü̃ i naanewa. Rü nüma i duü̃xü̃gü rü wüxichigü i ngunexü̃gu rü tá nawa naxĩĩxü̃ nax nayauxgüãxü̃ca̱x i ngẽma wüxi i ngunexü̃ca̱x inguxü̃. Rü ngẽmawa tá nüxü̃ chaxü i ngẽma duü̃xü̃gü rü chauga naxĩnüe rüe̱xna tama.

Wenaxarü naxümatü ga Tupanaarü mugü 2:7

Rü yimá Cori ya perü Tupana rü pexü̃ narüngü̃xẽxẽ nawa ga guxü̃ma ga yema pexüxü̃. Rü gumá 40 ga taunecü rü pemaxã nayexma rü pexna nadau ga yexguma yema taxüchixü̃ ga chianexü̃gu pexĩxgu. Rü taxuxü̃ma pexü̃́ nataxu ga yexguma.

Norü taxre ga to ga popera ga ãẽ̱xgacügüchiga ümatüxü̃ 32:31

Rü wüxi ga ngunexü̃gu ga Babiróniaanearü ãẽ̱xgacügü rü Echequíaxü̃tawa nanamugü ga norü duü̃xü̃gü nax íyadaugüãxü̃ca̱x ga yema cua̱xruxü̃ ga Tupana Echequíamaxã nüxü̃ ixuxü̃ rü aixcüma naxca̱x yataane. Rü yexguma ga nüma ga Tupana rü Echequíaxü̃ naxü. Rü nüxna nixũgachi nax nüxü̃ nacuáxü̃ca̱x rü aixcüma nüxü̃ nangechaü̃ rü naga naxĩnü.

Ínachoxü̃xü̃chiga 15:25

Rü yexguma ga Moiché rü Cori ya Tupanaarü ngü̃xẽẽca̱x ínaca. Rü nüma ga Tupana rü Moichéxü̃ nanawe̱x ga wüxi ga naixacü ga metanüxü̃. Rü nüma ga Moiché rü nanawoochi ga yema naixacü rü natüchiüwa nanatae. Rü yemamaxã nüxü̃́ inayarüxo ga nax naxüxchiüxü̃ ga dexá. Rü yéma nixĩ ga Tupana ga Iraétanüxü̃xü̃ naxüxü̃ rü nüxna naxããxü̃ ga norü mugü nax yemaacü tá mea naxca̱x namaxẽxü̃ca̱x.

Popera ga Chantiágu ümatüxü̃ 4:10

Rü name nixĩ i Cori ya Tupanape̱xegu pegü íperüxíragü. Rü nüma rü tá pexü̃ nicua̱xüxü̃ rü pexü̃ nataxẽxẽ.

Ore i mexü̃ ga Cuáü̃ ümatüxü̃ 2:25

Rü yemaca̱x ga nüma rü taxuca̱xma texé namaxã nüxü̃ tixu nax ta̱xacügu naxĩnüexü̃ ga yema duü̃xü̃gü. Yerü nümatama marü nüxü̃ nacua̱x nax ta̱xacügu naxĩnüexü̃ ga naãxẽwa ga wüxichigü.

Popera ga Chantiágu ümatüxü̃ 4:6

Natürü Tupana rü tüxü̃ narüngü̃xẽxẽ nax tama nagu iyixü̃ca̱x i ngẽma ngúchaü̃gü i chixexü̃gü i ñoma i naanewa ngẽxmagüxü̃. Rü ngẽmaca̱x norü orewa rü ñanagürü: “Tupana rü tümamaxã nanu ya yíxema tügü icua̱xüü̃güxe, natürü tüxü̃ narüngü̃xẽxẽ ya yíxema tügüna daugüxe nax tama tügü ticua̱xüü̃güxü̃ca̱x”, ñanagürü.

Wenaxarü naxümatü ga Tupanaarü mugü 29:5

Rü 40 ga taunecü yema chianexü̃gu pemaxã chixũ. Rü guxcüma ga gumá taunecügu rü taxuxü̃ma ga pexchiru rü perü chapatu pexü̃́ nangau.

