Wenaxarü naxümatü ga Tupanaarü mugü 15:9 - Tupanaarü Ore

⁹ Rü tama name nax cugüãẽwa cunguxẽẽxü̃ i ñaa ĩnü i chixexü̃ i ñaxü̃: “Marü ningaica ya yimá taunecü ya ngetanü nagu nüxü̃ irüngümaecü, rü ngẽmaca̱x naguxcha nax diẽru nüxna chaxãxü̃”, ñacuxü̃. Rü ngẽxguma namaxã cuxaügu rü tama nüxna cunaxãxgu, rü nüma rü tá Tupanamaxã cuxü̃ nixu, rü ngẽma cuxüxü̃ rü pecadu tá nixĩ.

Wenaxarü naxümatü ga Tupanaarü mugü 15:9 Referans Kwoze

Wenaxarü naxümatü ga Tupanaarü mugü 24:15

Rü name nixĩ i ngẽmatama ngunexü̃gu, naxü̃pa nax yanaxücuxü̃ ya üa̱xcü tüxü̃́ penaxütanü i ngẽma puracü i tüxü̃ pexüxẽẽxü̃. Erü tüma rü tangearü diẽruã̱x rü ngẽmaca̱x tanaxwa̱xe i ngẽma diẽru nax ngẽmamaxã tachibüxü̃ca̱x. Rü ngẽxguma taxũtáma ngẽmaãcü peyanguxẽẽgu rü tüma rü tá Cori ya Tupanamaxã pexü̃ tixu, rü pema rü tá nipeguãchi i ngẽma pecadu.

Ore i mexü̃ ga Matéu ümatüxü̃ 20:15

¿Tama ẽ̱xna name i ngẽma choma chanaxwa̱xexü̃ãcü ngĩmaxã nax chaxüxü̃ i chorü diẽru? ¿Rü ẽ̱xna quixãũxãchi erü ngẽmaãcü chamecüma?” ñanagürü.

Popera ga Chantiágu ümatüxü̃ 5:9

Pa Chauenexẽgüx, name nixĩ i nüxü̃ perüxoe nax pegü pixuechaü̃ nax tama ngẽmaca̱x pexna naca̱xaxü̃ca̱x ya Tupana. Erü marü ningaica nax ínanguxü̃ nax duü̃xü̃güxü̃ yacagüxü̃ca̱x i norü maxü̃chiga.

Yeremía 17:10

Rü choma ya Tupanaxicatama nixĩ i aixcüma chanangugüxü̃ i norü ĩnü i wüxichigü i duü̃xü̃, rü chaxicatama nixĩ i nüxü̃ chacuáxü̃ nax ta̱xacügu naxĩnüxü̃. Rü ngẽma tamaxü̃xü̃ãcütama tá tüxü̃́ chanaxütanü ya wüxíechigü —ñanagürü.

Ínachoxü̃xü̃chiga 22:23

Erü ngẽxguma chixri tümamaxã icucua̱xgu, rü tümagü rü ngü̃xẽẽca̱x tá choxna tacagüe, rü choma rü tá ngéma chaxũ nax tüxü̃ charüngü̃xẽẽxü̃ca̱x.

Popera ga Chantiágu ümatüxü̃ 5:4

Rü pema rü tama nüxü̃́ ngĩxü̃ pexütanü ga yema diẽru ga ngĩxca̱x napuracüecü ga perü puracütanüxü̃. Rü ngẽmaca̱x i ngẽma perü puracütanüxü̃ rü ngĩxca̱x nidexagü ga yema diẽru ga tama nüxna ngĩxü̃ pexãcü. Rü nüma ya Cori ya Tupana ya Guxü̃étüwa Ngẽxmacü rü marü ngẽma duü̃xü̃güxü̃ naxĩnü nax ngĩxca̱x yadexagüxü̃ ga yema diẽru ga nüxü̃́ ngĩxü̃ pengetanücü.

