Wenaxarü naxümatü ga Tupanaarü mugü 21:5 - Tupanaarü Ore

⁵ Rü ngẽmawena i ngẽma chacherdótegü i Lebítanüxü̃ rü tá ngéma naxĩ. Rü nümagü nixĩ i Cori ya Tupana nüxü̃ unetaxü̃ nax norü puracümaxã inacua̱xgüxü̃ca̱x rü naégagu mexü̃ duü̃xü̃gümaxã naxueguxü̃ca̱x. Rü nümagü nixĩ i namexẽẽgüaxü̃́ i guxü̃ma i duü̃xü̃güarü guxchaxü̃gü i ngẽxguma nügümaxã nanuegu rüe̱xna nügü nangaegu.

Wenaxarü naxümatü ga Tupanaarü mugü 21:5 Referans Kwoze

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 23:13

Rü Amráü̃ nanegü nixĩ ga Aróü̃ rü Moiché. Rü Cori ya Tupana nüxü̃ naxuneta ga Aróü̃ nax nape̱xewa ãmare i üünexü̃arü guruxü̃ yixĩxü̃ca̱x rü pumarate̱xearü guruxü̃ yixĩxü̃ca̱x. Rü yexgumarüxü̃ ta nüxü̃ naxuneta nax nüxü̃́ napuracüxü̃ca̱x rü duü̃xü̃gümaxã mexü̃ naxueguxü̃ca̱x. Rü yema nixĩ ga puracü ga Tupana Aróü̃na rü nanegüna rü nataagüna naxãxü̃ nax guxü̃gutáma naxügüãxü̃ca̱x.

Maraquía 2:7

Rü wüxi i chacherdótearü puracü nixĩ nax duü̃xẽgü tüxü̃ nangúexẽẽxü̃ nax choxü̃ tacua̱xgüxü̃ca̱x. Rü ngẽmaca̱x name nax guxü̃ma i duü̃xü̃gü naxü̃tawa ĩxü̃ nax tüxü̃ nangúexẽẽxü̃ca̱x, erü choma nax guxãétüwa changexmaxü̃ rü nüxü̃ chaxuneta nax chorü orearü uruü̃gü yixĩgüxü̃ca̱x.

Wenaxarü naxümatü ga Tupanaarü mugü 10:8

Rü yéma nixĩ ga Cori ya Tupana ga Lebítanüxü̃xü̃ naxunetaxü̃ nax yangegüãxü̃ca̱x ga yema baú ga Cori ya Tupanaarü mugüchixü̃, rü ñu̱xũchi namaxã inacua̱xgüxü̃ca̱x. Rü yexgumarüxü̃ ta nüxü̃ naxuneta nax nape̱xewa nayexmagüxü̃ca̱x rü nüxü̃́ napuracüexü̃ca̱x rü naégagu duü̃xü̃gümaxã mexü̃ naxuegugüxü̃ca̱x. Rü ñu̱xma rü ta rü ngẽmaãcü nanaxügü.

Wenaxarü naxümatü ga Tupanaarü mugü 18:5

Rü tórü Cori ya Tupana rü guxü̃ma i Iraétanüxü̃tücumüwa nüxü̃ naxuneta i ngẽma Lebítücumü nax nümagü rü nanegü rü nataagü guxü̃guma namaxã inacua̱xgüxü̃ca̱x i Tupanaarü puracü.

Lebítanüxü̃arü puracüchiga 9:22

Rü nüma ga Aróü̃ rü yema Iraétanüxü̃guama naxugüme̱xẽ rü yemaacü Tupanape̱xewa mexü̃ namaxã naxuegu. Rü nawena ga nax marü Cori ya Tupanana naxãxü̃ ga ãmare ga pecaduarü ütanüca̱x ixĩxü̃, rü ãmare ga Cori ya Tupanaca̱x yaguxü̃, rü ãmare ga namaxã Tupanaxü̃ nangüxmüxẽẽxü̃, rü nüma ga Aróü̃ rü nüxna nixũgachi ga yema ãmarearü guruxü̃.

Wenaxarü naxümatü ga Tupanaarü mugü 21:4

Rü nawa tá nanagagü i wüxi i doxonexü̃ i taguma nagu naxüanegüxü̃ rü taguma nagu natoegüxü̃ i nüxü̃́ ngẽxmaxü̃ i wüxi i natü i taguma yachexü̃. Rü nüma i ngẽma ãẽ̱xgacügü rü ngẽxma tá nayapoyenaxãgü i ngẽma wocaxacü.

Echequié 42:13

Rü gumá yatü rü chomaxã nidexa rü ñanagürü: —Ngẽma naã̱xtüarü poxeguxü̃arü to̱xma̱xtawa ngẽxmagüxü̃ i ucapugü i nórtewa ngẽxmagüxü̃ rü súrwa ngẽxmagüxü̃, rü ucapugü i üünexü̃ nixĩgü. Rü ngẽma chacherdótegü i Cori ya Tupanaca̱x daugüxü̃ rü ngẽma ucapugüwa tá nixĩ i nangõ̱xgüãxü̃ i ngẽma ãmaregü i üünexü̃. Rü ngẽma ucapugügu tá nixĩ i nanucuãxü̃ i ngẽma ãmaregü i üünexü̃ i trigute̱xe, rü ãmare i pecaduarü ütanüca̱x inaxãgüxü̃ rü ngẽma ãmare i wüxi i guxchaxü̃ nax naxüxü̃gagu ixãxü̃ erü ngẽma ucapugü rü nachica i üünexü̃ nixĩgü.

Echequié 44:24

Rü ngẽxguma duü̃xü̃gü nügümaxã nuegu rü ngẽma chacherdótegü tá nixĩ i chorü mugüwa nüxü̃ yaxuxü̃ãcü namexẽẽgüaxü̃́ i ngẽma guxchaxü̃gü. Rü nümagü rü tá nayanguxẽẽgü i chorü mugü rü chorü ucu̱xẽgü nachiga i chorü petagü. Rü mea tá nanaxaure i ngẽma chorü ngü̃xchigaarü ngunexü̃gü.

Norü taxre ga to ga popera ga ãẽ̱xgacügüchiga ümatüxü̃ 19:10

Rü ngẽxguma chi naigü ya ĩanegüwa ne naxĩxgu i duü̃xü̃gü nax pema nüxü̃́ penamexẽẽxü̃ca̱x i norü guxchaxü̃gü i máetachiga rüe̱xna Tupanaarü mugüchiga rüe̱xna ta̱xacürü to i mugüchiga rü penaxwa̱xe nax peyaxucu̱xẽgü nax tama Cori ya Tupanape̱xewa ta̱xacürü chixexü̃ naxügüxü̃ca̱x nax nüma ya Tupana rü tama namaxã rü pemaxã nanuxü̃ca̱x. Rü ngẽxguma ngẽmaãcü penaxügügu rü taxũtáma nipeguãchi i ngẽma chixexü̃.