Wenaxarü naxümatü ga Tupanaarü mugü 26:13 - Tupanaarü Ore

¹³ Rü ñu̱xũchi curü Cori ya Tupanamaxã tá nüxü̃ quixũ rü ñacurügü tá: “Marü chopatawa chanaxǘxüchi i ngẽma chaunetüarü o i cuxna üxü̃. Rü ñu̱xũchi marü nüxna chanaxã i ngẽma Lebítanüxü̃, rü ngẽma to i nachixü̃anecüã̱x i nua totanüwa ngẽxmagüxü̃, rü ngẽma taxcutagü rü yutegüxü̃. Rü ngẽmaãcü meama chayanguxẽxẽ i guxü̃ma i ngẽma choxü̃ cumuxü̃ rü taxuxü̃ma i curü mugüxü̃ icharüngüma.

Wenaxarü naxümatü ga Tupanaarü mugü 26:13 Referans Kwoze

Wiyaegü 119:176

Choma rü ñoma wüxi i carnéru i rütaxuxü̃rüxü̃ chixĩ. ¡Rü nua naxũ nax cha̱u̱xca̱x cuyadauxü̃ca̱x, erü tama nüxü̃ charüngüma i curü mugü!

Wiyaegü 119:153

¡Rü nüxü̃ nadau nax ñuxãcü chanaxĩ̱xãchiãẽxü̃ rü nawa choxü̃ ínanguxuchixẽxẽ! Erü taguma nüxü̃ icharüngüma i ngẽma curü ucu̱xẽ.

Wiyaegü 119:141

Pa Tupanax, choma i cupe̱xewa rü taxuxü̃ma chixĩ rü duü̃xü̃gü rü choxü̃ naxoe. Natürü tama nüxü̃ charüngüma i curü mugü.

2 Corintios 11:31

Rü Tupana ya tórü Cori ya Ngechuchu ya Cristunatü rü name nax guxü̃guma nüxü̃ icua̱xüü̃güxü̃. Rü nüma rü nüxü̃ nacua̱x nax aixcüma yixĩxü̃ i ngẽma nüxü̃ chixuxü̃.

2 Corintios 1:12

Rü ngẽma toxü̃ taãẽxẽẽxü̃ nixĩ nax toõxẽwa nüxü̃ tacuáxü̃ nax ñoma i naanewa rü aixcüma Tupana naxwa̱xexü̃ãcüma mea tamaxẽxü̃. Rü pepe̱xewa nixĩ ga guxü̃arü yexera yemaacü mea tamaxẽxü̃. Natürü tocüma rü tama ñoma i naanecüã̱xarü cua̱xwa ne naxũ, erü Tupana ya toxü̃ ngechaü̃cü nixĩ ya nüxü̃́ tayaxõcü.

Ngechuchuarü ngúexü̃gü ga yamugüxü̃arü puracüchiga 24:16

Rü ngẽmaca̱x nixĩ i guxü̃guma mea chaugüna chadauxü̃ nax chauãẽwa mexü̃gu charüxĩnüxü̃ i Tupanape̱xewa rü duü̃xü̃güpe̱xewa.

Ucu̱xẽgüchiga 3:1

Pa Chaunex ¡taxṹ i nüxü̃ icuyarüngümaxü̃ i chorü ucu̱xẽgü i cumaxã nüxü̃ chixuxü̃! ¡Rü mea cugüãẽgu namaxã nanguxü̃ i ñaa chorü ucu̱xẽgü!

Wiyaegü 119:139

Rü ngẽma curü mugü rü poraãcü chayanuxũ. Rü choxü̃́ nangu̱x nax tama naga naxĩnüexü̃ i ngẽma chorü uanügü.

Wiyaegü 119:93

Rü tagutáma nüxü̃ icharüngüma i ngẽma curü mugü, erü ngẽmagagu nixĩ i maxü̃ choxna cuxãxü̃.

Wiyaegü 26:6

Rü cupe̱xewa chaugü chayauxme̱x, rü chowa rü nataxuxü̃ma i ta̱xacürü pecadu. Rü ngẽmaãcü, Pa Cori Pa Tupanax, curü ãmarearü guruü̃wa changu nax cuxca̱x chawiyaexü̃ca̱x rü cuxü̃ chicua̱xüü̃xü̃ca̱x rü nüxü̃ chixuxü̃ca̱x i ngẽma mexü̃gü i cuxüxü̃.

Wenaxarü naxümatü ga Tupanaarü mugü 26:12

Rü ngẽxguma norü tomaepü̱x ya taunecüwa nanguxgu, rü tá ípenaxüxüchi i perü diésmu nawa i guxü̃ma i perü nanetügüarü o. Rü nüxna tá penaxã i ngẽma Lebítanüxü̃, rü ngẽma to i nachixü̃anecüã̱x i petanüwa ngẽxmagüxü̃, rü ngẽma taxcutagü rü yutegüxü̃ i perü ĩanegüwa ngẽxmagüxü̃ nax ngẽmaãcü nümagü rü ta meama nachibüexü̃ca̱x.

Wenaxarü naxümatü ga Tupanaarü mugü 14:29

Rü ngẽmaãcü i ngẽma Lebítanüxü̃ i ngearü naaneã̱xgüxü̃ rü ngẽma to i nachixü̃anecüã̱x i perü ĩanewa ngẽxmagüxü̃ rü tá naxãwemügü ñu̱xmata mea nüxü̃́ yangu. Rü ngẽmaãcü i nüma ya Cori ya perü Tupana rü tá pexü̃ narüngü̃xẽxẽ nawa i guxü̃ma i ta̱xacü i pexüxü̃.

1 Tesalonicenses 2:10

Pema rü toxü̃ pedaugü rü Tupana rü ta toxü̃ nadau nax yexguma petanüwa tayexmagügu rü aixcüma mea Tupanape̱xewa tamaxẽ rü taguma pepe̱xewa chixexü̃ taxügü.

Wenaxarü naxümatü ga Tupanaarü mugü 26:14

Rü ngẽma cuxna chaxãxü̃wa rü taxuxü̃ma changõ̱x i choma ga yexguma chayutanügu rü ngechaü̃wa chayexmagu. Rü bai nax yuexü̃na chanaxuaxü̃xü̃. Pa Cori Pa Chorü Tupanax, choma rü meama cuga chaxĩnü rü ñu̱xũchi meama chayanguxẽxẽ i guxü̃ma i ngẽma choxü̃ cumuxü̃.