Wenaxarü naxümatü ga Tupanaarü mugü 5:10 - Tupanaarü Ore

¹⁰ Natürü ya yíxema choxü̃ ngechaxü̃güxe rü naga ĩnüexe i ngẽma chorü mugü, rü tüxü̃ changechaü̃, rü tá nüxü̃ changechaü̃ i tümataagü woo 1,000 e̱xpü̱xcüna yamuxgu.

Wenaxarü naxümatü ga Tupanaarü mugü 5:10 Referans Kwoze

Romanos 8:28

Rü nüxü̃ tacua̱x rü tümaarü mexü̃ca̱x nixĩ ya Tupana ínangu̱xẽẽxü̃ i guxü̃ma i ngẽma tüxü̃ üpetüxü̃ ya yíxema nüxü̃ ngechaü̃güxe ga nüma nagu naxĩnüxü̃ca̱x tüxü̃ nadexe.

Nüxíraxü̃xü̃ ga popera ga Cuáü̃ ümatüxü̃ 1:7

Natürü ngẽxguma chi Tupanarüxü̃ ngóonexü̃wa imaxẽgu, rü yigütanüxü̃ tixĩgü, rü Tupana Nane ya Ngechuchu rü nagümaxã tüxü̃́ inayanaxoxẽxẽ i guxü̃ma i pecadugü.

Yeremía 32:18

Rü cuma icunawe̱x nax aixcüma nüxü̃ cungechaü̃xü̃ i duü̃xü̃gü woo 1,000 wa nangu nax yangṍetanüxü̃ i nataagü. Natürü cuma rü tá cunapoxcue i ngẽma nataagü naxca̱x ga yema chixexü̃gü ga norü o̱xigü ügüxü̃. Pa Tupanax, cuma rü cutachiga rü cuporaxüchi. Rü cuéga rü Cori ya Tupana ya Guxãétüwa Ngẽxmacü nixĩ.

Popera ga Chantiágu ümatüxü̃ 1:25

Natürü yíxema mea nawa ngúxe rü naga ĩnüxe i ngẽma ore i aixcüma ixĩxü̃ i pecaduwa tüxü̃ ínguxuchixẽẽxü̃, rü ngẽxguma tayangu̱xẽẽgu i ngẽma ore nüxü̃ ixuxü̃, rü Tupana tá tüxü̃ narüngü̃xẽxẽ.

Gálatas 5:6

Rü ngẽmaca̱x i ñu̱xma nax Ngechuchu ya Cristuarü duü̃xü̃gü ixĩgüxü̃, rü taxuwama name ega woo íiwíecha̱xmüpe̱xechiraü̃gu rüe̱xna tama, erü tama ngẽma nixĩ i Tupanape̱xewa tüxü̃ mexẽẽxü̃. Rü ngẽma Tupana naxwa̱xexü̃ i ñu̱xma nixĩ nax aixcüma yaxõgüxü̃ rü ngẽmaãcü yigü nax ingechaü̃güxü̃.

Ore i mexü̃ ga Cuáü̃ ümatüxü̃ 15:14

Pema rü chomücügü pixĩgü i ngẽxguma chauga pexĩnüegu.

Danié 9:4

Rü yema chorü yumüxẽwa rü Tupanamaxã nüxü̃ chixu ga chorü pecadugü rü chautanüxü̃arü pecadugü rü ñachagürü: —Pa Cori Pa Tupanax, cuma rü guxãétüwa cungexma rü cuporaxüchi rü guxü̃guma cuyanguxẽxẽ i curü unetagü. Rü ngẽmawa tüxü̃ cunawe̱x nax tüxü̃ cungechaü̃xü̃ ya yíxema aixcüma cuga ĩnüexe rü nagu maxẽxe i curü mugü.

Ore i mexü̃ ga Cuáü̃ ümatüxü̃ 14:15

Rü ngẽxguma aixcüma choxü̃ pengechaü̃gu, rü naga tá pexĩnüe i chorü mugü.

Ínachoxü̃xü̃chiga 20:5

¡Rü taxũtáma ta̱xacürü naxchicüna̱xãpe̱xegu cucaxã́pü̱xü rü nüxü̃ quicua̱xüxü̃! Erü choma ya curü Cori ya Tupana ya poracü rü poraãcü cuxü̃ chinuxü̃, rü ngẽmaca̱x tümaarü chixexü̃ca̱x tá tüxü̃ chapoxcu ya yíxema chauxchi aixe, rü ñu̱xmata tümaxacügüwa, rü tümataagüwa chananguxẽxẽ i ngẽma poxcu.