Ore i mexü̃ ga Luca ümatüxü̃ 18:14

Rü pemaxã nüxü̃ chixu rü gumá yatü ga Rómaarü ãẽ̱xgacüca̱x diẽru ngĩxü̃ decü rü yexguma napataca̱x nataeguxgu rü Tupana rü marü nüxü̃́ narüngüma i norü pecadugü. Natürü yema Parichéu rü Tupana rü tama nüxü̃́ narüngüma i norü pecadugü. Erü texé ya tügü icua̱xüxü̃xe rü Tupana tá tüxü̃ naxãnexẽxẽ. Natürü texé ya tama tügü icua̱xüxü̃xe rü Tupana rü tá tüxü̃ nicua̱xüxü̃ —ñanagürü ga Ngechuchu.

Amúx 2:10

Rü choma nixĩ ga Equítuanewa pexü̃ íchagaxü̃xü̃, rü 40 ga taunecü ínachianexü̃gu pexü̃ chigagü nax pexna chanaxãxü̃ca̱x ga Amoréutanüxü̃arü naane.

Ichaía 2:17

Natürü wüxi i ngunexü̃gu rü tá poraãcü naxãnee i ngẽma nügü icua̱xüü̃güxü̃ rü ngẽma nügü írütagüxü̃. Rü ngẽma ngunexü̃gu rü duü̃xü̃gü rü tá Cori ya Tupanaxü̃xicatama nicua̱xüü̃gü.

Ucu̱xẽgüchiga 17:3

Ngẽma úirumü rü diẽrumü, rü üxüwa nixĩ i yaguxü̃ nax ínayi̱xixü̃ca̱x i norü üxaxü̃. Natürü ngẽma tórü ĩnü rü Tupana nixĩ ya nüxü̃ ücü.

Wiyaegü 136:16

Rü ñu̱xũchi nüma nixĩ ga yema naane ga taxúema nagu ãpataxü̃gu yagagüãxü̃ ga yema norü duü̃xü̃gü ga Iraétanüxü̃. Erü ngẽma norü ngechaü̃ i Iraétanüxü̃ca̱x rü taguma inayagu̱x.

Wiyaegü 106:7

Rü nüma ga torü o̱xigü rü tama aixcüma nagu narüxĩnüe ga yema taxü̃gü ga mexü̃gü ga curü poramaxã cuxüxü̃. Rü nüxü̃ inayarüngümae nax cuma rü nüxü̃ cungechaü̃xü̃. Rü yema Már ga Dauchíüxü̃cutüwa rü cumaxã nayanue.

Wiyaegü 81:7

Rü yexguma guxchaxü̃wa peyexmagügu ga Equítuanewa rü choxna pecagüe, rü choma rü pexü̃ íchanguxü̃xẽxẽ. Rü yema caixanexü̃ ga duruanexü̃ nawa ínaxũxü̃wa pexü̃ changãxü̃. Rü yexguma Meribáwa pengugügu rü nataxuxgu ga dexá rü choma rü pexü̃ chaxümare.

Wiyaegü 77:11

Rü choma rü tá nüxna chacua̱xãchi ga yema mexü̃gü ga ü̃pa norü poramaxã naxüxü̃.

Norü taxre ga to ga popera ga ãẽ̱xgacügüchiga ümatüxü̃ 33:12

Natürü yexguma taxü̃ ga ĩ̱xãchiãxẽ naxca̱x ínguxgu, rü Cori ya norü Tupanana naca nax nüxü̃́ nüxü̃ iyanangümaxü̃ca̱x ga norü chixexü̃gü ga naxüxü̃. Rü norü o̱xigüarü Tupanape̱xegu nügü ínarüxíxra.

Wenaxarü naxümatü ga Tupanaarü mugü 7:18

¡Rü taxṹ i nüxü̃ pemuü̃exü̃! ¡Rü nüxna pecua̱xãchie ga yema Cori ya perü Tupana Faraóü̃maxã rü ñu̱xũchi guxü̃ma ga yema Equítuanecüã̱xmaxã naxüxü̃!