Ore i mexü̃ ga Matéu ümatüxü̃ 15:19

Erü naãẽwa nixĩ i chixexü̃gu naxĩnüexü̃ i duü̃xü̃gü. Rü ngéma ne naxũ nax namáetaxü̃, rü to i ngexü̃ i ãtéxü̃maxã nax inapexü̃, rü nax nangeãẽmarexü̃, rü nax nangĩ́xü̃, rü nax yadorata̱xáxü̃, rü nax naguxchigawa̱xexü̃.

Ucu̱xẽgüchiga 28:22

Ngẽma paxa nügü muarü diẽruã̱xẽẽchaü̃xü̃, rü tama nagu narüxĩnü, rü wüxi i ngunexü̃ rü tá naxca̱x ínangu nax nangearü diẽruã́xü̃.

Ucu̱xẽgüchiga 23:6

Tama name i ngẽma duü̃xü̃ i aüxü̃arü mechawa cuyarüto, rü cuxü̃́ nangúchaü̃ i norü õnagü i chíxü̃, erü ngẽma õna, rü ñoma wüxi i nayae i cuxmanaawa ngẽxmaxü̃rüxü̃ tá nixĩ. Rü ngẽma duü̃xü̃ i cuxna uxü̃ nax naxü̃tawa cuchibüxü̃ca̱x rü cuxaxexü̃ca̱x, rü tama aixcüma cuxü̃ nangechaü̃xü̃ca̱x nixĩ i cuxna naxuxü̃.

Yox 34:28

Rü chixri tümamaxã inacua̱xgü ya yíxema ngearü diẽruã̱xgüxe. Rü ngẽmaca̱x nüma ya Tupana rü nüxü̃ naxĩnü nax aita taxüexü̃ rü ngü̃xẽẽca̱x ítacagüxü̃ ya yíxema ngearü diẽruã̱xgüxe.

Ínachoxü̃xü̃chiga 3:7

Natürü nüma ga Cori ya Tupana rü ñanagürüama nüxü̃: —Meaxü̃chima nüxü̃ chadau nax ñuxãcü ngúxü̃ yangegüxü̃ i ngẽma chorü duü̃xü̃gü i Equítuanewa ngẽxmagüxü̃. Rü norü yumüxẽwa nüxü̃ chaxĩnü nax ñuxãcü norü dauruü̃güxü̃ nax ínaxuaxü̃güxü̃. Rü ngẽmaãcü meama nüxü̃ chacua̱x nax ñuxãcü ngúxü̃ yangegüxü̃.

Nüxíraxü̃xü̃ ga popera ga Pedru ümatüxü̃ 4:9

¡Rü wüxichigü i pemax, rü name i mea pegü peyauxgü i pechiü̃wa! Rü tama name i tümamaxã penuãẽãcüma tüxü̃ peyauxgü.

Popera ga Chantiágu ümatüxü̃ 4:17

Yíxema nüxü̃ cuáxe nax mexü̃ taxüxü̃, natürü tama naxǘxe, rü pecadu taxü.

Popera ga Chantiágu ümatüxü̃ 4:5

Rü tama natüca̱xma nixĩ i ngẽma Tupanaarü ore i ñaxü̃: “Tupanaaxü̃́ nachu̱xu i ngẽma taãxẽ i tüxna namuxü̃”, ñaxü̃.

Ucu̱xẽgüchiga 24:9

Ngẽma nagu naxĩnüxü̃ i ngẽma naechitamare maxü̃xü̃ rü pecaduxicatama nixĩ, rü taxúema yáxna namaxã taxĩnü i ngẽma yatü i tama ixĩnüxü̃. -24-

Ucu̱xẽgüchiga 21:13

Texé ya tama nüxü̃ rüngü̃xexẽ́xẽ i ngẽma ngearü diẽruã́xü̃ ega ngü̃xẽẽca̱x tüxna nacaxgu, rü tümax rü tá ta taxúetama tüxü̃ tarüngü̃xẽxẽ ega tüxí ngü̃xẽẽca̱x ítacaxgu.

