Wenaxarü naxümatü ga Tupanaarü mugü 18:1 - Tupanaarü Ore

^1-2 Rü ngẽma chacherdótegü i Lebítanüxü̃ rü guxü̃ma i ngẽma Lebítanüxü̃tücumü rü taxũtáma ngẽma togü i Iraétanüxü̃rüxü̃ nanayauxgü i norü naane. Rü nümagü i Lebítanüxü̃, rü ngẽma ãmaregü i Tupanaca̱x ínaguxü̃wa tá nixĩ i nayauxgüãxü̃ i nawemügü. Rü ngẽma diẽru i duü̃xü̃gü Tupanana ãxü̃wa tá nixĩ i nayauxgüãxü̃ i ngẽma diẽru i nüxna üxü̃ i ngẽma Lebítanüxü̃. Rü ngẽma Lebítanüxü̃ rü taxũtáma ngẽma togü i Iraétanüxü̃rüxü̃ nanayauxgü i norü naane. Rü nüma ya Cori ya Tupana tá nixĩ i nüxna nadauxü̃ rü namaxã inacuáxü̃.

Wenaxarü naxümatü ga Tupanaarü mugü 18:1 Referans Kwoze

Wenaxarü naxümatü ga Tupanaarü mugü 10:9

Rü yema Lebítanüxü̃ rü taxuxü̃ma ga naane nüxna naxǘ natanüwa ga yema togü ga Iraétanüxü̃. Yerü nümatama ga Cori ya Tupana nixĩ ga nüxna ücü norü ãmareruxü̃.

Yochué 13:14

Rü yema Lebítanüxü̃, rü nüma ga Moiché rü taxuxü̃ma ga naane nüxna naxã, yerü nüxna naxü ga yema ãmaregü ga Iraétanüxü̃ Tupanaca̱x íguxü̃. Yerü yemaacü nixĩ ga Tupana namaxã naxueguxü̃.

Wenaxarü naxümatü ga Tupanaarü mugü 12:19

Rü ngẽxguma ngẽma naanewa pemaxẽyane ¡rü taxṹ i nüxü̃ perüngümaexü̃ i ngẽma Lebítanüxü̃!

Iraétanüxü̃arü muxchiga 18:20

Rü Cori ya Tupana rü Aróü̃xü̃ ñanagürü: —Cuma rü taxũtáma ngẽma togü i Iraétanüxü̃rüxü̃ cuxü̃́ nangẽxma i curü naane i Iraéanewa. Erü choma tá nixĩ i cuxrü ãmare chixĩxü̃ rü cunegüarü ãmare rü cutaagüarü ãmare chixĩxü̃ i Iraéanewa.

Yochué 13:33

Natürü yema Lebítücumü rü taxuxü̃ma ga naane nüxna naxã, rü ñanagürümare nüxü̃: —Yimá Cori ya Iraétanüxü̃arü Tupana, rü yimá nixĩ ya perü ngü̃xẽẽruxü̃ ixĩcü —ñanagürü nüxü̃.

Iraétanüxü̃arü muxchiga 26:62

Rü yexguma yaxugüãgu ga guxü̃ma ga yatügü ga Lebítanüxü̃ ga wüxi ga tauemacü rüe̱xna yexera nüxü̃́ yexmagüxü̃ rü 23,000 nixĩ ga norü mu. Rü yemagü rü tama togü ga Iraétanüxü̃rüxü̃ iwǘgüéga, yerü taxuxü̃ma ga norü naane nüxna naxãgü.

Yochué 18:7

Natürü ngẽma Lebítanüxü̃ rü taxuxü̃táma naane nayauxgü, erü nümagü rü Tupana nayadexechi nax norü chacherdótegü yixĩgüxü̃ca̱x. Rü ngẽma Gáxarü duü̃xü̃gü, rü Rubéü̃arü duü̃xü̃gü, rü ngãxü̃tücumü i Manachéarü duü̃xü̃gü rü marü nanayauxgü i norü naane i natü i Yudáü̃arü éstewaama. Rü yema nixĩ ga naane ga Moiché ga Tupanaarü duü̃ nüxna ãxü̃ —ñanagürü.

Yeremía 33:18

Rü tagutáma nataxu i chacherdótegü i Lebítaagü nax guxü̃ i ngunexü̃gu cha̱u̱xca̱x yagugüãxü̃ i carnérugü, rü cha̱u̱xca̱x yagugüãxü̃ i trigute̱xe rü togü i ãmaregü” —ñanagürü.

Echequié 44:28

Rü ngẽma chacherdótegü rü taxũtáma ngẽma togü i Iraétanüxü̃rüxü̃ nüxü̃́ nangẽxma i norü naane i Iraéanewa. Rü choma tá nixĩ i norü naanerüxü̃ chixĩxü̃ i Iraéanewa. Rü ngẽmaãcü i choma rü tá ngẽma chacherdótegüarü chixĩ.