Wenaxarü naxümatü ga Tupanaarü mugü 1:33

Rü nüma nixĩ ga pemaxã inacuáxü̃ rü pepe̱xegu yaxũxü̃ nax pexü̃ nüxü̃ nacua̱xẽẽxü̃ca̱x ga nachica ga nagu tá pipegüetanüxü̃. Rü yexguma chütacü ipexĩxgu rü üxüemamaxã pexü̃ nüxü̃ nacua̱xẽxẽ ga nama ga nagu tá pexĩxü̃, rü ngunecü rü wüxi ga caixanexü̃maxã pexü̃ nüxü̃ nacua̱xẽxẽ.

Wenaxarü naxümatü ga Tupanaarü mugü 1:3

Rü 40 ga taunecü marü nangupetü nax Equítuanewa ínachoxü̃xü̃ ga yema Iraétanüxü̃. Rü Moiché rü marü nüxü̃ narüporamae ga gumá Amoréutanüxü̃arü ãẽ̱xgacü ga Chióü̃ ga Ebóü̃gu ãchiü̃cü rü gumá Bacháü̃arü ãẽ̱xgacü ga Óx ga Atarúgu ãchiü̃cü ga Edréianewa. Rü yexguma norü 40 ga taunecüwa nanguxgu ga norü 11 ga tauemacüarü ügügu, rü yexguma nixĩ ga Moiché Iraétanüxü̃maxã nüxü̃ yaxuxü̃ ga guxü̃ma ga yema ore ga Tupana namaxã nüxü̃ ixuxü̃ naxca̱x ga yema Iraétanüxü̃.

Naanearü ügüchiga 22:1

Rü yemawena ga Tupana rü Abraáü̃arü õxü̃ naxü. Rü naégamaxã nüxna naca. Rü nüma ga Abraáü̃ nanangãxü̃ rü ñanagürü: —Daxe chixĩ, rü nua changexma —ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:23

Rü ngẽmawa guxü̃ma i ngẽma yaxõgüxü̃ tá nüxü̃ nacua̱xgü nax aixcüma nüxü̃ chacuáxü̃ i norü maxü̃ rü ngẽma naãxẽwa nagu naxĩnüexü̃. Rü wüxichigü i pemax rü tá pexü̃́ chanaxütanü ngẽxgumarüxü̃ nax ñuxãcü cha̱u̱xca̱x pemaxẽxü̃.

Norü taxre ga to ga popera ga ãẽ̱xgacügüchiga ümatüxü̃ 33:19

Rü norü yumüxẽchiga, rü norü yumüxẽarü ngãxü̃chiga, rü ñuxãcü nax chixexü̃ naxüxü̃chiga, rü ñuxãcü ma̱xpǘnegügu tupananetagüca̱x ínaxüxü̃ãxü̃ ga ngutaque̱xechicagüchiga, rü ñuxãcü yemagu yanuaxü̃ ga Acheráchicüna̱xã rü togü ga tupananetachicüna̱xãgüchiga, rü yema naxü naxü̃pa ga nax Cori ya Tupanamaxã nüxü̃ yaxuxü̃ ga norü chixexü̃ rü nape̱xegu nügü ínaxíraxü̃, rü guxü̃ma i ngẽma rü Tupanaarü orearü uruü̃gü ümatüxü̃ i poperagu naxümatü.

Ínachoxü̃xü̃chiga 16:35

Rü 40 ga taunecü nixĩ ga Iraétanüxü̃ ga manámaxã naxãwemügüxü̃ ñu̱xmata yema naane ga togü ga duü̃xü̃gü nawa yexmagüxü̃wa nangugü. Rü yemaacü manámaxã naxãwemügüxü̃ ñu̱xmata yema Canaáü̃anearü üyewa nangugü.

Ínachoxü̃xü̃chiga 20:20

Rü nüma ga Moiché rü nanangãxü̃ rü ñanagürü nüxü̃: —¡Taxṹ i peba̱i̱xãchiexü̃! Erü nüma ya Tupana rü núma naxũ nax pexü̃ nawéaxü̃ca̱x i norü pora nax nüxü̃ pemuü̃exü̃ca̱x rü guxü̃guma naga pexĩnüexü̃ca̱x rü tama chixexü̃ pexügüxü̃ca̱x —ñanagürü.