Ucu̱xẽgüchiga 4:23

¡Ñoma i naanewa rü guxü̃arü yexera nüxna nadau i curü ĩnü, erü ngẽma curü ĩnü nixĩ i maxü̃wa cuxü̃ gaxü̃!

Wiyaegü 9:12

Rü nüma ya Tupana rü tümaca̱x nanu ya yíxema togü chixri tümamaxã icua̱xgüxe. Rü tama nüxü̃ inarüngüma i ngẽma tümaarü axu ya yíxema ngúxü̃ ingegüxe.

Wenaxarü naxümatü ga Tupanaarü mugü 15:1

Rü ngẽxguma 7 ya taunecüarü gu̱xguwa nanguxgu rü pema rü tá tüxü̃́ nüxü̃ iperüngümae ya yíxema pexü̃́ nangetanügüxe.

Wiyaegü 12:5

Natürü nüma ya Cori ya Tupana rü ñanagürü: —Choma rü tá tümaétüwa chachogü rü tá tüxü̃ charüngü̃xẽxẽ ya yíxema ngearü diẽruã̱xgüxe rü turaexe rü chixri tümamaxã inacua̱xgüxe. Erü ngẽma nixĩ i tanaxwa̱xegüxü̃ ya yíxema ngúxü̃ ingegüxe —ñanagürü.

Wiyaegü 101:3

Rü taxũtáma marü naxca̱x íchidau i ta̱xacürü chixexü̃. Rü tama namaxã chataãxẽ i ngẽma duü̃xü̃gü i tama Tupanaga ĩnüexü̃. Rü taxũtáma chanayaxu.

Ínachoxü̃xü̃chiga 22:22

Rü tama name i chixri ngĩmaxã icucua̱x i ngẽma yutegücü rü bai ya taxcutagü.

Wenaxarü naxümatü ga Tupanaarü mugü 31:10

Rü yexguma ga nüma ga Moiché rü yema ãẽ̱xgacügüxü̃ naxuxcu̱xẽ, rü ñanagürü: —Guxü̃guma i ngẽxguma norü 7 ya taunecüwa nanguuxü̃gu nax pegüxü̃́ nüxü̃ pengechaü̃güxü̃ i perü ngetanügü, rü ngẽxguma tá nixĩ i guxü̃ma i duü̃xü̃güpe̱xewa nüxü̃ pedaumatügüxü̃ i ñaa mugü. Rü ngẽma tá nixĩ i duü̃xü̃güpe̱xewa pexüxü̃ i ngẽxguma düxenügüchigaarü tauemacüwa nanguuxü̃gu rü guxü̃ma i Iraétanüxü̃ Tupanape̱xegu ngutaque̱xegüxü̃gu nawa i ngẽma nachica i nümatama tá nüxü̃ naxunetaxü̃.

Ucu̱xẽgüchiga 14:21

Yíxema tama tümamücüxü̃ cuáxchaxü̃xe, rü pecadu taxü. Natürü tataãxẽ ya yíxema tüxü̃́ nangechaü̃tümüxe i ngẽma ngearü diẽruã́xü̃.

Yeremía 34:14

“Rü ngẽxguma norü 7 ya taunecüwa nanguxgu rü wüxichigü i Iraétanüxü̃ i pexü̃ nügümaxã taxexü̃ nax perü mugüruxü̃ yixĩxü̃ca̱x rü tá ípenanguxuchixẽxẽ nawena nax marü 6 ya taunecü pexü̃́ napuracüxü̃, ñachagürü nüxü̃. Natürü ga perü o̱xigü rü tama chauga naxĩnüe rü tama nanaxü ga yema namaxã nüxü̃ chixuxü̃.