Ínachoxü̃xü̃chiga 34:7

Rü choma rü guxü̃guma tüxü̃ changechaü̃ rü tüxü̃́ nüxü̃ ichayarüngüma ya tümaarü pecadu rü tümaarü chixexü̃ ya yíxema aixcüma chauga ĩnüexe. Natürü taxũtáma tüxü̃ chaxüpetümare ya yíxema chixexü̃ üxe. Rü tá tüxü̃ chapoxcu ñu̱xmata tümanegüwa rü tümataagüwa —ñanagürü.

Iraétanüxü̃arü muxchiga 14:18

Rü woo nüxü̃ quixu nax tama nüxü̃ cuxüpetümarexü̃ i ngẽma chixexü̃ ügüxü̃ rü cunapoxcuxü̃ i ngẽma nanegü rü nataagü nagagu i nanatügüarü chixexü̃, natürü nüxü̃ quixu ta nax tama cunuxwa̱xexü̃ rü nataxüchixü̃ i curü ngechaü̃ rü toxü̃́ nüxü̃ cungechaü̃xü̃ i torü chixexü̃. Rü ngẽmaca̱x cuxü̃ chaca̱a̱xü̃ nax nüxü̃́ nüxü̃ curüngü̃maxü̃ i ñaa duü̃xü̃güarü chixexü̃, yerü marü yáxna namaxã cuxĩnü ga yexguma Equítuanewa ínachoxü̃gutama ñu̱xmata nua ñaa nachicawa nangugü —ñanagürü ga Moiché.

Wenaxarü naxümatü ga Tupanaarü mugü 7:9

Rü ngẽmaca̱x penaxwa̱xe nax nüxü̃ pecuáxü̃ nax nüma ya Cori ya Tupana rü aixcümaxü̃chi Tupana yixĩxü̃. Rü woo 1,000 e̱xpü̱xcüna yamuxgu i duü̃xü̃gü rü nüma ya Tupana rü guxü̃guma nayanguxẽxẽ i norü uneta i naxüxü̃ naxca̱x i ngẽma duü̃xü̃gü i ingóetanüxü̃ i nüxü̃ ngechaü̃güxü̃ rü yanguxẽẽgüxü̃ i norü mugü.

Yochué 22:5

Natürü ngẽma pexna naxca̱x chacaxü̃xicatama nixĩ nax aixcüma peyanguxẽẽxü̃ i ngẽma Tupanaarü mugü ga norü duü̃ ga Moiché pemaxã nüxü̃ ixuxü̃ ga ñaxü̃: “¡Nüxü̃ pengechaxü̃ ya perü Cori ya Tupana rü penaxü̱x i ngẽma nüma nanaxwa̱exü̃! ¡Rü naga pexĩnüe i guxü̃ma i norü mugü, rü guxü̃guma naxca̱x pemaxẽ guxü̃ma i perü maxü̃maxã rü perü poramaxã!” —ñanagürü.

Wiyaegü 103:17

Natürü ngẽma Tupanaarü ngechaü̃ tümaca̱x ya yíxema naga ĩnüexe rü taguma inayacua̱x. Rü tümaxacügüwa naxüe nax guxü̃guma Tupana tümamaxã mecümaxü̃ ya yíxema mea yanguxẽẽgüxe i norü uneta rü tama nüxü̃ irüngümaexe nax naga taxĩnüexü̃ i norü mugü.

Wenaxarü naxümatü ga Tupanaarü mugü 4:40

¡Rü peyanguxẽxẽ i ngẽma norü mugü i ñaa ngunexü̃gu pemaxã nüxü̃ chixuxü̃! Rü ngẽmaãcü tá mea pexü̃ rü petanüxü̃xü̃ nangupetü rü ñu̱xũchi mucü ya taunecü tá nawa pemaxẽ i ngẽma naane i Cori ya perü Tupana tá pexna ãxü̃ nax guxü̃gutáma pexrü yixĩxü̃ca̱x —ñanagürü ga Moiché.

Wenaxarü naxümatü ga Tupanaarü mugü 7:12

Rü nawena nax nüxü̃ pexĩnüexü̃ i ñaa mugü, rü ngẽxguma aixcüma peyanguxẽẽgu rü nagu pexĩxgu i ñaa mugü, rü nüma ya Cori ya Tupana rü aixcüma tá nayanguxẽxẽ ga yema norü uneta ga nügüégagu perü o̱xigümaxã nüxü̃ yaxuxü̃.