Iraétanüxü̃arü muxchiga 14:33

Rü penegü rü 40 ya taunecü tá ñaa chianexü̃wa nangẽxmagü rü nua naxü̃nagüarü dauruxü̃ tá nixĩgü. Rü ñu̱xma nax tama chauga pexĩnüexü̃ rü penegü rü tá nanaxütanügü i ngẽma perü chixexü̃ ñu̱xmatáta guxãma i pema rü nuxã chianexü̃gu peyue.

Ãẽ̱xgacügü ga guxchaxü̃güarü mexẽxẽruü̃gü 2:22

Rü ngẽma guxchaxü̃maxã nüxü̃ naxü i ngẽma Iraétanüxü̃ rü aixcüma tá yema nüxíraxü̃güxü̃ ga Iraétanüxü̃rüxü̃ naga naxĩnüe rüe̱xna tama.

Ãẽ̱xgacügü ga guxchaxü̃güarü mexẽxẽruü̃gü 3:4

Rü yemagümaxã nixĩ ga Iraétanüxü̃xü̃ naxüxü̃ ga Cori ya Tupana. Erü nüma rü nüxü̃ nacuáxchaü̃ rü aixcüma naga tá naxĩnüe ga yema mugü ga Moichéwa Iraétanüxü̃arü o̱xigüna ãxü̃.

Neemía 9:19

Rü cuma rü poraãcü nüxü̃ cungechaü̃ rü yemaca̱x tama chianexü̃wa cunawogü. Rü yemaca̱x ga yema caixanexü̃ rü tama nüxna nixũgachi ga ngunecü nax yemawa nüxü̃ nacua̱xgüxü̃ca̱x nax ngextá ta naxĩxü̃ ga namawa. Rü woo ga chütacü rü tama nüxna nixũgachi ga yema üxüema ga dauxü̃wa naxca̱x cungo̱xẽẽxü̃ nax yema nüxü̃ ibáixmaxü̃güxü̃ca̱x nax nüxü̃ nacua̱xgüxü̃ca̱x ga nama ga nagu naxĩxü̃.

Echequié 20:19

Rü ñachagürü nüxü̃: —Choma nixĩ i perü Tupana chixĩxü̃ rü ngẽmaca̱x chanaxwa̱xe nax naga pexĩnüexü̃ rü peyanguxẽẽgüxü̃ i chorü mugü.

Wenaxarü naxümatü ga Tupanaarü mugü 32:7

¡Rü nüxna pecua̱xãchie rü nagu perüxĩnüe ga yema nũxcüma ngupetüxü̃! ¡Rü penatügüna naxca̱x peca̱x nax pemaxã nüxü̃ tixuxü̃ca̱x, rü perü o̱xigüna peca̱x nax pemaxã nüxü̃ tixuchigagüxü̃ca̱x!

Wiyaegü 103:2

Rü guxü̃ma i chorü ĩnümaxã tá nüxü̃ chicua̱xüxü̃ ya Cori ya Tupana rü taxũtáma nüxü̃ icharüngüma i norü ngü̃xẽẽgü i cha̱u̱xca̱x naxüxü̃ rü bai i wüxi.

Yeremía 2:6

Rü nüma ga perü o̱xigü rü marü tama chaugu narüxĩnüe rü nüxü̃ inarüngümae nax choma ya Cori ya Tupana yixĩxü̃ ga Equítuanewa íchanguxü̃xẽẽxü̃. Rü nüxü̃ inarüngümae nax choma yixĩxü̃ ga íchayagagüxü̃ nagu ga yema naane ga chianexü̃ ga taxuxü̃ma i nanetü nawa rüxüxü̃. Rü yema ínamáxpü̱xanexü̃wa ga ínangearü dexáã́xü̃wa chanagagü ga ínaxãũcümaxü̃wa rü taxúema nagu ãchiü̃xü̃wa, rü taxúema ixüpetüxü̃wa.